هل أنت جاهز لقراءة احداث جميلة من إبداع المؤلفة كيندا ؟ إذا هيا بنا لنبدأ قراءة الجزء الثامن من رواية حبيبتي لا تنسيني حيث كل الإبداع والروعة والجمال في الكلمات والخيال الواسع .
الجزء الثامن من رواية حبيبتي لا تنسيني
وهنا خش احمد لدار وسلم وقعمز وبعدين قاللهم …
احمد … ياما نبيك فى موضوع مهم …
امه … خير ولدى ان شالله خير ؟؟
احمد … اه والله فى موضوع مهم قررت فيه قرار ونبى الكل يعرف هنا 
وهنا ملاك بعتتله رساله تقوله فيها …
ملاك … خلاص انى موافقه .. اطلع بالله عليك اطلع … ماتفضحنيش يحسابو فى شى بينا اطللللللللع …
احمد …. دقيقه بس … ندير تلفون ونرجعلكم …
امه …. لاحول ولاقوة الا بالله .. خيره الولد هوا هبل ولا نجن …
ناض احمد بسرعه وطلع من الحوش واتصل بيها وقاللها …
احمد … اكيد موافقه ؟؟ يعنى مش بعدين تقولى لا .. قصدى راهو القوات بدرس جنب الجبهه واى لحظة غدر بتضرب صواريخها طول …
ملاك … باهى خلاص اطلع درت العار والله انت مهبول …
احمد … باهى مالا خلى نخش نلخبطهم ونطلع هههههههههه
ملاك … ماتعطلش واطلع .. انت وجودك هنا يسبب كارته اقتصاديه …
احمد …. هوا انتى تطولى … خلاص سكرررررى .. لين نعيط ؟؟ لازم بالواحد يتعصب .. سلام ههههههههههههه
سكر احمد تلفون وخش لدار وقعمز .. وقعد يشبحلهم شوى وهما يشبحوله … وبعدين امه قالتله ..
امه .. ولدى نساوين رح يخش وفى اى لحظه … يانوض البس تسمال على رأسك ياقول الا عندك واطلع …
احمد … امى شن تسمال هادى اكيد تنكتى صح هههههههههه … بصراحه بصراحه … مافيش موضوع كنت حاب نهدرز عليكم شوى بس سلام … << وطلع >>
ام ملاك .. هههههههههههههههههههههه والله هالولد هدا خفيف وفرهودى .. مش زى ولادى الكزمه وخوه …
خالتى مهيبه … اى والله واخد هالطبع من خواله .. ربى يهديه ويصلح حاله يارب …
كبهت ملاك على دار العربي هالا مقعمزين فيها ولما لقت انهم مازبطوش رجعت لدار اختها وقعمزة جنبها وقالتلها …
ملاك … والله الولد هوا متهور ومهبول … شفتى شن قاللهم ؟؟ وامى عاجبها باين ههههههه
فرح … والله انتى ماتبى الا هكى … تستاهلى حطك فى الامر الواقع ..
ملاك .. اهو يتصل .. اااااااااااااص وفتحت الخط … الو
احمد … شن رأيك كيف لخبطهم ؟؟
ملاك .. لخباط بصراحه … بارع … فنان … هدا تلخبيط ولابلاش ..
احمد …. لا لا ونبى معاش تنفخينى توا نطربق ههههههههه
ملاك … تى نهار ابيض العيل يعرف يلخبط اكتر منك … شن الهباب الا درته داخل هههههههه
احمد … هدا الا طلع معاى بصراحه … عاد لقيت جمهور كله يشبحلى ومستنى منى القنبله الا بنفجرها .. فاقولت يالله نجرى بيهم على اساس .. برغم انى والله كنت نبى نفجر صاروخ
ملاك ….<< وفى داخلها تتمتم يعطيك صاروخ يطيرك ونرتاح >> .. اها ها الحمد لله الا رجعلك عقلك .. يالله نستأدن منك وان شالله معرفة خير ..
احمد .. تتسهوكى انتى ؟؟ ..ملاك .. نبى نشوفك ..
ملاك … ضربوه على راسه طاح مداسه … تى انى مالياش لحظات كيف وافقت بس انى نتكلم معا كفى نقال وبشروط … طول قررت انك تبى تشوفنى ؟؟
احمد … ماهو فى الامور هيا خود العرق وسيح دمه ههههههههههههه
وهنا غمت سماعه وشبحت لاختها وقالتلها …
ملاك … مجنون .. مجنون .. الولد مجنون رسمى يافرح … تصورى توا خشلى فى دم … مصاص دماء بيطلع فى الاخير هههههههههه
احمد … الووووووووو الوووووووو احم احم انتى معاى ولا نعسك نوم ؟؟
ملاك … معاك معاك يامصاص دماء انت …
احمد … مصاص دماء ههههههههههه لكن عجبنى والله انتى عندك خيال اوسع منى ماشالله ..
ملاك .. شن تقصد ؟؟ غير استنى ماتتخايلش وقف وقف وااااااااااااااااااااااااااقف ..
احمد … شن بنوقف بزبط ؟؟ بجد بجد انتى عندك خال اهبل ؟؟
ملاك … كخ كخ كخ كخ .. لا لا عندى خاله سمينه شوى … وقف تفكير يافهيم .. يعنى مايمشيش تفكيرك بعيد ..
احمد … اه قصدك كيف ينشو مصا ص دماء لا والله طلعتى فهيمه فى نقطه هيا ..
ملاك … ااااااااااااااص ماتكلمش خلاص انت مش مصاص .. انت باقيرا ههههههههههههههههههههههه
احمد … باقيرا ؟؟ فى حد قبل قالك انك بارده ؟؟هههههه
ملاك … لا والله ماحصليش شرف .. حصريا نسمع فيها منك توا بس ..
احمد … اسمعى ملاك …….. والله بجد نبى نطلب منك طلب .. نبى نشوفك حتى 5 دقايق لوطه …
ملاك … لا لا اسفه … مااختلا اتنين الا وكان تالتهم شيطان …
احمد … لا لا اطمنى تالت مش شيطان .. الرابع شيطان بعون الله …
ملاك … مالا منى تالت ؟؟
احمد … كلبى اللطييييف صدقينى انى ولد ناس مستحيل نقعمزو بروحنا
ملاك … لاااااااااااا كلبك هوا يقول لشيطان حول وانى نقعمز جنبك .. ولاندكرك اخر مره شن خلانى ندير …
احمد … شن درتى ؟؟
ملاك … لما هوا قعد يجرى وراى ..
احمد … اها شن صار ؟؟
ملاك … لما .. لما … اى على فقدان داكره الا عندك … لما قعدت بعدها نعيط وضاع كل شى ..
احمد … نهارك اسود شن هوا الا ضاع .. بتلبسينى تهمه من توا … انى من توا ما نعرفكش .. هي سلام عليكم
ملاك … باهى انت ماتبيش تفهم … من الاخير فى جزء من المشهد حدفته انى ومانبيش نقوله .. بس انت اكيد دكرته …
احمد …. اه قصدك بديرى جو ام بى سى … ممنوع تحت 18 ههههههههههههههههه بس خودى راحتك واحكى انى قريب نخش 30 .. باهى شن صار؟؟ ..
ملاك .. والله انت صايع وماتتحشم … وانى الا فاضيه عطيتك من وقتى .. سلام << وسكرت فى وجهه >>
فرح … ههههههههههههههه قسما بالله جوه اضحكى بس هههههههههه
ملاك … ماك مراهقه زيه … يبنى نهدرزله ..
فرح … على اليوم الاضاع فيه شرفك ههههههههههههههههههههه
ملاك … تتسهوكى ؟؟ اى ضاع .. انتى مش عارفه انى كيف مكرشه فيه باايديا ورجليا ونعيط … والكلب تحتى يدغمر ..
فرح … امى تضبح … تعالى نمشولها تعالى …
ملاك … نعم ماما
امهم … قيموا لعاله ديرولها تمصميصه وابدو وتو العشى …
ملاك … ماشى ماما …
خشو للمطبخ .. ملاك بدت تغسل فى عالة شاهى وفرح بدت تقرض فى بصل باش تحط رز بالبصله على نار .. وهنا فرح قالت لى ملاك …
فرح … ترا شوفى مازال فى مسير فى تلاجه ؟؟
ملاك .. اى مازال فى .. تعرفى شى … حاسه روحى فرحانه وفى نفس الوقت خايفه …
فرح … خيرك يابنت تحبى نكد ؟؟ معاش تفكرى فى موضوع وصدقينى احمد والله كويس وولد ناس ومستحيل يغلط فيك لدلك هنى روحك وابدى قرضة سلاطه ..
ملاك … ماشى نحطلهم عاله بس ونجى …
حطت ملاك العاله ورجعت للمطبخ باش يكملو توتى العشى … وفاتت ساعه وراء ساعه وحطو العشى وتعشو .. وهنا نزلت ملاك وفرح باش يغسلو معايين فى جنان بس وهما نازلين تلقتها امها وقالتلها …
امها … فرح … علاش نازله يابنتى انتى كيف جايبه .. اهو انى كيف بننزل نعاونها ..
فرح … لا لا ماما انى حابه نطلق رجليا شوى فى جنان … ردى بالك انتى من كتاكيت الا فى دار لين نركب …
امها … باهى غير ماتقليش على روحك انتى قاعده خضره … ملاك … ماتخليش اختك توقف هلبه ..
ملاك … ماشى ماشى
وهنا نزلت ملاك وفرح بسرعه بصفر العشى والمعايين ونزلو لجنان ووكيف بدو يغسل وفى معاين … اتصل راجل فرح بى فرح .. وهنا فرح قالتلها …
فرح … اسمعى بنكلم محمد ونجيك … ابدى فى معاين انتى ..
ملاك … ماشى خلاص غير ماتعطليش …
فرح … اوك …
مشت فرح باش تكلم راجلها براحتها بعيد شوى … بينما ملاك طبست باش تشوف صابون وين وقامت النايلو الا كان ملفوف على اللودينو زى دولاب … باش تشوف كان صابون محطوط داخل … ووكيف صوت طلع حد من وراه ..
احمد …. هووووووو هو << بصوت الكلب >>
ملاك … يماااااااا .. مبردك خوفتنى .. عارفنى عندى فوبيه من كلبك ..
احمد … ههههههههههه شن اخبار امورتى
ملاك .. خلاص برا برا اختى فى اى لحظه تجى ..
احمد … نبيها تجى انى شن مشكله .. انى مش متحشم من الا ندير فيه وبعدين اختك شفتها مقعمزه فى دورج قدامى وتهدرز مع محمد وسلمت عليها
ملاك … اها اوك توا تقدر تمشى ؟؟
احمد .. ملاك نبى نتكلم معاك ..
ملاك .. << عيونها فى معايين >> .. علاش ؟؟
احمد … علاش حاس انى كل مانقرب منك تبعدى عليا ؟؟ بالله عليك الا فى قلبك طلعيه .. انى حاب نعرف انتى فى شن تفكرى .. وخلينا صريحين مع بعض من الاول ..
ملاك .. عارفه لو تكلمت رح تزعل منى ..
احمد … لا والله لا .. شن فى ؟؟
ملاك .. انت بصراحه شخص متعدد العلاقات … وهدا اول شى يخلينى نخاف منك … وبعدين انت لحد توا ماحددتش نوع العلاقه الا تبينا نكونو فيها .. وانى مانحبيش نمشى وين ماترفعنى ريح وتم … وكدلك انى طبعى دكتاتوريه .. يعنى تكلمنى انى وبعدى تتصل بى 4 بنات ولما نجى نكلمك تقولى احنا اصدقاء ومافى بينا شى … انى سيناريو هوا كله مايمشى معاى .. يعنى من الاخير احنا عائله محافظه .. جو اصدقاء مانقتنعش بيها .. لو انت بجد تبينى وضحلى رؤيه من توا … هل انت ترضى بى بنت تكون هكى ؟؟
احمد .. بجد انتى تخوفى … معقوله هدا كله شايلتيه فى قلبك وساكته .. كانا انى راهو موتت ..
ملاك .. ههههه علاش بالعكس موضوع مش مستاهل لانى ماحطيتاش فى راسى اصلا
احمد … اها .. شن تقصدى ؟؟ ان انا مش بالك اصلا ؟؟
ملاك .. لا بس يعنى مافكرتش فى موضوع وخممت فيه هلبه ..
احمد .. تمااااام .. نعتبر روحى جملتين الاخيرات ماسمعتهم … مهم وخلاصة كل الا انتى قولتيه … انى رح نجاوبك بسطر واحد … انى موافق على كل شروط الا انتى تحطيها عليا باش بس نبرهنلك مدى صدق نوايا معاك وانى خاش من الباب … وانى مستعد اول مانتفاهمو لى كل شى نجى ونتقدملك ..
ملاك … اوك معناها شروطى كالاتى ههههههه بنات لا ؟؟ علاقات عابره لا … اهم شى صراحه متبادله … شفت اى شى منى غلط تعالى كلمنى باحترام وتاخد عيونى ..
احمد .. اها .. تمام وانى فى مقابل عندى شروط ياماما … بس مش رح نقولك عليها توا … رح نكلمك بعدين ونقولك على كل شى …
ملاك … اوك بس توا تقدر تمشى لااى حد يطب علينا ونخش وفى موضوع تانى …
وهنا على صوت امها جايه من جنان القدامى لجنان تالانى …
امها … ملااااااااااااااااااك .. ملاااااااااااااااااااااااااااااااك …
ملاك .. حى عليا .. ماما .. ماما .. نهارى اسود انى … تعالى تنايلو لودينو بسرعه بسررررررعه ..
احمد … مصحك .. انى تبينى نلبد تحت لودينو … انى رح نكلمها ونشرحلها كل شى ..
ملاك … امى امى .. اننننننننننزل … وحشاته تحت نيلو اللودينو الا مدايرته خالتى مهيبه زى مخزن صغيرون تحت لودينو بس فاضى …
امها … سنه نادى فيك … علاش تغسلى فى ظلام ؟؟
ملاك … لامبه هادى محروقه .. وضى متع جنان القدامى منور شوى عليا .. خيرك شن فى ؟؟
امها … كأنى نشم فى ريحه رجليا ؟؟ من امتى تبخى فى ريحه رجاليه انتى يابنت ؟؟
ملاك .. اه … اه .. من امس .. حسيت بس انا ريحات رجاليه افوح افوح .. مهم انتى شن تبى ؟؟
امها … بوك كلمنى وقالى يكلم فيك على تلفونك وانتى ماتردى وقالى نزليلها تلفون ..خلى تلفون جنبك توا يعاودلك …
ملاك .. باهى باهى خلاص اركبى انتى ..
امها … وين اختك ؟؟ وخيره انتى تصرفاتك مش طبيعيه .. وريحه رجاليه قويه فى مكان هوا … شن فى تكللللللللمى ؟؟
وهنا فرح سمعت امها تتكلم فامعاش عرفت لا تقدم ولاتوخر وفجأه .. مشت طلقت الكلب الا عندهم وبدت تعيط …
فرح … ااااااااااااااااااااااااااااااااااه كلبببببببببببببببببببب نطلقققققققققققققققققققققققققققققق ..
ملاك .. كلبببببببببببببببببببببب نطلب .. ااااااااااااااااااااااااااااااه
امها … استنووووووووونى وووووووووووووووووووه ياكبدى وووووووه …
وبدو تلاته يتجاورو ويسطربو فى جنان والكلب وراهم .. وفرح تجرى وميته بضحك .. وملاك تجرى وتبكى .. وامهم تجرى وتقطع فى شعرها … واحمد صايخ عليهم بضحك …. وفجأه ….
يتبع……
لقراءة الجزء التالي : الجزء التاسع من رواية حبيبتي لا تنسيني
لقراءة الجزء السابق : الجزء السابع من رواية حبيبتي لا تنسيني
للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا
جميع الحقوق محفوظة للكاتبة كيندا من ليبيا .
