وفي الجزء الثاني من رواية أنت عدوي يا تري ماذا سيحدث مع أبطال روايتنا من جميل الأحداث يا تري ؟ دعونا نعرف ذلك وأكثر من الأحداث المميزة في السطور التالية بإذن الله .
الجزء الثاني من رواية أنت عدوي
دكتور … عفو ممكن نسألك … انتي نفسه بوك دكتور زيد الهاشمي اخصائي طب الاطفال ؟؟ بصراحه من اكفاء دكاتره الا يعطو فينا في الجامعه …
وهنا كنزي سكتت شوي بوجه مش فاهم وقالتله …
كنزي … لا لا في سوء فهم … بابا صح زيد الهاشمي … بس متوفي من اكتر من عشرين سنه …
دكتور … (( شبحلها شبحة استغرب )) اه ممكن صح … واسفه اني فتحتلك الموضوع وربي يرحمه بوك بس اني الا شجعني اني لقيته فيه شبه منك بس …
وهنا كنزي قالتله بصوت متعصب …
كنزي … مافيش داعي تعتدر انت غالط وبس
ومشت وسيباته … ونزلت وركبت لسياره بسرعه لخالتها وما نطقتش ولا حرف ولا قالتلها اي شي لحد ماخالتها شبحتلها وقالتلها ….
ميسون …. خيره وجهك اصفر … هوا خدي صور ولا خدي وجهك هههههه
كنزي …. خالتي حاسه روحي تعبانه … روحي بيا طول …
ميسون … اسمعي ياسرك نكد … بننزل للمحل بناخد حاجات ناقصات علي حوش … وانزلي معاي ..
كنزي … مانقدرش خالتي ماقولتش شعبان وانتي تعرفيه وتعرفي نكده …
ميسون … ماتدوريشي كانا كلمك قوليله خالتي تفاهم معاها ونوريه بعدين مع امه …
احنا وصلنا خلاص مش بعيد هوا … وبعدين خلي شخصيتك معاه اقوي .. معقوله من توا هكي …
كنزي …. اه ياخالتي … لو نحكيلك بس والكارته انه كل شي واخده بتحكم … كل شي ممنوع وحرام وعليه هوا حلال … تصوري حتي خدمتي وكريري الاوتمنيت نبنيه درجه درجه هدمه هوا بقرار منه بس لما قالي لا … وياريت نلقي حد واقف معاي … كل يوم مشاكل اني وياه ياخالتي اي شي لا … نقوله نطلع مع صحاباتي يقولي لا … سواقه لا … خدمه لا … حتي ابسط حقوقي اني نلبس بدوقي بدون مانشاوره قبلها شن بنلبس جريمه … كل يوم مشاكل مشاكل ونكد من ابسط حاجه … وماما تقولي كلهم رجاله هكي قبل الزواج وبعد يتزوجو يولو شخص تاني …
وهنا درست خالتها بجانب المحل وكنزي مازالت تحكي وتشرح لخالتها وضعهم … ونزلو وخدو السله وخشو وهنا ردت عليها خالتها وقالتلها ….
ميسون …. واني مع امك …. رجاله كلهم يمشو بالمسايره وتمشي مافي راسك … يعني اني راجلي في نظرك كيف قدرت نكمل معاه رغم هباله … اني نساير فيه ونطبطب لكن الا في راسي نديره … يعني اضحكي عليهم زي صغار ونفدي مافي راسك بس …
وفجأء وهيا تشرح ومستمخه كنزي نخصتها وقالتلها …
كتزي … (( وجهه احمر من حشم )) … خالتي راجل من بكري يسمع في حديتنا ويشبحلك بااستحقار نقصي صوتك …
ميسون …. وينه ؟؟ تعرفيني اني مانتحشمش … عمي الحاج … مش عليك الدوه والله انت ياسلام عليك تهبل مش زيهم …
وهنا راجل طول نقلب وعطاها الابتسامه الحمره مع كمشه قلوب من عيونه … متع حقا … صحيتي بارك الله فيك …
ولكن ميسون فوتتها … لا لا … ولايمكن … طبست علي بنت اختها وقالتلها بصوت عالي …
ميسون … مش قتلك اني مهبله ومضاحك … ها تقدري تزلبحيهم بكلمتين ههههه بري بري ربي يكملهم بعقلهم ومشت وسيبت راجل علامات سبنك كلها علي راسه … بينما كتزي … مالقتش روحها الا نست همومها كلها وساخت من ضحك ودموع ….
كنزي …… ههههههههههههههههههههه …. خالتي خالتي راجل سمعك والله الا سمعها ههههههههه انتي بجد هبلتي اني مازال نطلع معاك …
ميسون …. اضحكي اضحكي القلب الا تقلب والله ماانا واخدين منها حاجه ..
وخلصو … وطلعو … وركبو لسيارتهم وروحو للحوش … وقدرت ميسون في هالساعات بسيطه بسيطه تغير جو كنزي 90 درجه … واول ماوصلو للحوش … استقبلتهم غاده وقالتلهم …
غاده …. واخيرا روحتو … خطيبك قالب عليك دنيا … خيره تلفونك مقفل ياكنزي …
كنزي … مش عارفه ياماما ممكن فاصل شاحن توا نخش لدار ونكلمه … شفتي ياميسون شن كنت نقولك …
ميسون …. في عينه …. تري يجي هنا نوريه كيف شكله … هدا واخد عليكم الغلب من توا …
غاده …. مالا شني مش خطيبها … وولد خالها .. يعني راجل بنتي يعني ولدي وراجل الحوش …
ميسون ….. اااااه غير كانا تبطلي سهواكه هيا بس … وانتي في وقت الحق كانا ماخديتيشي راك درتي ههههههه وتوا مدايره في روحك المسهوكه …
كنزي …. خليني ساكته خير ونخش لداري احسن …
غاده … كلمي خطيبك … وشوفيه اعتقد يبي شهادة ميلاد متعك …
كنزي … تمام اهو بنخش نكلمه … بس انتي ماتخليش خالتي تروح لين نكلمه ماشي … نكلمه ونرجعلكم هههه
وخشت لدار حطت تلفونها في شحن … وخشت للحمام لبست بيجامتها وتوضت وصلت الظهر … وبعدين مشت لسريرها فتحت تلفونها واتصلت بيه … فاسكر عليها وعاودلها …
كنزي … الو ..
شعبان … ايوا كنزي … شن الاخبار ..
كنزي … الحمد لله بخير …
شعبان … وينك اليوم اتصلت بيك في الاول ضبح وبعدين فصل …
كنزي … اي صح سمعاته رن مره وحده بس واني نتكلم مع دكتور بس لما جيت بنفتح شنطي وقف وفصل تلفون شحن هوا شكله ..
شعبان … متأكده فصل مش انتي فصلتيه …
كنزي … (( تنهيدة استوانت كل يوم )) علاش بنفصله عليك يعني … انت ماتعبتش بجد كل يوم هكي ياشعبان …
شعبان … ماتعبتش من شني … انتي اصلا ولا معبره كلامي في شي … اني الا نقوله تاني يوم نلقي عكسه … انتي اصلا عندك هوس باانك تكسريلي كلمتي …باهي اني متلا قداش مره نقولك اشحني تلفونك قبل ماتطلعي … بس انتي اصلا نحس فيك تديري فيها متعمده باش مانعرفش وين كنتي ووين مشيتي …
كنزي … شعبان … بالله عليك خلاص .. عندك خالتي ميسون تقدر تسألها تمام … وخلاص بجد اني تعبت … تعرف شي … انت حسيت ان صوتي اليوم متضايق او فرحان … انت شن تعرف عليا حاجات اني نعرفها علي نفسي بس … شن نحب … شن لوني مفضل … شن اكلتي مفضله … انت شن تعرف عليا … ماتعرف شي … في مره تكلمنا واستمرت مكالمتنا واحنا منسجمين ونضحكو ونتعرفو علي بعض … لا بسبب المشاكل الا تخلق فيها …. بدينا نتكلمو باش انت تعرف اني وين طالعه ومع منو … وانت شن تحب وشن تبي وشن شروطك الا بتدبح بيها قطه من توا بس …
شعبان …. بالله عليك الرومانسيه ودراما ورويات كيندا فوتينا منها … اني نتكلم معاك في المهم في اساس حياتنا في الا بنحطو عليه قواعدنا … اما تفاهات الحب هيا نعيشهالك بعد الزواج بس بالفعل … اما الدوه قبل الزواج فاهيا وسوسة شيطان بس … وبنت ناس حتي تلقي راجل يفتحها هيا تسكرها معاه طول … فهمتي يابنت عمتي …
كنزي …. انت علاش دماغك يشمي للحرام طول … من الا قالك اني نبيك تدوي معاي في الدوه الا تجيب الحرام … اني الا نبي نحسه بس انك تحسسني بالامان … نبي لما نسمع صوتك نرتاح … نبي لما نضايق نلجاء ليك انت ونحسك الكهف الا نرمي فيه كل اسراري …
شعبان … الله الله وأني نكونلك كاظم ساهر … ولا تامر حسني … باهي انت غير غيري دسكت نكد متعك باش اني نكونلك حتي نانسي عجرم ..
كنزي …. شعبان انت تحبني ؟؟
شعبان … سؤال تافه … يعني مالا علاش بنتزوجك … بس رجال افعال مش اقوال ..
كنزي … اني نبيك تقولي تحسسني اني علي الاقل مهمه بنسبه ليك … لان مافيش زوز يحبو بعض كل يوم يسكرو تلفون بمشكله … ابسط تفاصيلهم مشاكل …
شعبان …. هيا لاش فترة خطوبه … نتعاركو توا باش نتفاهمو بعد الزواج … يعني اني تعاركت اني وياك علي الخدمه صح … ولكن بعد عدة دعكات اقتنعتي … قناعتك هادي رح تخلينا رح نتجنبو مشاكل بعد الزواج ونرتاحو …
وهنا سكتت كنزي شوي وبعدين قالتله …
كنزي … اني بنسكر توا …
شعبان … شفتي من الا منكد فينا … انتي الا ماتبيش تعرفيني … اني واضح وصريح معاك من الاول … واني يوم مانتعارك معاك لما تغيبي عليا معناها مش من فراغ … بس اني مانعرفش نقول الكلام المزوق … اني نعرف تحتاجيني تلقيني راجل بس …
كنزي …. شعبان اني تعبانه … ممكن نكملو حديتنا بعدين … تبي مني شي قبل مانسكر ؟؟
شعبان … اي في اوراق يبيها شيخ لقراية الفاتحه رح نبعتهالك وتيهالي باش نخطم بكرا صبح ناخدها …..
كنزي … تمام ابعتهالي بس …
شعبان … تمام … خشو عليا زباين تواونتكلمو بعدين ..
كنزي … سلام …
وقعدة تشبح لتلفون شوي بعدي لوحت تلفونها .. وناضت من علي سرير وحاولت تنسي كل الا صار وطلعت لقت خالتها مقعمزه علي طاولة مطبخ … وامها تقرض في خضرة المحشي …
كنزي … الله الله علي لمه الحلوه … هاتي نوتي اني ورق سلك والملفوف ونضفلك الفلفل … وانتي وتي الخلطه …
ميسون …. الله الله عليك ياشيف الشربيني … الريجيم في انهيار والعرس قريب وايامي بيض وبعون الله بنحضره بالبيجامه …
كنزي …. القالب غالب ههههههههه .. نصبيلك عصير عنب خالتو ؟؟
ميسون …. صبي صبي خلي تريس تعرف بعضها … وشبحت لغاده شبحت لؤم وضحكت
غاده …. سكري فمك ياكلبه عيب البنت صغيره علي تفاهاتك هادي هههههه
ميسون …. تدكري هههههههههه ااااااه ايام سميحه شباشب دكريات سوتت هههههه ..
غاده …. ههههههههههههه سكري فمك ياكلبه … ماتعدليش عليها خالتك هبلت …
كنزي … قعدة زي الاطرش في زفه … احكولي شكلكم كنتم شياطين ..
ميسون …. ااااه ايام كان جدك بصحته قلبناها اني وياها كان يندري شن درنا بس راك توا تزوري فينا في المقابر هههه ..
غاده … سكري فمك يابنت شن واخده انتي … مهم شن صار معاك انتي …
ميسون …. ولا حاجه قالي بنتزوج عليك وبس …
غاده … وتضحكي ياميته القلب .. كانا اني نبكي بدل دموع دم …
ميسون … (( وهنا تعبت عيونها بدمعه وحاولت تخفيها بضحكه فيها قوه وقالتلها )) … علاش نموت روحي حسستيني ماخديته لين كويت عن زازيه العوره … ياخد براحته … وبعدين الكل معاه طالما ماجبتلاش العيل الا يبيه طول هالسنين …
كنزي …. معقوله ياخالتو راجلك ماوجعكش قلبك عليه ..
ميسون … ااااه … قلبي ياحبيبتي سكرته من واني بنت ولوحته في البحر …
كنزي …. شن قصتنا احنا لعنه ولا شني صابتنا ههههه ..
ميسون … احنا الممنوع بس مرغوب ♡♡ يعني لو طلعنا عرب مش امازيغ رانا نتشفعو عليهم هما هما نفسهم الا توا بنموتو عليهم لين نسقدوهم بدعاوينا للجبانه … ودليل علي ان الممنوع مرغوب فقط هوا امك .. في الاول مشتله علي فرس وبعدها في محاكم …
وهنا غاده طاح الموس من ايدها ومعاش عرفت تزيد كلمه وقعدة تشبح لااختها الا نصدمت زيها ومازاداش ولا حرف بعد طلسه من فمها …. اما كنزي شبحت لخالتها وقالتلها …
كنزي … شن محاكم خالتي …؟؟ بالعكس ماما وبابا قعدو يحبو بعض لين مات …
وهنا حاولت تلفلف الموضوع باارتباك وقالتلها …
ميسون …. اي اي قصدي مره مره مشاكل اي زوز متزوجين قصدت ؟؟ قريب يحلو بينهم المحاكم … تعبير مجازي فقط هههههههههه …
وناضت بسرعه وقالتلها … هاتي منك الفلفل نضفه ..
وحولت عيونها من عيون كنزي وحاولت تغير موضوع ومكانها ويرجع الجو عادي … ولكن غاده للاسف قعدة ساكته اغلب الحديت حتي بعد ماطاب الغدي وتغدو وغسلو المعايين وقعدة ميسون لبعد المغرب لعل غاده تغير جوها بدون ماتفتح معاها الموضوعلانها حست بتأنيب ظمير ولكن عبتا …
ولما يأست ميسون وحست اختها حاليا معاش تزيد معاه حرف في موضوع هوا … استأدنت وروحت … وغاده شبحت لبنتها الا حست من عيونها انها بتسألها علاش تحسست من كلام خالتها بزياده … فاحاولت تهرب منها وقالتلها ….
غاده …. اني بنخش ندير دوش وبنرقد تعبانه … وانتي خودي شن تبي لخطيبك من دار ووتيهمله وخشي ارقدي … بكرا ورنا يوم صعب بنطلعو نشرو باقيةالحاجات الا ناقصه عليك …
كنزي …. ماما بنقولك علي حاجه صارت معاي صبح ..
غاده …. راسي مصدع من خالتك وهرجتها الا ماتنتهيش … تصبحي علي خير . … وطفي اضواء الحوش قبل ما تخشي دارك ..
كتزي …. (( مع نظرة عطف )) اني عارفه انك تأترت مبكري لما جبدت سيرة بابا وتدكرتي كل دكرياتك … لهدا ياماما كيف بتديري من بعدي لما نتزوج … رح يفضي عليك الحوش … ؟؟ مافكرتيش تتزوجي علي الاقل … انتي مازالتي صغيره ..
غاده … زي ماقالتلك خالتك … قلبي سكرته وحدفته من زمان … بس اني حدفته مع بوك ومش ناويه نلقاه عند حد تاني … خلاص سكريه هالموضوع خلاص وبري شوفي شن يبي خطيبك …
وخشت للحمام وسكرت الباب وراها … وبمجرد ماخشت كنزي للمطبخ شربت وطلعت خطمت من بحدا الحمام … سمعت امها تبكي بصوت مكتوم … فا قعدة تشبح للحمام شوي وجت بطق عليها ولكن قررت تعطيها مساحتها ومشت لدار نوم امها وطلعت شنطه الا فيها الورق … وبدت تطلع في الورق وتفتش وتحط علي جنب … ووكيف بتجبد جواز سفر متعها طاح جواز سفر امها فاقامته … وهنا طاحت منه صوره وورقه … وكان مكتوب علي صوره يوم زواجنا وصورة امها مع شخص اول مره تشوفه … ووفي لحظه الا بتفتح فيها الورقه امها فتحت بابا الحمام بقوه والخطوات سريعه بدت تقرب من دار و في لحظه هيا نفسها فتحت كتزي الورقه .. وجت في عينها طول اسم بوها وامها تحت بند (( قسيمة طلاق )) واول ماشافتها من صدمه قعمزة علي السرير والورقه والورقه في ايدها وعيونها يقلبو في السطور …. وفي اللحظه هادي خشت امها تجري بتلحق المفر والقدر الا مافيش منه هروب ….
يتبع……….
لقراءة الجزء التالي : الجزء الثالث من رواية أنت عدوي
لقراءة الجزء السابق : الجزء الأول من رواية أنت عدوي
للإطلاع علي فهرس الأجزاء : جميع اجزاء رواية أنت عدوي للكاتبة كيندا
جميع الحقوق محفوظة للكاتبة كيندا .
