الجزء

الجزء الثاني عشر من رواية المشوه

الجزء الثاني عشر من رواية المشوه

وفي الجزء الثاني عشر من رواية المشوه دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة ميشو محمد .

الجزء الثاني عشر من رواية المشوه

لميس ايدها ف ايد غياث وهو يسوق
غياث ضحك: كذب ولا حلم
لميس: حق ❤
غياث قام ايدها باسها وابتسملها
.
نورس المجنونة:جواد الف مرة نتكلم معاد تعاودها الكلمة هادي
جواد يضحك: حوتة 🤣🤣🤣
نورس فتح غرفة النوم:اقعد بروحك باهي هي…وطلعت
جواد لحقها ويضحك:نبصر نبصر تعالي
نورس بجديات مش حلوة شكلي ز الحوتة
جواد: نبصر اني تبهلي طالعه ❤
نورس تدلع:باه علاش اتتتقل ف دمك
جواد قرررب جبدها ليه:نهز ف الورد عشان نشمه ❤🤤
نورس:ياخوفي الورد ييبس
جواد:لالا ميصير شي اني نسيطر ع الموضوع
نورس فنصت فيه: ياسخيف يابارد…وخشت للغرفة من جديد
جواد لحقها
نورس وقفت ع المرايا
جواد ايده ع السحاب وبدي السحاب ينزل
نورس تلبكت: ج جواد
جواد ينزل ف السحاب قرب من وذنها:توا بنخليك تغيري عشان نصلو تمام
نورس هزت راسها بتمام
جواد خش الحمام (اكرمكم الله ) وتوضى
.
.
.
الدنيا رمضان مانبيش نشرح اكثر من هكي
تهنو عرسانا وفات عليهم ليلة حلوة كيف مايحبو لكن فها ضحك وتلعب ❤😊
.
.
تاني يوم
غياث مرقدش طول اليل مش مصدق انه تزوج بنوتة حلوة وملاك ز لميس عكس انه عصبي ويتيم ومشوه
شاف الساعه كانت التسعه الصبح
غياث يلعب بشعر لميس:مرتي
غياث يلعب بشعر ليمس ع وجها ويضحك
لميس تبعد ف شعرها باانزعاج وتتكلم ف نومها:لااا اوووف
غياث باسها ع خدها:نوضي ياسر
لميس ف نومه: مزاال حرام عليك
غياث:الساعه طناش توا
لميس:اي مزال
غياث قرب ع شفيفها وعضها بشوية بصوت واططططي :نوضي
لميس فتحت عيونها:من اول يوم هكي بنطلق ملا
غياث ضحك: علاش هكي معاد تعودها الكلمه هادي
لميس تلعب بلحيته:باه خليني نرقد
غياث جبدها لصدره:ارقدي
لميس ع طول 😴😴
غياث ضحك: ع طول هكي
لميس 😴😴😴
.
.
.
نورس طلعت من الدوش وقعمزت ع زيانه تمشط ف شعرها المبلول
جواد فتح عيونه شافلها: بسبس
نورس تمشط ف شعرها: صباح الوردات
.
.
.
غياث لبس سورال جينز اسود سورية بيج واقف ع المرايا يعدل ف لبسته خشت لميس
لميس ف ايدها البخارة:هدا شنوو
غياث شافلها لابسه قفطان ابيض ربع كم شعرها مفتوح مع مكياج خفيف
غياث ابتسم وجبدها:انتي لهدا شنو
لميس بعدت عليه:غياث اني خديتلك زبووون البسة اليوم جمعه
غياث: اني بنلبس للعربي مستحيل
لميس:غياث اني خديته ليك هكي من اولها ☹️
غياث شاف نفسه ع المرايا وساكت
لميس مالت راسها ع جنب وشدت ايده بدلع: البسه عشاني
غياث فتح الدولاب:تعالي طلعيه وينه
لميس بحماس طلعاته:البسة
غياث شافله:فكيني منه تربحي
لميس كشخت: انت حر…وطلعت
دقــايق 🤭🤭🤭
لميس ف المطبخ تعدل ف البخارة
غياث من خلفها :هكي صح
لميس تلفتت 🤤:حيي عليا 🤤..وخدت البخاره بخراته
غياث: لميس وقفي تبخير
لميس وقفت قدامه: خيرك في شي
غياث: لميس عارف رح تكوني معاي ناقصة يعني غير الناس رح تعيشي معاي اني وماعندي حد لم نطلع رح تملي بروحك ….قاطعاته
لميس: غياث ماتكملش كلامك معاد تفكر هكي… قاطعها
غياث: لميس افهميني موضووع يخص عيلتي مانبيكش تدخلي نهائي فهمتي من اول يوم معاي نبيك تفهمي طبعي تعرفي الهاتف الارضي لفي الصالة لو يرررن العمر كله ماترديش ع الهاتف فهمتيني
لميس: اكيد
غياث طلع
.
.
نورس ف المحظر متعها ❤
.
.
.
بعد الصلاة
لميس صلة الجمعه ❤
وعدلت مكياجها ومشطت شعراتها ❤
وطلعت لصالة تتفرج
الهاتف الارضي: تررررن تررررن
لميس فتحت التلفزيون وقعمزت تتفرج
غياث خش ويسمع ف الهاتف يرن خش الصالة شاف لميس تتفرج والهاتف جنبها يرن قام السماعه
غياث: ايوواه
حازم: مبرووك وخياا
غياث صكر السماعه وفصل الهاتف من الضي
لميس: جيعان نحطلك تاكل؟
غياث قرب شد يدها: عندي علم انه صاحبتك درولها محظر زعلتي ؟
لميس: مش هامني لا محظر ولا شي ربي يفرحها
غياث: البسي نطلعو
لميس: شن رايك انت ؟
غياث ابتسم: رايي تقعدي معاي لا نطلعو لاشي نتغدى معاك ، بنخش نغير وعفكره طلبت وجبه من المطعم عارفك بايرة … وخش الغرفة النوم
وتغدو
وفاااات اليوم
وفاتو ايام وايام وايام
لعند ماصكرو شهر ع زواجهم
لميس جهزت الغدي كسكسي 🤤❤
غياث ولميس تغدوو
وفجآة الباب طقق
غياث: خليك تو نفتح.. وطلع فتح
ع الباب بنت ف وسط العشرينات ومعاها ولد عمره اربعه سنين
غياث: تفضلي من حظرتك
مريم: اني اختك مريم وهدا ولدي
غياث وجها تغير: المطلوب
مريم: غياث اعمل بااصلك اني مطلقه نبي نربي ولدي بس
غياث بصوت حاد: عطيني الزبدة شن تبي
مريم: اني اختك من لحمك نبي نقعد عندك يومين بس تربح وراس وخيا
غياث فكر مع نفسه هي ف النهاية اختها وغياث علم بااصله ودخلها
غياث خش للميس: لميس تعالي معاي للمطبخ (شاف اخته) انتي قعمزي هني مع ولدك
لميس مستغربه لحقاته للمطبخ
غياث: لميس
لميس خافت: غياث خيرك عارق
غياث: هدا اختي يالميس
لميس حطت ايدها ع فمها كيف قالها 💔
غياث: هدا منظر اختي مطلقة ادور ف الشوارع تي معرفتهاش
لميس: غياث اهدى عيب
غياث طلع من المطبخ وخش لصالة: اسمعي يابنت الناس انك اختي هادي خلها ع جنب نحطك فوووق راسي ومايذلك ولا يوصل فيك ذكر لكن بتفهميني شن قصتك والف والدوران فوتيه..وقعمز
مريم تشوف للميس بمعنى متقدرش تتكلم قدامها
لميس تحشمت لفت بتطلع
غياث: لميس قعمزي
لميس: غياث معليشي خلها تاخد راحتها
غياث شافلها: لميس قعمزي( شاف اخته) هادي مرتي اي شي بتحكيه قدامها تكون شاهده ع كلامك طبعاا معنديش 1% تقه فيك ادووي
مريم: خوي انت نبي نحكي بيني وبينك ل… قاطعها
غياث: لاخوك لا عمك بتتكلمي قدامها نحطك ع راسي ماتبيش تدوي وخيتي الباب يطلع جمل
مريم نزلت راسها: هدا ولدي لؤي عمره اربعه سنين اني اطلقت من فترة عشان مشكله معاه ولزني من الحوش قعدت عند حازم يومين وتعاركت مع مرته لزني وطبعاا ز ماتعرف ماما مش طايقه ولدي وماتبيشي وبوي نفس الشي رافضين ولدي
غياث: مطلقة رسمي
مريم: اي اول تطليقه
غياث: وين ملابسك انتي وولدك
مريم: ف سيارتي برا
غياث: تسوقي؟
مريم: اي
غياث شاف لميس
لميس: غياث متنساش انها اختك من دمك
لؤي ناض يلعب جنب المكتبة
غياث: تقعدي اليومين هادم زيك ز اي ضيفه عندي تستري روحك تبعدي بوشاحك ةعتبريني مش خوك تسمعي فيا
مريم: حاظر
غياث: يومذين تفوتيهم ع خير
لؤي قرب من لميس: منو انتي
لميس ابتسمت: اني لميس وانت شن اسمك
لؤي: اني لولي
غياث وقف شاف لميس: تبي شي من برا
لميس ابتسمت : سلامتك
غياث طلع
مريم ناضت تتفتل ف الحوش: ريتي هل… وسكتت كانت بتقول هلمشوه
لميس: هل شنو كملي
مريم من راس خشمها. شششي.. وكملت تتفتل ف الحوش
لميس تشوفلها
مريم مدت ايدها ع مقبض باب غرفة النوم
لميس وقفت بس تحشمت وسكتت
مريم خشت لغرفة النوم وتشوف فها 😨: من وين هادي
لميس: مانعرفش
مريم قربت تلمس ف الدولاب واطق عليه كانت مندهشه ف جمال الحوش لكن لم شافت الزينه قربت ع المكياج
لميس اضايقت وسكتت
مريم فتح احمر شفاه ودارت منه وتشوف ف روحها ع المرايا
غياث خش لانه كانت خطه يكشف اخته كان يعرف اخته رح تكون شيطان ز امها وفعلا فتح الباب ببطيء وقرب بدون صوت
مريم ادير ف روج شافتلها: انتي مرته قصدك
لميس اضايقت منها: اي
مريم فتحت درج المكياج: سبحان الله وخلاص اي وشن اسمك
لميس: لميس
مريم ضحكت بصوت عالي: اهاا لميس يعني ينظف بيك ف الحوش اسفه حبيبتي بس متعوده ع مواد التنظيف اسمها لميس
غياث ساكت ويسمع فها
لميس: لو سمحتي معادش تفتحي الدروج قصدي ف حاجات خاصه بين مراة وراجلها
مريم شافتلها 🔥 تخووف: عادي مافها شي..وكملت تفتح ف الدروج
لميس قربت وحطت ايدها ع الدرج : اسفه بس… قاطعها
غياث: انتي شن دخلك للغرفه اساسا
مريم نصدمه وجها تغير
غياث: تكككلممممي شن مدخلك للغرفه شن عندك هني
لميس قربت عليه: غياث اهدى الولد يخاف
غياث: هما يومين بتقعديهم هني متخلينيش نحلف بلله تسمعي
مريم طلعت من الغرفة وتبكي بدموع التماسيح: اخر مرة
غياث: وووقفففي
مريم تلفتت: نعم
غياث: اعتذري ع الكلام لنقال ع اسم لميس ياشاطره
لميس: غياث لا خلاص
مريم: قالت مرتك خلاص سمحتني يعني
غياث: انيي قلت اعتذري اظن ان كلامي مسموع
مريم: ا اسفه يالميس..وطلعت
غياث شاف لميس: لو صار شي تعلميني تمام؟
لميس: حاظر
غياث: لميس هادي اختي حتى اني مش طايقها لو ضايقاتك بحرف بس تكلميني باهي
لميس:لا عادي ماتشغلش بالك
غياث باسها ع راسها: ربي يريحك ز ماريحتيلي بالي .. وطلع
.
.
اليومين هادم فاتو كيف مافاتو بس طبع مريم تغير 180درجه بدت بنت كويسه وهكي
.
.
ع الفطور
مريم: هي لؤي ماما كول
غياث مقعمز بعيد علها عيونه ف الهاتف يستنى ف مسج
لميس سحبت الهاتف منه وابتسمت: مش كل شي شغل
غياث ابتسملها: سراحان مش معاكم
لميس قعمزت: في شي
غياث: لا خدمة بس
لميس بصوت واطي: واني
غياث ضحك بصوت واطي : بطلي عيب.. وقف
مريم شافتلهم من بعيد بكره
غياث ع الباب بصوت واطي قرصه ع خدها: نحببك ❤
لميس بدلع: ليا وقققت معاد سمعتها الكلمه هادي
غياث: شينه لانك باي
لميس: بايات
غياث طلع
لميس خشت الصالة: مريم انتي وكلي ولدك اني بنستاذنك بندير دوش تمام
مريم: اي تمام
لميس خشت غرفتها وخشت لدوش
مريم استغلت وجود لميس ف الدوش فتحت هاتفها ع الكاميرا وخشت غرفة النوم خفت الهاتف والكاميرا مفتوحه ع فيديو وطلعت بسرعه
لميس ف الدوش كملت دوش وطلعت لابسة بيجامه حمره وتجفف ف شعرها وطبعاا الكاميرا تصور
مريم خشت: لمييس حبيبتي ممكن طلب
لميس مستغربه: تفضلي
مريم: لميس لؤي ولدي عنده سروال غيره امس ممكن ف حمامكم
لميس: كيف يعني شن جاب سروال لؤي لحمامنا اكيد ف شنطتك لانه اني كنت ندوش والحمام نظيف مافيشي ملابس لؤي
مريم: باه عادي نتاكد
لميس: اي تاكدي
مريم خشت للحمام (اكرمكم الله)وبسرعه فتحت الغسالة خدت ملابس الداخليه متع لميس 😨
مريم خدت ملابسها دخلتهم ف ملابسها وخفتهم وطلعت: ملقيتاش تو نتاكد من ملابس لؤي..وطلعت
لميس كانت واقفه ع المرايا تمشط ف شعرها
.
.
.
.
بعد العصر
غياث رجع من خدمته
لميس ف الصالة
مريم خدت الهاتف من غرفة النوم وطلعت لبسة ولدها ولبسة عبايتها وبتطلع فجآة جي غياث
غياث: وووين مستعجله
مريم خافت لانه نخلعت: اهاه اا بنروح
لميس طلعت من غرفة نومها: مريم لخديتيه من حمامي رجعيه
مريم خافت
غياث: شن في
لميس: مرريم للمرة الاخيرة لخديتيه من حمامي طلعيه
غياث: شن تقولي
مريم: كذابه مرتك
لميس: غياث اختك خنبت مني ملابسي
غياث تعصب جبد لميس ع جنب من مرفقها: عشان ملابس رح ناخدلك ملابس خلاص خلها تاخدهم
لميس: غياث ملابسي اني… قاطعتها
مريم: نمشي ؟
غياث تعصب: اطلعي بري طريقك بيضة
مريم ططلعت بولدها بسرعه
لميس: غياث ملابسي خدتهم انت شن تقول
غياث بعصبيه: خلااااص راسي بينفجر تو ناخدلك اني ملابس… قاطعاته
لميس تبكي: اختك خدت مني ملابسي الداخليه لكنت لابستهم
غياث بصدمه: كيف داخليه قصصصدك
لميس خشت تبكي
غياث طلع يجري ملقاش السيارة: يالله هدا شن بدير… خش من جديد
لميس ف صالة تبكي
غياث: خش الصالة قام الهاتف الارضي خدي رقمها منه واتصل
غياث: مريم تعالي
مريم ضحكت: لايابابا خلاص ماعندي ماندير بيك
غياث: مررريم رجعي الملابس
مريم: امي طلبتهم مني قالت بتسحره ولا شنو لكن تقريبا بتسحرها
غياث: تسرحها تي علاااش شن درتلها امك اني علاش هكي اسمعيني خلي بنت الناس ف حالها تربحي
مريم: خلاص ماما خدتهم الملابس اهوو قريب نوصل اني
غياث: مريم وراس ولدك يامريم مديريش هكي بنت الناس سكتت وستقبلاتك حرام عليك
لميس وقفت ع باب الصالة مسحت دموعها وقربت خدت منه السماعه: شي بينك وبين ربك سمعتيني بينك وبين ربك لكن متحلميش انه غياث يترجاك لا انتي ولا امك لو نتقطع طرف طرف مانخليش راجلي يترجى مخلوق ع الارض…. وصكرت السماعه
لميس نهارت تبكي
غياث يمسحلها ف دموعها بهستريا: لالالالا بللهي عليك لاا ماتبكيش….
لميس تبكي: غياث علاش الناس متبيش تشوفنا فرحانين علااش
غياث قام وجها ليه: اني عشان دموعك كنت رح نقتل وليد … قاطعاته
لميس تبكي: لاالاا
غياث تعصب وقف وصل لعند الباب
تررررن ترررن
يتبع ………

لقراءة الجزء التالي : الجزء الثالث عشر من رواية المشوه

لقراءة الجزء السابق : الجزء الحادي عشر من رواية المشوه

للإطلاع علي فهرس اجزاء الرواية : رواية المشوه ( جميع الاجزاء كاملة ) للكاتبة ميشو محمد

جميع الحقوق محفوظة للكاتبة ميشو محمد .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى