وفي الجزء الثالث عشر من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثالث عشر من رواية عاصفة الصمت
نزار : ايواه …. انا ف دوش توا
صﻻح : وقت دوشك حق
نزار : تو انكلمك خليني مستمخ توا
صﻻح : تسمع
نزار : نعم
صﻻح : الخطة متاعك فشلت
نزار : تي …..
* طاحت منه الصابونة نزار وزلق برغوة وطاح جي راسه على جيهة البانيو وطاحت عليه سلة متع الحاجات متع المعاجين وفرش اﻻسنان… *
نزار : اييي احيييه سحيقة … ستر ربي محطوطة اسفنجة اييي ياراسي
* فتح الميا نزار نحى الصابون وحط فوطة ع نصه وطلع دايخ قعمز عالكرسي وسط الحوش يستجمع قواه ع خطمة لبنى
لبنى : هاااه نزار خيرك طالع هكي
نزار : تي بري واﻻ غضي بصر امشي
هربت لبنى ومشت لصفاء
صفاء : خيرك مسموطة
لبنى : خوك ليشو مداير فوطة ف نصه بس
صفاء : اللطف … خلي نقول ل امي
خ رقية : ريتي ياسميرة او كنة حوش الضاوي قالت ماتعرفش ادير بازين
خ سميرة : بالله بنات هاليومين بايرات
جتها صفاء : يمى … يمى
خ رقية : خير بﻻك
صفاء : نزار طالع ليشوو من الحمام
خ رقية : اللطف خيره هبل
واﻻ شنو خلي انوض نشوفه …
*طلعت خ رقية وقتله : نزار ئه خيرك طالع بفوطة … معاك صبايا ف الحوش
نزار : طحت ف الحمام ع راسي وانحس ف دوخة
خ رقية : اللطف … اتصل بواحد من صحابك ياخدك اتعاين ويكشف عليك الطبيب
نزار : ﻻﻻ مش ﻻزم دوخة بسيطة هيا
خ رقية : ﻻ ياود ﻻزم تمشي
نزار : ياودي مش ﻻزم
خ رقية : والله اﻻ ماتمشي عاد حلفت
نزار : باهي باهي غير نلبس حوايجي … بالله جيبيلي تلفوني طاح ف الحمام
خ رقية : باهي به … شنو نساعدك تقدر تمشي واﻻ تمشي
نزار : ﻻﻻ نقدر نمشي
*خش نزار لداره ولبس حوايجه وقعمز ع سريره … خشتله خ رقية وعطاته تلفون .. اتصل ب حاتم ماردش … اتصل بسفيان خارج التغطية … فتصل بربحي
نزار : اه ربحي انت وين
ربحي : في اربعة شوارع سيمافرو وﻻد الحاج
نزار : باهي بالله تعالالي ضروري
ربحي : للحوش
نزار : ايه
ربحي : اوكي دقايق ونكون عندك
نزار : باهي هي سﻻم
* سكر الخط نزار واتكى *
بعد دقايق شرين الحوش … ولبنى كانت خاطمة ففتحت الباب
ربحي : السﻻم عليكم
لبنى : وعليكم السﻻم
ربحي يفكر زعما هيا هادي لبنى … زعما ﻻ … خلي نجرب ندير حيلة : بالله ناديلي نزار قوليله يبيك حبحي
لبنى : ههههههه
ربحي : لبنى صح
لبنى : هههه صح دقيقة ناديهولك
خشت لبنى وفيقت نزار ومشت تجري ل صفاء ومروة
لبنى : شفت ربحي يابنات طرف طرفففف
صفاء : وينه
لبنى : برو اركبو لسطح وشوفوه
نزار : اه خير ربحي
ربحي : خيرات شن اﻻمور
نزار : ماشية … بالله نبيك تاخدني للعيادة
ربحي : ادلل … اركب هي
*مشوا للعيادة وخدي رقم وخش لصحة عامة وطلب عليه الدكتور صورة … دار الصورة ورجع لدكتور *
الدكتور يشوف لصورة اﻻشاعة : اممم … الجمجمة سليمة
نزار : الحمد لله
الدكتور : عندك كدمة بسيطة ف جيهة الرقبة من الخلف هيا اللي اديرلك في الدوخة
نزار : معناها مافيش خطورة
الدكتور : ﻻﻻ يسﻻمتك كبيرة … الطيحة هادي فيه حتى اللي يصيرلهم ارتجاج منها لكن الحمدلله
نزار : الحمدلله … مشكور دكتور
الدكتور : الشكر لله … حنعطيك حبوب هادو تاخد منهم مرتين ف اليوم اينحوا الدوخة ان شاء الله
نزار : تمام
*طلع نزار وصرف دواء من صيدلية وطلع لربحي برا العيادة *
ربحي : اه ان شاء الله ﻻ باس
نزار : اﻻمور طيبة قالي …
ربحي :اتصل القيافة قالي وين نزار ساعة 4:30 ومش امبين مشي قتله عاللي صار
نزار :به حطني ف الحوش نطمن العويلة وناخد سيارتي ونمشيله
ربحي : تمام
ريجينا : الوووه … حبايبي … حجزت بالريستورنت … ايلأ انا مابروح بﻻ حجز … مشاني خوخة طيب .. اكيد راح تحجوز ؟؟
خﻻفو : ان شاء الله
ريجينا : اموووه باي ياروحااااي
نزار : بارك الله فيك ربحي…منور
ربحي : النور نورك ياطيب
بتجي غادي واﻻه
نزار : ايه غير نطمن العويلة ونلحقك
ربحي : تمام سﻻمات
*خش نزار للحوش طمن عيلته وخدي حبة كﻻها وخدي مفاتيحه وطلع ماشي للقيافة *
سفيان : سبحان الله كلها جت مع بعضها فضل المخطط و طيحة الديناري مشكبنة
القيافة : وماعنديش خطة بديلة واهو لتوا مازال ماجاش
*خش عليهم ربحي : السﻻم عليكم
الكل : وعليكم السﻻم
القيافة : ها شن صار
ربحي : الدكتور قاله حالك باهي ومافيك شي
صﻻح : الحمدلله … وينه هوا
ربحي : حطيته ف حوشه قال بيطمن العويلة وبيلحقني
الشنشوبة : باهي مليح نص الهم وﻻ الهم كله
صﻻح : مشكلة ياجماعة دبرولي حل فكروا ف فكرة
زهير : راسي مايفكرش يعرف دير كدا دير كدا بس
سفيان : وانا راسي واخد اجازة نعرف نضرب نقتحم مكان نقتل بس
الشنشوبة : وانا زي سفيان
ربحي : وانا مالياش في هالمواضيع نعرف نساند بس
حاتم : وانا ..
قاطعه صﻻح وقال : انت بدات حتى كلمة .. قالك دبارة الفار على اهل الدار
حاتم : نعرف انفكر
صﻻح : هنينا تره انت وافكارك
*على خشت الديناري : السﻻم عليكم
الكل : وعليكم السﻻم
صﻻح : الله اكبر فوووق كيييد المعتدي
نزار : هههه
صﻻح : تي هكي تشغلنا عليك
نزار : والله كنت اندوش ﻻ بيا ﻻ عليا انت اتصلت وفركستني نحساب العارف دار حاجة
صﻻح : ﻻ … قعمز تو نفهمك
نزار : تمام فهمني هي
صﻻح : عندي شخص نعرغه المهم واصل هوا من القناقل
نزار : به
صﻻح : ايه بيمشي يتعشى هوا والمدام ف هداك المطعم
نزار : به وشن مشكلة
صﻻح : تي بيفشل مخطط هكي .. الراجل ﻻزم يمشي بالحجز للمطاعم معروف هكي … ووقت يحجز ﻻزم المطعم ايكون فاضي مافيشي حد اﻻ هوا ومرته … يعني خدمات خاصة من صاحب المطعم ويدير موسيقى هادية وجو اجانب
نزار : ساعة كم عادتا يمشي
صﻻح : قال ساعة 9
نزار : الميلن يعرف شكل الشخص الواصل هدا
صﻻح : ﻻ
نزار : عادتا يمشي بروحه واﻻ امن
صﻻح : بالحرس متعه
نزار : اماﻻ مليح بكل
صﻻح : كيف
نزار : نمشي انا ساعة 7:30 ع اساس ان احنا الواصل باﻻمن متعنا نمشوا بنفس خطتنا اﻻولى فرق تغير ان المطعم عنده علم بان شخص واصل وصل
صﻻح : وكان شك فيا
نزار : امممم عندك كروت واﻻ لبسة لعصابة معروفة
صﻻح : ايه ايه عندي لبسة لعصابة الراس
نزار : خﻻص ننسوها غادي بش الميلن ايشك في الراس … والشخص الواصل اييشد عصابة الراس على اساس انه انتحل شخصيته
*ارتخى صﻻح في كرسيه وابتسم ابتسامة فخر بالديناري وبدي ايصفق … وصفقوله الجماعة كلها *
صﻻح : اﻻفكار اللي عندك ماعند حد نزار : اه نسيت نقولك نبي طانطا كبيرة متع نقل القزة … و25 عامل
صﻻح : اه لنقل البضاعة تمام
نزار : عرفت العمارة اللي مقابلة المطعم
صﻻح : ايه
نزار : خﻻص خلي صاحب الطانطا ايدرس وراها وتو نتﻻقى بيه غادي
صﻻح : تمام وتوا فهم بزبط واعطي لكل شخص دوره
نزار : امنت اﻻموزين و البدالي الكحل وسماعات بلوتوت
صﻻح : كل اللي قلت عليه ويخي جبتلكم بخاخ كان تبخه ع خشم الشخص ايدوخ
نزار : 100% والشاب النظيف
صﻻح : جبتلك زوز واحد عمره 36 والتاني 29
نزار : اعطينا 36 … لكن نحتاجو مراة
صﻻح : مراة ؟؟؟
نزار : ايه بش تاخد دور مرت الواصل …
صﻻح : منين بنجيبهالك هادي … اه عندي تونسية في الفيﻻ طيابة
نزار : حلوة
صﻻح : اطلع طول
نزار : خﻻص جيبها
صﻻح : حاتم … برا للفيﻻ متاعي وتو نكلمها بش تطلعلك تمام
حاتم : تمام
صﻻح : ووقت اتجيبها برا خودلها لبس حلو قفطان طويل هكي وبكمام وعباية وكندرة
حاتم : تمام نص ساعة ونكون اهنا
نزار : ووين زوز الشباب الي حيكونوا اﻻمن متع الواصل
صﻻح : قاعدين برا ف سيارة
…الووو فاتيحة… خلي كل شي في ايدك واطلعي قدام الفيﻻ حيجيك شاب سيارته رصاصية اركبي معاه … ايه ايه بيجيبك عندي ..سﻻم
* مشي حاتم وخدي فاتيحة وخدالها قفطان انيق مستور وعباية قنينة وكندرة وجابها للقيافة *
نزار : شن اسمك انت
الشاب : طﻻل
نزار : تمام ياطﻻل البس البدلة اﻻزرق كحلي و اسي شعرك والبس كندرة هادي
طﻻل : اوكي …
*بعد شوي *
نزار : حلوو … توا نبيك تتصرف بتعالي و تكون متكبر هكي حتى ف كﻻمك وتصرفاتك وتقعميزتك واكلك وشربك تقدر ؟؟
صﻻح : يقدر يقدر واخد دورة في اﻻتيكيت
طﻻل : صح واخدها ف مصر
نزار : مليح بكل … طبعا دورك هوا ان وقت نقولك عبر السماعة صفر صفر … دير زوبعة طلع الشعرة هادي من جيبك وحطها ف الماكلة وقول من امطيب الماكلة هادي وبهدل القرسون ان الماكلة بايخة وان فيها شعرة … وخلي كبير الطباخين وكل اللي ف المطبخ ايجو لعندك … و خلي المدير المطعم ايجي ويرضيك زماترضاش بسهولة بهدله وهدده انك حتسكر هالمطعم … فهمت
طﻻل : فهمت
صﻻح : وانت ف خﻻل هالزوبعة بتخش للمصنع اللي تحت
نزار : بالزبط ….فاتيحة حتكون زوجتك …. اتصرف معاها ع هالأساس
طﻻل : تم
نزار : فاتيحة انسي روحك انك طيابة…. اليوم انتي سندريلا
فاتيحة : هههه ايعيشك
نزار : ماتتكلميش بكل ابتسمي بس ووقت مايكونش فيه قراسين جنبك حركي شواربك زعميتك تهدرزي مع راجلك
فاتيحة : تمام
نزار : انس وانيس البسوا بدالي الكحل متاعكم وزبطوا اموركم وحتكون حرس شخصي ل طﻻل وراه بزبط فاهمين
انس وانيس : فاهمين
نزار : خود انيس … سماعة بلوتوت ماتتكلمش اﻻ لما نكلمك
انيس : تم
نزار : زهير ربحي و شنشوبة وسفيان وحاتم انتو معاي … حرس اللي قدام المطعم … البسوا البدالي … و سفيان هاك سماعة ﻻسلكي حطها ف ودنك
* لبسوا كلهم واستعدوا وحطوا نظاراتهم *
صﻻح : ردوا بالكم تفشلوا … المهمة حساية نوعا ما
نزار : ساعة سبعة توا … دقايق بس اندير اتصال وانجي
* طلع برا نزار واتصل بغادة
غادة : الو
نزار :اهلين حبيبتي
غادة : اهلين بيك
نزار : غدوش … ردي بالك ع روحك باهي …
غادة : عﻻش اتقول هكي شن فيه
نزار : ﻻ شي بس حبيت نسمع صوتك ونقولك ردي بالك ع روحك ماندريش ماحدش ضامن عمره
غادة : شن فيه نزار
نزار : مافي شي بس كان صارت حاجة تاكدي ان نزار ايحبك موت .. يﻻ سﻻم
*سكر الخط ودار تلفونه صامت ورجعلهم داخل ومشي لجيهة القيافة ووشوشله : شن اسمه الواصل صاحبك
صﻻح : خﻻفو
نزار : ومرته ؟؟
صﻻح : مش عارف راجينا حاجة زي هكي
نزار : راجينا روجينا رجينا ريجينا
صﻻح : ايوه ريجينا
نزار : تمام ….
تلفت وقال : الكل تلفونه صامت … وهي طﻻل وفاتيحة اركبوا ف سيارة ﻻموزين … انيس ايسوق وانس يركب جنبه .. والباقي كلهم معاي ف سيارة اللبوة
صﻻح : نسيتوا حاجة
نزار : شنو
*ناض صﻻح وفتح دوﻻب وطلعلهم مسدسات وقالهم : انسيتوا اتسلحوا روحكم
نزار : هههه فاتتني والله … وردوا بالكم القراسين ف المطعم مسلحين
* خدي معاه كيسة نزار فيها لبسة طياب و لبسة متع عصابة الراس وطلعوا كلهم حسب مارتبهم نزار ومشوا للمطعم
نزار عبر السماعة : طﻻل اسمك خﻻفو تكلم بكل ثقة وقول عندي حجز
* وقت وصلوا للمطعم درست اللموزين وانزل انيس يفتح ف الباب واني يفتح من جيهة تانية …
ونزل نزار وجماعته متنكرين طبعا وﻻبسين بدالي اتسطروا قدام المطعم وبجنبه … خش طﻻل وفاتيحة والقرسون صدقهم وخششهم واي زبون ايجي يبي ايخش جماعة نزار اتوزعه … جي الميلن ايبيبي و فضى المطعم من زوز زباين ورحب بخﻻفو المزيف *
ربحي : بديت نتوتر انحس ان حنتكشفوا
نزار : ان شاء الله خير
* بعد ربع ساعة
نزار : طﻻل جابولكم اﻻكل واﻻ ﻻ
طﻻل : ﻻ
سفيان ل نزار : … ساعة 8:05
يستر : يستر الله
طﻻل : جابوها
نزار : انا حننسحب لسيارة ناخد الكيسة و نرجع … استنوني
* مشي عالسريع ورجع *
نزار : سفيان والشنشوبة وزهير تعالو معاي …. حاتم وربحي خليكم قدام المطعم
ربحي : اوكي
*مشوا وراء المطعم وبدلوا لبسوا لبس قراسين وخدوا مسدساتهم وحطوهم ف خسرهم وخشوا من الباب الخلفي … الشاب اللي واقف عالباب من داخل استغربهم وشك فيهم وكيف بيكلمهم طلعله نزار بخاخ وبخه ع خشمه فطاح الشاب وحطه ف تركينة ….
خش نزار ولقي عالم حايس من كميات المخدارات وجميع اﻻصناف
الميلن : ايه ايه اهو واتيات زوز طانطات …. بزبط ايه اهو ايعبوا فيهم في كياس ملح … تمام سﻻمات
نزار عبر سماعة : صفر صفر
* دار الزوبعة طﻻل ف المطعم وجو نادو الميلن
الميلن : غير استهدى بالله … شن المشكلة
طﻻل : طباخينك كلهم ماعندهمش اسلوب كيف ايكلموني بطريقة هادي كيف
*خش نزار للمكان وكلم الشاب
نزار : شنو واتيات طانطات
الشاب : ايه
نزار : باهي تمام هي خلي نطلع بيهم
الشاب : قالك الميلن ؟؟
نزار : اماﻻ عﻻش جاي بنرفعها …هوا حد يقدر ايدير حاجة من وراء الميلن
الشاب : اممم به وين المكان
نزار : تعال نقولك ع انفرد مش قدام باقي الشباب
* خداه نزار وراء الطانطا وطلع البخاخ وبخه ف وجه الشاب وشده وحطه ف طانطا … جي شاب تاني وشاف عملة نزار كيف بيتكلم عطاه سفيان خبطة على دماغه وبخله ف خشمه البخاخ وحطه جنب صاحبه …شافهم شاب من بعيد فصيح … طلع نزار مسدسه وركبله كاتم الصوت .. وعطاه رصاصتين ف رجليه …
العامﻻت فلبينيات خافو
سفيان : اقعدو ف تركينة مش حتصيرلكم حاجة
* ركب نزار الطانطا وركب وسفيا ف طانطا التانية وشنشوبة قعد بحدى العامﻻت …ش
وطلع نزار و سفيان من الباب
ومشوا لشارع اللي بعده ولقوا الطانطا كبيرة و25 عامل اللي باعتها ااقبافة فرغوهم في غضون 8 دقايق ….
نزار : فيسع البسوا البدالي متاعكم
انيس : نزار ساعة 8:35
نزار : اوكي
* لبسوا بداليهم فوق لبسة القرسون ولوح نزار ف طانطا متع الميلن لبسة عصابة الراس … مشت الطانطا و25 عامل بالدرقة من جيهة التانية ورجع نزار وسفيان لمكانهم
نزار : شنشوبة خليك ع استعداد من اول مانقولك اطلع اطلع طول ولف عالمطعم وبرا لشارع التاني تو نجو ناخدوك
شنشوبة : تم
نزار : ماتنساش ادير حريقة ف المصنع
شنشوبة : اوكي
طﻻل : تي كيف اتقدموا ماكلة بشعر متعها درهتولي مبدي
الميلن : حاضر يااستاد تو نغيره الطاقم
طﻻل : حنسكره حنسكره هالمطعم
نزار : طﻻل نوض زعميتك اضايقت
طﻻل : خﻻص معش نبي منك شي حول …
ناضت ريجينا مع طﻻل وركبوا سيارات كلهم ومشوا ونزار وجماعته لفوا عالمطعم وخدي شنشوبة واشتعل حريقة في المصنع تحت العامﻻت كلهم هربوا والحشيش كله فسد … طفو الحريقة والمطعم فوق ماصارله شي
القيافة : والله يا ديناري انت 100 %
سفيان : والله كله صار زي الحلم ههههه
شنشوبة : انا قريب متت قلت كما يخش عليا الميلن وانا ف المصنع لوطا
نزار : ههههه حظك طﻻل عرف كيف يماطله
* وقف صﻻح وطلع شنطة فيها فلوس من دوﻻب وحطها على الطاولة وفرق لكل شخص 3000 دينار عالمهمة … ونزار عطاه 6000 تخطيط وتنفيذ
نزار ردهمله وقاله : ﻻﻻ مانبيش فلوس انت عارف وانا عارف عﻻش وافقت بيها المهمة هادي
صﻻح : اه اوكي على راحتك
ترررررن تررررن
صﻻح : الوو
صوت غريب : انت نفدت العملية عن طريق دراعك اليمين … الديناري واﻻه
صﻻح : منو … منو معاي
صوت غريب : مش مهم منو المهم بتنفدلي مهمة انت وياه يا نبلغ الميلن انك وراء هدا كله
شن بيصير ف القيافة وشن بيرد على الشخص المتصل وكيف بيتصرف معاه؟؟ وهل يرفض او يقبل ؟؟ وشنننن بيصير في الديناري لو سمع هالكلام ؟؟ اجابة على هالتساؤﻻت هدا اللي حنعرفوه ف الجزء القادم …
يتبع…….
لقراءة الجزء التالي : الجزء الرابع عشر من رواية عاصفة الصمت
لقراءة الجزء السابق : الجزء الثاني عشر من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
