الجزء الرابع من رواية متعصب واحببته

وفي الجزء الرابع من رواية متعصب واحببته هل سنري أحداث جميلة مشوقة داخل الجزء ام ستسير الأمور بشكل طبيعي ؟ كل هذا وأكثر سوف نعرفه في السطور التالية بإذن الله .

الجزء الرابع من رواية متعصب واحببته

جود كملت الغداء مشت تقرا في كتاب اسمه {في قلبي انثى عبرية}في الحديقة بجنب الورد الى هيا زارعته زياد علمها القراءة والكتابة وهيا تحب القراءة 😍طبعا زياد كل مايزعلها يجيبلها في كتب يعرف نقطة ضعفها 😂😍

اسفة غلطت في اسم الكتاب😜بس عدلته

زياد ≈بس😜
جود≈وووه.. خزي خلعتني كنت منسجمة ع الاخر 😠
زياد≈قعمز جنبها.. ترا وريني شن تقري
جود≈مافيش المرة الجاية جيبلي كتاب امنيتي ان اقتل رجلاً😈
زياد≈يا ساتر يارب..اصلا انتي ماحد مخربك عليا غير هالكتب الى تقري فيهم
جود≈ 😒 ع فكرة بتجيبلي كتاب
زياد ≈ 😂من عيني هذي قبل هذي
جود≈ههه جد راه
زياد≈جودي نسألك سؤال😊
جود≈عادي تفضل😊
زياد≈احنا البشر مخيرين ولا مسيرين
جود≈ ابتسمت.. شن خطر عليك السؤال هذا
زياد≈مش عارف.. بس جاوبيني
جود≈مسكت يده.. شوف ياسيدي نحنا البشر في اشياء مخيرين فيها وفي اشياء مسيرين فيها مثلا زي الدين، الرزق،، الشكل. هذو نحنا مسيرين فيها يعني محد اختار يكون مسلم او مسيحي او يهودي ولا يكون غني او فقير او يكون جميل او قبيح … و الخير والشر والحلال والحرام هذو نحنا مخيرين فيها يعني انت تختار طريقك اذا كان خير او شر.
زياد≈ منسجم.. باهي وشن فايدة اختيارنا وربي كاتب حياتنا كيف بتكون من البداية..
جود≈ لا غلط .. ربي عليم بكل شي وعلمه لانهاية له مثلا انا لما نزعل انت شن تجيبلي عشان نرضى
زياد≈كتب وعن قريب حتفلسي بيا 😂😂
جود≈بطل حناطة عشان نفهمك يا همي .. باهي انت ليش جبتلي كتب
زياد≈ماهو لاني عارفك تحبيهم 😂
جود≈شفت كيف.. زي كان في شخص شرير ربي خيره بين الخير والشر وربي بعلمه عرف ان الانسان هذا بيختار الشر لانه يحبه فكتب عليه الشر فهمت توا
زياد≈ توا فهمت انا المتعلم كنت مش عارف المعلومات هذي انتي كيف عرفتيهم
جود ≈ مش ضروري الانسان يكون متعلم عشان يعرف معلومات عن دينه لان عندي قناعة الى يبي يعرف حاجة يبحث عنها ويسأل..
زياد≈ تعرفي ابهرتيني الصراحة بس انتي بجد كيف عرفتي كل هالمعلومات
جود≈في برنامج لشيخ سلامة عبد القوى في قناة الشرق انا صراحة نحبه كلامه مقنع وحلو
زياد≈😕مش سامع عنه من قبل
جود≈برفعة حاجب..ماهو لانك مش فاضي سهور وبنات شرب اللهم عافينا 😏😂
زياد≈والله حرام عليك من امتى بطلتهن.. زعلت نا
جود≈خلاص عارف اني ما نقدر على زعلك بس نعرف كيف نرضيك
زياد≈كيف😒😕
جود ≈اليوم مدايره الاكلة الى تحبها😉
زياد≈عيونه😍قصدك فاصوليا والله انتي احسن حتى من امي
جود≈ونبي اسكت والله كان تسمعنه تبيتنا في الشارع 😂
زياد≈ 😂😂

عليا تراقب فيهم من النافذة تغلي بكل🔥
عليا≈علي دير شي راني مش قادره نصبر اكثر من هكي ولدي حيضيع
علي≈ يشبح فيهم من النافذة باين انهم منسجمين بكل .. اصبري مسئلة وقت بس انتي ماتغيري معاملتك مع جود نحنا في نظرها الشخصين المثالين وزياد انتي الام المثالية بالنسبة ليه ماتهدمي كل شي بنيناه لسنوات ..
عليا ≈ انت كان تحكيلي قصة البنت وتريحلي قلبي بس
علي≈ كل شي في وقته حلو..تصدقي اليوم اول مرة نشوف زياد يشتغل كويس من قلب و رب.
عليا ≈انت ليش واخد الموضوع بالبساطة هذي شن داس .. الشغل والفلوس بس هذا الى هامك انا ولدي لو يصيرله شي والله مانقعدلك فيها تسمع فيا ياعلي.طلعت😡

في المدرسة °
البنت≈الله شعرك حلو من داره ليك 😍
لمار≈بدلع طفولي.. ماما 🙈
البنت≈ حلو واجد بنقول لماما اديرلي زيه 😊

في المحكمة °
زين≈اسف يا حضرت القاضي تأخرت كان عندي شوية ضروف
القاضي ≈خلاص تأجلت المحكمة لتاريخ….
زين≈معليش ياحضرت القاضي بس لو تأجلت القضية هكي حيدمر مستقبل موكلي وهو مظلوم في السجن
القاضي≈ انت محامي معروف وشاطر بس هذي القوانين شوف المحكمة كيف معبية قضايا وكل شخص وليه حقه
زين ≈ بس
القاضي≈ للاسف مانقدر😒
زين ≈بس كنت نوصل في ولادي للمدرسة
القاضي ≈كلنا عندنا ولاد بس هذا مايعني انك تكون اب ناجح ع حساب شغلك لانه حتى شغلك عنده حق عليك زي ولادك وين امهم..
زين≈ اول ما قال امهم خلاص عيونه🔥يشوف في القاضي
القاضي≈ احم احم خلاص اخر فرصة

تمت القضية وطبعا زين ربحها 😍

في الفيلا الكل مشغول بتحضيرات عيد ميلاد ليث ولمار الى بعد يومين المسؤل ع التجهيزات عليا فبتكون كل حاجة راقية وفخمة فخفخة ع الفاضي 😍😂

جود ≈ماقدرت نطلع للحديقة من كثر العمال
خديجة≈ الله غالب .. قبل بيحجزو صالة بس زين ما وافق
جود≈ ورتها كتاب الطبخ ع صفحة..حندير هذي كيكة 🎂.. مفاجأة ..كانت ع دورين
خديجة≈اي مشاءالله حلوه.. بس توا فكري شن بتلبسي اكيد بيجن زوجات رجال الاعمال وناس واجدة
جود ≈تصدقي ما فكرت فيها 😳
خديجة≈ انا عندي شوية فلوس مع مصروفك تشري حاجة ليك والى يزيدو نشرو بيهم الهداية
جود≈ بخجل.. لا توا الفلوس الى عندي يكفو
خديجة≈. انا مرتبي اندس فيه للضرورة ماعندي ولاد عشان نصرف عليهم ارفعيهم ماعندي حاجة بيهم 😊
جود ≈ بس … قطعت عليها
عليا.≈ جت ..جود هاك الفلوس تشري بيهم حاجة باهية لان بيجو ناس كبار ما نبيك تحشميني قدامهم
جود ≈ بعزة نفس..لا انا عندي فلوس مش ضروري
عليا ≈حطتهم ع الخام.. الفلوس الى عندك مايكفن حق شبشب الحمام ابتاعي (اكرمكم الله ) هاك وزي ماقتلك خودي حاجة باهية 😒 طلعت
خديجة≈تلطف في الجو..تحملي يابنتي ماتعدلي عليها
جود≈. ابتسمت بوجع..عادي مرا كبيرة بس حتى انتى حتشري راه
خديجة≈ ههه انا خلاص عدت عليا
جود≈ والله العظيم كان انتي ماشريتي حتى انا مش حنشري شي
خديجة ≈قرستها من ودنها ببصارة ..انتي مهبولة نعرفك اديريها خلاص موافقة
جود≈آآه.. ايوا هكي انتي شطورة 😂
خديجة 😒😂
يوم العيد ميلاد 💚
الكل حايس في روحه عليا في المزين 😂شن بيعدلو وشن بيخلو و زين مطلع ليث ولمار للملاهي 😍 علي حياته كلها في الشركة .. زياد +جود +خديجة=في السوق

جود ≈شوفي هذا حلو عليك
خديجة≈يابنتي انا عادي نلبس اي حاجة المهم اختاري انتي
جود≈ ا… قطع عليها
زياد≈عجبه قفطان..شن رايك هذا جود نعرفك ماتحبي لمفتح 😍
جود تشبح فيه.. عيونها 😍يجنن كان لونه اسود طويل مخصر فيه رقبة المهم حلو انا فاشلة في الشرح 😂
سرحت في السعر كان خيالي 1.000.د الفلوس الى كانو عندها 2.000.د يعني كان شراته مع مكملات الفقطان مش حيكفو للهدايا
زياد≈ جود
جود≈نعم
زياد≈وين سرحتي من بدري نكلم فيك.. ها شنو عجبك
جود≈ اه لالا خلى نشوفو غيره
زياد ≈ عارفها تكدب.. اه باهي امشي انتي وخديجة كملن انا قاعد مع صاحب المحل طلع صاحبي ..
جود ≈تمام

زياد≈ شن الجو يابرو
صاحب المحل≈ انت الى وينك مختفي ماتجي ع السهرات الليلة جايبين مزز من الى يحبهم قلبك 😍
زياد≈ لا خلاص لوحته الوجيج هذا من زمان توا لاهي في الشركة بس
صاحب المحل≈ ههه ربي يتبتك ع عقلك من يقول زياد يدير عقل ويدير حاجة ع روحه انت شيك كله ع الواضح😂
زياد≈ تسحابني زيك من تحت التحت في الصبح قرآن وفي الليل شاكيرا😉
الولد الثاني≈ قصف يارا😂😂
صاحب المحل≈ 😒😒 العيلة تكلم فيك
زياد≈ شاف في جود ..هيا شباب سلام

زياد≈ ها شنو كملتي
جود≈ ايه خلاص
زياد ≈خلينا نمشو لمطعم
خديجة≈. لالا انا ردوني رجليا معاش قادرة 😞
زياد≈. بصوت واطي من بينزلك اصلا يا خدوجة
جود ≈سمعاته فنصت فيه
زياد≈ 😂😂
خديجة≈. خيركم شن تتكلمو
زياد≈ اه ولا شي قلت هيا اركبن
جود≈ 😒
زياد≈ 😂

في المزين
المزينة≈ مدام شعرك يبي بلاتين ضروري 😨
عليا≈. عادي اهم حاجة نبي تسريحة حاجة فخمة وراقية ومافي حد مداير زيها
المزينة≈ ما تخافي مدام هلىء بعملك شي ماصار بليبيا كلها وبعدين انتي شعراتك زراف كثير.. طبعا كذب😂
عليا ≈توا نشوف شعلك وكان عجبني انجيك حتى في عرس ولدي
المزينة منيح كثير مدام 😍😍

في الفيلا
جود ..
خديجة ..

يتبع ……

لقراءة الجزء التالي : الجزء الخامس من رواية متعصب واحببته

لقراءة الجزء السابق : الجزء الثالث من رواية متعصب واحببته

للإطلاع علي فهرس أجزاء الرواية : جميع اجزاء رواية متعصب واحببته للكاتبة سراب الغيث

جميع الحقوق محفوظة للكاتبة سراب الغيث .