الجزء الثامن من رواية رجل يحببنه الكثير للكاتبة لوزة ليبية

لنكمل مع الأحداث لنري المفاجآت العجيبة التي تحدث وتصدمنا أكثر، ما هذا ؟ هل يعقل ما يحدث مع ابطالنا في الرواية ؟ كل شيء معقول فخيال الكاتبة كبير ويأخذنا في جولة من الجمال والروعة التي لا تنتهي ، لذلك هيا بنا لنبدأ قراءة الجزء الثامن سوياً لنعرف ماذا سيجري معهم ؟

الجزء الثامن من رواية رجل يحببنه الكثير للكاتبة لوزة ليبية

لبس هاني كندرته وفتح الباب
فتح الباب
عزيزة تنادي :هنيوة هنيوة
وقف هاني وتلفت وقالها:نعم
عزيزة قربت منه وقتله:حبيبي سامحني امس ماكانش قصدي
هاني:باهي عزيزة اوكي خلي نمشي توا..
عزيزة:بما انك ناديتني عزيزة معناها قاعد زعﻻن
هاني:ﻻ ماتاخديش فبالك
جبداته عزيزة و وقف هاني واتكى ع المدخل ((دوﻻب الكنادر))
قدمت عزيزة ولصقت ف هاني ووشبكت ايديها وراء رقبته وعطاته قبلة فرنسية حلوة وهاني انسجم معاها حط ايديه على خسرها وضمها ليه بقوة لدرجة انها انخلعت من الضمة
هاني:باهي عﻻش هكي درتي امس بيبي
عزيزة:ماه حبيبي ماتحملتش نشوفك مع بنت خالك امس… تاكلو وتهدرزو
هاني:به وشن المشكلة ماه حاكيلك عليها ف فترة خطوبتنا ان مرام ديما عندنا
عزيزة :ماتوقعتش انك واخد عليها لدرجة هادي
هاني:شن متوقعة يعني متربية معاي من كان عمرها 11 السنة ممكن حتى فترة اﻻعدادية سجلت ف المدرسة اللي جنبنا
عزيزة:يعني …
هاني:عزو بيبي ماتفكري في شي مرام زي اختي راه
عزيزة:باهي شن تقوللها ماكلتك حلوة
هاني: متعود ع ماكلتها الحق ادير في اكﻻت حلوة ﻻنها مسجلة في كورس طبخ
عزيزة:باهي بيبي معناها زي اختك واﻻه نطمن
هاني:اكيد حبيبتي امممموووه
محﻻ ريحتك عزو اتهبلي
عزيزة:هههههه …… اااااااا بيبي قطوسة حﻻاااهاااا
هاني:اوووف هدا قطوس الجيران شن خششه اهني
عزيزة:احنا انسجمنا وباب مفتوح
هاني:قصدي شن خششها وباب الرئيس لوطى مسكر ماحد فتحه
عزيزة:حبيبي عجبتني خلي ناخدوها نديرلها دوش ونربوها
هاني:ﻻﻻ فكينا من قططس خلي نشدها نطلعها .
هاني يجري في جرت القطوس وماقدرش يشده طلع ف الدروج هو يجري ف جرته والقط يهرب ويفلت منه وعزيزة تضحك ع هاني

مرام وراء الباب تسمع ف صوت هرج و مرج فرحت وتكلمت بصوت واضح تستاهل اهي تعيط ف الدروج حسه طلقها الجيفة ههههه

خ سميحة:يامراااام يامراااام
مرام:اهو جاية عمتي هي ….
ومشت مرام لدار خ سميحة
خ سميحة: خيره هاني صوته في دروج يصيح شوفي شن فيه مابين قمت روحي
مرام:هيا هي
مشت تجريي مرام وفتحت الباب وتخش قطوسة مياااااو مياااو
مرام:ااااااا وووووك عليا قطوووسة…
وكبش القطوس ف رجل مرام معش بي ايحول ومرام تبكي
خش هاني وقالها:اصبري يامرام معش تجري خلي نحيها من رجلك
عزيزة:شدها ياهاني
مرام:وراسك ياهاني فيسع
قرب منها هاني ونحى القطوس من رجلها
خ سميحة :ئه شن فيه
هاني:قطوس مش عارف شن خششه
عزيزة:تقريبا من باب السطح امس كنت فوق نشمم ف هواء ونسيته مفتوح
هاني:ههههه كله منك عزو درتينا شوشرة عالصبح… وفوق من هكي اقتحمت علينا الحوش يمى تصوري
خ سميحة:اللطف نوض نوض طلعها برا الحوش
هاني:هيا هي
وهاني كيف بيطلع من الحوش فلت منه القطوس ومشت لمرام
مرام تصيح هاني ونبي حولها ونبي ووووك عليا ووووه
رجع هاني خداها وطلعها برا الحوش ورجع خش
مرام تبكي جاها هاني وقالها يامهبولة ياخوافة تخافي من قطوس مرام:مانحبهمش القطاطيس
هاني:صار عزيزة شجاعة قتلي خليها عندنا هههههه
عزيزة:اي والله ياريت ههههه
هاني:هههه يﻻ سيداتي نستأذنكم توا ضمو الحوش فطرو ميمتي الغالية ومع ظهرية وتو رتوجة للمدرسة وطيبو الغدي ديرو حاجة قنينة باهي او
مرام:به تو ندير حاجات حلوة
خ سميحة: تكلم فيهم اتقول نساوينك الزوز هههههه يﻻ عليك هاني وخﻻص
هاني:هههههه عشت الدور انا… خلي نمشي بالله وقت عالعمل
عزيزة:ﻻﻻﻻ هاني يحب ماكلتي بس ههههه
هاني:اكيدة ….. وغمزلها

مرام تنتكلم فعقلها:ياكلبة الكلبات كان نشدك بس…
طلع هاني من باب الرئيسي ولقي قطوس واقف استعداد كيف بيخش سكر هاني الباب وركب سيارته واتجه للمصرف …
خشت مرام لدار وخدت نقالها واتصلت ب وفاء
مرام:وفاء وفاء
وفاء:خيرك شن فيه صبح
مرام:مش عارفة هاني قاعد يحب مرته ويغمزلها شنو سحر ماياترش فيسع
وفاء:ﻻ يأتر طووول
مرام:اماﻻ خيره قاعد عادي معاها
وفاء:كيف شن صار احكيلي
مرام حكت ل وفاء
وفاء:230 مشو عالقطوس مبروك عليك قطوس ايحبك مع مرتبة الشرف
مرام:تتسهوكي
وفاء:والله نحكي بجد
مرام:باهي كيف
وفاء:بش قتلنا كاميليا اول من يتخطى السحر حيديرله مفعول
مرام:ايه
وفاء:خﻻص القطوس تخطى السحر ودار له مفعول
مرام:باهي شن ندير توا
وفاء:ماعندك ماديري بري ربيه القطوس
مرام:منزومة بيه …. خلي نمشولها تاني كاميليا
وفاء:ماينفعش
مرام:عﻻش
وفاء:ﻻن ادير ف سحر لكل شخص مرة واحدة بس
مرام:خيره كل شي مرة واحدة
وفاء:هكي نضامها هيا …. مﻻحظتيهاش امس وقت قتلي شن جابك ياانتي بش درتلك المرة اللي فاتت
مرام تبكي:ايه ايه وووك عليا كيف ندير نبي هاني
وفاء:وين نندري عليك انا بري بري بنكمل نومتي هيا باي
مرام:باي باي
مرام تدوي مع نفسها وتقول شن هدا النهارات معقولة حتى بالسحر ماباش يجي والله تعبت عليك حظ رايح زي الكرنب

حسام ل هاني: صباحووووو
هاني:صباح الفل شنو اليوم حليق وانيق وﻻبس بدلة كحلة شنو فيه
حسام:ههههه فاتحتي اليوم بنتني
هاني:هههههه تي انت مش ملحق ع اﻻولى
حسام:هههه نغيض ف المرا بس
هاني:هههه يابارد
حسام:والله بجد كنطتني اتنق تبي تبات عند اماليها اربعة ايام مابيتش اناقشها زي كل مرة …امس ف ليل قتلها باهي تم واليوم صبح نضت حلقت دوشت ولبست بدلة هادي ودرت برفان ﻻكوسن .. وطلعت احﻻ كندرة عندي وقتلها هي خلي نحطك ف حوش اماليك قبل مانمشي العمل هاني:هههههه اقوى عليهم ياوحش
حسام:ههههه ايه المهم قرنت حواجبها وقتلي شنو خيرك امتكم
شن فيه اليوم
هاني:هههههههههه غيييرة
حسام:هههههه وهدا سبب لبسي للبدلة
شوف ها وصلني مسج هههه ومن بكري ترن تحسابني مداير موعد عالصبح
هاني:ههههه ياعيني مسجات واهتمام

ركبت عزيزة لحوشها وهيا متبلغمة من كﻻم هاني …. خدت نقالها واتصلت ب فيحاء وهدرزت معاها قريب تلت ساعة وفشت غلها ف كل شي شن صارلها امس وشن صار ف صبح

ومع ساعة 11
منال ل دنيا:كساد النهارات حسني بنروح
دنيا :ستني ستني اختي دارت رنة حسها جابتلي اخبار
منال:كيف بنسألك شن صار ف اختك
دنيا:قتلها ف بداية ماوافقتش انها تنقلي اﻻخبار لكن من هون ل هون قدرت نقنعها
منال:وباهي كيف عزيزة ماتعرفش اخت صاحبة اختها
دنيا:به مثﻻ انا شن بيجبرني نعرف اسامي خوات صاحبة اختي بكل انتي منال مرات نحس فيك غبية .. ستني خلي بنتصل ب اختي
الو ها سندس شنو ….حققق … اهاااا …حلو حلو وكيف عرفتي
سندس:وقت اتصلت عزيزة … فيحاء كانت جنبي بعد ماكملت مكالمتها سألتها شنو فيه فحكتلي كل شي
دنيا:اها صحيتي سندوستي يﻻ باي

منال:ها شنو
دنيا:هدا وين بتحلوو اللعبة يامنولة…
ناضت دنيا وطلعت من المكتب ونزلت من الدروج
وخشتله من مكان العمل خلف الشباك وقتله … عزيزي هاني
هاني:استغفر الله ياربي
دنيا:شنو شبحت شيطان واﻻ كيف
هاني:دنيا خاطيني خاطيني افهمي
دنيا:ﻻ مانقدرش نخطاك فيه حد يخطى عيونه ؟؟
هاني :دنيا انا مش ليك معقولة هكي ماعندكش ذرة كرامة !
دنيا:الحب مافيشي كرامة
هاني:اي حب اللي تدوي عليه ….انتي خاينة خ ا ي ن ة فهمتيها الكلمة هادي خنتيني وﻻ ومع منو مه مديري توجع النم بالله بري تره
دنيا:معليشي فش غلك فيا عادي نتحملك عارفاتك متعصب من عزيزة امس واللي داراته ههههههه
هاني:شنو !
دنيا:يﻻ كمل عملك ربي ايعاونك
هاني:تعالي اهني شن كنتي تقولي دنيا:سﻻم
مشت دنيا بخطوات سريعة وركبت دروج

هاني قعد يبكبك ع دنيا لين كسر البيرو اللي ف ايده
خشت واحدة حليوة للمصرف متكمة ﻻبسة سروال اكحل وبلوزة جينز وسبتة بيضاء في النص وساعة بيضاء وكندرة بيضاء ….سألت مراة وقتلها عفوا لو سمحتي منين نفتح حساب
المراة:من شباك هداكا الوسطي
البنت:تمام صحيتي
تقدمت البنت وقرنت حواجبها وفتحت عيونها ونحت النظارة وقالت لنفسها ﻻﻻ مستحيل … قدمت وقفت قدام الشباك وقالت :صباح الخير..
هاني قام راسه وقعد يركز ف مﻻمحها وابتسم وقالها:صباح النور..روابي واﻻه
روابي: ايه
طلع هاني من وراء الشباك ووقف قدامها وقلها
:متغيييرة امتى روحتي
روابي:السبوع اللي فات…لكن سبحان الله ماتوقعتش نلقاك صدفة بكل
هاني:سبحان الله… وشن بتستقري اهنا مش مصدق انك روحتي
روابي:ايه بابا كمل ابحاثه وانا كملت ماستر متاعي واخيرا ههههه وروحنا بس بجد تعودت ع ماليزيا
هاني:الحمد لله ع سﻻمتكم
روابي:شنو اماﻻ وين القروب وين مكانهم واﻻ معش تقابلتو …اكيدة تفارقتو واﻻه
هاني:ههههه ﻻ والله قاعدين زي العكرا …. اونه حسام نازل من الدروج
جي حسام وتقدم وقال ل هاني شنو يامبحبح الغدي ع حسابك اليوم واﻻه
هاني:تي غير شوف من اهنا
ركز حسام وقالها :اوووو روابي زارتنا البركة
روابي:هههههههه حسام شن الجو
حسام:تمام تمام شن امورك انتي وشن مدايرة
روابي:كويسة الحمد لله
حسام:شنو روحتي
روابي:ايه ….شن صار في حياتكم تزوجتو واﻻ قاعدين ﻻبسين الدبلة هكي وخﻻص زي ايام الجامعة هههه
حسام:ﻻ تجوزت وماشية اﻻمور ههههه
روابي:هههههه وانت هاني
هاني سكت فرد حسام وقال :هدا خليه بروحه عريس ليه شهرين بس …
تﻻشت اﻻبتسامة من ع خدود روابي وخدودها ولو حمر
هاني نزل راسه
حسام ادكر العﻻقة اللي كانت بين هاني و روابي والجامعة كلها تعرف بعﻻقتهم كانو عصافير حب بكل معنى الكلمة
استدركت نفسها روابي وقتلهم اها مبارك ربي ايهنيك
هاني:تسلمي روابي
حسام:وانتي روابي شنو مخطوبة تزوجتي شن صار فيك
روابي: جوني عرسان بس رفضت مانبيش نتزوج زواج تقليدي وفي نفس الوقت ماقدرتش نرتبط سكرت قلبي من لما سافرت من ليبيا عموما قولولي شن اﻻوراق المطلوبة بش نفتح حساب …مستعجلة بنروح
هاني ب ابتسامة خفيفة:ورقة من مكان العمل و4 صور وصورة لبطاقة الشخصية 
روابي:اوكي حنرجع غدوة … بالله سلمولي ع هيثم . سﻻم
هاني:سﻻم
حسام ل هاني : احلوت البنت ماشاء الله
هاني:شن طلعها في حياتي تاني
حسام:ﻻحظت وجها كيف اتغير لما قتلها هاني عريس
هاني:مبردك ياحسام مبردك عﻻش جرحتها هكي
حسام:معليشي هاني تصير حاجات في حياتنا عكس مانقررولها
هاني نزل راسه ويشوف ل اﻻرض وقال:خسارة كله من بوها  مهوس قراية النم …قام راسه هاني وشااف لصقف وكمل دوته :بمجرد ماكملت روابي قرايتها ف جامعة وكنا فرحانين حتى مشروع تخرج درناه مع بعضنا اونه كان تتدكر …وبعد تخرجنا بيومين مشيت خطبتها بس بوها ماوافقش قال نبيها تكمل ماجستير وفجأة سافرو كلهم اهو ليهم 6 سنين
حسام:عارف مدكر اتقول امس سبحان الله
هاني:مش عارف نحس ف حاجة زي اللي نبضت من اعماقي عرفت كمن يخشش ايده من فمك ويجبد قلبك هكي صارلي تو
حسام:وووه حتى تعبيراتك سحنتي
هاني:هدا اللي حاس بيه
حسام:خﻻص ياهاني مش نصيبك الله غالب
هاني خنقاته العبرة وناض وقال : بنطلع نشم هواء
حسام:اوكي
طلع هاني قدام المصرف وخدي جيهة ظل وقعمز

خ سميحة:يامراااام
مرام:نعم عمتي
خ سميحة:وتي رتاج للمدرسة واتصلي ب هاني قوليله يجيب طشة فاكهة وهو مروح
مرام:به حاضر عمتي

هيثم ل حسام:وين هنيوة اماﻻ
حسام:مضايق
هيثم:عﻻش
حسام:قريب حتى بكي
هيثم:شن فيه ياراجل
حسام:روابي كانت اهني
هيثم:من روابي ….ﻻﻻ تتسهوك
حسام:والله بجد
هيثم:روابي ماغيرها متع جامعة ؟
حسام:ايه
هيثم:وين هوا توا خلي نهدرز عليه
حسام:ﻻﻻ خليه تو يلم شتات نفسه بعد شوي تو نمشوله

مرام :عمتي هاني مايردش
خ سميحة:عاوديله عاوديله
مرام:به
اتصلت مرام ب هاني
هاني:ها مرام
مرام:هاني قتلك عمتي وقت مروح جيب شوي فاكهة
هاني:باهي ان شاء الله
مرام:خيره صوتك متغير
هاني:شي شي تو نهدرزو بعدين مش فاضي توا
مرام:اوك سﻻم

دنيا ل منال:تعرفي مخططة اليوم نبعتله مسج غرام ف الليل نطينله عيشته
منال:ﻻ فكك عيب عليك
دنيا:شنو غير انا نقعد حارقة اعصابي عليه خلي ايضوق حتى هو
منال:ﻻﻻ من راي ماتبعتيش مش باهي تفرقيه مع مرته
دنيا :واﻻ تعرفي قديمة لقطة نبعتله مسجات بش مرته تقراهم وتشك فيه ويصير بينهم تتش وتزعل منه وتمشي لحوش بوها وهو يلحقها ويراضيها وجو هدا متع
منال:ها شن بديري اماﻻ
دنيا:توا خطرت فبالي فكرة حلوة ومنمقة
منال:شنوووو
دنيا:نياهاهاهاهاها حتعرفي يامنال بس مش تو
منال:برغم انك صاحبتي واﻻ اﻻ انك خبيثة هههههه
دنيا:خبيثة واﻻ اللي هو المهم هنيوة
…خلي نتصل ب ولد جيرانة
منال:شن بتقوليله
دنيا:تو تسمعي نوضي سكري مكتب نوضي
منال:به
ناضت منال سكرت الباب ورجعت مكانها وخدت دنيا نقالها واتصلت ب ولد جيرانها
دنيا:اهلين حمودة شن الجو
احمد:تمام دندون شن امورك
دنيا بنبرة دلع:بخير …. حمودي عندي طلب صغيرون وان شاء الله ماتردنيش
احمد:من امتى نرد فيك انا عيوني ليك غير انتي ارضي علينا بس
دنيا:تسلملي حمودي…. نبيك تسألي ع عزيزة صالح فﻻن … سجل عندك اﻻسم هدا
احمد:عزيزة صاالح فﻻن تمام … شن كيف نسال عليها
دنيا:اي شي عﻻقات سابقة مواقف نقاط سودة ف حياتها اي شي
احمد:اها وين السكن
عزيزة:ف منطقة الحشان دورها دوارة باهي نبي معلومات مفصلة عليها
احمد:اوك تم بس شن سبب خيرها
دنيا:ماتسألش غير دير زي مانقولك
احمد:ضاربني الفضول
دنيا:حموووودي
احمد:ياحليلي من هالصوت الحلو خﻻص دندونتي تو نسأل عليها انتي تؤمري امر ياعسل
دنيا:احﻻ حمودي يﻻ بباي
احمد:زيدي هدرزي شوي
دنيا:تو نهدرزو وقت تجيب المعلومات يﻻ توا عندي شغل بباي حميدة
سكرت الخط دنيا
منال ل دنيا:اكيد تبصري
دنيا:اكيد ﻻ
منال:بتخربيلها حوشها
دنيا:دخلي فيها خدت مني حبيبي هاني
منال:ومنين بيجيبلك معلومات
دنيا:هدا احمد دولة كل شي عنده واللي يبيه يجيبه يجيبه
منال: ربي يهديك مرات انحس فيك تاعبة نفسيا
دنيا وقفت وخبطت بيديها ع المكتب وقالت: انا انحبه مش مريضة نفسيا

هاني ل هيثم:اااخ ماحسبتش روحي قاعد فيه شء في قلبي ليها هكي
هيثم:حتى هو حب 6 سنين من كنت ف 18 ل 25 وحتى سافرت قاعد تحبها ماتنكرش هاني
هاني:باهي لكن عﻻش قاعد نحس بيها هكي برغم اني متزوج توا وعندي مرتي انحبها
حسام:شن دخل المشاعر ف الزواج اصﻻ من اﻻخير خودها هكي انت تسرعت ف زواجك من عزيزة عرفتها ف اقل من شهر ومشيت خطبتها طول
هيثم:شن قصدك هاني ماحبش عزيزة ؟؟
حسام:ﻻ مش قصدي هكي لكن بكل صراحة سامحني ف كلمتي هادي ياهاني انت كنت هارب
هاني:تي فوتني تره شن هارب هادي ….واصﻻ انا مجرد مشاعر ماعتقدش اني نزال نبيها روابي
حسام:ايه هارب…هارب من دكرياتك مع روابي وحبك القوي ليها وهارب من عﻻقتك الفاشلة مع دنيا اللي خاناتك مع مديرك فدرت عزيزة طوق نجاة ووهمت روحك حبيتها وتزوجتها في مدة قياسية جدا جدا ماتجاوزتش تﻻتة اسابيع فقط انا شخصيا تفجأت ياراجل
هاني:تي ضم فمك بﻻ دراه كبد تره
حسام:عﻻش دراه كبد كنت نقول ف الحق
هاني:حق عينك
حسام:كداب كان بتقولي عكس هكي
هاني يصيح:ضم فمك حسام مش ناقص انا
حسام:تي شن تعلي ف صوتك عليا $#@&
هاني:نعليه ايه اعرف شن تقول ومعش اتسب
حسام:تي برا $@@&* انا الغلط ندوي معاك هكي
هيثم:صلو عالنبي ياجماعة خيركم خﻻص سكروه الموضوع
ناض هاني وطلع مفاتيحه من جيبه وركب سيارته حط ايده على وجهه

هيثم ل حسام:خيرك كلمته بطريقة هادي
حسام:ﻻن حقاني كﻻمي ياهيثم هاني تجوز عزيزة بش ينسى وقتله كﻻم هدا ف فترة خطوبته اللي كانت اسبوعين بس
هيثم:مهما كان انت حطيتله كﻻم اتقول خرسانة مسلحة
حسام:هدا صاحبي نعطيه الكﻻم اللي يبكيه مش اللي يضحكه تو تشوف يدور يدور ويقولي كﻻمك صح تو تشوف

فيحاء ل عزيزة:قولي من اتصل بيا برقم غريب ويبعت ف مسجات من بكري
عزيزة:ها منو
فيحاء:بانون …
عزيزة صيحت: ﻻﻻ كدابة تكذبي واﻻه !

يتبع ………..

لقراءة الجزء التالي : الجزء التاسع من رواية رجل يحببنه الكثير للكاتبة لوزة ليبية

لقراءة الجزء السابق : الجزء السابع من رواية رجل يحببنه الكثير للكاتبة لوزة ليبية

للإطلاع علي فهرس الاجزاء كاملة : جميع اجزاء رواية رجل يحببنه الكثير كاملة للكاتبة لوزة ليبية

جميع الحقوق محفوظة للكاتبة لوزة ليبية .