الجزء

الجزء الثالث عشر من رواية بقايا امرأة

وفي هذه الجزء برأيك هل الرواية تتخذ طريق آخر ومسار جديد ضمن الاحداث أم ان الوضع مازال يسير كما خطط له وكما هو منطقي ؟ كل ذلك واكثر سنعرفه في تفاصيل الجزء الثالث عشر من رواية بقايا امرأة لذلك هيا بنا لنبدأ قراءة الجزء سوياً .

الجزء الثالث عشر من رواية بقايا امرأة

وهنا طلعت نسرين من العياده وحاسه ولى اول مره انها صح … ومشوارها صح .. ورح تجرى وتاخدى دنيا كلها فى ايدها وتدير كل شى … واول ماركبت سيارتها … خدت شنطتها وفتحتها … وطلعت منها باكو دهب .. وشافت لصالة رياضه الا كانت جنب العياده الا رح تخدم فيها … وبعدين ولعت سيارتها وقعدت تلود فى شوارع لحد ماقابلت اول صفت محلات … واول ماوصلت للمطلوب … درست سيارتها وخدت شنطتها ونزلت وخشت للمحل …
نسرين … السلام عليكم
صاحب المحل … وعليكم السلام وخيتى … تفضلى بيع ولا شرى …
نسرين … بيع ان شالله … ممكن تشوفلى هادم كم ؟
صاحب محل …. لحظه بس … فى منه دهب زمنى الاول علاش تبيعى فيه حرام …
نسرين … هادى هديه من حناى … الله غالب ظروف احكام …
صاحب محل …. مع بعضهم …عشره الالف ومعاها ….
نسرين …. اه باهى اوك … عندك توا سيوله فى محل ….
صاحب محل …. اى والله نصيبك … لو جيتنى مبكرى كنت قتلك لا …. … لحظه بس نكلم صاحب محل …
نسرين … اوك خود راحتك ….
قعدت نسرين تتفرج على محل وتقلب فىه بعيونها وتمنت لو دنيا عطتها اكتر من هكى … والموضوع مش مادى زى ماتوقعتو لا … بس تمنت لو كانت هالزياره هيا وراجلها ويقوللها
وائل …. حبيبتى اختارى اى هديه او خاتم يعجبك … انى بصراحه كنت حاب نراضيك وخفت ناخدلك شى بدوقة ومايعجبكش …
وفى اللحظه هيا واول ماتفكرت نسرين هالضحكه انفلقت بضحك ولقت زبونه الا فى محل تشبحلها ومستغربه تحسابه لابسها جن … فااعتدرتلها ونزلت عينها لوطه …. واكتفيت بينها وبين نفسها تقول … انا حلم جعان عيش ….
وبرغم انا الا كان فى محل عطل قريب ربع ساعه الا انا نسرين قعدت تتفرج على دهبها وكل قطعه ودكرى الا امتدتلها فيه … والا كان نصه دهبها ونصه هدايا من حوش العريس والعروسه ليلة دخولها ونصه هيا دارته بعد الزواج
صاحب محل … تفضلى وخيتى هادم فلوسك … تعديهم توا ؟ اهو تفضلى قعمزى هنا على طاوله ..
نسرين …. اوك
قعمزة نسرين وعدتهم واول ماتاكدت منهم حطتهم فى شنطتها وطلعت … وهنا خطرت فى بالها فكره … لما تدكرت بنت خالت وائل كيف شافتها فى عرسها وانصدمت كيف نقصت … وعرفت انها مشت لمركز ايلاف واشتركت عندهم ونقصت فى شهر 15 كيلو …. وهنا قعدت تفكر شوى … لانا كانت فلوس محتاجتهم … وصعب تحطى فى شهر 800 او 900 بس بعدين جاوبت نفسها بااجابه وحده
نسرين …. انى علاش نخمم تى طز 800 او 900 شن فرقت … انى فلوس وسيله باش نوصل لهدفى ولو نقصت 15 كيلو فامش خاسره فيهم ….. ومشت للمركز فعلا … وخشت واستفسرت وحجزت عندهم ودفعت الفلوس وروحت …. واول ماوصلت لحوش اختها استقبلتها امها …
امها …. هدا وين جيتى ؟ وين كنتى هدا كله ؟
نوره ….. استلمى هههههههههه
نسرين …. امى تعودى انك رح تشوفينى هكى …. من اليوم … فى الحوش مش رح نقعد ونحط ايدى على خدى ونستنى الفرج ….
نوره …. طمنينى شن درتى ههههههههه
نسرين ….. قولى شن مادرتش …. انتقمت من سجن الا كنت فيه بسم سمى هههههههه
نوره ….. شنى شوقتينى .
نسرين …. اول شى بعت دهبى توقعى قداش طلع ؟
امها …… ووووووووه عليك يابنتى حسك مادرتى خير … هوا هدا الخبر الا جيتى تهزى بيه ؟
نسرين ….. ياما الفلوس وسيله مش هدف … ولو انى مااستعملهمش توا باش نوصل لهدفى معناها مافيش داعى ليهم والدهب والفلوس تصنعو للازمات هيا …
نوره …. امى خلى بنت تكمل حكيها ….
نسررين …. واشتركت فى نادى ايلاف لتخسيس
نوره ….ماتقوليش متع 750 او 800 هدكا
نسرين ….. ااااااااى ودفعتهم واخيراااااااا
امها …… ووووووووه عليا ووووووه ياضحك الناس عليا … دفعت كيلو وجايه تهز وتضحك … والله والله من قبل نقول …. الغباء واخدتيه بالفطره من بوك …. نوضى يافرخه هاتى حبوب ضغط … ولا نقولك …. خلى نوض انى من جنبكم خير لانى شوى تانيه واحتمال ننجلط … وفى الاخير هما فلوسك وانتى ادرى بيهم ….
وهنا ناضت امهت لدار الا راقدين فيها صغار وهيا تسحن وتترد بينما نوره شبحت لنسرين وقالتلها ….
نسرين ….. فوتيها امى تعرفيها انتى كانك عليها راك قلعتى زليزه وحطتيهم تحتها ههههههه ولا ضربتى بيهم خناق شجره … مهم باقى فلوسك شن مقرره بتديرى بيهم ؟
نسرين …. 8 الالف بنطلع اليوم وبنشوف سياره فى اى معرض سيارت … يقعدولى ممكن الف ومعاها …. بنخليهم على جنب لصغارى فى حساب على اى ظرف … مش رح نطيحله نفسى … وخاصة انا 3 شهور الاوله تدريب يعنى بدون معاش …
نوره …. باهى كيف بتصرفى على صغارك وعليك فى مده هيا ….
نسرين …. ماهوا هدا الا جايتك فيه …. انتى مش طالبه مده الا فاتت وحده تساعدك ؟
نوره …. اى صح
نسرين …. خلاص انى نساعدك … ومنا نتسلى ومنا نتعلم منك شوى ومنا نطلع مصروف صغارى اليوم لحد مانوقف على رجليا فى عياده ونتبت نفسى ….
نوره خلاص تمااااااااام …. بس كيف بترتبى جدولك ؟
نسرين ….. شوفى بيكون من من ساعه 9 لحد 2 ظهر فى عياده وبعدها وبعدها نمشى طول للمركز …. نكمل منهم 4 ونص … نروح هنا نبدل وننزل معاك فى مزين …. ومرأه الا بتجيبها صبح تقعد مع غيت وليت رح نخلصها بعون الله اهم شى تكلميها ….
نوره…. غيت وليت مادخلش بيهم والله ماك مخلصتيها شى انى رح نتفاهم معاها خالتى فاطمه
نسرين …. تسلمى حبيبتى والله من غيرك مش عارفه شن كنت ندير …. وانى غير يفوت شهر متع مركز ايلاف بعدين نبدا نتريض فى جيم الا بحدا العياده لمدة ساعه بس يعنى 3 ونص نكون فى حوش لانى بنبدا 2 ونكمل 3 بعون الله …. ااااااه تعرفى تعبااااااانه حاسه روحى … قداش ليا معاش طلعت مشواير هكى … حسيت روحى رجعت نتنفس من جديد ….
نوره ….. باهى امتى بتطلعى تشوفى سياره ؟
نسرين ….. مرات ناجلها لبكرا العشيه … ونتقل عليك فى سيارتك بكرا
نوره ….. شن تقولى انتى ….. اهم شى نبى نشوفك سعيده بس والله وعيونى مش خساره فيك . … نحطلك شى تاكليه ؟
نسرين ….. لا لا بنرقد توا لانى تعبانه … وكانا غيت او ليت تعبوك نوضينى ….
نوره ….. لا لا ببنزل للمزين وتوا نزلهم معاى انى وامى … نحطهم فى قعمزهم ونرضى نبع حنان قالتلى اصبغيلى شعرى وديرلى فتله لوجه …
نسرين ….. سعد ناس ههههههه وانى رايحه تقول عزوز
نوره ….. هههههههه غير ارقدى ونوضى توا نفضى بيك …. اصلا انتى مقعمزه على قلبى قداش ليك … بى هالهيئه
نسرين …. ههههههههه خلاص تمام …. بس بالله عليك سامحينى لو تقلت عليك
نوره ….. ووووووه فكينا من اسطوانتك مشروخه توا خيمتى انتى وصغارك والا نزلاته السمى بتتحمله لوطى ههههههه
نسرين …. مبررردك على قلبك مقعمزه هههههه
نوره…. ايوا هكى خليك براده زى عوايدك هههههه فكينا من مسلسلات تركى اصلا انت مو انت وانت جعانهههههه
نسرين …. قصدك نعسان اى ممكن لانى خلااااااص بنرقد …. مش عارفه خيرنى حاسه روحى نعسانه بنموت
نوره …. بالك تتوحمى يابنت
نسرين …. هههههههه منين ياحسره … ماتشوفيش فيا … من الهنا وراحه لين خيمت عندك ههههه ونبى اسكتى وخلى طابق مستور
نوره …. انتى شكلك بتبدى تخرطى برى برى ارقدى … ونقصى مكيف عليك لانك سخونه …
نسرين ….. مااااااشى
خشت نسرين للحمام … خدت دوش … وبعدها خشت للمطبخ … خدت صونية فاكهه وطاسة ميه وطلعت …. بس ولاول مره … تحس انها مش متأتره بى تلاجه او روائح الاكل … ممكن لانا الا فى قلبها والا مرت بيه خلت ارادتها تزيد تقوى وتتغلب على اى شهوات ضعيفه … كانتت سبب ورا تدمير حياتها …. والخلاصه … نسرين نتيجة تجربتها القاسيه .. تكونت عندها مناعه طبيعيه زى مناعه الا تتكون بعد مرضه قووووويه ترقدك فى الفراش بس بعدا تنوض اقوى واصلب وتقدر تواجه المرض بنفسيه وجسم اقوى من قبل ….
قعمزة نسرين فى دار …. وطلعت فلوسها وبدت تنقرش فى الفاكهه وتخمم . كيف بتخطط حياتها من اول وجديد … وخاصة بعدما قررت انها تمسح ماضى من حياتها
ومن هنا وهنا لحد مامشت فى سابع نومه
فات الوقت بسرعه … ونسرين ماشيه فى نومه … وام نوره ونوره فى مزين …. وصغار يلعبو وهما يشربو فى شاهى ومقعمزين يستنو فى خشة زبون …. وفاتت العشيه وام نوره جاها ولدها وروحت … ونوره سكرت مزين وركبت فوق ..
نوره ….. نسررررررررين …. نسررررررررين ….. نووووضى ياخميرة نوم ساعه 10 …. نهار ابيض مازال راقده ؟
نسرين …. نضت نضت …. اول مره نرقد وانى مرتاحه …. قبل كنت نوض من نومى مفزوعه وخاصة بعد عملتهم حسبى الله ونعم الوكيل فيهم …. بس اليوم بس حسيت انا دنيا ماتوقفش على حد وانهم مجرد صفحه فى كتابى وطويتها وخلاص … وصفحه هيا … رح نكتب فيها بتأنى ومش رح نحط شى فيها الا بعد مانتأكد انا يستاهل يكون فى كتابى او لا ….
نوره …. هكى نبيك انى …. وياويلك ياسواد ليلك لو مازال تفكرى ترجعليه
نسرين …. لا لا مستحييييييل …. بس تعرفى شى … دكتور زيد دكرنى بااحلى ايامى … اياك ماكان وائل يغير منه لما نحضرله ولا لما يلقانى واقفه معاه يبدا زى مجنون … تصورى قريب بطلنى مهم مانمشيش لمحاضراته دكتور
نوره ….. ايواااااا ياعم …. سعد ناس من قبل مايتزوجو يلق و عريس
نسرين ….. مصح وجهك …. والله مافكرت فى موضوع …. اصلان خلاص موضوع الزواج طلعته نهائى من قاموسى وحاليا …. حياتى ملكى انى وصغارى بس … جربت زواج ومانفعش معاى … ومش مستعد نكمل باقى عمرى وغيرى يرسملى حياتى بطريقه الا تناسبه … من هاللحظه انى الا نرسم حياتى بشكل الا يناسبنى ويناسب صغارى بس ….
نوره ….. والله طلعتى قويه ومايستاهنش بيك …
نسرين ….. احيانا كترة الالم يموت الاحساس عند الانسان …. ويعدين من غير هدكا كله … هوا اكيد توا متزوج وبضغاره …. فابلاش يروح تفكيرك بعيد ….
نوره …. باهى توا فكينا من روميو زمان وتعالى نديرو حل فى جدر سلاطه الا فوق راسك
نسرين ….. الله لاتربحها لعبتلى فيه مريم زفت
نوره ….. لا لا توا نقدر نغيرهولك بشكل نهائى لانى مره الا فاتت هديتلك فيه …. وبعدين حواجبك بنعاود نرسمهم …. ووجهك يبى لفه … يعنى من الاخير تبى دورة 200 جنى ههههههه
نسرين …… مصحك استغلال عينى عينك هههههههه
نوره …… هوا الا يشوف ام او يشوفك يشوف رزق …. يالله الله غالب الا وحلت فيه دبرله … قعمزى قعمزى … واحكيلى على خطتك المستقبليه …
وهنا قعدة نوره تهدرز وتضحك هيا ونسرين … وتخدمله نوره بقلب ورب وصغار يلعبو جنبهم … وفاتت ساعه ورا ساعه ونوره لاهيه تخدم لى نسرين وتسمع مع بعض تعليقات ولايخلى الحديت من ضحك …. اما نسرين فاكانت عندها كم كبير من مشاعر الايجابيه وسلبيه فرغتها كلها فى الحكى مع اختها وضحك …. واول ماكملت نوره قالتلها
نوره …… واخيرااااااا كملت …. توا تقدرى تشوفى للمرايه …. شن رايك ؟ مش هكى احلى ؟ وخاصة بعد وجهك ماضعف
نسرين ….. وووووواوووووه بصراحه …. قداش ليا معاش وتقت فى نفسى هكى … بجد والله انتى احلى اخت فى دنيا وتستاهلى كل خير ياعسل انتى
نوره ….. مش تعرفى بس ….. وتوا خودى صغارك الا رقدو فى قعمازطيرى بيهم لدارهم لانى خلاص بنرقد
نسرين ….. صح انتى معك الحق تعبتك والله معاى تسلمى حبيبتى
نوره …. معاش تقولى هكى يامعفنه احنا خوت ولبعضنا ومصيرنى انى نحتاجك
نسرين ….. وعد منى لو تبت نفسى الا مانديرلك تشك اب كامل لسنونك مع جلسات تبيض بالليزر مجانا …
نوره ….. والله طلعت بفايده منك ههههههههه اسمعى كانا تبنى توا نرقد صغار عادى نخدم توكه ليليه مافى مشكله
نسرين ….. هههههههخه مبردك …. انى خاشه لدارى تبى شى ؟
نوره …. لا لا سلامتك حبيبتى
ركبت نسرين لدار ضيوف الا هيا ولت دارها بشكل مؤقت هيا وصغارها وبدلتلهم وعطتهم شيشتهم ورقدتهم …. وكيف طفت ضى وفتحت ضى سهره واتكت على سرير …. طق الباب
نسرين ….. منى ؟
نوره …. انى انى رقدتى .
نسرين …. خشى لا لا
نوره …. كانا مارقدتيش نبى نفضفض معاك ممكن
نسرين …. اى عادى تعالى
وهنا اتكت نسرين ونوره قدام روشن على سرير … ونوره بدت تتكلم
نوره …. حاسه روحى مخنوقه من تصرفات محمد …. بجد تعبت من كونى كل يوم نستنى فيه امتى يتغير امتى ينقصه خدمته ويحس بيا … انى تعبت من بروده وعدم اهتمامه بيا
نسرين ….. والله انى مش عارفه شن نقولك …. بس لو متاكده انه مايخون فيك فامعناها قدرى وضعه واوقفى معاه لانا اكيد هو

… يتعب فى الاخير على خاطركم
نوره ….. عارفه …. بس حاسه لدت تتكون فجوه كبيره بينا … وخايفه هالفجوه تمتد للخيانه …. ولو خشينا لطرق هوا صعب نرجعو منه زى اول وجديد
نسرين …. انتى بقدرتك انك ملتخليشى بوصل للمرحله هيا
نوره …. يعنى انتى راجلك منين خانك كنتى سبب
نسرين …… اكييييييد …. اهملت نفسى وسرحت فى سمن وخليت غيرى ياخد قرارت فى شى يخصنى وسلمت سرى لوحده ماكانت قد تقه ودخلتها لحوشى وطعنتنى وشدتنى من ايدى الا توجعنى …. وتنازلت تنازلت لحد ماخسرت حتى نفسى قدامه وبدى يشوف فيا انى جاهله الا ولا شى …. بينما مريم دكتورة الاسنان الا تخدم وبسيارتها وانسانه قويه ومستقله … وفوق من هدا كله شكله جميل ولسانها زى تعبان الا يرقص على مزمار العازف ….
نوره )شبحت لاختها وقالتلها ( … هوا انتى شفتيه كيف يرقص ؟
نسرين …. لا سمعت الحق هههههههههههه
نوره ….. هدا ماهلك الشعب الليبى هوا غير قالوها ههههههههههه
نوره ونسرين ……. هههههههههههههههههه
فاتت الليله وكانت اول واحلى ليلى تمر بيها نسرين من تلاته سنين …. او خلينا نقولو سنتين ومانكونش ناكرين للحق … بااعتبار ان كانت سنه الاوله حلوه فى عينها او اقلها فى اعتقادها هيا …. وبعد حديت طويل … نعسهم نوم ورقدو جنب بعض …. ومافاقوش الا على صوت منبه
نوره ….. نسررررررين ساعه 8 … نوضى وقت عليك
نسرين ….. شووووى بس بنرقد
نوره …. نوضى يابلوه
نسرين ….. خلااااااص نوضت اوووووووف
نوره …. خليهم راقدين صغار توا مع ساعه 9 نوضهم نفطرهم ونبدلهم …. انتى البسى واطلعى وانى بنمشى نكمل نومى فى دارى ..
نسرين …. برى برى هما قبل 11 مش رح ينوضو
خشت نسرين لتوليت …. وبعدها طلعت وحطت صلايه وصلت وبعدين بدلت حوايجها وطلعت …. واول ماوصلت للمكتب ….لقت دكتور زيد يستنى فيها …
نسرين …. صباح الخير دكتور
د.زيد ….صباح الخير نسرين …. وصلتى قبل مانبدو فى اول حاله …. يالله واتيه ؟
نسرين …. بعون الله نلبس بالطو بس ….
د. زيد ….. اووووك …. نهى دخلينا اول حاله
ووقف وعطى هوا ونسرين بالقفى وبدى يورى فيها بااختصار وين اماكن معدات الاساسيه الا رح يستخدمها …. واول ماخش اول حاله وقال ….
الحاله الاوله …. صباح الخير دكتور …
وهنا جت صدمه لنسرين من نبرة صوت وقعدة جامده فى مكانها بدون ماتتحرك …
بينما الحاله قعمز على كرسى وبدى يتكلم مع دكتور … وفى اللحظه هيا ..دكتور زيد قال …
د زيد …. نسرين ممكن تمديلى مرايه وقلافز …

وهنا نسرين تلفتت و …

يتبع………..

لقراءة الجزء التالي : الجزء الرابع عشر من رواية بقايا امرأة

لقراءة الجزء السابق : الجزء الثاني عشر من رواية بقايا امرأة

للإطلاع علي فهرس اجزاء الرواية : جميع اجزاء رواية بقايا امرأة كاملة للكاتبة كيندا

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى