وفي الجزء الخامس من رواية زوجة المغترب دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بيروحاء.
الجزء الخامس من رواية زوجة المغترب
اتذكرت اليوم الوحيد الطلعنا فيوو سوا قبل ما نتزوج..
كنا ماشين برجولنا عشان هي اصرت على كده..
ولمن جينا عايزين نقطع الظلط.. مسكت يدي قويي وجرت وشدتني معاها.. وهي مغطيه وشها بيدها التانيه..
وقتها ضحكت وقلت والله ح اتزوج طفله شكلي
قطع ذكرياتي صوتها وهي بتقول متين جيت ما شفتك؟ وهي بتقيف على حيلها..
قلت ليها ما طولت.. بتكوني م سمعتي الباب عشان صوت المطر.. قالت لي اهااا.. طيب
ارص ليك العشا؟؟
قلت ليها لالا اقعدي عايز اتونس معاك بس..
كان باين عليها علامات الاستغراب.. بس بسرعه اتحولت لي ابتسامه.. وهي بتقول طييب
…………………
شووق.. يا بت شووق
نعم يا امي سامعاك..
لي ساعه بناديك سامعه شنو؟؟ كلو من السماعات المركباها اربعه وعشرين ساعه دي .. بتطرشي يا بت والله..
اخدت نفس وقالت .. دايراني في شنو يا امي؟؟
عايزه جوالك ادق لي رغد.. عشان م عندي رصيد..
يا امي ما ممكن تدقي ليها كل يوم كدا.. وهي يادوب في شهر العسل.. خليها تنبسط بحايتها هي يادوب عروس جديده..
اتضاقيت وبحزن كده ردت عليها كويس
……………….
اصبحنا تاني يوم ونفس روتين امبارح.. نظمت البيت والروتين اليومي داك..
واقفه بعدل لي وائل في لياقتوو وانا لابسه توبي ..
قال لي انتو ما بتزهجو من بعض يومي كده تتلاقوو..
قلت ليو لالا بعدين انا زوله وناسه انت بس ما عارف..
هنا فجاءه مسكني من كتفي.. جسمي كهرب.. وحسيت قلبي دقاا..
وهو شكلو حسا لأنو قال لي مالك؟؟ ما عايز اعمل ليك حاجه م تخافي..
وفكاني بدون اعرف كان عايز شنو؟؟
حصلت لحظه صمت بعدين قال انا طالع..
طلعت وراو..
فطومه قالت انها ماشه السوق تشتري شويه ملابس..
سألتها ليه؟؟ قالت انوو ساي ونفسها في هدوم جديده وكده ..
بس بعد شفت الفساتين ال جابتها.. عرفت انو في سر وراها
م كانت عايزه تقول في الاول بس بعد زنقتها.. قالت انو ولد بحبها وجاي يخطبها رسمي.. وبعد تخلص جامعتها يتزوجو و كده..
واصلت وقالت لي .. ماف زول عارف يا رغد .. ما تقولي طيب؟؟
قلت ليها اكيد
ابتسمت ليها وبقيت افكر .. لو كنت خليت موضوع العرس ل بعد اخلص قرايتي ما كان احسن لي؟؟ .. كنت ع الاقل فهمت الحياه دي ماشه كيف
وما بعيد كنت حبيت واحد واتزوجنا ونحن متفاهمين
قالت لي بالمناسبه م كملتي؟؟
قلت ليها ايي المطر قاطعنا
قالت لي اهااا
الحصل يا ستي انو العرس تمم.. وتاني يوم طوالي جيناا هنا قطر
بس انتي عارفهه الحياه م دايما ورديه.. ومرات الزواج التقليدي بكون مشكلهه خصوصا لو ماف تفاهم
اول مشكله بيناتنا بدت لمن قال لي جعان قومي اعملي لي الغداء..
وانا ك زوله وسطانيه في بيتنا..
م كنت بدخل المطبخ وحتى لو دخلت بتفرج بس
امي وشوق هم ال كانوو بطبخوو وبعملو اي شي ..
انا ومعزه دورنا كان ترتيب وتنظيم وكده
دخلت قوقل ب رغم اني كنت عارفه كده+ كده+ كده بدوك الحاجه الفلانيه.. بس المقادير بالضبط.. ولو حصل خلل اعالجو كيف والتركات دي م كنت عارفه
طلعت ليو شيي كده بجد لو تقعدي جعانه م تاكليو
ف اتشاكلنا واصواتنا عليت..
والزعلوو زياده اني بكراتوو طوالي حرقت ليو قميصوو لاني م بعرف اكوي كويس ..
ذنبي شنو اذا كان شوق بتكوي لينا.. ومازن اخوي بكوي هدومو براو؟؟
انا ما عارفه يا فطومه والله غلطانه انا .. ولا غلطان هوو ولا منو بالضبط
وحلاا للموضوع دا طلبت منو
الطلاق
………………..
عدت الايام ويوم خطوبتي قررب .. كنا شغالين تجهيزات.. ورغد كانت طبيعي داخله مارقه من بيتنااا..
في الفتره دي علاقتها مع مزمل قوت نوعا ما ..
يمكن رغد بتتعامل معاو ك اخ.. وبتتعامل بعفويه..
بس مزمل لا وال شي دا كان مخوفني شدديد..
واجهتو كذا مره بسس كان دايما بنكر وبقول لي انتي ناسيه انها متزوجه؟؟ ماف شي بيناتنا اكيدد..
في اليوم دا كناا في المطبخ انا ورغد سوا بنعمل في كيكه برتقال
جانا مزمل وهو بقول.. رغد وفطومه في المطبخ..؟؟ امشي أسأل الحجه نطلب شنوو من حسيي..
فلقتوو بي كبايه بلاستيك جمبي وقلت ليو ما يضحك
اتلفت لي رغد اللقيتها بتضحك..حمرت ليها سكتت..
قال لينا اساعدكم؟؟ اصلا زهجان ماف موضوع..
قلت ليو لا ما كان نفسي يتواجد في مكان فيو رغد
بس هي قالت ليه لا؟ خليو ياخ مفيد..
وفعلا بقينا شغالين التلاته .. او بالأحرى الاتنين ومزمل بشغل فيناا..
الجرس دق .. قلت ليهم انا بفتح وطلعت.. وصدمني شوفهه وائل في الباب ..
حاولت امنعوو يدخل.. بس هو اندفع قدامي وهو بقول وين رغد؟؟
وبدون يستناني اجاوبو مشا ع المطبخ ووقف في مكانو وهو بعاين وانا ما شايفهه شايف شنوو بالضبط؟؟
قربتت بخطوات بطيئة..لحدي ما بقيت وراهو تماما.. وعاينت لقيت رغد ومزمل واقفين عادي.. بس يمكن عشان المساحه بينهم ما كانت كبيره
رجعت اعاين ل وائل ال وشوو بقا غضبان شديد.. وبصوت مخنوق قال رررغد
اتلفتت عليوو وقالت وائل.. جيت بردي..
قال ليها ارح البيت..
قالت ليو طيب بس اكمل الكيكه واجي..
هنا كورك لدرجه كلنااا اتهجمنا. وقال ررغغددد يلا قداااامي..
ختت ال في يدها وطلعت وقفت قداموو..
بس هنا مزمل اتدخل..
يتبع ……..
لقراءة الجزء التالي : الجزء السادس من رواية زوجة المغترب
لقراءة الجزء السابق : الجزء الرابع من رواية زوجة المغترب
للإطلاع علي فهرس أجزاء الرواية : جميع روابط اجزاء رواية زوجة المغترب للكاتبة بيروحاء
جميع الحقوق محفوظة للكاتبة بيروحاء .
