الجزء

الجزء السادس من رواية حالة حب للكاتبة لوزة ليبية

في الجزء السادس اليوم سوف نعرف ماذا سيحدث مع شمسي وكيف كان يعرف جمانة من قبل ؟ وكيف سيكون اللقاء بينهم والسر الذي كان يخفيه والذي منعه من الإتصال بها ؟ كل هذه الأحداث سوف نعرفها سوياً بقراءة الجزء، لذلك هيا بنا سوياً لنبدأ بالقراءة .

الجزء السادس من رواية حالة حب للكاتبة لوزة ليبية

بس شمسي ماسمعش كلمات معتز الاخيرة …. سرح…. سرح وجاوب ظنا منه ان معتز لا يزال بجنبه ….
شمسي – صعب يامعتز صعب
* في الجملة هادي … بدوا يدين شمسي يرعشوا ووجهه يتصبب عرقآ وجسمه متشنج وعيونه مفتوحات عالاخير … نزل مقود الطائرة عالأخييير انحرف مسار الطيارة فجأة وبسرعة مذهلة اتجه بإتجاه الاسفل بسرعة قاتلة لين الارض بدت واضحة للي بيشوف من الروشن والركاب الكل ايصيح ويعيط في حالة ذهول

معتز – ياساتر ….ياساتر هذا شنو ماسد وجع البطن زيد الطيارة بطيح ….. لا لا مانبيش انموت ف الحمام لاااااااا مانبيش نموت في الحماااااااام فيسع …. فيسع خلي نطلع ….. ووووه خيره الطوبو الميا مايخدمش برا اجعنك ماخدمت مانبيش انموت اهنااااا شمسي …. نحلف عليه الا شمسي البلي اشبح شن دار نهاره احرف الا مانوريه

حواء تبكي – كابتن شمسي ….. كابتن شمسي …. شن ادير
*معش اتحملت حواء وحست ان الطيارة بطيح فساخت …. على جية معتز
معتز – شمسي …. شمسي ….شمسي يا كلب $#@#&&&

* معتز عرف ان شمسي متشنج هزه يمين يسار وضربه كف
تلفت شمسي لمعتز يشوفله
معتز – شوف شن ادير ياشمسي طيارة اقريب اطيح …
استدرك نفسه شمسي وشاف لعملته السوداء وقام المقود لفووووووق وحطه عالطيار الالي
معتز – عيب عليك والله عيب …. شيابين وعزايز راكبين معاك ركبتلهم الضغط والسكر الدنيا كلها تتعايط … وانا خليتني نطلع من الحمام نتجارى حتى حواء ساخت مسكينة
* حط شمسي وجهه بين يديه
للحظات …. وخدي المايك …
اعتذر اعزائي الركاب فقد حدث عطل بسيط وتم معالجته ارجوا ان تكونوا بخير …. وشكرا
معتز – حواء …. حواء فيقي
شمسي – بخلها شوي اميا
معتز – كان نفهم شن صارلك بس
شمسي – سرحت فجاة ومعش نندري ع روحي …
~~~

ع علي – هاه كيف كانت الرحلة
جمانة – حلوة وهادية …
ع علي – استاذ مراد مشي معاك عالرحلة والاه
جمانة – اي
ع علي – شن درتي احكيلي بالتفصيل الممل … الطريق للحوش طويلة والشواره زحمة وانا بنسمعك وبس
جمانة – هههههههه
ع علي – ياربي قداش ليا معش شفتك تضحكي لا رسمي حتى المشجل بنسكره هاه وهادي تسكيرة هدرزي هي
جمانة – تعرف يابوي من اول ماخشيت الطايرة وقفت ….
* ضلت جمانة تحكي لبوها عن شعور شخص اول يوم ليه في العمل … وكيف انها من الاول كانت مضايقة شوي و مع هذا لا يزال يوجد شعور الحماس للعمل … وقعدت تحكي وتحكي لين وصلوا للحوش
جمانة – يلا خلي ننزل استحشت امي ونورة وعفاف
* خشت جمانة للحوش ولقاته فاضي فتشت الديار مالقت حد …. خش عمك علي وسكر الباب *
جمانة – وينهم يابوي وين مشوا
ع علي – اه نسيت نقولك جت بنت خالتك وخدت امك وخواتك وطلعوا لسوق
جمانة – اشي الخيانة ماقدروش يستنوا للعشية يعني
ع علي – قريب ايروحو معش يعطلوا اكثر من هكي
جمانة – ها به خلي نبدل امالا ونستناهم
ع علي – الاذان يأذن بنمشي لجامع انصلي الظهر …. تبي نجيبلك حاجة وانا امروح
جمانة – لا لا سلامتك يابوي …
(نخش ناخد دوش خير ونصلي الظهر ونستانهم لين ايروحوا)
*خدت دوش جمانة وصلت لظهر ودارت نص تن وكلاته … فتحت لاب توبها وحطت اغاني اليسا واولهن اغنية يامرايتي …. وفتحت الفيس كسدت عليه
بعد شي نص ساعة روحوا ام وخوات جمانة وبنت خالتها رتاج خشوا هما الثلاتة لدار وين مافيه جمانة ….

جمانة – خيانة خزيه عليكم عفاف ونورة وبذات رتاج
عفاف – ههههه
رتاج – غير سلمي قبل وقولي كيف حالك يارتاج انستينا
جمانة – لا اهلا ولا سهلا ياعينك استنيتيني
رتاج – والله بنستناك عفاف قالت هيا في المطار وبتعطل
جمانة – كلبة من يومك ياعفاف
عفاف – ماشية للمطار واتكحلي في طيارين وتبينا نستنوك ع مشية سوق !
جمانة – شن انكحل مصحك
عفاف – تو بتقنعيني انك مانعجبتيش بواحد منهم
جمانة – لا وماتغيرووووش الموضوع
نورة – غير فكينا من العتاب ياجمانة و احكينا شن صار .
جمانة – استنوا خلي نسلم ع ريتاج
اننننه كيف حالك
رتاج – انننه باهية باهي اللي ادكرتي تسلمي عليا
جمانة – ماه مانحبش الخيانات
نورة – اسمعي ماتحكي شي بناخد دوش ونصلي استنيني اه
جمانة – به
عفاف – وانا خلي انساعد امي في الغدي
جمانة – اي حق امي ماتندريش عليا روحت خلي نسلم عليها
* الكل شاف اموره وشن يبي ايدير هدرزوا وضحكوا وتغدوا وخشوا البنات للمطبخ غسلوا الماعين وخدوا مرطبات وقعمزوا يهدرزوا *
رتاج – صار كابتن اشرف
نورة – خاطري انشوفه
جمانة – لكن صوته زي صوت حاتم 😦
عفاف – فكينا من سيرته يا جمانة الله يربحك
رتاج – حق شن صار فيه هوا
جمانة – وين نندري عليه
رتاج – انموت ونعرف شن السبب
عفاف – ماهناك سبب واحد حقير وخلاص
رتاج – والله كان نشده نعجنه طريحة مقومة
* وبينما عفاف ورتاج يتناقشوا اضايقت جمانة من كلامهم تبي تنسى لكن كل شي حولها يذكرها بيه … فتخيلت جمانة محمد عبدو واقف قدامها ويغني الاماكن كلها تدكرني بشي حتى صوتي وضحكتي لك فيها ….
نورة – اسمعوا سيرته اتغم راه من الاخير هدرزوا ف موضوع تاني
جمانة – اي لان اضايقت نبي ننساه هالحاتم تعبت منه تعبت كان نلقى حاجة تمسح ذاكرة مانقصرش بكل
حقير سيبني وخنبلي فل…
*شدت لسانها في اللحظات الاخيرة قريب قالت فلوسي *
عفاف – شن خنبلك ؟؟؟؟
جمانة – اه … خنبلي فلاشي فيه كل الافلام الاجنبية
عفاف – طز فيه هوا والفلاش خليه دعوته اتقلبه هالحاتم ..
رتاج – بس بجد خاطري نعرف شن صار فيه
جمانة – خلاص رتاج سكريه الموضوع مايهمنيش نعرف شن صار فيه
~~~~

منيرة – حتومي امتى بنتجوزو
حاتم – اولا مفلس ثانيا لين اتوافق امي ياروحي
منيرة – باهي وامتى بتوافق
حاتم – مش عارف ….
منيرة – ياخاتم لامتى بنقعدو هكي ياحاتم انلودو من جيهة لجيهة ونتغدو ونتعشوا وندهوروا مليت انا
حاتم – به شن تبيني اندير نمشي انكشخ ع امي نقولها نوضي البسي جبتك وبري اخطبيها
منيرة – ياعيني عاد تبيلك بنت سن بدير بيا مطلقة
حاتم – لهسبب ماتبيش اتوافق

منيرة – به كيف الحل
حاتم – مافيش الا اننا نتجوزوا بالسر
منيرة – هههههه لا عينك
حاتم – علاش لا احنا ديما مع بعض وشبه عايشين مع بعض غير مع وقف التنفيذ
منيرة – ههههه لكن مش بالسر عاد
حاتم – يامهبولة احنا نتجوزوا في المحكمة جواز شرعآ وتبدي مرتي وحلالي
منيرة – زعمااااا
حاتم – اي فكري فيه الموضوع بس وردي عليا …..

~~~
مع ساعة 5 عشية تم شمسي كل رحلاته ورجع للحوش وجايب معاه شوي حلويات ومرطبات …. فتح الباب وخش وسكر وراه حط الحاجات ع الطاولة و نحى كندرته وحطها في المدخل … فك قرواطته وخش لصالة
خ بدرية – روحت شميسة
شمسي – اي توا كيف وصل….
خ بدرية قاطعاته يارررورورورورووري ياقمرررررر ياااا قمرررررر زودي خوك ولى يتكلم
وقف خ بدرية والدمعة فعينها
اضبطها شمسي وقالها – سامحيني يمى مفروض اتصلت بيك من بكري وقتلك
خ بدرية – المهم انك وليت تتكلم قعمز قعمز واحكيلي كيف صار
قمر – شن فيه يمة لاش اتزغرطي
خ بدرية – خوك ولى يتكلم
قمر – حققققق الف مبروك شمسي والله خبر ايفرح ….
شمسي – هههه الله يبارك فيك
قمر – كيف صار شن الحاجة اللي خلاتك تتكلم
*شمسي حكي ل امه واخته انه اتخيل ريفاء امه ماهتمتش للموضوع المهم عندها ان ولدها رجع يتكلم *
قمر – خلي انوض نتصل بخواتك نقوللهم
خ بدرية – به واتصلي ب احمد (راجلها) وقوليله يجيني توا خلي نعطيه فلوس
قمر – علاش ؟
خ بدرية – بش يمشي يجيب سقيطة بندير عزومة بعد غدوة
قمر – به هي
شمسي – لاش السقيطة ولاش العزايم
خ بدرية – وحيدي شميسة ولى يتكلم وماتبينش ندير عزومة
شمسي – لالا يمى مافيش داعي
خ بدرية – لا فيه داعي تحساب
شمسي – يمة عزومة ودوشة واتكلفي ع روحك حق خروف الدنيا شايطة فيها النار كل شي غالي
خ بدرية – الغالي يرخصلك ياولدي ….تحساب روحك شوية عندي ….. انت وحيدي ياشمسي …. شمس ضوت عليا دنيتي….
* هامت امه في ذكرى وواضح انها متأثرة لذكرى اللي ادكرتها
شمسي عقد حواجبه وقالها – خيرك يمى
خ بدرية – اذكرت حناك ام بوك الله يرحمها
شمسي – خيرها
خ بدرية – وقت جبت تلاتة بنات ورا بعض ماخلت ماقتلي كل يوم تعاير فيا بالبنات نسكت ونكتمها فقلبي وكنت كل ليلة ندعي ايجيني ولد …. كل بطن نحمل يقعدو يلقحوا عليا ونجيب و تطلع بنت وعزوزتي ادير فيا البهادل برغم ان مش مدورو كنت حامدة الله على الخلقة التامة لكن هما بهدلوني واتعبي في راس بوك الله يرحمه اتقوله اتجوز تاني وفكك من ام البنات … ويجي ايروح يكسر في حاجات الحوش ويدير حالة قعدت مكمودة ….. لين حملت بيك قالي كان البطن هادي بنت بنتجوز عليك امناني بنت عمي وامناني هادي ارملة عندها خمسة ولاد بياخدها بش اتجيبله ولاد …. اضايقت قعدت كل يوم ندعي انقول ان شاء الله ولد لوقت مابنولد وقاعدة ندعي ووقت قتلي القابلة انه ولد فرحت وزغرتت لروحي …. بوك سماك شمسي طول قال هدا وين شمست حياتي
شمسي باس راس امه وقالها – ربي يحفظك يمة … خلاص ديري عزومة بشرط انا ناخده الخروف
خ بدرية – لا انا ناذرة نذر لو اتكلنت نذبح خروف
(منين ليك الفلوس يمة اكيدة بتبيعي حديدة والا خاتم وانا والله مايهون عليا اتبيعي ذهبك وخشمي ايشم الهواء …. احسن شي نمشي ناخدلها تاكم ذهب ونديرهولها مفجأة غدوة )
خ بدرية – هدرزلي ياشميسة مستفقدة صوتك ليا شهور …. كل يوم نرقد متأملة انك غدوة تتكلم
شمسي اتكى في حجر امه وقالها – نحكيلك على انسانة ؟؟
خ بدرية – احكي اللي تبيه المهم تهدرز عليا
شمسي – فيه واحدة حياتي من غيرها ماتسواش ….
خ بدرية – اشيه سعدودها ياكبدي
شمسي – طيبة وربي يحفظها …. هيا النفس وهيا الونس هيا ضي يومي وضي حياتي وين انخش الحوش اندورها طول حتى وانا مانبي شي لازم اندورها واناديها…. شوفتها اتحسسك بالامان …. الله لا ايغيبها ولا ايغيب كل ام على صغارها ربي ايخليك ليا يمة
قام راسه شمسي لقي امه تبكي من كلامه فقالها – معش تبكي يمى ياسر بكيتك قبل تزيدي تبكي حتى توا
خ بدرية – كلامك ايبكي ياولدي تخيلت يوم ربك ياخد امانته كيف بدير
شمسي عينه دمعت وقال – والنبي معش اتقولي هكي بالله عليك ربي ايطول في عمرك يمة
جتهم قمر وقالت – خيركم تتباكوا اللطف خليتكم حالكم باهي وتضحكوا
شمسي – مادوريش دموع فرح هادو
قمر – ها به … احمد شوي تاني جاي وكلمت زهرة ونسمة ووردة وقالو جايين وبيباتو
شمسي – باهي مليح ومنه انلعب الصغار استاحشتهم
خ بدرية – باه نوض توا بدل حويجاتك مابين وتتلك اختك غداك
شمسي – بناخد دوش بالمرة
خ بدرية – به

*خ بدرية عطت حديدة لقمرر وقمر عطتها لراجلها باعها وجاب سقيطة من سلخانة وشوي مستلزمات و اتلقطوا خوات شمسي واحدة تلو الاخرة وهدرزوا وضحكوا ودارو جو وكذلك جمانة وخواتها وبنت خالتها هدرزوا وضحكوا ودارو جو *

على ثاني يوم الصبح وتى روحه شمسي وطلع ماشي للعمل …. وقبل مايمشي خطرله يمشي للمقبرة ايزور ريفاء قعمز ويتكلم ويجاوب في روحه …

خ نعيمة – جمانة …. جمانة انتي يابنت
جمانة – نعم يمة
خ نعيمة – قالك بوك ماتبيش تمشي اليوم
جمانة – لا لا نبي
خ نعيمة – امالا نوضي ساعة عشرة وربيع راهو
جمانة – حي عليا كله من سهر امس ….
خ نعيمة – به نوضي فيسع
جمانة – هيا هي
* بسرعة البرق خدت دوش وصلت وبدلت وحطت كحل في عيونها وطلعت وطول الطريق تقول لبوها اجري …..

(حي عليا تأخر بيا الوقت فيسع خلي نطلع من الجبانة ونمشي للعمل معش فيه وقت )

وصل شمسي قبل جمانة ولقاه معتز
معتز – وينك ياراجل من بكري نتصل بيك
شمسي – اه تلفون صامت
معتز – بسرعة وقع دخول عندك رحلة لتركيا ع خط البراق
شمسي – باهي هي

وصلت جمانة وطول لريسبشن
جمانة – صباح الخير … بالله فيسع شوفيلي جمانة العطري فيه رحلات اليوم
ريسبشن – جمانة جمانة …. ايه طيارتك بتطلع توا الكابتن كيف وقع دخول …. خط البراق بسرعة اجري
جمانة – اقامة ؟؟؟؟
ريسبشن – لا ذهاب واياب
جمانة – اوك
مشت جري جمانة وطلعت تلفونها من شنطتها وتتصل ببوها
جمانة – بوي لقيت الرحلة لتركيا
ع علي – بش موصيهم يديرولك رحلات داخلبة بس
جمانة – مانعرفش هذا اللي لقيته
ع علي – بالبيات ؟؟؟
جمانة – لا مشي وجي في نفس اليوم
ع علي بغضب – استغفر الله ياربي …. باهي ردي بالك ع روحك ….
جمانة – ان شاء الله …سلامات
سكرت الخط جمانة ووصلت للمهبط وركبت لطايرة جري وهيا نفسها هارب من كثر الجري
خشت لغرفة الكابتن وقالت – اسفة عالتأخير ….
شمسي من غير مايتلفت قال – مش مشكلة اتفقدي الركاب بنقلع
جمانة – اوكي تمام
تفقدت الركاب جمانة ورجعتله وقتله – كل شي تمام
شمسي – يالله توكلنا ع الله ….
*اقلع شمسي وهذا كله هما الزوز مايندروش ع بعض ….
قعمزت جمانة وجبدت الستار وحطت رجل ع رجل و تقرا في مجلة
وقف شمسي يبي ياخد اميا
اذكرت جمانة انها ماقالتش للكابتن تبي تشرب حاجة وقفت
وتقابلوا الزوز قبالت بعض وسكتوا حتى كلمة *
سرح شمسي ظنها ريفاء وظن انه يتوهم …
سرحت جمانة وفي عينها دمعة …. واذكرت بعض من ذكرياتها مع شمسي
جمانة – سمسي سمسي
شمسي – معش اتقولي سمسي قولي شمسي ….خيرك اتعيطي
جمانة – سمسي سريف ولد جيرانكم يقولي سوسة ودبة
شمسي – خلاص اسكتي معش اتعيطي تو نضربه ….
جمانة – هيييييي
شمسي – معش اتقوللها سوسة ودبة فاهم
شريف – باهي ياشمسي خلاص معش نقوللها غير ارخيني بس …..
……
جمانة – شمسي راهو استاذ الرياضة يقلل في ادبه عليا ويديرلي في لقطات بايخة
شمسي – كلب ولد كلب والله الا مانوريه
…..
جمانة – هههه هيا قول ليك ساعة اتقولي بنقولك حاجة
شمسي – انا ياجمانة حبيتك من لما وليتي في العدادي واهو توا كبرتي ووليتي 20 من عمرك … حبيتك وحبيت كل شي فيك وقلت في في عيد ميلادها 20 انصارحها بحاجة
جمانة – شن فيه ياشمسي شغلتني
شمسي – انا يا جمانة ….فيه كلام كاتمه في قلبي ليا سنين….. وربي نشوف في البنات كلهم انتي لدرجة كتبت تلاتة مذكرات اشعار كلهم جمانة جمانة جمانة ههههه عيلتي بدو يقولولي ياجمانة من كثر مانتكلم عليك…..عارف روحي كترت دوة وبالمختصر المفيد ….انحبك جمانة
جمانة – اه بس انا مانقدرش
شمسي – كيف ماتقدريش
جمانة – اه خلينا منه موضوع هذا ….
شمسي – وعلاش تتكلمي هكي وكانه موضوع مش عاجبك
جمانة – سامحني شمسي انا …. انا ….انا
شمسي – هاه انتي شنو
جمانة – انا بنسافر بوي عنده عمل
شمسي – عادي نخطبك وسافري
جمانة – انا بنتجوز شمسي وعرسي بنديره في دبي سامحني …. انت زي خوي
* كل هذا اذكراته جمانة في خلال ثواني بسيطة ….
ابتسم شمسي وابتسمت جمانة …
قرب منها خطوتين للقدام … جمانة حست بتعب من كل اللي صابها قبل تبي حد تستند عليه زي قبل … حد يهون عليها همها يكون معاها في كل وقت …حنت لحنية شمسي وطيبة شمسي
مد يده شمسي لخدها ولا يزال يحساب نفسه يتوهم … بعدت راسها جمانة ونزلت عيونها للارض ميل راسه شمسي قليلا عالجنب وابتسم ودمعته ع خده ….
(هادي مش ريفاء ومش وهم هادي جمانة وانا متاكد من هالشي )

[الله ياشمسي كان تعرف قداش الدنيا مرمدتني وبهدلتني…]

(لو تعرفي بس ياجمانة قداش تعذبت في حياتي .. )

[محتاجتلك انا …..محتاجة نحكيلك ونشكي همي ونفرغ اللي بداخلي وتقولي معش تبكي وطبطب عليا تهون همي زي قبل]

(كان وجودك مهون عليا برغم انك جرحتيني في نص قلبي وخليتيني خشيت ف عقلي وطلعت )

[تمنيت لو ان ماسكرتش الطريق في وجهك شمسي كنت على الاقل خليتك معاي كصديق….]

(سديتي في وجهي كل الطرق ماقدرتش حتى نعرف اخبارك )

[ غبية انا مش عارفة علاش قتلك اني اتجوزت … ]

( ربي يحفظك ياريفاء … نقصد جمانة)
* المحادثة اللي فاتت كانت كل شخص منهم يتكلم بينه وبين في نفسه *
استدركت نفسها جمانة وانهت المحادثة اللي كانت ادور بينها وبين نفسها ولا اراديا نزلت من عينها دمعة الم وفي نفس الوقت فرحة لشوفت شمسي ….مسحلها دمعتها شمسي وفي نفس اللحظة حتى هيا قامت يدها ومسحتله دمعته و ….

يتبع …..

لقراءة الجزء التالي : الجزء السابع من رواية حالة حب للكاتبة لوزة ليبية

لقراءة الجزء السابق : الجزء الخامس من رواية حالة حب للكاتبة لوزة ليبية

للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية

جميع الحقوق محفوظة للكاتبة لوزة ليبية .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى