وفي الجزء الثاني والثلاثون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثاني والثلاثون من رواية عاصفة الصمت
رامي : امتى عرسك نزار
{شن بنقولك فسخت بش انت تفقد اﻻمل …ﻻﻻ مش حنقوله}
نزار : مزال شوي امها مريضة فقلت نزيد ناجل
رامي : اه باهي … شن بنقولك … عارفك انك بتحرج من كﻻمي … بس ﻻزم نقوله
نزار : قول
رامي : انا ….انا نبي نفسخ من لبنى
نزار : غير استهدى بالله ياراجل شن تفسخ هادي
رامي : ايه بنفسخ
نزار : به اعطيني سبل مقنع سن البنت قتلك كﻻم مش كويس ؟؟
رامي : حشاها
نزار : شفت منها عيبة
رامي : نهائي
نزار : مش مهتمة بيك
رامي : بالعكس انا مختفي من حياتها قريب شهر
نزار : تصدق ونؤمن بالله ماجتش شكتلي وقتلي مايدورش مثﻻ ؟؟ وﻻ سمعتها تدوي عليك بالعاطل مع خواتي
رامي : عارف عارف يانزار البنت ماتتعوضش ومافيهاش مشاكل بكل المشكلة فيا انا … ماعدتش زي قبل راهو …شوفني … شوفني كويس هل رامي هكي كان…. منظري زي الشيباني … شن دنبها البنت اتنوض من النوم تلقاني في وجهها شن دنبها … نخلعها … واﻻ بنمتلوا قصة الجميلة والوحش
* في هالكلمة اكتم نزار ضحكته ع كلمة جميلة والوحش مش قصده يتهزا بس ماتوقعش تخطر فبال رامي حاجة زي هكي *
نزار : عيب عليك البنت تندري بالظرف اللي صارلك وحق الله واسمه ماسمعتش منها كلمة مانبيشي واﻻ نبي نفسخ منه …
رامي : مش قادر يانزار
نزار : انا عارف ان حاليا تشعر بشعور ان ااا مثﻻ انا مشوه وبتوقف قدامها وبتتحشم منها وتحس روحك ابصر كيف
رامي : اكيد
نزار : به انت غالط …
رامي : كيف
نزار : غالط لانك قررت ونفدت بروحك تبي اتغيب عليها بدون سابق اندار … انت تبيها اتغني بﻻ موجعة فارق عزيز عليا وﻻ لغيبته سابق اندار غياب … انت تبي اتوجعها وتكسر بخاطرها …
* ادكر روحه نزار لما فسخت منه غادة ويتكلم من هالمنطلق *
نزار : واجهها يا رامي واجها واسئلها وقولها هاني قدامك ترضي بيا يابنت الناس او ﻻ … وخليها تجاوبك … قالت بتفسخ فهداك توافقت ارائكم … قالت بتقعد معاك فهيا مش صغيرة وحتكون متحملة نتيجة اختيارها
رامي : مانبيش نظلمها
نزار : وانا مانبيهاش ايصيرلها زيي !
رامي : عﻻش شن صارلك انت
نزار : ماصار شي … تو نستنى فيك العشية اتجي
رامي : انا مانطلعش من الحوش نزار …
نزار : تو نزوركم العشية انا والعيلة ونجيبها معاي
رامي : لكن
نزار : من غير لكن ﻻزم تتفاهموا مع بعض ياتقنعها ياتقنعك اسلوب اﻻنانية بﻻش منه
رامي : باهي يانزار باهي اللي تشوفه …
نزار : هي نستادنك خلي انروح … اه حتى انا مانطلعش من الحوش الحال من بعضه من شهر فات اول طلعة جيتك اهنا … يعني ماتتحسرش يارامي
رامي : ان شاء الله يانزار بس والله نفسيتي صفر افهمني يانزا
نزار : افهمني انت يارامي في وضعي انا وياك نحتاجوا مراة اتحن علينا اطبطب علينا اتحس بينا افهم انا مانضغطش عليك ﻻ بالعكس مانبيكش تجرح بنت خالتي مشناه شعور الفسخ بدون تفاهم بدون شرح اﻻسباب انطب عليها انقولها رامي فسخ منك بري دوري تركينة وابكي
(انت ناسي انها اتحبك يانزار ؟؟؟)
رامي : يستر الله تعال بيهم عيلتك العشية وان شاء الله خير …
نزار : ان شاء الله … هي سﻻمات ياطيب
رامي : فمان الله
صفاء : كساد والله كساد فديت من قعدة الحوش ﻻ خدمة وﻻ راجل هلبا عليا والله هلبا
مروة : قعدنا غير زي شغاﻻت غدي عشي وخﻻص طقينا 28 وماحد عبرنا …
صفاء : صراحة بنقول لنزار بنشتغل مروة : ايه ياريت حتى انا… لكن زعما يخلينا
صفاء : احنا نحاولو وخﻻص
مروة : لبنى شنو بتكلميه معانا
لبنى : بالله عﻻش بنتكلم وانا ماعنديش حتى شهادة ههههه خايبة من حتى تانوي ماكملته
مروة : بالك يقبلوك
لبنى : باش بيقبلوني ومن غير هكي من قال رامي بيوافق اني نشتغل
صفاء : اقنعيه
لبنى : تي وينه هوا ﻻ اتصل وﻻ دورني ليه شهر تام
مروة : مرات مشغول
لبنى : ايه مرات الله اعلم
مروة : هكي خير ﻻن كثر مكالمات ادير المشاكل
صفاء : صح ايه
لبنى : يﻻ … وين نزار شفتوه اليوم مروة : ﻻ طلع بكري … اشبح وين مشي
لبنى : باهي اللي طلع من داره ساده نكد على هديكا اللي ماتسواش
صفاء : بالله مادكرينيش بيها قاعدة انبكبك عليها لتوا
مروة : كان نلقى راجل زي خوي هكي طيب واحنين والله حتى مقعد راضية بيه المهم يكون حنين عليا
صفاء : ههههه … سمعتوا بالفيس بوك
لبنى : ﻻ
مروة : شن هوا هدا
صفاء : تي اللي يتكلموا عليه ف اﻻخبار ايقولوا نشروا خبر كدة ع صفحة تواصل اﻻجتماعي فيس بوك
مروة : صح صح زعما شن يديروا بيه
لبنى : بالك متع اخبار
صفاء : استنوا خلي نبربش عليه ف النت
مروة : المتصفح ارزين متع النقال بايخ
صفاء : وهوا عندنا غيره اهو نجربوا لبنى : جربي وكان هدا ديريلي حتى انا فيش بوك
مروة : ههههه فيس يالبنى
صفاء : اهو فتح تعالوا شوفوا
نزار : السﻻم عليكم ….شفشات قلنا سﻻم عليكم
التﻻتة : وعليكم السﻻم
نزار : فاش مغطسين دماغتكم شن اديروا ….
صفاء : نجربوا ف الفيس بوك
نزار : هدا متع اﻻخبار
مروة : ايه
نزار : فتحتوه ؟؟
لبنى : ايه لكن ما ماعرفناش نسجلوا يقولنا بريد اكتروني ماعرفناش شن هوا
نزار : هههه باهي كان عرفتوا تفتحوه ديرولي واحد
صفاء : به
* بعد ساعتين من عناد قدروا يفتحوا بريد اكتروني وفيس
صفاء : نزار فتحنا شن تبي اسمك بش نفتحولك واحد
نزار : امممممم ديريه نزار الديناري
صفاء : به
نزار : واﻻ انقولك ديريه
عاصفة الصمت
صفاء : ههههه به ياعاصفة انت
نزار : هههه هيا افتحيه وقليلي …وضبحي ع ضرسي نبيها
صفاء : به
مروة : كل اللي نبيه يالبنى راجل يهتم بيا يحبني يحسسني اني موووجووودة
لبنى : ان شاء الله ربي يعطيك
مروة : ان شاء الله يارب
صفاء : لبنة يبيك نزار
لبنى : شن يبي
صفاء : الله اعلم
لبنى : باهي تو نمشيله هي …
{انا مش حنغصبها ليها حرية اﻻختيار لو تبيه او تفسخ منه ايه خير وتشوفه وتتنحى عقدة رامي ووقتها اتقرر مش حنغصبها ﻻ تقعد معاه وﻻ تفسخ هادي حياتها الشخصية }
لبنى : ها نزار …
نزار : قعمزي قعمزي نبيك ف موضوع …
لبنى : ان شاء الله خير هههه
نزار : خير خير
لبنى : يﻻ سمعني
نزار : امممم رامي رووح
لبنى : الله ومن امتى
نزار : ليه شهر
لبنى : غريبة ﻻ حس وﻻ خبر
نزار : ماهو يناري شكله متغير ومتحشم منك جاياته عقدة … خايف انك تشوفيه اتصديه واﻻ تجرحيه
لبنى : ياناري والله واجعني
نزار : يوجع الحق
لبنى : باهي شن قالك
نزار : هكي متعقد من روحه .. وواضح راكباته حالة نفسية لدرجة انه مايطلعش من الحوش
لبنى : اه صارله زيك
نزار : ﻻ احرف …
لبنى : ياحليلي والله موجوعة عليه يانزار كل مانفكر مجرد التفكير لما شبت فيه النار لحمي ينوض شوك شوك …
نزار : انا قاعد الموقف قدام عيوني
رامي : يمى نبي نفسخ
خ سعاد : عير اهفت ياولد خلي انجوزك
رامي : يمى انا مش طايق روحي بصدق شوفي حالتي كيف
خ سعاد : هيا قتلك بنغسخ
رامي : ﻻ والله بروحي
خ سعاد : اماﻻ خيرك بما ان البنت ساكتة وراضية …
رامي : ماحد فاهمني … على كل حال في العشية بيجوك عيلتها ومعاهم لبنى
خ سعاد : اللطف من امتى المخطوبة اتخش حوش خطيبها
رامي : ولد خالها قال ﻻزم اتشوفك وتهدرز انت وياها مايبينيش نفسخ منها
خ سعاد : اه كان هكي معليشي مرحبتين بيهم
لبنى : باهي بما انه متعقد من نفسه خليته يفسخ وبرضو جت منه
نزار : خفت عليه بس … اتزيد حالته النفسية وفي نفس الوقت خفت عليك انتي … مرات تتغششي لو فسخ …
لبنى : ﻻ بس نخاف حتى لو قتله عادي افسخ بالك يدير حاجة فروحه
نزار : هدا اللي خايف منه لكن مانبيش نغصبك وفي نفس الوقت انتي مش زيها يالبنى انتي بنت اصل
* نزل راسه نزار وادكر غادة وواضح ع وجهه متغشش لبنى انحطت بين نارين نار رامي ونار نزار *
لبنى : يستر الله ماتكدرش روحك اطمن مانيش زيها … اليوم قتلي واﻻه
نزار : ان شاء الله بعد العصر هكي …
لبنى : ان شاء الله …
نزار : ضرسي ..
لبنى : نعم
نزار : شن اتحسي اتجاه رامي ؟؟
لبنى : كيف
نزار : شي شي بالله جيبيلي طاسة فروتة نوضي
لبنى : به هي …
ناضت لبنى وماشية للمطبخ وتفكر ،،ئه عﻻش سئلني نزار السؤال هدا زعما يبي يعرف مشاعري اتجاهه بش يتصرف ف موضوع الفسخ ؟؟ و اﻻ غير غاير منه ؟؟ لو انه فعﻻ غاير تو نوريه … دار فيا شوية او بهدلني مروجني قداش سنة فسنة
*ننصحك ياضرس لبني تفوتيه هالموضوووع ** وبينما نزار غارق يفكر كيف حيمشي يشتغل ف شركة من غير رجل ويفكر بصوت واضح ومسموع
نزار : لو اني نمشي نسافر نركب ساق خيرلي من التنقيز … معقولة كل مابنمشي نقعد نتكى على ضرسي … ايه ايه غير انتم موضوع لبنة و رامي قبل ..وبعدين نلهى بروحي
خشتله لبنى على
هالكلمات وقتله : شن بدير بتلهى بروحك بعد لبنة ورامي
نزار : صناطة هههه بنلهى بروحي ونتجوز
*وكيف بتمدله صونية الفروتة انغصت بهلكلمات وانتلصت منها صونية وتشرتعت ع نزار اللي كان متكي ع ظهره هههه ولى غابة فروتة
نزار : تو هدا شن يقولوله 
لبنى : اسفة مش قصدي
*انحنت لبنى شوي وخدت قطعة من الفروتة اللي ع صدر نزار وحطتهاله ف فمه
نزار : هبلتي !!
وحطتله واحدة تانية …
نزار : ههههه ضرسي بطلي
* نفض روحه نزار من الفروتة
وخدتله واحدة تانية وحطتهاله ف فمه بيتكلم فحطت صبعها ع شفايفه وقتله : اششش
تغيرت نظرة نزار ولمعت عيناه وارتخي كله مع بعضه وكأن لبنى سحراته … وﻻ شعوريا خدالها قطعة فراولة وحطها ع شفايفها غمضت عيونها لبنى وكلتها وقت فتحت عيونها لقت نزار قدام وجها مباشرتا العين في العين … وكل منهم يسمع في انفاس اﻻخر … لثواني نسوا نفسهم وهما قبالت بعض… ونزار يقترب ولبنى تقترب وفي لحظة وجوهم بيوصلوا لبعض تلفت نزار على اليمين يحك ف رقبته ولبنى عليسار وتواسي ف ربطة شعرها …
* وواضح الخجل على كﻻهما *
نزار : زودي فيسع لمي هالجردينة اللي درتيها
لبنى خدودها حمر
قالت بكل خجل : به
لمت الفروتات ف الصونية تنحى نزار جانبا وخدي قطعة انانسة وكﻻها وقالها رونتيني بيها فروتة النمي … بتخليني ندير ابيخ جزء في حياتي اليومية
لبنى : دوش تقصد
نزار : ايه ..
*وقفت لبنى وقتله : تو نوتيلك البانيو برغوة شامبو دوش روعة
نزار : عينك يامريشة مانخشلاش البانيو ….انطيح
غمزتله لبنى وقتله : امااﻻ خﻻص تو نحطلك شامبو دوش بﻻفندر استعمله حيعجبك
نزار : بالك نسائي هههه
لبنى : هههه ﻻﻻ للكل مش خاص بنساء
** طلعت لبنى من دار نزار حطت الطاسة في المطبخ ومشت جري لدارها خدت شامبو الدوش اﻻفندر وخدت ليفة جديدة داستها بتات يعني جهاز العروس… وحطتهمله ف الحمام … وطلعت مبتسمة تضحك …. خش نزار بياخد دوش .. مسكين ايدوش عالكرسي
{هوا هدا اللي قالت عليه ئه جايبة حتى ليفة بكل هالضرسي… ياودي حسه نسائي خلي ندوش بصابون زي قبل … واﻻ هيا خلي ندوش بيه وخﻻص خير ماتزعل مني }
فتح الدوش وخدي الشبشابة هههه اشبح شن تقولولها انتوا المهم صب الشامبو ف ليفة ودوش باﻻفندر وغمض عيونه … جت قدامه لبنى طوووول .. نفس ريحتها اللي يعشقها من سنين … غير قبل كانت تستخدم ف صابون ومع سنين داروا شامبوا دوش ….
{ضرسي اللبني…محﻻها ريحتك عﻻش انحس بقشعريرة كل مانشم هالريحة }
(خطيرة يالبنى )
* كمل دوشه وطلع … وتغدوا وهدرز مع خواته وفتحتله صفاء موضوع العمل
صفاء : ها شن قلت
* اتكى نزار حط ايدهطيه راسه راسه وهوا متكي… وشم ريحة ساعد ايده ريحة لبنى فقال : اااه ضرسي
الكل يشبح لنزار نظرات ريبة >_>
لبنى : نعم
{حي عليا مصح وجهي نسيت روحي هههه تكلمت بصوت مسموع}
نزار : ايه اه ضرسي قصدي شنو ماتبيش تشتغلي معاهم
لبنى : بالله ماعنديش شهادة
نزار : اه نسيت صح …
مروة : ها شن قولك ؟؟
نزار : ﻻ عادي عادي مافيش مشاكل قدموا ف شركة انتوا الزوز واشتغلوا
صفاء : بجديات ؟؟
نزار : ايه
مروة : اشمعنى قبل تقولنا ﻻ
نزار : قبل عندي عدوات وكنت خايف عليكم لكن توا شبه اتنحت العدوات تقدروا تشتغلوا ومني ليكم انا تز ندورلكم العمل
صفاء : والله فرحتني الحق
مروة : ماتوقعتش انك اتوااافق
خ رقية : باهي والله نسحابك غير بتكشخ عليهم
نزار : ﻻﻻ عﻻش ماعمريش كشخت عليهم يمى
خ رقية : به به فيه بنية بنخطبهالك
لبنة شرقت : كح كح كح
نزار : هههه شرقت البنت
لبنى : ايه من الشاهي
خ رقية : المهم فيه واحدة بنخطبهالك قنينة بسم الله ماشاء الله
نزار : لكن يمى.. انا مانبيش نتجوز
لبنى : كححح كح كح ههههه زي العزوزة وليت
خ رقية : نوضي بالكي اشربي اميا
لبنى : ﻻﻻ خﻻص مشت الشرقة
خ رقية : نوضي قتلك
لبنى : باهي هي
* ناضت لبنى للمطبخ شربت اميا وقعمزت عالكرسي وحطت يديها ع راسها … عﻻش هكي …كل مانقول بالك المسافة تتقرب بيني وبين نزار اتزيد تباعد … خالتي بتخطبله تاني وانا مخطوبة لرامي !
خ رقية : ايه شن قتلي يانزار ماتبيش تتزوز !
نزار : اجل
خ رقية : وﻻمتى ياغزيل امك عمرك طق 33
صفاء : 38 يمى
نزار : غير راك رزرزتي
خ رقية : شنننن هواااا 38 انهارك مغبر اقريب اطق 40 راهووو
نزار : معليشي عزري حويل
خ رقية : بنخطبلك ماخصنيش فيك
نزار : تي من بتقبل بيا برجل واحدة زي طائر القلق
خ رقية : البنت هادي تقبل
نزار : سكريه يمة الموضوع … مش مفكر فيه … عندي حاجة نبي انديرها بعدين ساهل … وهيا نوضوا العصر قريب وتوا رواحكم بش نمشوا لحوش رامي
خ رقية : اح وخﻻص ….باهي هي
* بعد ساعة بتمام وتوا رواحهم وطلعوا ووصلوا حوش رامي… فتحلهم الباب خوه الصغير وهدرز ع نزار … وجي رامي وهدرز معاهم …بعدين طلع خوه …
رامي : والله قريب نبكي يانزار عﻻش تحط فيا فموقف مع البنت تو تخاف مني
نزار : بالله نحيلي قصة الجميلة والوحش من بالك تو تعيش مرتاح ههههه
رامي : به اسكت يا قصة القلق الحزين
نزار : الله غالب شن بنديروا بنعيشوا وخﻻص شئنا ام ابينا هدا وضع وانحطينا فيه
اخت راامي( هناء ) : هي تعالي لبنى خلي تخشي لرامي ف المربوعة …
خ رقية : نزار غادي او
هناء : ايه حيقعد معاهم
خ رقية : ﻻ باه قبل بنوض مدام نزار قاعد خلي نقعد مقعمزة مافيا مانضت معاها
هناء : هههه ﻻﻻ اطمني قاعد ..
واست لبنى وشاحها وقالت : هي
* لبنى متوترة وخايفة تجرح رامي بنظرة عيونها كمثلا تنظرله نظرة مش حلوة بدون قصد هدا من غير ان حبيبها نزار موجود … طلعوا عالممر هناء ولبنى وخششتها للمربوعة
ويتبع……….
لقراءة الجزء التالي : الجزء الثالث والثلاثون من رواية عاصفة الصمت
لقراءة الجزء السابق : الجزء الحادي والثلاثون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
