الجزء

الجزء الخامس من رواية اصبحت حياتي

الجزء الخامس من رواية اصبحت حياتي

وفي الجزء الخامس من رواية اصبحت حياتي يا تري هل سنري أحداث جميلة مشوقة مع ابطالنا ام سنري احداث حزينة ؟ دعونا نعرف إجابة هذا التساؤل في السطور التالية بإذن الله مع الكاتبة زين الشريف .

الجزء الخامس من رواية اصبحت حياتي

-سوء الظن إياكم وسوء الظن فإن بعض الظن إثم “
لما تفكر في حد انه مش تمام او شرير بسبب موقف انت سايرلك انت هكي اسأت الظن فيه وخذيت اثم ..
متاخذوش فكره ع حد الا لما تعاشرو….
متكونوش زي علي أساء الظن في سيرين وجرحها…هيا نشوفو شن دار علي ل سيرين🚶‍♀️🚶‍♀️🙃..
_______________________
خشن الصبايا وهل مريم وسيرين كانو في انتظارهم وحنو مريم اللي على غير العاده كانت في هدوء تام
طبعاآ هذا الهدوء اللي قبل العاصفه🤷‍♀️😂
وصفقو ودان جو مش عادي وتعرفن على بعضهن
عبدالرازق اخ سيرين: اللي تبي تمشي تلبس وفكني من الكركره ايوه بايتين عند عرب وسيريتن ماشيات
لبست سيرين وشيماء وطبعآ غاليه كانت في الاستثناء عبد الرازق مانعها تمشي يغير😂
والبنات لخرات قالن نقعدو معاها
ولبست اسماء وفايزه أم شيماء وغاده
علي: وهو قاعد على نا عيط ل عبدالرازق كذا معليش قوللهم هيا تقول يبو يباتو
عبدالرازق: باهي بشويش ياشاب توا نكلموهم وفنص في علي
علي: ماناقص الا هذا ازح
مراد: علي ارجوك اركب في السياره
وجا مراد اعتذر من عبدالرازق
عبدالرازق: ميهمكش عيب ضيوف عندنا انتو
مراد: ربي يكملك بعقلك مالا زي صاحبنا وضحك
عبدالرازق: ضحك حتى نا شر منه راه مغير اليوم هادي علينا ربك
مراد: يستر الله شكلي طايح بين اثنين مايحملو شي
عبدالرازق: ههه لالا متاخف بكل انتو ضيوفنا وفوق روسنا
مراد: تسلم
وخش عبدالرازق وقاللهم هيا وطلعن الصبايا وخش اخ مريم طلعها وشله كلها تبكي الا سيرين وشيماء اللي كان كل همهم انهم يطلعو مريم بدون مادير فضيحه😂
شيماء شدها عبدالرازق وقاللها انتن معاي ونسا سيرسن تهياله انها ركبت
وهي طاله في جنب مريم وتوصي فيها وترتب فيها وفي مكياجها وتهدي فيها
علي: وحق الله لونا متجوز راني جايبها صغار هذوم شن عرفهم لجواز
مراد: واخذ على روحك عاد انت ملكش دعوه بيهم وانت معيط معاهم😂
وصلت سيرين ومريم لسيارة العريس وهي تهدي فيها ركبتها هي واحمد
سيرين: احمد رد بالك منها هبلتنا
احمد: وهو يضحك والله مفروض تقوليها لها هي
مريم: كني نا قالولك علي خطافت الارواح ولا سحاره
سيرين واحمد: طربقوها ضحك
سيرين: فيش كنا نحكو نحنا سكريه فمك لعند توصلي لشقتك
مريم: مهي اصلن مزال حسسابه في شقه وسكرت الباب
وسيرين: تضكك ربي يعينك يا أحمد
وأحمد: اسكتي راه تسمعك خلينا نوصلو بخير وسلامه
سيرين:😂
علي : نا اللي نسوق يامراد
مراد: على كيفك
علي: عشان حسني بنفش غلي في سرعه
سيرين تلتفت ماتلقاش سيارة عبدالرازق ولقت روحها وسط الشارع وسيارات هلها مشن وناسيينها !!!!!
طلعت من رصيف بتشوف وفجأه سياره قريب خبطتها هي سيارة علي
علي: هذي كنها الزح ونزل هو ومراد
مراد : يشوف فيها وهو في سره انا شايفها من قبل
سيرين: رفعت عيونها وهي تقول يارب مايكون علي خوي
ورفعت عينها لقت شابين بحتت في علي اسفه بس كنت نرجى في خوي شكله مشا ومش فاطنلي
علي انتي ماشيه في زفه ؟؟؟
سيرين: اها بس مش عارفه شن صار كنت نركب في العروس مع احمد وشكلهم نسيوني
علي: كيف احمد ماقلكش !!
سيرين: لاشن يقول🤷‍♀️
علي: انه اللي طلعت مع العروس تركب معاهم
سيرين: لامقاليش!!
علي: نعنجد العيل الخبيث هذا شكلي بنطربقه الليله باهي توا شن بديري
مش عارفه وهلي فضو القاعه ٠بدو عيونها يمتلو دموع
علي: ألتفت لمراد وقاله تقولي اهدا عليه شوف شدار
مراد: وسع بالك وقرب على سيرين
سيرين رفعت عيونها ونصدمت !!!!!
وفي سرها : هواااا والله هو نحلم انا ولا شن الحمدالله شفته الحمد الله…
مراد: باهي متقدريش ترني على هلك
سيرين: طولت وهي تشوفله : لالا تلفوني مع احمد هو وتلفون مريم
علي: نعنجد أحمدالزفت هذا ونا سيارتي باب واحد بس
باهي أركبي مع مراد وتوا يوصلك ونا توا نرن على واحد من جماعه يرد علي
مراد : تمام معنديش مشكله
سيرين: بس نخاف
علي بدون مايخليها تكمل: عاجبك باهي مش عاحبك خليك فشارع هن 🤨
سيرين: مصدومه من كلامه !!!
علي: مش ناقصني تمثيل بنات
مراد: علي كنك انت مع بنت الناس وشد سيرين من يدها وركبها في سياره وقاللها فوتيه هذا مطرشق
سيرين: عيونها معبيات دموع ركبت وسكرت الباب وهي مصدومه في خاطرها تهزب احمد وعلي بس سكتت عشان خاطر مراد 🤷‍♀️
مراد: ركب وعيط لعلي قاله دبر راسك انت اليوم فاصل بكل ومشا في سرعه كبيرا
علي: رن ع صاحبه رد عليه عشان ياخذه..
_______________________
اما أستبرق في الوقت هذا قاعده في الحوش وأختها : الاسبوع الجاي جامعتنا زعمه اول يوم شن نلبس
أستبرق: وهي تفكر في نعيمه وخوها وشن بتتصرف
البسي اي شي انتي خايله في كل شي ..
اختها خيرت ياخيتي …
استبرق: مشي متضايقه بس شدت بطانيتها ورقدت وهي قلبها موجوع
________________________
اما مريم ماشيه في الطريق وجوها سمح فتحت الروشن
احمد: يبنتي صقع كنك انتي
مريم: جو تهبني الريح😂😂
احمد: والله مجنونه
و ولعو اغاني وعايشين في جو رومانسى واحمد ولا كأنه سيب سيرين
اما سيرين: كانت فطريق ميته من الصقع لانهم كانو منزلين الرواشن والريح تهب فيها وهي كل شوي دفي روحها بيديها
مراد: برم عيونه شورها عشان يتعذر ع تصرف عللي
سرح فيها وهي ميته من الصقع و خصلات من شعرها طالعه من الحجاب وتهز فيهم الريح وقعد يشوفلها وكيف هي جميله ويحاول يذكر وين شايفها
سيرين: شالت عيونها لقاتته يشوفلها انحرجت وطبست راسها وهي تفكر لو عبدالرازق او علي عرفو ح يذبحوها 😥
مراد: شال عيونه وسكر القزاز اسف ع شي اللي قاله علي هو هكي عصبي ومعندش اسلوب بس هو طيب راه
سيرين: طولت وماردت ممكن نطلب منك طلب
مراد: تفصلي اكيد
سيرين: رفعت راسها شور مراد وهو قلبه بيطلع من جمالها
سيرين: ارجوك انكم متقولو لحد اني مجيتش مع احمد
لان هلي لو عرفو ح يسيرن مشاكل بينههم وبين احمد ونا منبيش مريم تزعل في يوم زي هذا ارجوك
مراد: وهو سارح فيها وهي تترجا فيه اكيد متخافيش
سيرين: شكرآ
مراد: العفو وسامحينا حطيناك في هالموقف
سيرين: ولا يهمك صار اللي صار وخلاص
مراد: انا…..وسكت
سيرين: انت شنو …
مراد: انتي من درنه صاح !!!
سيرين: اها
مراد: اها اصلن نا خوالي هنا حسيت اني شايفك من قبل ماتفهمينيش غلط بس والله حسيت اني شايفك من قبل
سيرين: وهي فرحانه انه اذكرها …قررت انها تثقل
يمكن درنه صغيره يمكن شايفني في اي مكان.
مراد: يمكن اسف ازعجتك بس عادي نولع اغاني؟؟؟
سيرين: لا ازعاج ولا شي عادي ..ولع اصلن كنت مكسوفه نقولك حط اغاني
مراد: ضحك متنكسفيش عادي راه اهم شي تنسي الكلام الجارح اللي قاله علي
سيرين: مقالت ولا كلمه قررت تسكت
اما مراد: كان يبي يمدح جمال سيرين ب أغنيه وقعد يدور في اغاني واختار اغنية علي الديك (القالب غلب)
وحطها ع جزء القالب غالب 😂..
وقعد سارح في سيرسن وكل شوي يشوف االطريق ويرد عيونه عليها وهوو يحس انه كل كلمه في الاغنيه عليها وكإنه مغنيها علي لها
سيرسن: مستغربه من الاغنيه وذوق مراد وساكته
وكملت الاغنيه ومراد هلب سيارات الزفه كلهن وتما هو اول سياره عشان لما ينزل سيرين هلها ماينتبهو انها كانت معاه لانهم كانو في الاخير
ولع اغنية حسين الجسمي اهواك ياشيه القمر وغنا معاها أهواك وهوا لونك ويبحت في سيرين
سيرين انتبهت خافت وقعدت تعدل في قعدتها
مراد: انتبه انه بالغ ف قرر يسكت وخلا السرعه ع البطيئة لانه كان هالب السيارات بوااجد
سيرين: انت هذا ذوقك في الاغاني
مراد: تعجب واخيرا حكت
لالا هن جن صدفه
سيرين: انا لوو نقولك شن الاغني الي نفضلهم تضحك
مراد: شن هم
سيرين: الشيلات ٠😂وضحكت وهو ذاايب مع الضحكه
مراد: سبحان الله نفس الشي كنت بنحط عليهن خفت تقولي كنه متوحد
سيرين: 😂😂لا حط وانت مطمن وفعلا حط الشيلات
وهو فرحان
سيرين انتبهت انها خذت راحتها زياده فقررت انها تثقل شوي
بس جت الشيله اللي تحبها مقدرتش تقااوم
وبدت تغني معاها
انتهت فرحة سنيني يوم فارقني ضنيني ……واضرم النار بكنيني!!!
مراد: عيونه عليها وهو مصدوم وفي عقله ع اثر جماال الصوت يجنن اخرى
سيرين انتبهتله حطت يدها ع فمها وخدودها نحمرو
انا اانا اااسسفه
مراد: عليش تأسفي والله صوتك حلوو بكل ياريت تكمليها
سيرين: مقدرتش نقاوم الشيلات نقطة ضعفي
مراد: ع خاطر انا وصلتك عشان خاطري كملي صوتك جميل مشاءالله
سيرين: بس
مراد: مغير كمليها بس وخلاص
سيرين: ليت قلبي قد عصاني يوم حاكاني وأجااانييييي
مراد كمل معاها الحسايف في حناني والوفا فيني وذوقي يووم قلت انه حبيبي واعتبرته من صيبي غاب رغم انه طبيبي راح وين علاج توقي ..
وضحكو مراد: جتتت جميله لو نزلوها ننشهرو
سيرين: شكلي خذيت راحتي انااا ماتخذش عني فكره انا مش هكي بس مش عارفه شن صارلي
مراد: عليش انتي شن درتي اصلن المحترمه معروفه راه ماتبررري تصرفاتك العفويه حتى انا زودتها تقول نعرفك من سنين
سيرين ضحكت ضحكه خفيفه وسكتو
ووصلو ودرس في جرتهم علي في سيارة صاحبه
ومراد فتح الباب ونزل لعلي
علي متقول لحد انه احمد سيب البنت فكنا من المشاكل
علي: غير قولها لها هي اصلن هن اساس المشاكل نعنجد البلوه وخلاص
مراد: علي انت كنك اليوم راه والله نمشي ونسيبك راه نرفزتني ونا من صبح ساكتلك البنت هي اللي قالت منبيش نسبب للعروس مشاكل
علي : انكسف وسكت
مراد: سامحينا هذا حمار مش عارف كنه اليوم
سيرين: وهي خانقتها العبره تسمع كلمه وحده تنفجر
متعتذرش بداله هو هكي وضح تربيته مش مظطر انت تعتذر عنه
علي: وجعاته وفي نفسه (انتن اللي خليتني هك…… )
قتلك اسمعي راه واصله معاي ع الاخر متخلينيش نرتكب فيك جريمه وقعد يخبط ع السياره وصل احمد ومريم نزل احمد وسيرين فتحت الباب وهي منهاره بدموع ومراد طارتله من علي
نزل احمد مجرد مانزل جاته سيرين: تفوه يالي منكش متربي تسيب بنت في شارع مش عارفه انا مريم كيف حباتك وانت مفيكش ذرت رجوله مش مسامحتك ع كل كلمه سمعته من التافه هذا حسبي الله ونعم الوكيل فيكم
انا مش ح نتكلم ع خاطر مريم …..
وخشت وهي تبكي 💔💔😭
اما احمد خاف ان مريم تكون سمعت وغم ع الوضع….
مراد وجعااته من علي ركب سيارته وطلع في سرعه…
علي: في جرته تي وين ماشي انت
مراد: لمكان مش شورك بيه وخليك انت وعصبييتك وطلع في سرعه
علي: شن درت نا الزح مقدرتش نمسك روحي وطلع في جرته بسياره
يامراد عشان خاطر امي وامك مشي معاي هاليوم بس واللي تبيها حاضر
مراد: خذا نفس ح نرد بس متحكيش معاي ولا كلمه
علي: اللي تبيها حاضر
مراد: لف السياره في سرعه ورد للقاعه
وخشو العرسان وخشت سيرين معاهم
ووصلو هل مريم وسيرين
شيماء جت تجري لسيرين: كنك عيونك متنفخات باكيه ولا شن !!؟
سيرين: صار معاي شي عمري ماتخيلته وهي دموعها ينزلو !’💔
اسماء وغاده: خشو كنك سيرين عليش تبكي ؟؟؟
شيماء: متحملتش تفارق مريم🥺
اسماء: بلاش هبال ناس يضحكو علينا خشن للحمام وعدلن ارواحكن ع بال ماحكينا نحنا مع مريم ونخشو كلنا …
وفعلن غاده واسماء مسكو مريم وقعدن ينصحن فيها
وشيماء وسيرين مشو عدلو ارواحم وطلعن احسن من قبل🤤❤❤
وخشن كلهن للقاعه والعيون عليهن وخش العريس ودارو جو مش عادي بكل
وسيرين كانن العيون عليها
وجتها اكثر من وحده سالن عليها 🤷‍♀️
شيماء: احكي شن صارلك
سيرين قولي مع من ركبت
شيماء: مع احمد
سيرين: الحقير عدا وسيبني وحكت كل شي لشيماء
شيماء: يوووم هذا كله صار الحمدالله ربي جمعكم وك العاده بهدلتي روحك😂😂
سيرين: منقعدش سيرين لو متهبدلتش😂😂
ومشن يتفقن مع ام علي وبناتها وام مراد معاهم
حنان: نجمه شفتيها سيرين
نجمه: تبارك الرحمن جماال وأدب هي واللي معاها ربي يحفظهن
حنان : شرايك فيها ل علي
نجمه: مشاءالله عليها
حنان: اذكرت انه علي كاره السيره هذي وعبست😥
نجمه؛ كنك
حنان: البنت ماتعوض غير وليدي كااره سيرة الجواز ينعلي يانجمه شوفيها لمراد البنت ماتعوض شفت اكثر من وحده تسأل عليها
نجمه: يسير خير انشالله نروقو ونضمو أمورنا وربي يكتبها لنا
حنان: امين يارب مهم انها متطلعش منا حتى مراد وليدي
نجمه: تسلمي وماشالو عيونهم عن سيرين
…………………
وانتها الفرح وطلعت سيرين وشيماء وغاده واسماء وفايزه يروحو ع أقربائهم عشان يجو ثاني يوم ل مريم يلبسوها البدله العربيه ويشوفنها شن ناقصها ويحضرن الصباحيه ويروحن…
سيرين وهي طالعه عيونها لوطا هي وشيماء
مراد: شوف ياعلي ادب البنات وانت ماعقبت عليها كلمه والله خذيت ذنب دموعها..
علي: حس بذنب خلاص موضوع وصار🤨
مراد: عيونه ع سيرين 😍
وهي تركب ولا حتا رفعت عيونها طاحت شنطتها عبدالرزق: نعنجد هكي وخذا شنطتها وسكر الباب بالقوه
وحمزه اخ مريم يعطي في نظرات وجوهم متكهرب
ادم بعد حكاله علي: احمدو ربكم اللي البنت سكتت ع كلامك ياعلي كان هكي راه صارت جنازه هنا شكلهم عصبيين
علي: فوتهم ياراجل موضوع وانتهى وسكروه😡
مراد: ماأعتقدش ينتهى
علي و ادم: شقلت
مراد: شي غير انتو اللي مركزين معاي
اما علي كان يرجا في ثاني يوم عشان يمسح كبده في احمد ويعاقبه
يتبعع……

لقراءة الجزء التالي : الجزء السادس من رواية اصبحت حياتي

لقراءة الجزء السابق : الجزء الرابع من رواية اصبحت حياتي

للإطلاع علي فهرس اجزاء الرواية : جميع روابط اجزاء رواية أصبحت حياتي للكاتبة زين الشريف

جميع الحقوق محفوظة للكاتبة زين الشريف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى