تتسارع الوتيرة في الاحداث وتحدث الكثير منها تجعل عقولنا لا تصدق كيف حدثت ولماذا وما الدوافع ورائها لكن لا تتسرع في الحكم فلكل شيء مبرر قد لا نعرفه لكن دائماً هناك تحكيم للعقل علي مجريات الأمور، لذلك هيا بنا لنتابع ماذا سيحدث في الجزء الثامن من رواية حالة حب لنعرف المزيد ونستمتع بجميل الكلمات من كتابة المؤلفة العبقرية لوزة .
الجزء الثامن من رواية حالة حب للكاتبة لوزة ليبية
حاتم – انعوضك ….انعوضك عن كل لحظة تألمتي فيها …. انا عارف نفسي انسان واطي ولقطة اللي درتها مايديرهاش تريس لكن سامحيني وانا من ايدك هادي ل ايدك هادي المهم ترضي عليا ….هاه شن ردك
جمانة – مش عارفة بجد مش عارفة
حاتم – اسمعي ياروحي
جمانة – نعم
حاتم – انتي عارفة ان قبل صارلي ضغوطات… معش عرفت منين نلقاها لا من حال البلاد ولا من المعشات الواقفة … ولا من حالة امي … مرضت وطاحت علينا قبل شهور …
جمانة – ان شاء الله لاباس عليها خيرها
حاتم – عندها مرضة قوية عافنا الله مرض اللهم احفظنا
جمانة – لاحول ولا قوة الا بالله
حاتم – وانتي عارفة قداش انحب امي ومعش انفكر في شئ غيرها لدرجة كرهت روحي
* حاتم دار روحه يبكي *
جمانة – استهدى بالله ياحاتم
حاتم – بجديات معش قدرت نخليك معاي خفت عليك نقعد معصب ونبدى نكشخ عليك فقلت افضل حل ننفصلوا
جمانة – انت القرار خديته بروحك ياحاتم من غير حتى ماتوضح اسبابك … من قال من قال اني بنخليك …. مدام اني انحبك نقعد معاك عالحلوة والمرة
حاتم – خلاص امالا سامحيني
جمانة – مش قادرة ياحاتم
حاتم – حبلين سو وطاحوا في بير ياجمانة
جمانة – صعب
حاتم – انا انحبك ياجمانة ….
*جمانة تبكي قعدت حايرة بين عقلها اللي يقولها لا وبين قلبها اللي يقولها ايه …. بكت جمانة بحرقة وكان واضح ع صوتها ….
حاتم – معش تبكي بيبي
*في اللحظة هادي اذكرت شمسي لما يقولها معش تبكي وسبحان الله هيا اذكراته من اهني خش عليها انتظار من اهنا *
حاتم – منو خاش عليك انتظار
جمانة – رتاج بنت خالتي …
حاتم – اه باه …. حبيبي اجمنو انا وضحتلك اسبابي …. وانا مانبيش نخسررررك اهياه حطيها في دماغك انحبك ونستنى منك رد بمسج مع الساعة 12 في الليل اوكي بيبي يلا سلام
جمانة – سلام …
[علاش بس … علاش هكي ايصير معاي علاش … توا بيبدى صراع ببن قلبي وعقلي بين القبول والرفض اخ اخ …. كنت نبي ننساه انا شن طلعه في حياتي تاني …. كذابة انتي ولا عمرك حتنسيه حاتم عايش بداخلك اتموتي عليه …. فيقي مرات يكذب عليك ياحلوفة ؟؟؟ كيف بيكذب يافهيمة اهو قال عنده ظروف الولد شنو مافيش تقدير حتى طشة ….هييييه بلا هبال عاد اما تقدير ياام تقدير انتي تي كان هوا مقدرك راه قالك اصبري هالايام بعد مانتم ضروفي انكلمك …. مرات ماعرفش يتصرف الا بطريقة هادي
وااااك ياربي شن اندير والله تعبت تعبت انحبه بقلبي وعقلي رافض ايروف بحالي ويفهم هالشي ]
ع علي – والله كان البنت تبي اتوليله يانعيمة اتولي … انا مانقدرش نقول لا بعدين تنتكس البنت والا تخش فحالة نفسية والا اشبح شن يصير فيها نقعد غير حاصل
خ نعيمة – مادابيا ماتوليلاش مدامه سيبها خلاص مش ميتين عليه احنا
ع علي – ماتخشيش في الموضوع يانعيمة خليها هيا اتفكر وتقرر
خ نعيمة – ماضيعنا غير دبمقراطيتك الزايدة
ع علي – تبيني نكون دكتتوري زيك
خ نعيمة – مش دكتتورية انا ننظر للموضوع بزاوية اخرى
ع علي – ريحينا لا زاوية لا مربع تره خليها بنتك كبيرة مش صغيرة تعرف راسها من رجليها واللي يريحها اديره
خ نعيمة – اشبح هي
ع علي – تبي ترفضه باهي تبي اتوليله باهي اهم حاجة عندي انه ولد كويس ومحترم خلاص تو وكانه سكير نكير ولا متع وجيج راني كرشمته الموضوع
خ نعيمة – به به اشرب شاهيك اشرب
ع علي – وتيلي شنطتي بنطلع الصبح بكري لدبي
خ نعيمة – اللطف هكي طق طربق
ع علي – نادوني المدة اللي فاتت كنت غياب جيت ع خاطر جمانة
خ نعيمة – وكم بتقعد غادي
ع علي – مش معطل ان شاء الله
~~~
منيرة – باهي اللي جيت حبيبي وينك من بكري
حاتم – كنت ف حوشنا
منيرة – معش تبعدعليا حبيبي قاعدة عروسة راني
[مسكين حاتم سخفني كيف يبكي اكيد توا يدعي ان نوافق نرجعله ]
حاتم – وهوا فيه حد يقدر يبعد عالعسل هذا اموووه ..انموت فيك موتان ماعنديش الرووووح معاك
منيرة – هههههه حول ياصايع حرجانة منك انا
حاتم ل منيرة – حرجانة منيروووو نراضيك ياروحي شن فايدتي امالا
منيرة – اللللااااا
حاتم – اووووو لا لا لا معش نقدر شن الارواب الصقع هادي والطرحات
منيرة – هههه بش قتلك صايع
حاتم – تعالي اهنا تعالي هههه
* طبعا هذا كان بينما جمانة اتفكر في حاتم في نفس اللحظة حاتم شن كان ايدير وهيا ظانه انه متنكد ويفكر فيها وهوا عايش اللحظة *
~~~~
عفاف – ليك ساعات في هالدار فاش تفكري
جمانة – في حاتم يا عفاف في حاتم
نورة – ع شن اتهدرزوا
عفاف – والنبي زوديلها يانورة قالت اتفكر في حاتم
نورة قعمزت وقتلها – مايحتاجش تفكير فوتي البلي
جمانة ربطت شعرها بتوكة وقالت – قالي نده ظروف
عفاف – جمانة ماتعفلقينيش تره
نورة – وانتي صدقتي هالكلام طبعا
جمانة – مانعرفش
خشت عليهم امهم وقتلها وبنظرة نص نص قتلها – قالك بوك اللي بديريه باهي كان تبي اتوليله ولي كان ماتبيش احسن
عفاف – وحسها بتوليله
خ نعيمة – تعرفي كان وليتيله يافرخة م….
ع علي سمعها وقال – نعيمة !
خ نعيمة – باهي سكتنا ياعلي هاه
طلعت نعيمة وسكرت الباب
جمانة – ماتشبحوليش هكي قتلكم الولد كان عنده ظروف
نورة – به نسيتي اللي داره فيك
جمانة – تو نحكيلكم شن قالي
عفاف – احكي
جمانة حكت بتفصيل كلام حاتم
نورة – ديري اللي تشوفيه مناسب جمانة
عفاف – بش لو تبدي حياتك من جديد واطيحيلك شبوب من المطار خير
سكتت جمانة وهي شاده سنسلتها قريب اتقطعها وعينها تلمع بدمعة
نورة لاحظت ملامح جمانة فقالت لعفاف – خلاص خليها ع راحتها هادي حياتها وهيا اللي بتعيش معاه مدامها اتحبه خلاص
~~~
شمسي – ها معتز انت وين
معتز – طالع يااحبيبي
شمسي – وين
معتز – عندي رحلة
شمسي – اه اوكي اوكي
معتز – فيه حاجة
شمسي – لا قبل بنقولك تعال كسد
معتز – يلا معليشي نتلاقوا حتى غدوة الصبح لان بنمشي عسريع لمصراتة وبنروح بنرقد تااااعب
شمسي – اوكي توصل بالسلامة ياسي
معتز – وانت طيب ياخال
سلامات
شمسي – سلام
(زعما انكلم جمانة توا …. لا لا بالك انديرلها ازعاج استحشتها والله لو كان نلقى عمل 24 ساعة ونشوفها كيف مانبي …. هيا اصبر ياولد لغدوة خلي انوض انحلق نواسي لحيتي وغدوة ان شاء الله نمشي بكري )
….وصلت الساعة 12 …..
شدت النقال جمانة وكتبتله مسج
>> حاتم …. لو رجعنا لبعض توعدني معش اتسيبني ؟؟؟
* وبمجرد ماحطت التلفون جاها مسج <<< اكيد نوعدك ياروحي
ردت عليه >>> اوكي حبيبي …
<<<نفهم من المسج هذا انك موافقة
>>>اي موافقة
>><خلاص الصبح تو انهدرزوا غير قاعد مع الشباب توا
>>> اوكي …
ناضت طلعت ل امها وخواته قتلهم انها رجعت هيا و حاتم لبعض وخشت لدار جري بش معش تسمع اي انتقاد في الموضوع
* حطت راسها جمانة ع المخدة وهيا مبتسمة … حست الروح ردتلها برغم ان حاتم مخادع بس هيا مضحوك عليها وياما منهم اللي زي حاتم عندهم وجهين ….
غمضت عيونها جمانة مبتسمة اتفكر فيه
[انحبه ياناس ]
وفي نفس اللحظة شمسي كان في البلكونة … واخد مق قهوة ويشوف للقمر ويتخيل في جمانة
(الله ياربي كان اتحبني جمانة بس… مانبي شي من الدنيا غير ريفاء … غير جمانة يعني …. والله غير اتحبني بس نعطيها عيوني نحافظ عليها زي اللؤلؤة في الصدفة … انعيشها ملكة خلي نكتبلها مسج … ان ذدشاء الله فايقة بس )
مساء الورد للوردة جمانة …
اطلعي للبلكونة وشوفي لسمي حتلقي قمر مكتمل ماشاء الله حلو بس مش احلى منك …
*قرت المسج جمانة ودارت نقالها صامت وحطاته عالكمدينو وتلفتت لجيهة الثانية ورقدت …. فات قريب ربع ساعة وشمسي يستنى في رد من جمانة …
(شورها راقدة خلي نخش نحدد بدلتي ونرقد تو اترد عليا الصبح وقت اتشوف المسج تو اترد عليا )
شاف اموره شمسي .. واتكى فكر في ريفاء وفي جمانة لين خداه النوم
فاق ساعة 6 على صوت المنبه دوش وشاف اموره وصلى وخدي قهوة وخدي شنطة صغيرونة تبعه حط فيها ملابس تحسبا لرحلة بالاقامة …
فاقت جمانة ساعة 7 بدلت ووتت روحها وتستنى في بوها …
طلع بوها من داره بسنطته تفجئت جمانة وقتله – صباح الخير … مسافر بوي ؟؟؟
ع علي – صباح النور ..اي كان سخر ربي ماقلتلكش امك
جمانة – اه لا لا ماقتليش
ع علي – اهو تو يخطم علينا عمك ضو ايحطنا ف المطار
جمانة – به من بياخدني غدوة
ع علي – قولي لعفاف تاخد سيارتي وتوصلك
جمانة – باهي يستر الله …
خ نعيمة – علي نديرلك فطور
ع علي – لا لا هاتي قهوة بس
خ نعيمة – به
ع علي – راقدين البنات
خ نعيمة – ابه انوضهم ؟؟
ع علي – لا لا خليهم سلمي عليهم …. اهو ضو يتصل جي شوره …ايوه صباح الخير …. ايه طالع هي … ماشي سلام
خ نعيمة – شنو جي
ع علي – اي … هي ردي بالك ع روحك نعيمة اونه الفلوس في نفس المكان
خ نعيمة – ان شاء الله …. رد بالك ع روحك
ع علي – بإذن الله
خ نعيمة – في امان الله
ع علي – ف امان الله … هيا جمانة
جمانة – هيا هي …. بسلامة يمة
خ نعيمة – بسلامة …
* وصل عمك علي هوا وبنته للمطار وبمجرد وصلهم كانت طيارة عمك علي بتطلع… سلم ع بنته وسافر ….
جمانة – صباح الخير
شمسي – صباح الورد …
جمانة – انت وين شمسي
شمسي – انا وراك اجمنو
جمانة – هههههه
شمسي – ههههه خليك اهو جايك هي …
سكر الخط وكيف بيمشيلها وقف عليها اشرف صبح عليها ومشي … وصل فيها شمسي وقالها – تعرفيه اشرف ؟؟
جمانة – اي
شمسي – اياح منين تعرفيه
جمانة – كنت طاقم متعه اول يوم ليا …
شمسي – اه هههه باهي
جمانة – خديت قهوتك
شمسي – اي شربت امبكري شوي ونستنى فيك عالنسكافيه
جمانة – به تمام..
شمسي – حق وينك ياامورة امس … نتصل بيك نبعتلك ف مسجات وانتي ولا هنا ههههه
جمانة – معليشي امس كنت مشوشة شوي
شمسي – اه شن مشوشك
جمانة – قصة طويلة
شمسي – شن ورانا نسمعوها هالقصة الطويلة
جمانة – امممم بس مش عارفة منين نبدى
شمسي – ابدي منين مابعجبك ماعندكش مشكلة
جمانة – به تعال نقعمزوا ف الكفتيرية
شمسي – خوفتيني يابنت قعمزي حتى اهنا واحكيلي
جمانة قعمزت عالكرسي وقعمز جنبها في الكرسي اللي بحداها … وقتله –
– بنحكيلك بس خايفة تفهمني غلط
شمسي بنظرة استغراب – لا علاش بنفهمك غلط … احكي عادي
جمانة بكل توتر تهز في رجلها
شمسي – شن فيه جمانة والله وترتيني
جمانة (حكتله وقت كانت مخطوبة حكتله لوقت مافسخت بس )
شمسي – مع احترامي ليك جمانة … هذا واطي وحرام فيه كلمة راجل بمحتصر المفيد هذا عيل … الراجل اللي ياخد فلوس من مراة مايتسماش راجل … وببني وبينك افتكيتي منه يحيقة الملح هالخايس …. والله الا فورلي دمي كان تقوليلي طريقه بس وحق ربي مانبدى الا مسببله عاهة مستديمة …..
*سكت شوية وكمل كلامه – انتي اصلا كيف تعطي لواحد فلوس ياجمانة كيف …. منحط والله ماراجل هي باهيووو … تي حد يبدى عنده هالملايكة ويجرحها بكلامه والا بمعاملته والا بتصرفاته تي المفروض يبوس ايده وجه وقفا ان عنده واحدة زيك لكن احسن افتكيتي منه شكلات مقلبة
* حس روحه شمسي انه دوي زيادة عن اللزوم وان جمانة قريب تبكي … فقالها – اسف سامحيني والله من غيضي قلت هكي وانتي ماليكش ذنب انا انعيب فيه هوا مش فيك … انتي كنتي مخدوعة فيه
[بالله شن بنقولك ياشمسي اني انحبه واني وافقت نرجعله بعد كلامك هذا معش نقدر نقولك بكل ]
شمسي – زعلتي اجمنو
جمانة – لا لا مازعلتش كنت سارحة بس
شمسي – ربي يبعتلك الانسان اللي يحترمك واللي يقدرك واللي يصونك واللي يعاملك زي الؤلؤة في الصدفة يحميها من كل شي واي شي يحدها في عيونه ومايشوفش غيرها ايكون شمس حياتها
* زعميتك ايلمح ههههه *
جمانة – ان شاء الله ….
* رن تلفون جمانة طلعاته من شنطتها وقالت لشمسي – شوية نرد عالمكالمة ونرجعلك
شمسي – اوك تمام مابين شفت رحلاتنا وين …
جمانة – اوكي
خدت جمانة ساتر وقالت ياساتر وردت – صباح الخير
حاتم – صباح النور ….
جمانة – غريبة فايق بكري
حاتم – ماه عندي عمل … اسمعي بنجوكم العشية اليوم انا وامي … نبي انهدرز عليك
جمانة – اوك الساعة كم
حاتم – مع العشية
جمانة – اوك تم …
حاتم – وين انتي شن هالدوشة
جمانة – تو بعدين نقولك في العشية
حاتم – قولي توا
جمانة – بعدين ياحاتم
حاتم – باه باه ياحبي … هي سلام
جمانة – سلام
بعد شوي جاها شمسي
شمسي – هيا رحلتنا تنادي ….
جمانة – وين الرحلة
شمسي – لتركيا تاني باهي اللي حولت فلوس امس تركيات لان تموا مني امس هههههه باهي اللي حصلنا حق طاسة العصير
جمانة – ههههههه باهي درت احتياطك هالمرة…
شمسي – ديما انحول راه تيزتاني فيه جميع العملات
جمانة – هههه كويس
شمسي – يلا رحلتنا اتنادي
جمانة – هي
* مشوا ركبوا طيارتهم واقلعوا في خلال رحلتهم جمانة اتفكر ….
[علاش دسيت عليه اني رجعت لحاتم …. بغض النظر عاللي قاله لازم انقوله مدام نبي حاتم … خلاص من اول مانوصلوا انقوله ]
(مسكينة جمانة تعرضت لتجربة زفتة ديما الشخص الصادق ايطيح في شخص كداب منافق والله قاعد نسحن عليه لتوا خزيه تافه جرحها مش راجل …. من ينام ويترك انثاه تبكي فهو لا يستحقها فعلا )
ولما قريب يوصلوا لتركيا صار خلل في الطائرة اتمكن من معالجته مؤقتا شمسي وهبط …. هدرزوا جمانة وشمسي شوي …. وقتله – شمسي انا دسيت عليك حاجة
شمسي – ان شاء الله خير
جمانة – انا عارفة ان كل كلمة قلتها مزبوطة بخصوص حاتم …. وعندك الحق … لكن هوا وضحلي اسبابه امس ورجعنا لبعض
شمسي ماستوعبش وقالها – شن رجعتوا لبعض
جمانة – رجعنا لبعض وليت مخطوبته من جديد ….
سكت شمسي انطمس حتى كلمة اتخيل نفسه ان كاميرا ادور عليه و خلفية المكان اتغيرت لاسود والاغنية هادي تتردد في راسه ..طفاك القدر ياشمعتي… خلاني اجر بحسرتي شن لي بهالعمر يادنيتي …محسود على حظي وقسمتي…
ومع اخر كلمة طاح شمسي واطفت الشمعة ….
*خيال هذا شوية دراما هههه*
يتبع ………….
لقراءة الجزء التالي : الجزء التاسع من رواية حالة حب للكاتبة لوزة ليبية
لقراءة الجزء السابق : الجزء السابع من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
