الجزء الخامس عشر من رواية إمرأة بلا هوية

مهند أدهميوليو 7, 2022

0 174 5 دقائق

وفي الجزء الخامس عشر من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الخامس عشر من رواية إمرأة بلا هوية

ميناس نططت عيونا واتخلعت لما شافت رهف  ووشها ضلم لما اتأملت جمالها الخلاب وروعتها،،،،،
الاء جرت رهف ومشو سلمو عليها وقدمو ليها الهدايا وطلبت منهم يتفضلو علي التربيزه ،
رهف بقت تفتش بي عيونها لي خطاب بس كانت كل مره بتلقي نفسها بتعاين جهة شاب وجيه شديد،،،،، اسمراني….
ميناس قربت من مهند ولقتو شارد بعيد سألتو وهي بتعاين في الجهة المتنح فيها وقالت : عجبتك ؟
مهند رد وهو م شال عيونو من رهف: في زول يقدر م يعجب بيها ؟
ميناس في غيظ : م عارفه العاجب الرجال فيها شنو ؟  طولها 5 سم دي….
مهند : حرااام عليك والله عسل عديل
ميناس : كان عاجباك تقل جيبك وامشي ليها
مهند اتلفت وعاين لي ميناس في حزن وقال : عليك الله ؟ خساره والله  بس كدا سهلتي علي الطريق ،،،،،
ميناس في مغيره الموضوع : وين صحبك ؟
مهند :جاي في الطريق
سكت حبه وواصل وهو بعاين : ممكن تعرفيني عليها ؟؟ ولا اقول ليك انسي ،،،، خليها في وقتها ،،،،

الاء بقت مبحلقه في مهند وبتقول : وووب دا انس ولا ملك ؟ فظيييع ،،،، نضيف وعسل ،،،،، لكن شكلك عجبتيهو  م شال عينورمنك اصلو الزول م يباريك
رهف في غيظ : شخص غريبجرئ جدا ،،،، بعدين الكل لاحظ لي نظراتو دي، كويس انو خطاب مافي شكلو قريب ميناس لانو عبيط زيها
الاء : ههههه والله زول زي دا كان بعاين لي انا كان طوااالي مسكتو ومشيت على المأذون
رهف : هههههه مجنونه بس  نسيتي حسومي ولا شنو ؟
الاء عاينت علي المدخل وقالت في حيره : جبنا سيره القط ،،، الراجل دا الجابو شنو ؟ من قبيل احنس فيه ابي يقعد اسي براااه جا
رهف : ههههه ارتاح منك شويه يلا امشي لي خطيبك ،،،،
حسام جا عليهم والاء طارت فيه طوالي : شايفه غيرت رايك يعني
حسام : خطاب اصر علي ،،، لكن لو جيتي ضايقتك ممكن امشي عادي يعني!!!
رهف مشت وخلتهم بتناقشو وعيونها بتفتش لي خطاب لسه وبقت مقلقه عليه ،،،
طلعت التلفون واتصلت بس م رد وذاد توترها ،،،فجأة لقت زول من خلفها مادي ليها كاسه عصير اتلفتت عشان تشوف منو،،،،،، لقت مهند مبتسم وقال ليها : شايفك م شربتي عصيرك
رهف في ارتباك : لا شكرا م عايزه
مهند عايز ينزل الكاس اتكب في فستان رهف  ورهف قربت تضربو من الغيظ وطلبت من هيلين تدخل معاها الڤيلا بس هيلين اعتذرت لانها مشغوله بالضيوف وقالت ليها امشي براك انتي عارفه البيت كويس م محتاجه يمشو معاك ،،،
رهف بقت تفتش عن الاء م لقتا يظهر طلعت بره مع حسام ،،،،
طلعت السلم بسرعه وهي ماسكه الفستان ودخلت الحمام غسلت الجزو الفيهو العصير ومشت عشان تعرضه للهوا بس لقت مهند في الهول واضايقت جدا لما شافتو تاني وعايزه تنزل وقف في طريقها وقال : لييي البت الجميله دائما شرسه ؟
رهف : عفوا  انت طبيعي ؟ لو سمحت انزل وسيبني في حالي
مهند : بقصد قربي من الهوا عشان فستانك الحلو يجف ،،،
رهف : لو سمحت ممكن تسيبني لوحدي
مهند قرب منها شديد لحدي م حست بحراره انفاسه بس رهف زحت وضربتو كف ونزلت تحت وهي متوتره وقلبها بخفق بقوه بس بعد نزلت اول سلمه شافت رجلين زول قداما،،، رفعت راسها لقت خطاب واقف وقال ليها في فرح : ملاكي  من جيت بفتش عنك ،،،ومالك متوتره كدا ؟ بعدين طالعه فوق براك ليه ؟؟
قبل م ترد رهف،،، مهند جا نازل السلم وهو كمان متوتر ،،،،
خطاب قال في دهشه : مهند ؟
رهف عاينت لي مهند في خوف وردت : ااانا
بترت كلاما ونزلت تجري في السلم بس خطاب سأل مهند في حيره : الحاصل شنو ؟
مهند : ولا شي ،،، انت اتأخرت مالك ؟
خطاب : كنت موصي لي هديه حمودي من بدري واتأخرت في المحل لانها وصلت متأخره ،،،
سكت خطاب مسافه وبعدها قال : وجودك هنا مع رهف صدفه ؟
مهند في عدم اكتراث : البنوته عجبتني وقلت اتعرف عليها عملت لي فيها بنت بنوت بس عرفت فهمها شنو  لو علي القروش المال كتير والحمد لله ،،،،
خطاب في غضب : انت بتقول في شنو ؟ رهف دي اشرف بت عرفتها  و
بتر كلامه بعد سمع اصوات عاليه تحت ونزل بسرعه لقي واحد ماسك رهف من يدها وبقول : رهف عماد ؟ مصيرو الحي يلاقي ،،،، فاكره يعني اذا خليتي بورتسودان م بقدر القاك ؟ بتحلمي صاحيه يظهر
خطاب قرب منو في غضب وقال : في شنو ي بشير الجاك ؟ التصرف دا م بليق بي واحد زيك
بشير بعد فك يد رهف : معليش ي خطاب بس انت م عارف البت دي عملت فيني شنو ؟ ياخ دي ا
خطاب : طيب اذا في اشكال م بتحلي بالطريقه البشعه دي انت زول محترم ياخ ،،
رهف بقت تبكي في تشنج وهي بتعاين للناس بتتغامز وتأشر عليها وشافت نظرات الشماته في وش روضه وميناس وحتي خوله ،، حنت راسا وبقت م فاهمه حاجه ولا سامعه شي وخطاب بتكلم براحه مع بشير والمعازيم بدت تتسحب حبه حبه لحدي م فضل ناس البيت بس بالاضافه لي مهند وبشير ،،،،
مهند قرب منها ومد ليها كاسه مويه وهو بقول : اهدأي كل حاجه بتتحلي!!
رهف شربت حبه مويه ومدت ليه الكاسه وقالت بصوت خافت : سيبني في حالي لو سمحت
مهند : دا جزاي عشان قلت اخفف عنك لما مشكلتك تتحلي ؟
رهف شالت الشنطه وعايزه تطلع وقفتها روضه وقالت : هاربه وين ؟ الحمد لله ولدي عرفك علي حقيقتك ومن حسن حظنا بشير جا امس من السفر وجا سلم علينا وعزمناه عيد ميلاد محمد عشان الله يكشفك وانا لو في محلك اطلع من هنا وتاني م اظهر ل اي زول
ميناس بقت تعاين لي رهف وبعد شويه جا خطاب ووشو متغير شديد وحاول يكون عادي بس فشل لانو الضيق واضح عليه شديد وم قادر يعاين لي رهف في وشها ودا خلي رهف تطلع وبشير يطلع معاها بس خطاب وقفو وهو بقول : موش خلاص الموضوع دا انتهي ؟
بشير : ايوه ،،،، كنت عايز اسأل رهف لييي عملت فيني كدا و
خطاب قاطعه وهو بقول : امي انتي وميناس لو سمحتو اطلعو فوق عندنا موضوع م خلصنا
روضه وهي طالعه مع ميناس : كان تتكلم ساي قدامنا ،،،، هو في شي نحن لسه م عرفناه ؟  بس ياريت تقتنع انت!!!!
ميناس بعد طلعت غرفتها اتصلت على تسنيم وقالت ليها : الغبيه الاسمها اشجان م جات وكمان قافله تلفونها وفشلت لي خطتي كلها،،،، بس ربك جاب بشير الجاك صاحب مهند داك واتاري بعرف رهف من بورتسودان واسكتي ساي من الحصل  ياخ الظروف خدمتني خدمه والله لو خططت ميه سنه م اقدر افكر في الحصل دا ،،،،، وانتظري لما بكره اوريك التفاصيل ،

خطاب اخد نفس عميق بعد طلعو وقال : ياريت لو اخدت رايي قبل م تعمل الدراما دي اسي خربت سمعه البت ،،، بعدين هي مريضه وبتتعالج وفاقده الذاكره…
بشير : معذور اصلك م شفت البت دي وحبوبتا استنزفوني كيف ياخ ديل قعدوني علي الحديده خلوني ابيع الوراي والقدامي وخسرت اهلي ،،، انا وزوجها المرحوم ابراهيم كنا اكتر ضحايا اضررنا منها
سكت مسافه وبعدها واصل : قلت لي فاقده الذاكره ؟ ههههههه رهف عماد تفقد بلد بحالها الذاكره والله م اصدق الكلام دا لو كنت انا نفسي الدكتور المسئول من حالتها
خطاب اصيب بنوبه احباط مدمره وبقي في حاله انعدام وزن ورهف واقفه بره مع مهند ،،،،،
خطاب م قدر يمشي نادي مهند وطلب منو يوصل رهف البيت وهي في حاله لا تحسد عليها ،،،،،،
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*