في بداية حكايتنا سوف نبدأ بالتعرف سوياً علي ابطال الرواية ونبذة بسيطة عنهم وعن اعمارهم وما خلاف ذلك حتي يكون لدينا بعض المعرفة عنهم قبل الدخول في ملحمة الرواية المشوقة التي ستتمني لو ان الكاتبة تجعل اجزاءها مائة جزء من حلاوتها .
نبذة عن شخصيات رواية حنين الماضي
عبد الرحيم شبوب كويس مواليد 1982 وحيد امه وبوه ..يشتغل اعمال حرة وعنده مصيف على البحر مسميه فسطاط في تاجوراء وكذلك يجيب في مولدات كهرباء ويبيع فيهم
امه سميرة مدلعاته وبوه عبدالله
سالمة مواليد 92 بنوتة حليوة ينادو فيها سلمى من وقت صغيرة ..
عندها اخت اسمها نادية اكبر منها… واخين اصغر نها يقرو ف اﻻبتدائي حسن وحسين ..
اﻻم امنة واﻻب صالح …
سلمى متخرجة من قسم تصميم و طباعة واعلام وتشتغل في شركة صغيرونة تبع دعاية واعلان
الجزء الأول من رواية حنين الماضي للكاتبة لوزة ليبية
عبدالرحيم ل صاحبه :والله قريب نطربق ياراجل
مهند:عﻻش خيرك ياعبدو شن فيه
عبدو:سلمى انقطعت اخبارها عليا
مهند:اها مازال ماكلماتكش قصدك !
عبدو:مازال والله خلي نجرب نتصل توا ….هاه قاعد مقفل الهم اﻻحرف
مهند:اياح وكم يوم توا
عبدو:ليها خمسة ايام نقالها مقفل
مهند:باهي اصبر بالك نقالها فاسد
عبدو:باهى بيفسد نقالها هيا واختها ف نفس الوقت ؟ ….
مهند:باهي بالك كبسوهم شادين نقال يتكلمو واﻻ حاجة
عبدو:مش عارف بجديات مش عارف
مهند:نوض برا عكس قدام بلكونتهم لين تطلع
عبدو:فكرت فيها والله… ايه ايه ايه نوض نوض خلي نمشو
مهند:ليل توا ساعة 8 ماعتقدش تطلع …
عبدو:تي نووووض
مهند:باهي غير خلي نعلق بس على صورة الولد
عبدو:تي نوض وقته الفيس توا
مهند:باهي اهو نايض لكن اسمع سوق انتا رجلي توجع
عبدو:باهي غير هيا سقدني …
ركبو سيارة وبعد ربع ساعة وصلو قدام حوش سلمى
مهند: في الشك تطلع من بلكونة هيا نروحو
عبدو:منو هادو اللي خاشين للحوش
مهند:بالك جيران
عبدو:جيران شنو ياراجل …. فتحو الباب بالمفتاح ! !
مهند:شن قصدك باعو حوشهم ؟
عبدو:معقولة هكي من غير ماتقولي …ستنى خلي نمشي نسأل
مهند:تسأل عينك قعمز واهفت
عبدو:هه خشو كان خليتني نمشي نسأل خير
بعد دقايق انفتح الباب
مهند:عبدو عبدو شوف
تلفت عبدو ولقي بنت ﻻبسة توتة طلعت حطت شكارة الكناسة بحدا الحوش وخشت
عبدو ل مهند:منو هادي ؟
مهند:بالك اختها
عبدو:ﻻ وﻻ عمري ريتها عندها اختها نعرفها لكن هادي ﻻ
مهند:مايكون اﻻ واحدة قريبتها بايتة عندهم
عبدو:شنو توا اقربائهم عندهم مفتاح خيرك يامهند
مهند:والله حرت ياعبدو الحق
عبدو:انا حاير اكثر منك وقريب نهبل والله ماقادر نرقد ليلي ماهو بليل ونهاري ماهو بنهار والله كانت صارت فيها حاجة انموت كبيدتي هادي كبيييدة
مهند:باهي قولي اخر مرة شن صار بينكم بالك فيه نقطة غايبة عليك اتصير راه
عبدو:اوكي نحكيلك بالزبط شن صار وقت اتصلت بيها لكن شن صار قبل اتصالي مش عارف…
((حنحكيلكم انا شن صار ))
نادية:سلمى ياسلمى
سلمى:نعم
نادية:وتي روحك بابا بيرفعنا مﻻهي سلمى:بجد؟
نادية:ايه زعما شن نلبس
سلمى:مش عارفة ستني بنتصل ب عبودي نسأله
نادية:فكك تو يقولك ﻻ ..من رايي اطلعي من وراه ماضيعيش المشية
سلمى:مانقدرش وكان لقيته ف الشارع
نادية:اييياح علينا ديري اللي ايريحك خليه يقولك ﻻ زي العادة
سلمى:يقولي ﻻ اهون من اني نقعد ف المشاكل
خدت نقالها واتصلت ب عبد الرحيم
سلمى:اهلين عبودي
عبدو:اهلين بيك شن الجو
سلمى:تمام… اممم حبيبي نبي نطلع
عبدو:وييين ؟؟؟؟ ¿¿¿
سلمى:لمﻻهي مع با…
قاطعها عبدو:ﻻ مافيش هنيلي روحك ﻻ طلوع وﻻ عزوزة تره
سلمى:وراس حبيبي
عبدو:ﻻ قلنا ماتزنيش سلمى خﻻص مافيش طلوع وهيا توا امي تنادي سﻻم
سلمى:اوكي سﻻم
سكرت سلمى الخط وهيا مضايقة ومدايرة شوارب الحرجانة
نادية:قالك ﻻ واﻻه
سلمى:ايه 
نادية:عرفته هكي بيديرلك مش عارفة حب شنو هدا اللي يتكلم عليه
ماتطلعيش ماتخشيش ماتمكيجيش ماتلبسيش
سلمى:حرام عليك والله الولد ايحبني وانا نحبه لينا توا سنتين ونص حتى لو قالي هكي انا راضية بيه نحس فيه رجولي وشخصية
نادية:باهي باهي فكيني منك وتو انا نتصل بيه عبدالرحيم
سلمى:ﻻﻻ ماتكلميشي فكيني منه تو يحسابني انا باعتاتك ويكشخ عليا
نادية:ﻻﻻ غير اسكتي بس ونوضي البسي
ناضت سلمى طلعت من دوﻻبها سروال ابيض وقطعة تركواز ووشاح وبدي ابيض
خدت نادية نقالها واتصلت ب عبدو
نادية:الو
عبدو:اهلين نادية
نادية:شن اخبارك
عبدو :كويس
نادية:شن بنقولك ..ااا سلمى حتمشي معانا هيا طالعة مع اماليها ماليكش الحق اتقولها ﻻ
عبدو:تعرفيني يانادية غيور ومﻻهي زحمة وشباب يديرو ف لقطات بايخة غادي…. انا شاب وعارف شي هدا
نادية:بوي معانا تريس واﻻ مش عاجبك 
عبدو:ﻻﻻ العفو منك اخخخح باهي خﻻص قولها تمشي
نادية :اوكي سﻻم
سلمى:شن صار ،؟؟؟
نادية:بش قتلك البسي انا شن مزال قاعدة بتوتة ؟؟
سلمى:قلت بالك يقول ﻻ … هي تواني بس
خ امنة:تي هيا يابنات
سلمى:هيا لحظة ماما ملبس الوشاح
على اتصال عبدالرحيم بيها
سلمى: هﻻ بيبي
عبدو:باعتيلي اختك ياهانم اتقولي خليها تطلع
سلمى:ﻻ حبيبي والله ماقتلها
عبدو:اسمعي اخر مرة راه ﻻ تتصل نادية وﻻ حتى واحدة فاهمة
سلمى:حاضر حبيبي خﻻص ماتعصبش انت … انحبك
عبدو:اااه خوديني بلسانك الحلو هي سلمى:حبي عبوودي دودي خﻻص ارضى
عبدو:انحبك ياروحي خﻻص به … شن بتلبسي
سلمى:بنلبس لبسة التركواز اللي جبتهالي هههه
عبدو:باهي حلو ربي يحفظك ياعمري
ردي بالك تمكيجي بيبي اوكي
خ امنة:تي هيا ياسلمى
سلمى: حبي توا ماما تنادي بنطلعو يﻻ باي باي..
عبدو:استني استني
سلمى:نعمممم
عبدو:هاتي واحدة…
سلمى:هههههه ﻻﻻ يﻻ باي
عبدو:اماﻻ مافيش تسكير خط
سلمى:حبيبي ماما تنااادي تو تجيني اهنا
عبدو:ايييﻻﻻﻻا مافيش تسكير هههه
سلمى:يامجنووون امممموه … يﻻ باي باي
عبدو:باي ياحبي
طلعت سلمى من دارها وقتلها امها:هدا كله وشاح ؟؟وخيرك مش دايرة حتى تشيشة كحل ف عيونك
نادية:هههههههههه
سلمى:ماهو ماما …. هكي خير
خ امنة:حسك بتقعديلي ف الرقبة يابنت
سلمى:معش تقولي هكي النصيب على الله ماما
خ امنة:هيا اطلعو
عمي صالح:هيااااا اطلعو خير مانبطل من رفعكم
طلعو يتجارو كلهم وركبو سيارة ودارو عركة ﻻ انا مش ف النص مش فنص وقعمزو الوﻻد في النص وسالمة ونادية جيهة الروشن
وبعد شوي وصلو المﻻهي
ركبو حسن وحسين ف اللعبة
ووقفت سالمى ونادية يتفرجو ع اﻻلعاب مع بعض
بعد ربع ساعة
نادية:سالمة شوفي منو اهنا تلفتي ف جيهة هادي
سلمى:وين ؟
نادية :اهني ياكلبة
سلمى:حي عبدوووو
نادية:خنايسي النهارات جاي ورانا بيشوفك شن اديري
سلمى:ياوخيتي سلمه ﻻﻻ اكيدة جاي بيشوفني ماعتقدش يراقب ﻻنه واتق فيا
نادية:باين عليه مازال ماشافناش
سلمى:خلي نتصل بيه …..
طلعت نقالها واتصلت>>> الرقم المطلوووووب خااااارج تغطية
نادية ل سلمى :حي عالجو حتى عقيل اهنا شن يدير زعما…. حي جاي جيهتنا
((عقيل شرقاوي ثمح ولد عم سلمى مواليد 1980 طبعا حتى سلمى اصلها من الشرق لكن مولودة ف طرابلس وامها طرابلسية))
عقيل :السﻻام عليكم شخبارك يامرت سيدي
خ امنة:وعليكم السﻻم ..الحمد لله ياولدي كيف حالك انت
عقيل:الحمد لله …كيف حالكن ياصبايا .. شن دايرات
سلمى ونادية:تمام شن جوك انت
عقيل:تمام عشره ع العشرة
خ امنة:امتى جيت اهنا
عقيل:اول امس بس
خ امنة:وعﻻش ماجيتش قعدت عندنا عاد
عقيل :والله جيت ب سيارة مش ب طايرة وصلت طرابلس باطل((تعبان)) ومش قادر انصبي تاكيت ع اقرب واحد من شباب صحابي وقعدت عنده … اماﻻ وين سيدي ؟؟
خ امنة:اونه مع حسن و حسين مركبهم ف لعبة ويستنى فيهم
عقيل:اها اوكين خلي نعدي نسلم عليه
سلمى ل نادية:شنو شافنا عبدو
نادية:ﻻﻻ حسه ماشافناش مرة واحدة
مشي عقيل بيسلم على عمه وهوا ف طريق جاه صوت من جنبه
يقول:اووووووو عقييييل تي وين وين ياراجل معقولة زي هﻻل العيد هكي
عقيل:اوووو عبدالرحييم شخبارك يالحمر
عبدو:والله تمام بخير خيرك مادورتناش
عقيل:والله من نزلت طرابلس وانا ندور ع رقمك واللي نسأله من شباب يقولي ماعندش
عبدو:باهي شن امورك
عقيل :تمام شنجك انت وشنج المصيف يابو صاحب
وفي لحظة هادي عبدو شاف سلمى واقفة جنب اللعبة
عبدو فباله والله كان تركبي انغبرها ع دماغك ياسالمة
عقيل:كنك ياراجل نحكي معاك وانت مش معايا بكل
عبدو:اها ﻻ شي
نادية ل سلمى:شن بتركبي
سلمى :ﻻﻻ فكيني من عبدو
نادية قعمزت ف كرسي ف لعبة وقالت لسلمى :اعطيني نقالك بنصور بيه غير نقالي فصل شحن
مدتلها سلمى النقال
نادية :ماباش يفتح تعالي افتحي قفل فيسع قبل ماتبدى اللعبة
سلمى :اوكي
وقفت برا اللعبة بشوي فتحتلها القفل و توري فيها منين تصور
عقيل:ف من اتبحث يا عبدالرحيم ؟
عبدو كان يفكر وتكلم بصوت عالي من كثر ماهو يبكبك وقال:والله عرفتها تبي تركب وبديرها من وراي عقيل:تي من هي
عبدو:الكبيدة …. اها ﻻ به ماركبتش ريحتني ههههه
عقيل:قصدك تحكي ع اللي ﻻبسة اﻻزرق وشاربة البيضا ؟
نادية:حيه ع امك ياسلمى عقيل واقف جنب عبدو …
بدت اللعبة تشتغل وركبت اللعبة ب نادية
وسلمى تلفتت وشافت عبدالرحيم وعقيل مع بعض
عبدو قرن حواجبه وقال ل عقيل :شنو معاكسها واﻻ جيت
جيهاتها ؟؟؟
عقيل:تي..
يتبع………
لقراءة الجزء التالي : الجزء الثاني من رواية حنين الماضي للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حنين الماضي للكاتبة لوزة ليبية
جميع الحقوق محفوظة للكاتبة لوزة ليبية .
