في هذا الجزء سوف نعرف ماذا سوف يحدث بين إياد وصلاح وهل صلاح سوف يتفهم إياد وموقفه ؟ ام سيكون هناك بعض الحساسية في التعامل فيما بينهما ؟ هذا كله سوف نعرفه في السطور التالية بإذن الله ، لذلك هيا بنا لنبدأ قراءة احداث الجزء سوياً .
الجزء التاسع عشر من رواية همس العيون للكاتبة لوزة ليبية
اياد:صلوحة من اﻻخير خايفك تفهمني غلط وموقف ما يفرق بينا
صلاح:ع حسب الموقف كان موقف قوي مرااات ايفرق بينا هههه
اياد سكت يفكر ويشوف ل الوطى نخاف تفهمني غلط وديرني بعتك ياصلاح على خاطر بنت موعرها لما تريس يقولك بعتني ع خاطر بنت اتحس روحك عيل
صلاح:تي هاه وين سارح
اياد:ااا اا …
صلاح:تي انطق هالجوهرة ياجيفة جبتهالي صفار
اياد:سامحنا وخيتي رفضت الموضوع صلاح:والسبب
اياد يفكر خلي نقوله السبب وندويله دوت سارة تو يكبش فيها طول
صلاح:والسبب ؟؟
اياد:ﻻ هكي يعني
صلاح:قاعد نعاودلك والسبب ؟؟
اياد:على خاطر بطوط برغم اختي التانية قعدت اتهزب فيها وقتلها وكان بطوط وشن فيها بس هيا ماقتنعتش
صلاح:رفضتني ع خاطر سمين !
اياد:ايه
صلاح:استغفر الله ياربي هي نستادنك
اياد:تي غير قعمز ياراجل
صلاح:ﻻﻻ هوا داك..عندي مشوار
اياد:تي غير قعمز بلا جو عارفك حرجت من الكلام اللي قلتهولك
صلاح:ﻻﻻ اﻻمور طيبة يابرو مادور شي
اياد:غير اسمعني وراس صلوحة قنعتها هيا مسكرة راسها سامحني بجديات ماتحرجش والله قتلها ان مافيش منك شاب كويس وثقة نوتق فيه اكثر من نفسي لكن لقيتها مش متقبلة موضوع فا مابيتش نضغط عليها قلت الزواج دوم مش يوم
صلاح:اختك التانية قداش عمرها
اياد:شن قصدك توا كان مش حمد حميدة ؟
صلاح:ﻻ والله مش هكي … شن بنقولك حلوة لما شخص يتقبلك كيف ماانت … وبما انها اختك التانية اتقنع ف سرور معناها عادي تتقبل السمان
اياد:هيا مواليد تسعينات
صلاح:على بركة الله وين نلقى خير من وخيتك اياد….حددلي موعد مع العيلة بنخطب وبالنسبة ل سرور زي وخيتي وان شاء الله تلقى شاب زي ماتبي ويكون خير مني
اياد:خير منك ماعتقدش…بنحكيلك حاجة
صلاح:احكي
اياد:انا ماعمري كدبت عليك ف حاجة
صلاح:اي عارف
اياد:عموما هو الموضوع صار خت فت بش اونه ف الصبح لقيت بوها
صلاح:ايه
اياد:المهم ((حكاله بتفصيل))
صلاح:شنهوووووااااااا تلعب بيا اياد !
نورس:حيه عليا بنبعت مسج ل رتاج بعته ل اياد
هديل:شن كتبتي
نورس:غبااارة … كتبتله
اياد:والله مانلعب بيك ياصلاح بجديات هدا اللي صار
صلاح:معناها اختك مارفضتنيش ﻻني سمين انت خليتها ترفض بش انت تاخد نورس
اياد:عيب عليك عيب عليك ياصلاح اللي تقول فيه
صلاح:تي انا صاحبك النم ومكلمك ع اختك من قبل مايكلمك وسيم تمشي تعطيهاله بش يبطل من نورس وانت تاخدها بعتني هكي
اياد:الله يسامحك صﻻح … انا وقتها كنت دايخ وحالتي حالة معش فرزت شي ونسيت موضوع انك تبي اختي من صدمتي من كلام وسيم
صلاح:باهي باهي نستاذنك اياد
اياد:مش مصدقني ؟؟؟؟اوكي كيف ماتبي تفضل
روح صلاح وقعد اياد مقعمز ف الشارع بروحه وجعه الموقف ويفكر … معقولة هكي ياصلاح اتكدبني وتمشي وانا اللي بديتك عليا وقنعت سرور بناء ع مصلحتي وانت بكل بساطة تكدبني اييييه يادنيا الله يسامحك ياصلاح .
روح اياد للحوش وقعمز ع الكنبة ايفكر
خ مريم: ياد روحت وليدي
اياد:مالياش هلبه
خ مريم: اسمع غدوة بش تسحب فلوس ماعندناش مونة التلاجة فضت
اياد:ان شاء الله
خ مريم:واختك تلفونها اتكسر تبي تلفون جديد
اياد:ان شاء الله
خ مريم:ايه ونبي شوية خضيرا وانت مروح جيب معاك غدوة
اياد:ان شاء الله …
خ مريم:هههه حسني كملتلك معاشك ياولدي
اياد:فداك
خ مريم:خيرك مهموم ع خاطر الصرف ؟؟
اياد:ماندورش فيهم الفلوس … ف النهاية ماصرفتش ع حد غريب
خ مريم:اماﻻ خيرك
اياد:مخلطة عليا يمى من كل تركينة كل مانرقعها من جيهة تنفلق من جيهة تانية والله طايرتلي
خ مريم:معليشي وعندي ليك خبر اكيدة حيفرحك
اياد:قولي
خ مريم:بنخطبلك
اياد يفكر ف صلاح كان بيخطب صلاح حيسحسها باعني سبحان الله شوره مش مكتوبلي نفرح
خ مريم:ههاه شنو موافق نخطبلك
اياد:ﻻ تخطبيلي ﻻ واحدة يمى الله يربحك مازال
خ مريم :خوك بيخطب امهبلني وانا مانخطبلاش من قبل ما نخطبلك هدا سبر العيلة …
اياد:تخطبيله عمار لكن انا مازال
خ مريم:به احكيلي مافيش بنت ف بالك
اياد :مش عارف اﻻمور ملخبطة شوي
وقف اياد بش بيمشي لداره
فقتله خ مريم:غير زيد فكر ف موضوع الخطوبة
اياد:بري اخطبيله عمار ﻻ سبر وﻻ عمك نوم
خ مريم:مانقدرش
اياد:وبعدين عمار وين بيسكنها حتى خدمة ماعنده
خ مريم:بيبني فوقك دويرا
اياد:به غير اخطبيله وبعده تو نخطب
خ مريم:مانيش خاطبة اماﻻ …
اياد:يستر الله يمى… غير فوتيلي اﻻيام هادي راسي مصدع ونفكر ف هلبا امور
كمل طريقه اياد ل داره خش وسكر الباب …بدل حوايجه وسكر تلفونه واتكى ع سريره وفتح ﻻبتوب بيتفرج ع فلم
ومشي الوقت رزين ع اياد و صلاح ونورس تسحن ع اياد ﻻنه نقاله مقفل ….
ف الليل مع ساعة 11فتح اياد نقاله وجوه كدس رسايل من نورس ..
عاودلها
نورس:طيب فيك
اياد:طيب وقتك
نورس:هدا وين قررت اتحن عليا وتفتح نقالك وتتصل
اياد:بالله بيبي مش ناقص عتاب ماتزيدينيش على مابيا
نورس:علاش شنو فيه
اياد:مواضيع هكي خاشة بعضها
نورس:في العمل
اياد:ﻻﻻ ياريت
نورس:اماﻻ شنو دودي
اياد:هدا وسيم ولد عمك لخبطها
نورس:كيف
اياد:((حكالها بتفصيل لحد ماتعارك هو وصلاح))
نورس:اووووف موعرها متع صلاح عليم موقف
اياد:بش قتلك ماتزيدينيش
نورس:اسمع اسمع، صلاح قلبه طيب
اياد:وانتي منين تعرفيه قلبه طيب واﻻ خرسانة مسلحة 
نورس:قصدي من خلال حكيك عليه حسيته طيب
اياد:معش تحسي بحد غيري
نورس:قصدي
اياد:فاهم قصدك … يستر الله تو ندير راي غدوة
نورس:ان شاء الله تنحل بينكم … بس شفت الصدفة وسيم يبي سرور
اياد:ايه حتى انا استغربت
نورس:سبحان الله … حبيبي
اياد:نعم ياروحي
نورس:عندي اجتماع غدوة ف فندق كورنتيا
اياد:غادي !
نورس:ايه
اياد:وانتي تعرفي من الصبح من وقت كنتي ف العمل جاية توا ساعة 11 ف الليل اتقوليلي !
نورس:ماهو ماحصلتش وقت بجراير وسيم وخطبة المزيفة
اياد:من بيمشي من قسمك ؟
نورس:رتاج وبنت تانية وشاب من مكتب اللي بجنبنا
اياد:صبح واﻻ ظهر
نورس:مع ساعة 10
اياد:باهي ردي بالك ع روحك ﻻ يمين وﻻ يسار
نورس:ان شاء الله دودي …. ياااااا ربي ياربي
اياد:شنو فيه
نورس:نتفرج ف فلم هندي فاجئها بوردة
اياد:خلعتيني نحساب اشبح شن فيه
نورس:محﻻها اللقطة بجديات حبيبي اياد:مانيش جايبلك ورد ﻻن الورد مايهدوشي ورد يااحلى وردة
نورس:تسلمممملي حبيبي
اياد:اممم شن بتلبسي غدوة
نورس:لحد اﻻن مقررة ع بدلة قونة
اياد:جاكيت طويل؟
نورس:يعني كويس
اياد:شن الون
نورس:احمر
اياد :حلووو …. نورس !
نورس:نعم ياعيون نورس
اياد:انحبك مهبولتي …. وهيا توا ارقدي اوكي نحس ف روحي تاعب بنتعشى ونرقد
نورس:اوكي دودي ليلة سعيدة
اياد:ليلتك اسعد .
صلاح متكي في فراشه ف المربوعة ويفكر…معقولة رفيق عمري لينا قريب 17 العام صحاب يبيعني ع خاطر مصلحته ! باهي اللي مش مرتبط بيها اختها كنهدا راهو وجعني الموقف اكثر من هكي …. ﻻﻻﻻ ياصﻻح اياد مايديرهاش .. لكن شن مايديرهاش واضحة بعين الشمس …. انا اخته الحق ماشفتهاش اﻻ مرتين يعني عندي عادي لو انها رفضتني لكن بش اما انه يقولي رفضاتك ع خاطر سمين وهوا سبب ع خاطر وسيم ! بش تتسهله اﻻمور … والله شي يوجع اياد يوجع بجديات
صلاح يفكر ف اللي داره اياد و اياد يفكر في موقف اللي صارله مع صلاح …لين خداهم النوم
يوم الخميس الساعة 7 صباحا
منبه نورس يررررن واياد منبه متعه ايرن …
فاق اياد شاف اموره ودار قهوته ولبس لبسة العمل وحط ف كيسة مﻻبس مدنية وطلع
ونورس قاعدة ادير ف غفوة للمنبه وتولي ترقد
ليين وصلت ساعة 7:35 ناضت من سريرها عسريع شافت امورها ولبست بدلة عاﻻحمر وتأنقت وطلعت من الحوش
وصل اياد للعمل صبح عالكل وقعمز ف مكتبه
فاتت 8 ..9 وصلاحماجاش … اتكنطى اياد ﻻن صلاح فهمه غلط
ومع 9:15
بدل اياد حوايجه … لبس مدني ووصى ايمن ان كان حد سئل عليه قوله طالع وراجع
نزل من دروج وطلع من المقر و ركب سيارته ومشي لمشتل متع الورد … خدي وردة حمراة ولفهاله صاحب المحل …
طلع اياد من المحل ويتمتم تو بنمشي نهز بيها وردة هكي خلي نديرلها كيسة هداية صغيرونة …
فخطم ع المكتبة وخدي كيسة هداية
على اتصال نورس
اياد:صباحو
نورس:صباح الورد شن الجوو
اياد:تمام بخير شن جوك حبيبي
نورس:الحمدلله … دودي انا كيف بنطلع ل كورنتيا حنمشي بسيارتي انا ورتاج
اياد:علاش اماﻻ هما باش بيمشو اللي معاك
نورس:فيه اللي بيمشي بباص المركز وفيه بسيارته
اياد:باهي ردي بالك على روحك نورس
نورس:ان شاء الله
اياد:ﻻ يمين وﻻ يسار باهي وماتكلمي حد احضري اﻻجتماع وانخصي سيارتك ورحي
نورس:حاضر ياعمري
اياد:وقت توصلي غادي رني عليا بش نطمن عليك
نورس:ان شاء الله انحبك وانحب اهتمامك بيا
اياد:هههه ربي يحفظك … سﻻم
نورس:سلام
سكر اياد الخط ومشي لجيهة كورنتيا ودرس بعييييد …
وصلت نورس دارتله رنه وخشت الفندق هيا ورتاج
بعد ربع ساعة اتصل اياد ب نورس فصلت عليه وبعتتله مسج انا ف اﻻجتماع …
بخ برفان اياد ونزل وخدي معاه الوردة
وخش ل كورنتيا وسئل وين قاعة اﻻجتماعات للي جو من مركز البحوث فدله شاب مشي ووقف ف
ردهة بعيد شوي ع القاعة
بعد نص ساعة من اﻻجتماع طلعو اللي في القاعة وطلعت نورس و رتاج … وماشافوش اياد وهوا مازال ماشافهمش
وهما خاطمين يخطم شاب ويوقف ع نورس
شاب:نووورس كيف حالك
نورس:عادل ! شن جيبك اهنا
عادل :تخصصي فندقة واﻻ ناسية
نورس بتتجاهله مشي وقفها وقالها :لحظة بالله عليك اوقفي
رتاج تهمس بنمشي للحمام تو نرجع ومشت رتاج
هزت راسها نورس لرتاج وتلفتت ل عادل وقتله : شن تبي
عادل:بصدق يانورس خليتي مكانك
نورس :ههههههه هدا وين ندمت قصدك
وفي نفس اللحظة هادي تلفت اياد ويشوف الشوفة… نورس تضحك مع شاب
حط اياد ايده ع ذقنه يفكر ومصدوم من اللي يشوف فيه…ادكر حاجة من ماضيه البائس… نفس موقف رهف اتكررله بحذافيره
يتبع ……
لقراءة الجزء التالي : الجزء العشرون من رواية همس العيون للكاتبة لوزة ليبية
لقراءة الجزء السابق : الجزء الثامن عشر من رواية همس العيون للكاتبة لوزة ليبية
لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية
جميع الحقوق محفوظة للكاتبة لوزة .
