إن الروعة لا يختلف عليها إثنان وفي الجزء الثامن من الرواية سنري الكثير من الجميل في الاحداث وهل برأيك سنري مفاجآت غير سارة أيضاً أم سيعم الهدوء والرومانسية والجمال علي مسرح المواقف بين الابطال ؟ ام سيحدث شيء غير متوقع نهائياً ؟ لذلك هيا بنا سريعاً دون تضييع الكثير من الوقت لقراءة أحداث الجزء في السطور التالية .
الجزء الثامن من رواية صغيرة علي الحب
طلعت رولا من دار … وخشت رنا تحت يرغانها وغطت وجها وبدت ترعش مع بعضها بمجرد انها سمعت صوته نفسه وحركاته كيف يفك فى ساعه ويسكر فى غرفه …
واول ما قرب لسرير … قعد ساكت شوى بعدين قاللها ..
قصى … احم … بكرا عطله زى ماتعرفى … ورولا حابه نطلعو نقضوه برا فى مكان بعيد شوى على جيهتنا .. ورح نقضو يوم كامل برا واحتمال نباتوفى الاوتيل .. وبما ان هيا جهزة كل شى لانها عازمتنا بحكم اننا عرسان زى مالكل فاهمين … فامضطرين ان نمشو معاها … فالو حابه … وتى شناطيك لان رح نمشو مع ساعه 9 صبح وارفعى معاك اسمك لبس عندك … لان الجو صقع هلبه وتلج كتيف …
وبعد ماتم كلامه خدى الجاكيت ولوحها جنبها على سرير لين هيا انتفضت وابتسم ابتسامه لردة فعلها لانه كان عارف انها خايفه منه ومشى وسيبها وخش لتواليت …. وهنا ناضت بشعرها المكشكش وقعمزة بعد ماسمعاته سكر باب تواليت وراه … واول ماقعمزة قعدت تتمتم بشوى وتقول …
رنا …. ماشفتش ابلد منه ااااااااه نكرهك نكررررررهك ..
وفى اللحظه هيا رد عليها برغم انها تكلمت بصوت واطى وقاللها …
قصى … انى حدرتك وقتلك ماتحاولى تستفزينى .. فاماتتوقعيش اى شى منى …
وهنا رنا من صدمه لان سمعها … نطت تحت اليرغان وغطت وجهها وقعدة تستنى فيه لين يطلع وقلبها كل مره يدق … لحد مافتح باب الحمام … وهنا طلعت عينها بشوى من تحت اليرغان … لقاته طالع وكيف بيفتح دولاب وبياخد بيجامته … وهنا تلفتلها بسرعه فاتكمكت تحت اليرغان وهوا ابتسم وسكر الدولا ورجع للتواليت وقعد يحلق …. وهنا ناضت بسرعه متعفلقه لانها حست هيا مفروض تكون الاقوى مش هوا … وبدات بعد ماتجرأ بالموقف الا يوم داره … ووقفت وجاته طول للحمام ووقفت بشعرها مكشوش ومحوس وبيجامتها الا مصور عليها سبونج بوب … وقالتله ..
رنا … لحد وين بنوصلو ؟؟ لامتى بتتصرف هكى … انت بجد مش طبيعى . وانى تعبت وبصرااااحه طلقنى خلاص ..
وهنا استمر قصى فى الحلاقه وقاللها بعد ماقعد يمصمص فى ماكينه تحت ميه وقاللها …
قصى … برى اللعبى بعيد سلم بنتى …
رنا .. << وهنا قربتله وجت جنبهوضربت ايدها بشوى على كتفه وقالتله >> … انى مش عيل طلقنى وخلى كل واحد يمشى فى حاله .. انى كرهك وانت تكرهنى … شن الا يخليك صابر عليا …
قصى … << شدها من طرف بيجامة ايدها الا كانت محطوطه على كتفه وقاللها >> حبيبتى برى اللعبى بعيد ماتستفزنيش … << وبعدين قعد يشبح شوى للبستها وقاللها >> سبونج بوب ؟؟؟ العبى بعيد انتى والا لابستيه وخلينى لانى بجد تعبان ومانبيش نهبل عليك …
رنا … انى مش عيل لوووووسمحت … وبعدين نلبس سبونج بوب نلبس ميكى ماوس هادى حاجه تخصنى … الا يخصك عرفته من اول … من اول ….. ؟؟؟
<< وهنا لقت روحها نزلقت وسكتت ومعاش عرفت تكمل جملتها >>
وهنا قعد ساكت وضغط على ماكينة الحلاقه لين جرح روحه وشبحلها وقاللها …
قصى … كملى … من اول ليله صح ؟؟ وانى رح نوريك الحقير هوا الا عرف انك خاينه من اول ليل وقعد معاك علاش … تعرفى علاش ؟؟
ولوح ماكينة الحلاقه على طول ايده وغسل ايده … وقرب جيهتها بعصبيه وشدها من ايدها بقوه وطلعها من حمام ولوحها على سرير وهيا تبكى وتترجى فيه …
رنا … << مع دموع وصوت ضعيف >> نحى ايديك مانبيش حووول .. انى اسفه والله ماقصدى … ااااااسفه … قصى وراس امك لاااااا بعد … والله مارح نستفزك مره تانيه .. بس بعد وماتتهورش .. انى عارفه انك رح تندم قصى … قصصصصصصصصصصى …
وهنا قصى وقف ووخر شوى وقام شعره بعصبيه وقاللها ..
قصى … << بصوت عالى فى تهديد وعصبيه ووجه صبعه ليها وقاللها >>> اقسم بالله نديرها وانتى تعرفينى لما نهبل نقتلك … بعدى عليا وماتحاوليش تسفزينى لانك انتى خاسره … تسمععععععععععععى فيا ؟؟
رنا << مع حشرجة بكاء >> مااااشى خلاص … خلاااااااص والله …
وهنا قصى قعد يشبحلها شوى شبحات كلها تهديد وامتصاص للغضب وخش للحمام وقربع الباب وراه سكره …
وهنا رنا خشت تحت اليرغان وهيا مصدومه فى ردة فعله الا ماتصورتهاش لهدرجه … وبعدين خشت تحت اليرغان وقعدة تبكى لين طلع من الحمام وطلع من الغرفه مره وحده ونزل للمكتب متعه وسكره وراه … بينما رنا بعد ماسكر دار النوم … ناضت من سريرها وخدت يرغانها معاها .. وطلعت للبلكونه … وقعمزة على نفس كرسيه وتغطت باليرغان … وقعدة تبكى وتتأمل فى القمر .. لحد مانعسها نوم ورقدة …
وفاتت الليله الهاديه والكل فى غرفه … وجمله وحده بس قالتلها بدون وعى كانت كفيله تنوض كل جنونه نائم وغضبه المميت … وكل افكارها سيئه ودكرياتها …. الا لحقتها حتى فى نومها وتحولتلها لكوابيس متواصله .. مافاقتش منها الا على تقربيعة فى دروج … وهنا ناضت فجأه لقت روحها فى سريرها ومتغطيه .. وهنا صدمه ضربت راسها … هيا كيف وصلت على سرير ؟؟ مستحيل هيا متأكده ا ننعسها نوم على كرسى بلكونه … وهنا نطت من سرير ومشت جيهت البلكونه وفتحت الباب شوى … فالق تقصى مقعز على نفس الكرسى … ويشرب فى شاهى مادونتس … فا حطت ايدها على فمها من دهشه وقعدة تشوف لروحها شوى وترتيب لبسها وبعدين طلعت حوايجها وخشت للحمام بسرعه .. وفتحت دوش وخشت تحت الميه وقعدة تفكر وتفكر وتستنى امتى يطلع من الدار باش تلبس براحتها وتنزل تفطر … بس للاسف كل انتضاره باء بفشل … لحد مايأست … فاطلعت من البانيو … ولبست سروال اتش دى اسود .. ومالية برنوص على لون الاحمر ومصور عليها دب وينى اصفر وجبدت شعرها وقامته كعكه فوق وحطت شوى ميك اب وطلعت من الحمام … واول ماحست بالسعة صقع فى رجليها .. فتحت دولاب وطلعت شبشبها متع البسطات الا على هيئة ميكى … وقعدة تشبحله شوى وتفكرة كيف كان يتهزى عليها وبعدين قالت بينها وبين نفسها ..
رنا …. زعمك اول مايشوفنى رح يتسهوك ؟؟ ااااه ياربى .. علاش انى حايره هادى شخصيتى ولو تجرأء وتكلم مش رح نسكتله ورح نوقفه عند << وهنا تفكرة الا امس صار فابلعت ريقها وقالت >> ورح نمشى ونسيبه …
وبين هالافكار وهالافكار وكيف تلبس فى شبشبها فتح البلكونه وخش …
وهنا قامت عينها … واول ماجت عينها فى عينه خافت وقالتله ..
رنا … صباح الخير …
قصى <<< شبحلها ونزل عينه وكأنه مازال متعصب من ليلة امس وقاللها >> … المره هادى حولتك من الكرسى متعى وحطيتك فى سريرك … مره الجايه رح تلقى روحك ملوحه فى الارض … الكرسى هدا انتى عارفه انى نحب نرقد عليه فى الليل وعارفه انى رح نركب ونرقد فيه … فاياريت تكون رسالتى وصلت … << وللحظه سكت ونزل عينه على دب وينى وشبشبها وقاللها >>
قصى … بجد انى نتكلم مع طفله عمرها 8 سنين … والباين انها ماتستوعبش الا بالعياط وتهديد … وماتعرفش من هالعالم اولا تفهم الافى رسوم الكركتيريه
رنا … << وهنا قربت منه وقالتله بنوع من تهديد ووجهت صبعها لوجهه >> …اوك انى نفهم مش عبيطه ماشى ومش عيل انى … وعمرى انت الباين مش سامعه صح لدلك شن رايك تزيد واحد جنب تمانيه باش تعرفه مزبوط … وياريت ياريت ..
وهنا قطع عليها وقالله …
قصى … << مع نظره فيها نوع من الاستهزاء >> ياريت انتى تنحى صبعك ومعاش توجيهولى وانتى تتكلمى … خير ماتلقيه مهناكش مره وحده ومقصوص … << وشحلها صبعها بالقوه ونزله وكمل طريقه وبعدين قاللها >> انزلى افطرى ووتى شنطتك معاك ساعه ونص بالكتير … وسكر الباب وراه وطلع …
وهنا قعدة تعجب فيه كيف يمشى بطريقه متعجرفه ومضحكه فى نفس الوقت … وبعدين نزلت وراه باش تفطر … واول ماجت بتقعمز على كرسى بعيد عليه شبحلها شبحه هيا فهمتها وجت بعدها قعمزة جنبه …
رولا … صباح الورد ..
قصى ورنا … صباح الورد << مع بعضهم حكو >>
رولا … ههههههه بنقوللكم على حاجه مهمه جدااااا … امس فى الليل كلمنى محمد … وصدمنى ان امه تحسنت … وانه قدر يقنع اهله بوجودى .. وحجزلى طيارة اليوم وتحديدا بعد نص ساعه … بجد انى اسفه …مش رح نقدر نمشى معاكم … بس انتم مش رح تفوتوها اكيد واعتبروها هديه منى … حجزة الاوتيل .. ومبكرى كلمتهم لغيت غرفتى وخليتلكم غرفتكم ووصيتهم فيكم … فاقود لاك ليك واستمتعو واتفكرونى 
وهنا اول ماسمعو كلامها … قعد كل واحد منهم مصدوم وساكت وبعدين رد قصى وقاللها …
قصى … بتوفيق يارب ونتمنالك رحله موفقه ..
رولا … حاسستكم زعلانين كنت متوقعه انكم رح تفرحو واخيرا رح تقعدو لوحدكم ..
رنا … << ابتسامة مع شبحة تزريطه >> ههههههه اكيد اكيد فرحانين بس كنا نتمنو تكونى معانا انتى ومحمد بس يالله تعوضوها ياريت …
رولا … رح تمشو صح ومش رح تتغير الخطه ؟؟
قصى .. << شبح لرنا شوى وبعدين شبحلها وقاللها .>> … اكيد رح نمشو بعون الله طالما تم الحجز خلاص ..
رولا … معناها نستأدنكم توا لانى رح لحق على طيارتى وقود لاك ليكم سلام ..
رنا … اموه … اموه .. سلام حبيبتى
طلعت رولا من الحوش بعد ماودعتهم وهما قعدو مقعمزين على طاولة الفطور يفطرو بصمت .. وماقامش ولا واحد منهم عينه فى تانى … بس فجأه قامت رنا عينها وقالتله ..
رنا … << بصوت هادى وفيه نبرة زعل >> … انت مش مضطر انك تمشى اليوم ولا انى .. خلاص الغى رحله ..
قصى … وتى روحك مش رح نستناك اكتر من ساعه …
رنا … قصدك رح نمشو ؟؟
قصى … وساعه ابتدت من هاللحظه …
رنا .. << وهنا غمرتها الفرحه ونقزت من الكرسى وطلعت تجرى فوق بسرعه … واول ماوصلت فوق نقزة بالقوه وقالت … ياهووووووووووووووووو واخيرا واخيرا واخيراااااااا رح نمشى ونطلع ونتدهور واخيرااااااااا اااااه ياربى نحبببببببك يارب
واول ماسمعها وهوا كيف بيركب من دروج … وقف شوى وعلامات الاستفهام من طريقة تصرفاتها طفوليه … بعدين ابتسم ابتسامه على جنب وواشر باايده لى الشغالها ونادها لدار مكتب …
واول ماخش للمكتب وقعمز على كرسى قاللها ….
قصى … كلمىهم برا قولى للمسؤال على سيارتى يلف عليها شن ناقصها ويجهزهالى باش بنطلع بيها … ووتيلى شنطتى لبس عملى كالمعتاد … وكدلك … << وكملها باقى تعليمات الا بيقوللها عليها …
وفاتت دقيقه وراء دقيقه لحد ورنا مشغوله بتجهيز شنطتها … وقصى فى مكتب ويكمل فى شوى شغل عنده …
وبمجرد ماجى الوقت المحدد … نزلت رنا بشنطتها وحاطه الواشح على كتافها بدون ماتلبسه وكانت عاطيته بالقفى باش تطلع بوتها من دولاب مخصص وهنا فجائها بسؤال وقاللها ..
قصى … بتطلعى بدون وشاح ؟؟
رنا … << انصدمت من سؤاله الا ماعرفتش شن مصدره … هل غيره ؟؟ ام تملك ؟؟ ام مجرد اتباتات رجوليه لاغير >> وقالتله … علاش انت يهمك هلبه تعرف ؟؟
قصى … اى يهمنى نعرف لانك بدون وشاح محطوط على راس وبدون ماتسترى شعرك وماتبانش منه ولا شعره … صدقينى مش رح تطلعى برا الحوش …
رنا <<< وهنا قربت وقالتله بتحدى >> … هل شعرى يعنيلك لهدرجه ؟؟ << مع شبحة لئم >>
قصى << شدها من ايدها وهزها بى قوه وقاللها >> … ماتسفتزنيش يارنا … خليى المشيه هادى تمشى بدون مانضطر ندير فيها جريمه …
ومشى وعطاها بالقفى …
رنا …. جاوبنى … هل شعرى يعنيلك شى ؟؟
قصى … << تلفتلها وشبحلها شبحة تهديد وسكت وبعدها كمل طريقه وقاللها … اقلها فى الوقت هوا يعنيلى بس ماتخافيش مش رح يطول هالوضع ..
رنا … شن تقصد ؟؟؟ رد عليا شن تقصد ؟؟
بس هوا طلع وسكر الباب وراه …
وقعدة تسأل ياترى هوا على شن ناوى ؟؟ وشن يقصد بجملته الاخيره …
وفى ظل هالافكار متراكمه … قطع تفكيرها صوت سيرنا تقوللها …
سيرنا … مدام مستر قصى قالك هيا ..
رنا … اوك حبيبتى خليها شنطه رح نطلعها .. قوليله لحظه بس تلبس وشاحها وتطلع …
سيرنا … اوك مدام
وهنا كملت رنا لبس وشاحها وخدت شنطتها وطلعت لسياره … وحطت شنطتها فى كوفينو وركبت تالى …. وبمجرد ما ضغطت بطمت مرش باش تفتح المرش … شافت مرش رح تسكر … وقاللها ..
قصى … اااااااوف … قعمزى القدام …
رنا …. بس انى رح نضايقك ..
قصى .. قعمزززى القدام …
رنا …. اوك …
فتحت رنا الباب وركبت القدام .. ويبست فى مكانها .. وهنا هوا ولع الراديو … وولع سيارته وطلع …. بينما رنا … حطت السماعات فى ودانها شغلت الاغانى …. وحاولت ماتفتحش معاه اى موضوع ينرفزه …
وكان اغلب الوقت او طول طريق ساكتين … لمدة ساعتين كاملات … طول الطريق …. وماقطعش هالهدوء الا قصى وقف سياره وقاللها …. انتى عارفه ان رولا حجزت غرفه وحده بس انى اول مانوصل رح نحجز غرفه تانيه ليك باش تاخدى راحتك … وعلى توا سمعت من الاخبار ان ممكن فى عاصفه قويه ماصارتش قبل رح تضرب منطقه لمدة 3 ايام .. واحيانا رح يهرب الضى … لدلك … لو استمر الوضع اكتر من يوم رح نحاولو نروحو ومانقعدوش اكتر …
رنا … بس توا نقدر نستمع باليوم صح ؟؟ ولا بنستنى العاصفه فى الليل ؟؟
قصى … نعتبرها نكته … وطلع من سياره وهوا يتمتم على غبائها …
بس رنا اول ماقعدت تتلفت وتشوف فى مكان وجماله … والناس كيف يتزلجو من اعلى جبل على تلج … طلعت تجرى زى مهبوله وتضحك …وتعييييط
رنا … واخيراااااااااااااااااااااااااا رح نتنزلج واخيراااا ياربى حققتلى اول امنيه ليا بجد شكرا ياررررب شكرااااا
قصى … رح نقطع على صلاوتك .. ممكن يا انسه تجى تساعدينى فى تنزيل شناطى <4
رنا … اوك … خلى منك
وخدة الشنطه باش تنزلها بس نبزقت هيا وياها وانزلقت فى تلج
وهنا قصى ماقدرش يشد ضحكته وانلق بضحك على منظرها …
قصى … ههههههههههههههههه بجد بجد انتى كارته … هاتى هاتى منك والحقينى على الاوتيل .. رح نطلب منهم هما يدخلوهم …
رنا … ممكن نطلب منك طلب ؟؟
قصى … على حسب .. انتى عارفه ..
وهنا قطعت عليه وقالتله …
رنا … عارفه بس خلينا هدنه اليومين هما بس … بالله عليك بالله عليك .. انى حلمت طول عمرى نشوف جبال هيا ونتعلم نتزلج عليها ونبى دبدوب التلج وندير سفناريه على خشمه
قصى … اوك خلااااص بس بطلى تترجى ناس تشوفلنا .. رح يحسابوك طفله وانى خاطفها من اهلها …
رنا … اوك خلاص نطلعو توا ..
قصى .. خلينى نكلمهم يدخلونا الشناطى … ونطلعو …
رنا …. اووووووووووووووووك
ومشت تجرى قبله زى طفله الا شافت شى تحقق من حلمها ومش مصدقه ….
وهوا مشى للولاتيل كلمهم وقعد يشوفلها كيف تجرى من بعيد وتلعب بى تلج …. وبعدها … مشى لشخص الا يأجر فى مزالج .. وخدى منه زلاجتين …. وقاللها …
قصى … خليك رح نركبهولك …. وطبس يرتبتلها فيهم على رجليها … وبعدين ركبه لى روحه … وقاللها …
قصى …. لما نقولك هيا …. شدى فى ايدى وارخى روحك … وتبتى رجليك فى اللوحه وحافضى على توازنك ماشى …
رنا …. اوووووك 1 _2 _1 يااااااااااااااااااااااااااااااااااااااااااااااااااااهوا
وفاتت ساعه ورا ساعه وهما يتزلجو .. ورنا تتصرف زى مهبوله … وقصى احيانا يشد ضحكته واحيانا ينفلق بضحك …
وبعد ساعات من فشلها متواصل .. وطيحاتها عليه اكتر من مره … وضحكاتها المتواصله … وجنونها وغبائها وحفت دمها المتواصله فى كل مشهد .. فاتو ساعات بسرعه وحل ظلام …. وجت ريح قوووووويه تدل على بدور عاصفه قويه …
قصى …. خلاص خلينا نخشو ولو تعدل الجو لبكرا رح نقعدو ….
رنا … اووووووك انى جعاااااانه
قصى …. رح نطلبلك اكل فى غرفتك اوك … خلاص خلينا نخشو لان الجو صقع …
رنا …. اووووك << مع نبرات ضيق فى كلماتها >>….
واول ماخشو للاوتيل ووقف على ريسبشن وقاللهم …
قصى … هل فى غرفه تانيه لو سمحت ؟؟
وهنا رنا شدت فى ايده بقوه زى طفله وقالتله والخوف فى عيونها ….
رنا ….
يتبع……….
لقراءة الجزء التالي : الجزء التاسع من رواية صغيرة علي الحب
لقراءة الجزء السابق : الجزء السابع من رواية صغيرة علي الحب
للإطلاع علي فهرس اجزاء الرواية : جميع اجزاء رواية صغيرة علي الحب كاملة للكاتبة كيندا
جميع الحقوق محفوظة للكاتبة كيندا من ليبيا .
