الجزء

الجزء الثاني من رواية ضوء في آخر النفق

الجزء الثاني من رواية ضوء في آخر النفق

وفي الجزء الثاني ماذا برأيك سوف يحدث مع ابطال الرواية ؟ هل سنري مواقف جميلة سعيدة بينهم ام سيكون هناك بعض الأحداث الحزينة المأساوية ؟ كل هذا وأكثر سوف نعرفه سوياً في السطور القادمة بإذن الله .

الجزء الثاني من رواية ضوء في آخر النفق

توضيح سريع للشخصيات

_ حسام …. طليقها او زوجها سابق

_ وائل …. شخص الا كانت تحبه وعلى علاقه معاه قبل الزواج ودكتورها فى كليه

_ وريده …. امها
_ جمعه … بوها
_ سهيله …. اختها الا اكبر منها
_مؤيد … خوها الكبير واكبر منها بى 10 سنين
_ هدى … صديقتها مقربه جداااااااااا والكاتمه لكل اسرارها

الجزء الثاني :

مؤيد ….. منوووووو وراس وخيتى قبل ماتحرشى امى بعد ماتطلع سعاد حسنى من الحمام قصدى هدى تلقى حوايجى المش نظاف ملوحات على زليزززز قيميهم وحطيهم فى سله وبعدين برى حرشى اوباما ماشى …
منى …. قصدك …. ملوح كل شى كل شى
مؤيد …. يس
منى …. كل شى كل شى متأكد
مؤيد …. مالا بنحى نص حوايجى على زليز وباقى بنبلعهم متلا ولا بنزيد عليك ….
منى ….. اااااااااااااااااااااااااااااااااااااااااااااامى تعالييييييييييييييييييييييييييلى خلااااااااااااااااص انى متتتتتتتتتتتتتتتتتت
وفجأه طلعت هدى من الحمام وقالتلها منى …
منى … سامحينى على منظر شنيع الا لقيتيه فى حمام سامحينى خوى ديما هكى راهو فوضوى ..
هدى … اما منظر منى ؟؟؟
منى …. ماريتيش حاجه ملوحه على زليز بكلللللل ؟؟
هدى …. زى شنى منى خيرك انتى شن تخترفى ؟؟
منى …. مؤؤؤؤؤؤؤؤؤؤؤؤؤؤؤؤيد نكرهك ….
هدى …. خلاص حبيبتى انى بنطلع توا وقت عليا ماما اكيد تستنى فيا توا وبعون الله فى اقرب وقت رح نجى نزورك
.. سقدت منى هدى لفم الباب وسكرت الباب وراها وبعدين خشت لدارها وخدت نقالها وفتحت اغنية وائل جسار << بعدك بتحبو >> …
واول ماجى مقطع فى الاغنيه << بعدك بتحبو بعدك بيخطر على بالك بعدك بتحنلو ياقلبى يالى خيب امالك ياقلبى حرام عليك حلفتلى انك نسيت …. >>
وهنا رجعت بداكرتها سنه وشوى ايام ماكانت تشوف فى الحب فى كل نظراته وعيونه ولمساته … كيف تنوض صبح على صوته كيف تخش للمحاضره الا يعطى فيها ومستعده تسمعله ساعات وراء بعض بدون ملل … كيف يضحك كيف يتعفلق وكيف كانت تزعل منه باش يراضيها وكيف رسمت كل حياته معاه وفجأه نهد كل شى بقرار كان كفيل انى يدمرلها كل حلم حلماته …. وبين هنا وغادى وهيا ساهيه خشت عليها امها وقالتلها …..
امها …… تى نوضى نوووووضى وسكرى هالخيبوط الا فى ودانك والله مازادك الا هوا ومصيرنى نحصله يوم فى ايدى الا مانغزززززه بسنونى ….
منى …. نعم ياماما شن فى اهو طفيته فى شى ؟؟؟
امها … اى هونى حطيت الغدا على طاوله وغطيته نوضى شوفى خوتك كان بتغدو وبعد مايتغدو اغسلى الماعين ولما يجى بوك مع ساعه 4 قولى لسهيله تحطله غداه هونى على كوشه مغطى وتديرله القهوه بعدها على طول ماااااااااااااشى ولا نعاود …
منى …لا لا والله حفضتهم النصائح 10 بس وين لابسه وموتيه روحك ؟؟
امها …. شنى مالا انتى قاريه فيا الفاتحه وانى مانندريش … شن دخلللللك انتى .. والله هدا مامازااااال البنت تحقق مع امها … على عموم انى ماشيه لحوش خالتك حليمه بنشرب عندها القهوه ونفضفض معاها بكلمتين ونجى وكان سال بوك قوليله مشت لخالتى حليمه وعندهم ظروف حياه او موت تعرفيه انتى مايحبش طلاعات زايده …
منى … ماشى ماشى غير ردى وراك الباب توا وطفى ضى …
امها …. شن هياااااااااااااا تى بنوضى ولا لا نوضى جمرى ياكل عفاجك نقولها نوضى غدى خوتك تقولى طفى ضى تى نووووووووووووووووووضى ..
منى …. ووووووه باهى ياماما وانتى تقولى معمرينك على ظهر … شن هدا حتى الواحد نفسيته زى زفت مش مقدرينه قريب الواحد يلم حوايجه ويهج من حوش ويخليهولكم …
امها …. هدا حال بهيه شابه وصبيه … تديرها وتديرى ماكبر شنى مش طفشتى من حوش راجلك وتوا كمليها واطفشى من حوش بوك ويالله اول عكارى والطريق على البحر …
منى …. امى معاش تكلمنى هكى …. اقسم بالله ماتقول بنتك تشوفى فيا نفسيتى زى زفت وانتى خاطرى مره تجى تخففى عليا اكتر ماتزيدينى …
امها …. ماك انتى وحده بايره كان هدا عرفتى كيف تكسبى راجلك وتنتفى ريشه وتخليه خاتم فى صبعك بس يالله هادم الحاجات يديروها بناتها مش انتى الا مافالحتيلى الا فى الخيبوط الا على ودانك وتصيخ على سرير وبكى بس ….
منى ….. ان شالله ربى يرفعنى ونرتاح من هالدنيا قسما بالله ماعاد نبى منها حاجه واصلا من اليوم الا خليتونى تنزوج هالحيوان هدا وانى كرهت كل الدنيا …
امها …. شنى مالا عاجبك وجه البنت الا فلقتينا بيه وبيخطب وياماما ويبنى وماريت شى اكتر من تفشيك زايد وهونى ضحك عليك وضرب بعدك بنت وانتى الا خسرتى بس لاك من راجلك ولاك من سمعتك بين ناس بس بالك تحسابى روحك كانا طلقتى خلاص تى ووووالله والله لو كان تنبت نخله فوق راسك هدا الدايح الا كان يقراى فيك مايكتبها عليك ربى ويسكر عليك حوش لو كان تقطنى هنا وزيدى توا اركبى راسك وسكرى دماغك وماترجعيش لراجلك على امل هالدايح ياخدك …
منى ….. نقولك شى وائل انى طلعته من دماغى من زمااااان وانتم سبب وبالنسبه لحسام تى والله ماعاد نرجعله لو كان يرشقنى من فوق للوطه بالدهب وبرى قوليله معاش يتعب روحه واما بالنسبه لحياتى فاانى راضيه بى الا بابا يعطيهولى وخوى مؤيد واما انتى زيدى دورى كلام ناس …
امها …. تعرفى انى كانا نزيد نتناقش معاك يااما تنفقع مرارتى يااما نفقع راسك على اتنين فالدلك نطلع خير …
طلعت امها من هنا ومنى شدت نقال واتصلت بى هدى وقالتلها …
منى …. الو … هدددددددى .
هدى …. خيرك تبكى شن فى ؟؟
منى … امى قالتلى كلام والله ماتتحمله للوطا ولا سماء … قوليلى انى الادرته غلط ؟؟
هدى … منى الا انتى درتيه هدا احسن قرار فى حياتك من الاخير وردى بالك تتنازالى عليه وبالنسبه لامك معاش دوريها شوى وتقتنع وتخليك فى حالك واما بالنسبه لبوك فاعمى جمعه نعرفه طيب والله الاماينصفك فمعاش دورى ومعاش تبكى حبيبتى واسمعى بنقولك شى بس ماتعيطيش عليا ..
منى …. شن فى ؟؟
هدى …. وائل امس تلاقيت معاه على فيس بوك بصدفه وسألنى عليك ….. اااااااااااى منى معاش تبكى خيرك توا انى قتلك هكى باش تبكى باهى برى معاش مكمله …
منى … كيف ضفتيه وكيف عرفك ؟؟
هدى … لقيته فى قروب المعيدين وطلبت اضافته واول ماحكينا مع بعض عرفنى وسألنى عليك ..
منى …. وانتى شن قوتيله ؟؟
هدى …. مابتش نقوله شى لين ناخد الادن منك لانا مانعرفش انتى تبى تقوليله او لا
منى …. ماتقوليلاش انى طلقت ولا اى شى عليا نهائيا بالعكس قوليله سعيده وامورها كووويسه
هدى …. علاش ماتبينيش نقوله قصدى مرات …
منى …. هدى وائل انتهى من حياتى خلاص وهوا سبب الا انى فيه توا وانى ماضى كله حرقته وهوا كان فى ماضى ..
هدى …. انتى هكى تقسى على نفسك اكتر وتقسى عليه لانى نعرف انتى لحد توا قداش تحبيه ونعرف هوا قداش يحبك … انتى ماريتيش طريقه الا سأل بيها عليك …
منى …. هوا خطب وشاف حياته وانى تزوجت وشفت حياتى وخلااااص …
هدى ….. انتى اطلقتى … وهوا قالى انه فسخ خطوبته وانى بربشة بروفايله وتأكدت … بجد حرام تتسرعى فى قرارك ..
منى ….. هوا تتوقعى مازال بيرضى بيا بعد ماسيبته وتزوجت ولابيرضى بيا بعد ماطلقت وياسيدى ولو حتى هوا فكر انتى تتوقعى امه رح ترضى بيا وتوافق انا ولدها ياخد وحده مطلقه … هدى بالله عليك طلعينى من الموضوع هوا لانى معاش نبى نفكر فيه وبعدين انى طلعينى من مشاكلى الاوله انى قبل انى نبى سنتين باش نصفى ونرجع زى قبل هدا كان قبل يرخيتى حسام فى حالى ..
هدى … باهى لامتى بتقعدى هكى انتى توا … ولامتى بتقعدى انتى وامك فى مشاكل والخلاف ؟؟
منى … لامتى مانموت خلاص لانا حياتى من اليوم الا طلقت فيه انتهت تقريبا … معاش عندى حرية نحب او ننحب او حتى نطلع ونعيش باقى حياتى زى اى بنت وسبب بس انى اطلقت ..
هدى … انتى علاش تقولى كى ويأسه من عمرك وبعدين عمى جمعه عاقل وفاهم وانى متاكده انى مستحيل ينهى حياتك بسبب شى انتى ماليك فيه دنب اما بالنسبه للمجتمع فاصدقينى صدقينى مهما درتى ومهما فعلتى مش رح تقدرى ترضيهم فااقلها ارضى ربك وارضى نفسك فقط ..
منى … اااااااااااااااه ان شالله ان شالله وسامحينى كانا عطلت عليك خلاص برى توا كملى انتى شن تديرى وخلينى نمشى نتغدا ونغسل معايين ونخش نرقد شوى … اصلا انى معاش وراى الا نوم وضمان وضمان ونوم ..
هدى … وكلى امرك لربى وهوا العادل صدقينى ..
منى … ان شاله سلام حبيبتى .
طلعت منى من دار وخشت للمطبخ ونادت على خوتها وتغدو وغسلت معاين وهيا كيف كملت سمعت رساله وصلتها على فايبر فامشت فتحتها وهنا لقيت هدى باعتتلها ..
منى حبيبتى هادى صورته لقيتها حاطها على فيس بوك وانى عارفه خاطرك تشوفيه حتى لو ماقلتى وخلى املك بالله كبير ولو انتى من نصيبه لو كان يوقف العالم كله ضدكم رح تكونى ليه ومرته وتنكتبى بااسمه هدودى
فتحت منى الصوره ودموع ينزلو منها لااارديا وتكت على سرير وقعدت تتفرج عليها وتبكى لحد مانعسها نوم ومافاقتش الا على صوت سهيله تقوولهاا …
سهيله …. منى منى تلفونك من بكرى يرن وفى رساله وصلاتك ..
منى … اوك ..
سهيله .. نديرلك نسكافيه ؟؟
منى … اى ديرلى نحس راسى بيتفجر .. ساعه كم توا ؟؟
سهيله … ساعه 8 فى الليل …
منى …. علاش مانوضتينيش من بكرى اااااااااه بديت زى ميته انى ياربى امتى نطلع من كابوس هوا بس ..
مشت سهيله للمطبخ وهنا قامت تلفون وفتحت رساله ولقت فيها …
<< رح نكلم بوك ترجعيلى غصبا عنك وبوك رح يوافق صدقينى وبعدها وافقتى او رفضتى رح ترجعيلى ولو انك مابيتيش رح ننكر انى طلقتك وانتى قاعده على دمتى طالما ماتمش الطلاق بشكل رسمى … ونبيك تعرفى شى انى نحبك ومستحيل رح نتخلى عليك وهادى حطيها فى دماغك … سلام
وهيا قاعده ماكملتش رساله اتصل بيها الرقم نفسه الا باعت رساله وهنا فتحت الخط وقاللها …
حسام …..

يتبع………..

لقراءة الجزء التالي : الجزء الثالث من رواية ضوء في آخر النفق

لقراءة الجزء السابق : الجزء الأول من رواية ضوء في آخر النفق

للإطلاع علي فهرس اجزاء الرواية : جميع اجزاء رواية ضوء في آخر النفق للكاتبة كيندا

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى