سنعرف في هذا الجزء ماذا سوف يحدث مع ابطال روايتنا هاني وعزيزة ودنيا ومرام وروابي من احداث شيقة ؟ الأمور تحتدم اكثر وسنصل إلي مراحل فاصلة في الاحداث لذلك هيا بنا لنبدأ متابعة الجزء سوياً للتعرف عليها .
الجزء التاسع من رواية رجل يحببنه الكثير للكاتبة لوزة ليبية
هاني ركب سيارته ولعها بيطلع من بركيدجو بيروح
هيثم:هاني هاني
فتح هاني روشن السيارة وقاله :اه نعم
هيثم:وبن ماشي
هاني:مروح
هيثم:دوام مازال ماتمش قاعدة ساعة 12
هاني:نحس ف راسي صداع خودلي اذن بالله عليك
هبثم:اوكي ان شاء الله ﻻ باس عليك يابرو
هاني:الله ﻻ ايوريك باس هي سﻻمات
طلع هاني من زنق مختصرة بش يروح ويضرب عالدومان ويقول الشيت شن طلعك ف حياتي روابي كيف قلت استقريت شن ذنبها عزيزة بش تكون مشاعري لبنت تانية ﻻﻻﻻ ياهاني عزيزة بنت طيبة وكويسة اااخ ياربي
عزيزة ل فيحاء:قاعدة مش مصدقاتك راه
فيحاء:والله بجد
عزيزة:باهي شن يبي بانون توا
فيحاء:قال بنسأل ع عزيزة ونهديها اغنية وينك حبيب عيوني ل عاصي الحﻻني
عزيزة:وشن قال تاني
فيحاء:شي هوا هدا اها وقال ان امه توفت
عزيزة:الله يرحمها
فيحاء:بس هدا اللي قاله بس حسيت من صوته انه يبكي واﻻ مخنوق بالعبرة لما قال اسمك
عزيزة:والله فركستيني يافيحاء
فيحاء:المهم هدا اللي صار يﻻ باي توا
عزيزة:باي
قعمزت عزيزة عالكنبة نكلم في نفسها .. ﻻش رجع بانون يسأل عليا هو اللي سيبني مش انا… وتوا زعميته يسأل….. اخ وخﻻص …صح اني متزوجة بس وحق ربي ماننكر قلبي قاعد مع بانون ياربي عﻻش هكي
هاني قاعد يفكر عﻻش بس اشمعنى توا عﻻش ماروحتيش قبل زواجي عﻻش …. ياودي كﻻم حسام صح انا هربت من واقعي بدل مانواجهه مفروض اني ماتزوجتش وبرغم ان يقولو الزواج ينسي اﻻ اني كنت نضحك ع روحي
وصل هاني قدام الحوش وركب طول لحوشه
خش وقال سﻻم عليكم وقعمز ع اول كرسي صادفه
عزيزة :وعليكم السﻻم
هاني شاف ل عزيزة وقال بينه وبين نفسه …. معقولة بنقعد عايش معاك وقلبي مع غيرك ؟ خايف نتخيلك روابي حتى حرام عليا
عزيزة تشوفاه وتفكر بينها وبين نفسها … انت شخص كويس ياهاني وماريت منك اﻻ كل خير بس قلبي معلق مع بانون كان قدامي 24 ساعة …كنت نحساب روحي بننساه
هاني:كيف حالك عزيزة
عزيزة:الحمد لله شن اخبارك انت
هاني:كويس ،ماستاحشتنيش اليوم
عزيزة:اها اكيدة وانت
هاني:اي حتى انا
عزيزة:رجعت بكري اليوم
هاني:ضغط عمل ف قررت نروح
عزيزة:اها اوكي
وقف هاني وقالها :اوك بنخش ناخد دوش توا …
عزيزة:به
خش هاني للحمام وعبى البانيو
واسترخى يفكر … وقعد يذكر ف ايام الجامعة لما يستنى فيها ف المحطة لين اتجي ويركبو اﻻفيكو مع بعض … ويحضرو محاضرات وياكلو ويشربو ويمشو لسوق يشرو في حاجات مع بعض …ابتسم هاني ونحى اﻻفكار من راسه وتكلم مع نفسه ﻻﻻ مستحيل نخون عزيزة حتى بتفكيري البنت عطتني عيونها وتغار عليا …. ايييه عليك هم مايلتم
خطمت عزيزة من جنب الحمام طقطقت باب وفتحت وقتله : هاني في من تكلم
هاني:ههههه سرحت وفكرت بصوت عالي بس
عزيزة:اها اوك … طلعت عزيزة وسكرت الباب
وخشت للمطبخ ادير ف سﻻطة وتفكر في بانون لما كان ديما تحت روشن دارها وبحكم حوشهم ارضي كانو مع ساعة 4 في الليل يجيها ويحطو ايده ف ايدها ويهدرزو
وكانت شبه طول اليوم في حوش جيرانها تتسبل بتهدرز على خواته وعيلة بانون كلها تندري على الحب اللي بينهم ..وحاولت تتفكر اسم اﻻغنية بس ماقدرتش معش ادكرتها…
كمل هاني دوشه وطلع من حمام لبس حوايجه وفتح تلفزيون بش يتفرج يمشي في قنوات خطمت قناة مزيكا سمع اغنية وركب ف القنوات لين صادفاته قناة روتانا…فيها اغنية وينك حبيبي … حصريا
قال بصوت واضح:حيه هادي اللي سمعتها ف ال fm تعالي اسمعيها عزيزة من شوقي الك دبت متت
عزيزة قالت فبالها اياح خليني فحالي ياهاني والله ماناقصاتك وردت عليه:انا مشغولة شوية هاني ..
هاني:اوكي به
هاني من اعجابه ف اﻻغنية على الصوت
وبمجرد عزيزة ماسمعت كلمة وينك حبيب عيوني طلعت تجري من مطبخ ووقفت تسمع ف اﻻغنية
هاني:هاه عجباتك واﻻه شن رايك في ذوق حبيبك هههه
شبحتله عزيزة وقتله: بانون
هاني:شن بانون ؟؟
عزيزة جبهتها ولت عرق وقتله:قصدي المغني اللي مع عاصي الحﻻني نحسابه الشاب بانون هههه
هاني:اها ماندري …
مرام:عمتي انا راكبة نمد صونية المبطن والرز المخلط ل عزيزة وهاني
خ سميحة:باهي به ماتعطليش بش تجي توتي رتاج للمدرسه
مرام:اوكي لكن مش عارفة زعما روح ؟؟
خ سميحة:شوفي سيارته كان مدرسة معناها روح
مرام:صح اي
مشت مرام لروشن شافت لقت سيارته مدرسة خدت الصونية وركبت وقبل مااطقطق واست شعرها وشرينت عالحوش
هاني:اوكي جاي هي
فتح الباب
هاني:مرومة خشي خشي
مرام:شن الجو
هاني:تمااام
مرام:خيرك ماخطمتش وقت روحت
هاني:روحت خلوقي ضايقات
مرام:من شنو
هاني:ﻻ هكي غير ضغط عمل بس
عزيزة سمعت صوت مرام وماعدلتش سارحة في بانون
هاني:الصونية شن فيهاااا
مرام:رز مخلط ومبطن
هاني: نقاط ضعفي
مرام:هههههه
هاني:اسمعي مرام …. توا عزيزة مطيبة غدي وتو تحرج كان كليت اﻻكل هدا
مرام:ياسﻻم قصدك تبيني نرجع بيه وانا دايراته ع خاطرك
هاني:برغم اني جعان …. وهيا حسها مدايرة طبيخة اممم به نقولك بري نزليها صونية وانا تو ننزل ناكلها لوطى اوكي
مرام:لهدرجة ماتبيش تزعلها o_O
هاني:اي عزو زعولة هلبا 
مرام بنبرة حزن:خﻻص تو ناكلها انا
هاني:تاكلي عينك يامشفشفة دسيهالي
مرام:باهي به خلي ننزل انا
هاني:به
طلعت مرام وسكر هاني الباب مدت راسها عزيزة من المطبخ وقتله: شن تبي مرام
هاني:قتلي تبي تتغدى فقتلها عزو حبيبتي مطيبة حاجات قنينة
عزيزة:اها اوكي
صلو الظهر وحطت عزيزة الغدي وتغدو
هاني مشي لدار النوم واتكى
كملت عزيزة عسل ماعين وضمت المطبخ وخشت لدار النوم بش اتقيل اتكت على السرير وغمضت عيونها
هاني يشوف لسقف بعدين تلفت لعزيزة وقالها :عزو خيرك عاطيتني بالظهر وقرب منها وباسها من كتفها عزيزة:ﻻ شي تعبانة بس
هاني:خيرك مادلعيش فيا اليوم
عزيزة:حبوبي نعسانة شوي بس
هاني:ما اشتقتيلي ؟
عزيزة :اشتقتلك بس نعسانة يلا قيل هاني
هاني:اوكي
خطرت على باله روابي ضرب راسه وقال عيب ﻻزم نحترم هالأنسانة البريئة اللي راقدة جنبي ابتسم وقال :ربي يحفظك عزيزة
عزيزة سمعت كلمته هادي نزلت من عينها دمعة ردت عليه :ويحفظك هاني
مر اليوم بين تفكير عزيزة في بانون وبين هاني يفكر في روابي ويحاول انه يتناسى موضوعها …. وعلى تاني يوم من هدا الموقف
عزيزة:هاني يﻻ فيق بش تمشي العمل
هاني:هيا هي ….
بعدين ادكر ان روابي بتجي للمصرف بش تفتح حساب فقال لعزيزة: مش ماشي اليوم
عزيزة:اوكي به …
بعد اربعة ايام بالتمام
يوم اﻻربعاء الساعة 9 صباحا في مصرف الجمهورية
منال ل دنيا: نقالك كان يشرين
دنيا:اوكي خلي نشوف منو ….. حيه احمد متصل عﻻش ماقتيليش
منال:انتي كنتي تلوقني ف المكتب التاني
دنيا:به به خلي نعاودله…. الو اهلين احمد
احمد:اهﻻ شن الجو
دنيا:تمام وين الغيبة
احمد:انشغلت شوية وكنت ندورلك نسألك ع البنت هادي
دنيا: هاه وشن لقيت
احمد:بﻻوي كثيرة
دنيا:ههههه هيا قول قول
احمد:ﻻﻻﻻﻻ مش هكي عالتليفون
دنيا:هاه اماﻻ شنو
احمد:عازمك على الغدي اليوم وتو نهدرزو ونحكيلك بالتفصيل
دنيا:تم تم حمودة خﻻص نتقابلو في التركي ساعة 1
احمد:اوك تم سﻻمات …
منال:ها شنو
دنيا:ماباش يقولي قالي نعزمك ع المطعم ونهدرزو
منال:اها باهي تكسبيلك تغداية هههههه
دنيا : مش هامتني التغداية المهم نعرف ماضي الاخت عزيزة ههههه
يتبع …….
لقراءة الجزء التالي : الجزء العاشر من رواية رجل يحببنه الكثير للكاتبة لوزة ليبية
لقراءة الجزء السابق : الجزء الثامن من رواية رجل يحببنه الكثير للكاتبة لوزة ليبية
للإطلاع علي فهرس الاجزاء كاملة : جميع اجزاء رواية رجل يحببنه الكثير كاملة للكاتبة لوزة ليبية
جميع الحقوق محفوظة للكاتبة لوزة ليبية .
