وفي الجزء السادس من رواية أنت عدوي للكاتبة كيندا ماذا يا تري سوف يحدث مع أبطال الرواية من مواقف جديدة وهل سيكون هناك شيء مفاجأ علي غير الحسبان سوف يحدث معهم أم لا ؟ كل هذا وأكثر سوف نعرفه في السطور التالية بإذن الله .
الجزء السادس من رواية أنت عدوي
أيهم …. (( بوجه متعصب وواحمر )) خوووووووشي وسكري الباااااااب خشي … وفي لحظه الا سكرت فيها كنزي باب وهيا تبكي وخايفه جي زيد وكان وجهه متعصب ومتضايق ومايشوفش في شي قدامه اساسا من غضب …. واول ماشافهم يتعاركو جي يجري وفك بينهم وقال ….
زيد …. (( خلااااااص)) …. شن هدا ؟؟ مافيش احترام لناس الا تسمع او لااي شي … من انت وكيف جاي تتهجم علينا هكي …
شعبان … (( بصوت متعصب )) … اني جاي ناخد خطيبتي ونطلع والاخ هدا هوا الا بدا يتهجم ..
وفي اللحظه الا بيتكلم فيها ايهم بوه شبحله وقاله …
زيد … خلاص أيهم هدا قبل كل شي ضيفنا وماتعودناش نتصرفو مع اي حد وصل لحوشنا هكي … تفضل داخل نتفاهمو …
وخش زيد وشعبان وأيهم وكنزي كانت مقعمزه تبكي علي صالون الا في وسط حوش الا يلاقيك في باب مدخل طول … واول ماشافها
وهنا أيهم شبحلها طول وقاللها …
أيهم … كنزي خشي لدرك انتي ..
بوها … خليها معليشي موضوع يعنيها ولازم تسمع كل شي وننهو كل شي هنا .. تفضل انت ارتاح …
وقعمزو كلهم علي صالون علي خشت ورده فجأءه ولقت ولدها وجهه احمر ووجهه مضروب وتاني حوايجه ملخبطات وحست ان كأن صار شي في غيابها … ووكيف بتتكلم شبحلها زيد وقاللها …
زيد …. ورده خشي انتي ديرلنا قههوه من فضلك ولما توتي نادي أيهم يجيبها …
شبحتله ورده وكانت عارفه ان زوجها يوزع فيها ومايبيش يكون ليها دور في الحديت الا رح يصير … فامشت طول بدون نقاش … وللحظات عم سكون في مكان وبعدين تكلم بوها وقاله …
زيد …. نبي نفهم منك سبب مجيئك هنا … هل جيت بناء علي جدك او حد تاني او بنفسك هكي ؟؟
شعبان … هادي خطيبتي ياعمي ولولا تصرفاتها طايشه الا مش مفهومه كانت اليوم رح تكون زوجتي وهيا بنت عمتي وامها طلبت مني نمشي ونروح بيها ونقنعها قبل ماموضوع يكبر …
زيد …. واني انهيت موضوع مع جدك خلاص … هادي بنتي قبل مااانتم تتقاسموها بينكم .. وجدك قال الا عنده وقالك القرار ليك واني مستحيل لاا اني ولا غيري حد يغصبك علي حياه انتي رافضتيها … حاليا القرار عندك يابنتي …. اما انك ترجعي لامك وتوافقي تتزوجي وفقا لي هما شن خططولك وتكملي حياتك معاهم عادي …. او ترفضي وتنسي امك واي شي يربطك بيها بشكل نهائي … وهدا قرار جدك وانتي حاليا اختاري باش ينتهي جدال العقيم هوا … واني معاك في اي شي يسعدك ….
كنزي (( مسحت دموعها وقالت )) … يعني جدي يخير فيا بين امي وبين حياتي ؟؟
شعبان …. كنزي مشاكلنا بسيطه تنحل ببساطه فاماكانش في داعي تتصرفي هكي انتي هكي بدمري نفسك وامك وحياتنا الا رسمنها مع بعض ..
ايهم …. (( بوجه متعصب علي صوته وقاله )) … ماتحاولش تضغط عليها لو تبيك ماااااكانتش هربت اساسا …
شعبان (( رد بعصبيه )) … وانت من تكون اساسا باش تتكلم وتخش في موضوع وحارق نفسك عليها ؟؟؟
ايهم …. (( وهنا ناض وبيضربه )) هادي تكووون من تكون بالنسبالي … انت شن ليك عندهاااااا ؟؟؟
زيد …. خلاااااااااص … هدا خوها … وهدا اعتقد مش موضوعنا …
وهنا كنزي قامت عينها في عين أيهم اول مازيد قال خوها وقعدو يشبحو لبعضهم شوي بعدين قطع بوها افكارهم وقاللها …
زيد …. القرار يعودلك يابنتي ياريت تعطينا رأيك باش ينتهي هالموضوع وينفض …
كنزي …. (( عيونها رجعو دمعو )) …. وماما … وينها … وافقت انها تبعد عليا ؟؟
شعبان …. امك تعرف انك مصلحتك معاي ومعانا …
زيد …. مواضيع زي هيا اطلع منها انت لو سمحت … ناقش موضوع الايخصك فقط … كنزي اعطينا الاجابه واني موافق حتي لو قوتيلي رجعني اليوم لعند امي … ووعد مني اني اول واحد يحط ايده مع شيخ الا بيقرا الفاتحه لو انتي وافقتي ….
وهنا وبرغم ان ورده قعدة تنادي علي أيهم باش يجيب القهوه الا انه ماكانش اصلا يسمع لشي الا لاجابة كنزي ويشبحلها … وهنا وكنزي قامت راسها ومسحت دموعها وناضت لدارها …. فاعرفو انها ناضت باش تمشي لدار وتاخد شنطتها ولبسها وترجع لامها وخطيبها …. فاناض أيهم بعصبيه وسيبهم ومشي للمطبخ وكأنه عاصفه … وخش للمطبخ وقعد تواني وبعدين طلع وقعد واقف يشوف في كنزي طالعه من دار …وايديها فاضيات مافيهمش اي شنطه … وفجاءه بدت خطواتها تقترب بااتجاه شعبان وحطت دبلته قدامه علي طاوله الا كانت في ايدها اول ماجت ونحتها في شنطتها لما وصلت … وقالتله ….
كنزي …. ان شالله تلقي البنت الا تستاهلك وتكون احسن مني …
ومشت وسيباته … ولكن شعبان ناض وقاللها ….
شعبان …. بس اني نحبك ياكنزي وشاريك … اني عمري ماغلطت معاك في شي … ومستحيل نتخلي عليك … اني عارف ان الكل ضغط عليك حتي جدي بس اني مش زيهم ومش رح ناخد هدا جاوب ولا رح ناخدها دبله …
أيهم …. اعتقد هكي وصلاته معلومه يابابا … والا يحكي فيه هدا زايد …
زيد …. اعتقد كنزي اعطاتك المعلوم يا شعبان ياريت مانكبروش موضوع اكتر … وتكون وصلت المعلومه وتوصلها لجدك …
فاخدي بعضه شعبان بدون مايزيد حرف وخلي دبله علي طاوله وطلع …. بينما كنزي مشت للبلكونه وحاولت تمسك دموعها الا خانوها ونزلو للاسف .. لان هالقرار كان اصعب قرار خداته في حياتها …. اما ترضي امها واهل امها وتدمر حياتها او تكون انانيه وتنقد حياتها وتنسي امها وكل شي يربطها بيها …. وللاسف كنزي ماعرفتش تكمل في هالكدبه اكتر …
وفي اللحظه هادي قعد يشبح زيد أيهم وقاله …
زيد … اني مش رح نواسيها لان نعرف موضوع امها قداش حساس ليها وورده نفس الشي … بس انت خوها اني متأكد … وهادي اختك … حاول تتكلم معاها وتهديها …
أيهم …. تمام …
وطلع للبكونه متع وسط الحوش ودف كرسي وقعمز قدامها …
أيهم …. علاش تبكي توا ؟؟ انت الا رابحه صدقيني … امك اصلا انانيه ومافكرتش الا في نفسها بدليل خلاتك في موقف زي هدا …
وهنا ناضت كنزي زي مجنونه وقالتله …
كنزي (( بوجه متعصب )) …. انت من تكون اساسا باش تتكلم علي امي هكي … انت شن تعرف علي امي ولا الا شافاته من امك الا لفت علي بابا لين خداته وطلقت امي وكانت سبب في ان حياتي وحياة ماما تدمر … للاسف مش امي الا كانت انانيه … امك الا انانيه سيبت كل رجال العالم ونقزة لبابا … وبعدين انت علي اي اساس اساسا تتكلم معاي من عطاك هالحق ولا بالك صدقت انك خوي … لا حبيبي فيييييبق… انت ولد الا دمرت حياة امي وحياتنا …. ياعني انت عدوووووووي مش خووووووي زي ماانت فاهم تماااااام وواخر مره نسمحلك تتكلم علي امي هكي او تتدخل في حياتي او شي يخصني …
ونفضت الكرسي ومشت وسيباته وخشت لدارها وسكرت بابا عليها بالمفتاح طقه …. بينما أيهم قعد مصدوم من كلامها الا تقول ساعقه نزل عليه لانه ماكانش ليه اي دنب في الا سمعه منها وماكانش هدفه الا يخفف عليها فقط …. وبعد مافاق من صدمة كلامها … ناض قربع الكرسي وطلع … فاناده بوه بس ماكانش يسمع لحد وقربع الباب وطلع …. وزيد واقف يشوفلهم ومصدوم من ردود فعلهم … علي طلعت ورده من دار وقالتله …
ورده …. شن صوت هالباب … أيهم طلع ؟؟ شن مايبيش يأكل شن في هالنهار الابيض هدا ؟؟
زيد …. اني بعته لمشوار كنت اني مفروض نمشيله بس حاس نفسي تعبان فابعته …
ورده …. باهي علي الاقل خليته يفطر راهو من فطور صبح …
زيد … ومن عنده نفس ياكل يعني … خلاص قيميها ماكله في تلاجه ولما يروح توا يسخن وياكل … اني بنخش لداري نرقد حاس نفسي تعبان وضغطي عالي …
ورده …. ماشي حبيبي خش ارتاح سلامتك يارب
وخش زيد لدار وورده لحقاته طول لدار وسكرتها …. بينما كنزي بعد ماسمعت ان أيهم طلع وهدت حست انها كانت قليلة ادب وزودتها معاه حتي ولو انه مفروض ماتكلمش علي امها هكي .. ولكن هيا قالت كلام اقسي من هكي علي امه ويكفي هوا ماكانش ليه دنب في الا صار …
وفاتت ساعه ورا ساعه وعم الهدوء في حوش وكنزي في فراشها في ظلام وتفكر … وزيد وورده هب الهدوء في دارهم وأيهم مارجعش للحوش … وساعه ورا ساعه غطو كلهم في نوم …. ومافاقوش الا مع ساعه تمانيه علي بوها لابس وماشي للخدمه ويكلم أيهم ….
زيد …. ايهم ولدي نوض … علاش راقد بحوايجك هكي ؟؟؟ امتي روحت وشن الا خلاك متبهدل هكي تعاركت مع حد ؟؟
أيهم …. صباح الخير بابا … لا لا مافي شي بنخش ناخد دوش ونبدل … روحت موخر وتلوحت رقدة طول ..
زيد … تمام خش قبل ماامك تطلع وتشوفك هكي … اني ينطلع عندي محاضرات نعطيها ونجي … وبعدها نقعمزو وتحكيلي شن في امس علاش تعاركتو مع بعض … او نمشي نسألها بروحي ..
أيهم … لا لا بالله عليك فوته موضوع خلاص وبرا توا وبعدين نتكلمو (( وابتسمله باش يطمن ان مافي شي مهم ))
زيد …. تمام خش لدوش واني طالع … في امان الله …
وطلع زيد وخش أيهم لدوش … وهدا كله
أيهم …. تمام … وناض للحمام بينما ورده ناضت وخشت للمطبخ طول بعد مالقت مكان أيهم محوس فايعني روح وفاق …
وبدت توتي في فطور وبعدها طقت علي كنزي … الا بمجرد ماطقت عليها طلعت طول … واستنت أيهم لين يطلع من دوش واول مافتح بابا الحمام وطلع جت عينها في عينه وبعدين تحشمت ونزلتها طول وخشت للحمام بعد ماسيبها ومشي بدون اي كلمه …
وبمجرد ماخشت للحمام وغسلت وجهها ومشطت شعرها وواست وشاحها طلعت وقعمزة علي صفرة الفطور معاهم …
وهنا وقعدة عيونها في صونيتها بدون ماتنطق اي كلمه لحد ماقالتلها ورده …
ورده … وليدي خيرك امس تقول ركبك ميتين عفريت وطلعت ؟؟
أيهم …. ولا حاجه موضوع وخلاص …
ورده … قالي بوك .. خيره وجهك ازرق هكي ..ّماتقوليش هدا من امس قص ايده ان شالله .. ماهو قالي بوك تعاركتو … كاني حضرته بس …
أيهم …. خلاص ياامي مش وقته هدا … الا صار صار …
ورده … يالله معليشي كنزي زي بنتنا … وزي وخيتك تستاهل …
أيهم … (( وهنا نفض الكرسي وقاللها )) … الحمد لله اني شبعت … معليشي ياامي بس كانا تطيبتي قهوه تطلعيهالي …
وطلع للبلكونه طول بدون مايقيم عينه في كنزي … بينما ورده شبحتلها وقالتله …
ورده … خيره هدا شن بلاه من امس تقول واحد قام شخص وحط شخص ؟؟ علي عموم زوة القهوه وصفره واتيه هاتيها بالله من مطبخ توا نطلعلها .
كنزي … حاضر …
وناضت مشت للمطبخ جابت الصفره وحطتها علي طاوله … ووكيف بتنوض ورده ترفع صفره شرين تلفون الارضي فاقالت ورده …
ورده …. اوووف هادي اكيد لطفيه اختي … بالله كنزي طلعيله القهوه خلي نمشي نرد قبل يفصل لان الارضي ماعبيتلاش اشتراك مازال باش نعاود نتصل بيها وماعنديش رنه علي موبيلي …
كنزي … تمام خالتي بري انتي توا نطلعهاله …
وخدت كنزي صفره وهيا تبلع في ريقها من خوف والاحراج من كلام الا قالتهوله … واول ماطلعت للبلكونه شبحاته يدخن بشراسه وواضح انه متضايق جدااااا واول ماشافها … طفي دخان بسرعه علي طفايه وتلفت يشبح قدامه وكأنها مش موجوده …
فاحطت القهوه ومشت شوي وبعدين وقفت وقالتله …
كنزي … اني اسفه … اني امس كنت قليله ادب معاك بس اني اعصابي ماكنتش متحمله … اني نكرر اعتداري مره تانيه …
ولكن أيهم ماردش عليها بي ولا حرف … فاقعدة واقفه شوي وبعدين حست بالاهانه لما مااعطهاش اي اهميه لاعتدارها فامشت طول وخشت للمطبخ باش تحس ان الموضوع مش مضايقها اصلا وانها دارت الا عليها … وبدت تغسل في معايين … ووهيا كيف كملت غسل المعايين وتمسح فيهم خش عليها ايهم بالصفره وحطهم في اللودينو … وبعدين خدي طفايه بزعها وبدي يغسل فيها … فااهنا قربت منه وقالتله …
كنزي … هات منك … اني مش رح نخلي خوي يغسل واني موجوده …
وهنا قطعها وقاللها …
ايهم … عدوك قصدك … انتي اكيد انطقتيها غلط …
كنزي …. اني اعتدرتلك خلاص قوتلك اسفه ..
أيهم … واني ماقبلتش اعتدارك … تمام … اني هنا قاعد فتره محدوده وراجع وين ماكنت … صدقيني مش رح نضايقك او تشوفي من عدوك اي موقف … ولو تبي نتبتلك ارجعي قولي لخطيبك يجي وياخداك ومش رح نوقفه تمااااام ؟؟
كنزي …. علاش تتكلم هكي ؟؟ قولتلك اني اسفه (( بصوت عصبي )) ..
وهنا أيهم قلب علي الوجه العصبي ولاول مره وقاللها ..
أيهم … (( بنرة تهديد وعيطه )) … معاااش تعيطي عليا فهمتتتتي اني مش عيل قدامك امس تهزبيني علي امي ومواقفها مع بوك
واليوم تعيطي عليا فهمتتتتتي ؟؟
ولكن كنزي من خوف ومن عيطته لقت روحها لاارديا حطت ايدها علي فمه بسرعه وقالتله …
كنزي …. اسفه خلااااص والله اسفه اااااااص بالله عليك ياسر عياط ….. ومشاكل امك تسمع مش ناقصني …
ولكن أيهم اصلا انصدم من حطت ايدها عليه الا كانت زي نار الا صبيتي عليها ميه … وبعد لاحظات ولما فاقت نحت ايدها بسرعه ووجهها ولي احمر ووهوا قعد ساكت ويشبحلها بس … وبعدين طلع وخلاها …
وهيا قعدة تخبط وتضرب في راسها وتقول …
كنزي …. غبيه غبيه شن درتي … افرض امه خشت … كيف نحط ايدي عليه …. اه غبيييييبه … شن بندير … شن بنقول … ياربي بجد اني غبيه نحط نفسي في مواقف اسوء من بعض …
وهنا علي خشت ورده …
ورده …. كنزي … شن هبلتي انتي ولا شني ؟؟ شن حوش مهبول هدا هدكا نطلع نبي نشوفه في بلكونه نلقاه مبتسم بروحه ولما نسأله مايردش وانتي تدوي بروحك … شن صابه هالحوش في هاليومين …
كنزي … خالتي اني كنت نستغفر في قلبي بصوت عالي شوي بس اسفه كان ضايقتك … علي عموم اني كملت خلاص مازال ومعايين القهوه متع ايهم بس … اني بنطلع كانا ماتبيش شي …
ورده … لا لا سلامتك قولي لبوك بس …
كنزي … حاضر رح نتصل بيه في طريق … ومشت لدار كلمت صاحبتها و لبست حوايجها ووتتت روحها …. وسكرت الباب وراها وطلعت … واول ماسمع أيهم باب تسكر خش لامه وقاللها …
ايهم … بوي جي ؟؟
ورده … كنزي طلعت مشوار ..
ايهم … وكيف تطلع هكي قالت لبابا ؟؟
ورده … وانت شن همك بيها ؟؟ ولدي طلع روحك منها ومن مشاكلها راهو انت من اول ماشفتها ماشفتش الا فشخ وفتح راس …
أيهم …. خيرك ياامي اي حد مكاني يدير هكي وبعدين هادي زي اختي طالما هيا عايشه معانا هنا معناها متسميه قدام ناس اختي علي الاقل …
ورده … ياريت تكون زي اختك وبس …
ايهم … اووووف ياامي ديما انتي الويسو يشتغل عندك … مهم اني طالع تبي شي ؟؟
ورده … شن عندك اقعد معاي … اللطف خيركم بتسيبوني … اقعد اقعد عندي معاك موضوع حلو ♡♡
أيهم …. ان شالله خير شن في ؟؟
خليني نطلع الاكل متع بكرا باش يفتر وبعدين نقعمزو ونحكيلك … انا غير استهدي بالله وطلع موضوع طلوع من راسك ….
ايهم …. ماشي ياسيدي …. وهادي تقغميزه …
ورجع قعمز علي صالون وقعد يقلب في تلفزيون وامه مشت للمطبخ طلعت ماكتب ربي من تلاجه ورجعت قعمزة جنبه … وبعدين قالتله …
ورده … وليدي توا انت قداش مازالك باش تاخد دكتوراه ؟؟
أيهم …. هههههه ااااه مدخلةمايطمنش … بس تمام سنه تقريبا …
ورده … باهي وبتروح بعدها شن بتدير ؟؟
أيهم …. زي كل ناس نخدم ونكمل تكوين مستقبلي واحتمال مانروحش اساسا كان عجبني جو غادي ههههههه
ورده …. في عينك هدكا مانبداش ورده … باه ومن غير خدمه شن تاني ؟؟
أيهم …. ماخطيتش في بالي شي تاني والله ياامي الحق ..
ورده …. اني نقولك باه … وتتزوج و وتجيب صغار …. وواني مقدما لقيتلك بنت الحلال …
أيهم …. ههههههه والله انتي ياامي نشهد بالله تمتعي تمتيع في احلامك ومن ياتاري هيا نعرفها ؟؟
ورده …. اااااااي تعرفها …. وساكنه معانا يخي ؟؟
ايهم …. مني كنزي مالا ههههههه ؟؟
ورده …. في عينك وعيناها لو كان اخر وحده في دنيا ماناخدلها ماربحتش مع العربيات لين بنربح مع الامازيغ …
أيهم ….. اوووووف ياامي علاش دوه هيا وخيرهم هما يعني مش ليبين زينا بلاش هالعنصريه الا موديتنا في ستين داهيه وبعدين اني قتلك كنزي اختي وتكلمت ببصاره ولان مافيش حد غيرها حاليا عايش معنا …
ورده …. اي باه صدقتك … اني قصدت في نفس شارعنا يعني اني وياها جيران وعشتو في نقس شارع … ياسمين بنت جيرانا في حوش الا قبلاتنا … امس كنت عند امها نشرب في قهوه والله البنت زي لوبانه تتطرشق تطرشيق والله ياوليدي ودييتك بيها وديده وانت مش ظروري تركب في روحك نار … نخطبوها توا ونعطو راس كلام بس لناس وبعد ماتروح تتزوجها واهو في سنه هادي تكونو فهمتو بعض بتلفون …
أيهم … يصير خير ياامي … ان شالله خير … تبي شي تاني …
ورده … شن يعني بتقلفدني وخلاص قولي ايه او لا باش نفتح مع بوك موضوع … طمني ياولدي عليك ..
ايهم … خليني نفكر ياامي ونرد عليك علاش ظرووري توا رد خليني نفكر خير مانقولك لا مره وحده … وبعدين اهو اين حلال علي سيرتو بي يبان بوي يتصل … ايوا … اها اي قاعد في حوش … علاش شن في ؟؟
زيد … تمام … اني كنزي كلمتني وعلي اساس بنخطم نروح بيها بس للاسف عندي اجتماع مهم مايتأخرش جي فجاءه وظروري نكون فيه ومافيش غيرك انت … نعطيك رقمها وتتصل بيها وتعطيك نعته ..
أيهم…. ولا يهمك خلاص ابعتلي رقمها بس تمام وقوللها انت اني بنروح بيها لاتهب فيا تقولي شن جابك …
زيد … تمام … نسكر منك ونكلمها ماشي ولدي سلام …
وسكر زيد من هنا واتصل بي بنته من هنا …
زيد (( بوها )) … ايوا … كنزي اني صارلي اجتماع كلمت ايهم بيروح بيك وبنبعتله رقمك ردي عليه واعطيه نعته بنتي ماشي ؟؟ تمام .. سلام وفي اي شي كلميني ..
كنزي … ماشي بابا … تمام …. سلام …
خالتها ميسون … انتي بجد هبلتي .. كيف جاتك الجراءه تهربي هكي واني اخر من يعلم معقوله … وتوا تجيني هنا عادي كأن مافي شي ..
كنزي … خلتي اني نحبك وانتي تعرفي انك صاحبتي … وتعرفي اني تحملت هلباااا بس الا صاير ظلم … اني ماطلبتش منهم الا ابسط حقوقي بس نرسم حياتي ونفصلها اني … بس امي فجاءه قررت تبيعني وتبيع سعادتي باش ترضي قبيلتها واهلها …. وماهمهاش اني مانحباش او مش متخيله اني نكون معاه … تشوف في زواج مجرد مشروع بس خالي من اي مشاعر …
ميسون … حتي ولو كان كلامك صح ؟؟ انتي مستعده تدفعي تمن ؟؟ امك امس كانت عندي … واعتبراتك موتي خلاص بعد الكلام الا قالهولها شعبان … وبعدين تعالي هنا .. من الولد الا ضربه هدا ؟؟ وعلاش واخدها بحمقه من تالاك ؟؟ لدرجة يضربه يخلي وجهه خريطه ؟؟
كنزي …. هدا ولد ورده مرة بوي من زوجها الاول … وطبيعي بيتصرف هكي لما نكون اني في شقه بروحي ونفتح باب فجاءه لانه يطق ويشوفه فجاءه يشنتل في حوايجي ويقولي توا تطلعي شن متوقعه انتي ؟؟
ميسوووون (( مصدومه بوجه مخلوع )) … غبااااارتك سوده قصدك انتي قاعده معاه في شقه بروحكم ؟؟
كنزي … لا طبعا هوا كان برا واني كنت اني ومرة بوي ولكن طلعت بتجيب حاجه من جيران وجايه بس … وبعدين هوا مش قاعد هنا كان مسافر وجاي زياره بيشوف امه وبيرجع ..
ميسون … علاش قداش عمره هوا باش يقرا ؟؟
كنزي … 32 سنه … يحضر في دكتوراه …
ميسووون … اها ماشالله تعرفي عليه كل شي … ان شالله مايكونش شي من الا في بالي بس … قسما بالله لو صار امك رح تقتلك … وتمشي فيها
كنزي … شن تقصدي ؟؟
ميسون … كنزي قصدي واضح … تحبيه .. هدما وين تقتلي امك بجد ويبدا موضوع مش موضع لاعرب ولا امازيغي لا يبدا فوقها امك لان لو نسيتي نفكرك هادي عدوة امك وهادي الا دمرت امك ووهيا وولدها نفس الكفه ومفروض الا يمس امك يكون مسك حتي ولو في بينكم خلافات …
كنزي … ميسون هدا زي خوي يعني مستحيل نفكر فيه اولا تانيا هوا ماليشي دنب في جرة امه حتي ربك قال هالكلام وبالله عليك سكريه موضوعه خلاص …
ميسون … تمام مصدقاتك بس راجعي نفسك في موضوع شعبان … والله ماشفتيش اليومين هما كيف دافع عليك ووقف ضد الكل حتي لما جدك سمع انك لوحتيله دبله … تصوري قاله حتي لو رجعت مستحيل تاخدها بعد الا دارته … بس هوا وقف ضده وقاله رح ناخدها ولو نخسر الكل .. قصدي والله لما وقف ضد جدك حسيته يحبك وموقفه رجولي .. فاراجعي نفسك بعيد علي ضغوطات امك وهوا … اعتبري نفسك الفتره الا بتقعديها في حوش اهلك نقاهه تمام وفكري وراجعي نفسك … مرررات تحسي بشي اتجاهه مرااااات ..
كنزي …. بالله عليك خلاص سكريه موضوع زي مااني سكرته وخلينا فيك انتي … انتي تعرفي اني قداش نحبك وافتقدتك في ساعات هادي ؟؟؟
وهنا تعبو كنزي عيونها دموع وحضانتها وخالتها بادلتها نفس الحضن بدموع من شدة حبهم وتعلقهم ببعض في في ظل هاليومين صعبات …
ميسون … اقعدي الليله باتي عندي ؟؟ خلينا نحكو لصبح مع بعض …
كنزي … نسيتي زوجك ولا شني … شوي تانيه بيجي لو شافني رح يقول لجدي وامي طول ورح يطربقوها فوق راسك … وانتي مش ناقصك ….
ميسون …. ههههه ضحكي والله توا يوتي في شقه جديده للعروسه ويوتي في روحه شبه معاش نشوف فيه بكل …
كنزي … انتي مش مجبره تكملي معاه سيبيه .. علاش مجبره تتحملي شخص بدلك ..
ميسون … يعني لو سيبته لمن بنرجع وعلي اي اساس وشن مازال باقي في العمر هوا …
كتزي …. علاش تقولي هكي حبيبتي … والله انتي صغيرونه وتهبلي والف من يتمناك … تي نسيتي لما نطلعو قداش يعاكسو فيك … ههههه تقول انتي صغيره هههههه
ميسون … هههههههههههههه هبلتي انتي خلاص وتبي ناس كلها تهبل زيك ♡♡♡ مهم من بيروح بيك توا ؟؟
كنزي … نقولك لكن بدون كلام …. أيهم ..
ميسون …. ياكلبه بيروح بيك حتي … والله لو لو مانبيش نقول اكتر بعدها حتي اني نتبري منك خلاص ..
كنزي … خيرك ميسون شن تقولي انتي مهبوله اني نطلع من علاقه نخش من علاقه … اني هاربه من شعبان نطيح في واحد تاني …
ميسون … تمام صدقتك … تغديتي ؟؟ ساعه اربعه هيا توا معاش غدي بيولي عشي ..
كنزي … اووووف مسرع الوقت جري .. تأخرت … خليني نتصل بيه ونروح مرات يجي حد ..
ميسون … خليك شوي مافي حد بيجني توا اني عارفه مواعيد راجلي وامك امس كانت عندي مستحيل اليوم تجيني واصلا من لما سيبتي حوش مشت قعدة عند جدك …
كنزي … والله مانبي ياخالتي بس هيا جبرتني … اني ماكنتش نبيها هكي توصل بس هدا الا صار وخلاص …
خالتها … خليني ندير مق نسكافيه ونجيك … خلاص يسارنا من بكي ودموع من اول ماوصلتي واحنا نتعاركو ونتباكو والا صار صار … نوضي معاي مطبخ نديرو نسكافيه ونحكيلك علي عروسه جديده امس تم فيها هههههه واحتمال بيروح بيها الاسبوع جاي …
كنزي … انتي بجد تضحكي ومش هامك ؟؟
خالتها …. تي هياااااا نوضي نديرو نسكافيه ونكملو دوتنا في مطبخ …
كنزي …. ماشي تمام .. شن غداك اليوم ..
وناضو للمطبخ باش يديرو نسكافيه ويكملو حديتهم … وفاتت ساعه ورا ساعه ولما قرب زوج ميسون من مرواحه اتصلت كنزي بي أيهم … ومافاتتش نص ساعه لين كان قدام الحوش … فالبست وشاحها وخدت شنطتها وناضت …
كنزي …. عطيني حضن يخليني نصبر فتره معاش نشوفك ههههه
ميسون …. ههههههه انتي بنتي اصلا الا ماجبتهاش … مستحيل مانشوفوش بعض لو بيقتلونا هههههه مره مره تعاليلي زي مااتفاهمنا تماااام ..
كنزي …. تمام …. يتصل خلاص خليني نمشي … سلااااام .
وطلعت تجري كنزي وركبت في سياره وفتحت الباب خلفي وركبت …
واول ماركبت سياره … ولع سياره ومشي … ووهيا قعدة متلفته تشبح للمرش وساكته … وهوا يسوق وساكت لحد ماجت اغنية وبقابل ناس لي رامي صبري … فاعلي صوت الاغنيه شوي … وفجأء قام عيونها في المرايه وقعد يشبحلها وهيا سارحه … وبعدين نزل عيونه ابتسم ونزل عيونه …. وماقالش اي تعليق لحد ماوصلها للحوش … واول ماوصلو للحوش … فتحت الباب ونزلت وكيف بتمشي قاللها …
ايهم … خليك .. ماتركبيش بروحك استني نزل شكاير ونركب معاك …
وهنا اتلفتت كنزي وابتسمت لان هادي اول جمله كان يوجهالها بدون ماتتكلم معاه بعد مشكلتهم الاخيره … وبعدين ركبو مع بعض وخشو للحوش … وهيا خشت للدار طول بدلت حوايجها وبعدين طلعت وهنا لقت بوها مقعمز يخدم علي لاب توب والورق مطروحه قدامه وورده مقعمزه جنبه وتخيط … فاقعمزة كنزي قدام بوها وقاللها …
بوها … شن بنتي مشوارك مشي تمام (( وغمزلها ))
كنزي …. (( ابتسمتله وقالتله )) … ايه بابا الحمد لله …
بوها …. تماااام … تعشيتي ؟؟
كنزي …. باهي تمام احنا تعشينا اني وورده لان انتي لما تصلتي كيف حطينا العشي ولكن ايهم ماتعشاش فاتو تحطلكم ورده عشاكم وتعشو …
(( وهنا ايهم طلع من الحمام بدون مايكون سمع حديتهم وقال لامه ))
أيهم …. جعان ياامي بالله حطيلي عشاي في بلكونه خاطري نتعشي برا …
زيد … حتي كنزي ماتعشتش توا تجيبلكم عشاكم في بلكونه ..
أيهم (( وهنا شبح لي كنزي وبعدين قال )) الا يريحك نمشي نصلي العشاء اني ونلقي العشي علي طاوله بالله والله بنمون من جوع ياامي القنينه انتي ♡♡
ورده …. هدا ماوخدني انت غير بالكلام الحلو بس ولكن في موضوع ياسمين مش رح تاخدني اهو قولت لبوك وقالي توكلي علي الله وتمو فيها …
أيهم …. الله الله عليك ياامي اني قولتلك اعطيني فرصه نفكر شهدرتي بالموضوع وقولتي لبوي وحتي بتمو … نمشي نصلي العشاء احسنلي …
وطلع ومشي باش يصلي … وكنزي مشت للمطبخ مع ورده ورفعو العشاء علي طاوله … ومشت ورده بجنب راجلها تعبيله في دماغه علي موضوع بنت جارتهم القنينه الا تبيها لي ايهم وهيا ترغي وهوا يخدم ومش معاها اصلا … بينما كنزي قعمزة علي طاوله وبدت تتعشي علي دخلت أيهم للبلكونه … ووخر كرسي وقعمز … وبدي يتعشي بدون مايتكلم … وهنا قطع هالصمت صوت كنزي تقوله …
كنزي … الف مبروك علي الخطوبه …
ايهم … يبارك فيك وعقبالك حتي انتي مع ولد الحلال …
كنزي … ان شالله يارب يهديني حتي اني ونرجع لخطيبي ..
أيهم … (( بوجه استهزائي )) … اليوم صارتلك معجزه وخلاتك ترجعي تفكري فيه بعد الدبله الا تلوحت في وجهه ولا كيف …
كنزي …. (( ضحكه استهزائيه )) …. نفس المعجزه الا خلاتك تحب ياسمين وتخلاص بتم فيها وتخطبها …
أيهم … هوا اني علاش حاسس ان حارقتك ياسمين شوي ؟؟
كنزي … بالعكس اني امس الا حسيتك ضربت شعبان بغل وكأنك تعرفه او واخد منك شي …
أيهم … اني ههههههه تضحكي انتي اني ضربته لانه مااحترمش عتبة حوشنا فقط ويتهجم قدام بابنا مش اناي تحديدا الا خديت ضدك موقف … يعني لو متلا جي بياخد قطوسه متلا كنت درت نفس الشي … وبعدين انتي اقلها زي اختي صغيره ونعتبر اني ظهرك طالما بوي مش في حوش ..
كنزي … اكيييييد زي مااني فرحتلك علي ياسمين كأني اختك وصدقني يوم فرحك اني اول وحده رح نكون موجوده ورح نشري احلي قفطان …
ايهم …. تمام … واني نفس الشي يوم عرسك رح نرشقلكم الفين جني ♡♡ لو كان ندير نشحتهم …. تعشي توا ماشي ♡♡
ونزل عينه علي صونيته وسكت …
كنزي … اكيييد رح نتعشي … علاش مش رح نتعشي …
وسكتت ونزلت عينها علي صونيتها … وبعدها تكلم فجاءه وقال ..
أيهم … علي فكره … اني مازالت مااعطيتش موافقه … للعلم بس باش ماتشريش قفطان من توا بس لااكتر …
كنزي …. اها تمام (( وابتسمت )) ….
بعدين قالتله …
كتزي … وحتي اني علي فكره رفضت حتي لما خالتي قالتلي فكري اليوم … قولتلك مش علي شي .. بس مش رح نرضي انك تشحت علي خاطري في الاخير انت خوي …
أيهم … (( شبحلها شوي )) …وقاللها اها تمام افضل قرار
((وبعدين انفلقو بضحك)) هههههههههههههههههههههههههههههههههههه
ايهم …. اقسم بالله احنا مهبله … انتي هبله واني اهبل منك … شن نقولو احنا …
كنزي … ههههههه مش عارفه … بس بجد انت علاش ماوافقتش ؟؟
أيهم … اها اني ماقلتش ماوافقتش ها وفي نفس الوقت ماقولتش وافقت … يعني اني قاعد نفكر … مانكدبش عليك اني من سنتين كنت نفكر في موضوع .. بس كنت ناجل فيها بحكم قرايتي ومانبيش نخطب ونقعد سنتين تلاته برا … بس توا بما ان مازالي سنه بس فاالموضوع خش في دماغي …
كنزي … اها (( ووجهها ارتبك )) يعني انت من ناحية المبدء موافق … ربي يتمملك علي خير يارب
أيهم …. (( وهنا حط الكاشيك وشبحلها شوي وقاللها )) … اني موافق علي زواج فقط ولكن مش علي البنت نفسها … وفي فرق كبير … بس عندي احساس اني لو لقيت البنت … رح نتعب في الاول شوي ..
كنزي … علاش انت في حياتك وحده ؟؟
أيهم … انتي شن تبي بزبط (( وغمزلها )) …
كنزي …. اني ولا حاجه … بس اني كنت بنقولك لو انت ماعندكش فاياسمين مناسبه ليك جداااا علي كلام امك …
أيهم … علي كلام امي اها …. تمام … ولو قولتلك اني ماناخدش بكلام امي ؟؟ اني ناخد بكلام شخص واحد بس …
كنزي …. اها … اكيد بابا هههههه (( حبت تنزل بفكاهه تغير بيها الحديت محرج و مربك لان حست انها انحصرت في زوايه وشبه علقت )) ..
أيهم …. لا والله … شخص هدا … ♡ قلبي ♡ …. واني قلبي مايعترفش الا بالحب من اول نظره فقط سبحان الله ..
كنزي … كيف يعني ؟؟
ايهم … يعني شخص لو خش لقلبي وحبيته من اول ماعيني طاحت عليه … خلاص هدا خش لقلبي وسكرت عليه …
كنزي … اها كوووويس
وحاولت تغيير موضوع وقالتله …
كنزي … بنسألك انت شن تخصصك ؟؟
أيهم ….. ههههههههه وشبحلها شوي بعدين غمزلها بعينه وقاللها … شكلك حصلتي صح ؟؟ يالله خليني نكمل معاك وين ماتبي توصليني … اني تخصصي ادارة اعمال وقاري ماستر ودكتوراه في ادارة الاعمال وبعون الله بنفتح شركه خاصة بيا وبادي نخطتلها من توا …
كنزي … بس انت كيف في سن هادي قدرة تخدم وتدير شقه وتكمل قرايتك وتاخد دكتواره ؟؟
أيهم … من قالك من خدمتي درت هدا كله … صح اني نخدم قبل ماسافرت بس شقتي وقرايتي علي حسابي كانت مش من مالي الخاص … بوي للاسف توفي وكنت اني الابن الوحيد ليه وورت منها مبلغ كويس الحمد لله قدرة نشري بيه شقه ونأتتها لكن ماسكنتش فيها ولا نقعد فيها ولا نحب نمشياها ونقعد فيها ساعات بروحي هكي يعني نكبه عليها مره مره فقط ولكن اغلب زيارتي لليبيا لما نكون مسافر نجي لامي طوول ولكن اكيييد مع زوجتي مستقبليه رح نستقر ونحبها زي صاحبتها اكييد ♡ وهوا هدا والباقي سافرت بيهم كملت قرايتي وفضلي شوي فلوس منهم وهادم الا بنفتح بيهم شركه بسيطه بعد مانروح ونكبرها شوي شوي بشغلي بعدين …
كنزي …. اها حلو والله مخطط حياتك بشكل حلو ومرتب ♡ ربي يوفقك …
أيهم … وانتي ؟؟
كنزي … اني ولا حاجه … كملت قرايتي وقعمزة في حوش زي اي فاشله ماحصلتش فرصتها ههههه بس وهيا هادي ملخص حياتي …
وفي اللحظه الا بيرد فيها عليها … سمعو تبرزيمة حد طاح في حوش … وبعدين صوت زيد يقول …
زيد …. (( بصوت حاد )) ااااااااااااااايهم هااااات مفتاح سيارررتك بسررررررررعه وتعاااالي …
وناضو بسرعه يتجارو ….
يتبع………
لقراءة الجزء التالي : الجزء السابع من رواية أنت عدوي
لقراءة الجزء السابق : الجزء الخامس من رواية أنت عدوي
للإطلاع علي فهرس الأجزاء : جميع اجزاء رواية أنت عدوي للكاتبة كيندا
جميع الحقوق محفوظة للكاتبة كيندا .
