الجزء

الجزء التاسع من رواية سر سعادتي

الجزء التاسع من رواية سر سعادتي

وفي الجزء التاسع من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء التاسع من رواية سر سعادتي

طلع حازم قدام الباب وقال:اوووه دكتورنا تفضل تفضل
خششه للمربوعة
يوسف:زاد فضلك ..كيف حالك وكيف حال الحاجة
حازم:والله ف خيار الخير الحمد لله دارتلك شهره تشكر فيك وتحط ههههه
يوسف:ههههه بارك الله فيها…
حازم:صار امورك طيبة
يوسف:في نعمة الحمد لله.. اكيد تتسأل توا عن سبب الزيارة وحنخش ف الموضوع على طول
حازم:تفضل شغلت بالي
يوسف:انا جاي اليوم نطلب بنتكم اللي جت معاكم في المستشفى
حازم:اها مرحبا بيك يادكتور بس وين العيلة ماجوش معاك
يوسف: الحق انا جيت قبل العيلة قلت نشوف ردك
حازم:نعطي علم للوالدة ونشوف راي البنت ونرد عليك
يوسف:لكن فيه حاجة بنقولك عليها
حازم:تفضل
يوسف:الحق انا متجوز
حازم:اها اماﻻ سامحنا خوي ماعندناش بنات لزواج وان شاء الله ربي يفتحها عليك
يوسف:انا رايدها بالحﻻل يااستاذ حازم والشرع حلل ب اربعة
حازم:سامحنا هادي وخيتي وهيا راس بنت اكيد نبيلها شاب عزابي ماعنداش التزامات سامحنا مرة تانية يوسف:اوكي نستأذنك توا
حازم:تفضل في امان الله

طلع يوسف من حوش مسرة وركب سيارته متكنطي ومتغلل ايتمتم تو شن فيها كان متجوز هي يما منهم هكي اهو منير وافقو بيه ويخي قالوله ماتجيب شي اشمعنى انا …اااه استغفر الله ياربي
ومشي ل احمد في المحل
احمد:وسيفا شن الجو
يوسف :متبغضض ومتنكد
احمد:شن فيه
يوسف:كنت نخطب وهادي مرواحتي توا من حوش مسرة
احمد:وشن صار
يوسف:خوها رفضني طول بمجرد عرفني متجوز
احمد:ﻻ حول وﻻ قوة اﻻ بالله باهي ماقالكش حتى تو نشوفو ونردو عليك
بوسف:ﻻ طول قالي ماعنداش بنات لزواج فقش حطهالي ف وجهي
احمد:باهي حاول تنساها يايوسف
يوسف اتكطكط ورد عليه:شن تحساب صبلي نشرب انا حبيتها ونبيها تعبت حياتي مشت غير تعتير حبيت واحدة طلعت خاينة تزوجت واحدة طلعت مهملة حبيت واحدة سيبتني باهي عﻻش لهدرجة انا ماننفعش
احمد:استهدى بالله يوسف خﻻص هكي ربي رايد
يوسف:ونعم بالله …لكن عﻻش عﻻش هكي يااحمد شن فيها كان وافق
احمد سرح بينه وبين نفسه ياريتني ماقتلك تعرف شورني نسيت هديكا اﻻيام الغبرة تو يبيله بش ينساها مغباك يااحمد مغباك
يوسف:تو بش نكلم فيك وانت سارح اشبح وين
احمد :ﻻﻻ معاك
يوسف:ﻻ معاي ﻻ واحدة انوض نروح خيرلي هي سﻻم
احمد:غير تعال يايوسف وئ

ف حوش مسرة مع العشية مقعمزين يشربو ف شاهي كلهم
حازم ل خ فتحية :قتلك يمى.. الدكتور اللي دارلك جي يخطب ف مسرة الصبح ههههه
مسرة انصدمت
خ فتحية:يا والله نهار سعيد
حازم:رفضته
خ فتحية:ليه عليك توقف ف نصيب اختك
حازم :طلع متجوز مصحه وحاط عينه عالبنت
خ فتحية:اها ﻻ اماﻻ عندك حق خير مادرتله
مسرة شرقت بالشاهي وناضت للنطبخ تاخد اميا وهيا تبكي
مسحت دموعها واتصلت ب عفاف
مسرة:الو عفاف يوسف كان ف حزشنا يخطب
عفاف:اووووو
ممسرةة:اووو طياح سعدك حازم رفضه صح قاعدة نحبه ماننكرش لكن خير مادارله حازم
عفاف:ياودي من وجهة نظري متجوز واﻻ اللي هوا المهم متفاهمين وتحبو بعضكم
مسرة:وين نندري عليه حبني واﻻ ﻻ بالك حتى هادي كدبة حسبي الله ونعم الوكيل فيه …
وفاتت 4 شهور حزن ف حزن على يوسف ومعش قدر ينسى مسرة
يلود ف الشوارع بسيارته زي المهبول ماعارف وين يمشي ويتصل بمسرة وهيا وﻻ هنا حطاته ف قائمة الرفض
وفي يوم ….وهوا ف مستشفى جاه منير
منير:وسيفا قول شنو
يوسف:شنو
منير:جايتني واحدة توا ونبيك تشوفها انت بدالي
يوسف:اكيد ﻻ
منير:غير هيا
يوسف:تو بش تجوزت متع 96 شن مزال تبي تتعرف وتضحك عالبنات
منير:والله عجبني صوتها ونبي نشوفها
يوسف:منير ماتنفخليش راسي هوا هكي وقريب ينفجر
منير :باهي غير افهم قبل
يوسف:مانبي نفهم شي غطي عليا انا طالع بنروح ماعنديش مراجعات
وهوا مروح من مستشفى خطر فباله انه يمشيلها في المختبر… خطم ع المختبر
خش وقال:السﻻم عليكم
عفاف :وعليكم السﻻم
يوسف:كيف حالك عفاف.. وكيف حال مسرة
عفاف:الحمد لله
يوسف:وين مسرة مش باينة
عفاف:قاعدة داخل ف الحجرة
يوسف:ممكن تناديهالي
عفاف:اوكي لحظة بس
بعد دقيقة رجعت عفاف ل يوسف
عفاف:سامحني يوسف بس هيا قتلي اااا ….
يوسف:قولي شن قتلك
عفاف:سامحني قتلي قوليله مانبيش نشوفك وقتلك راني انخطبت انساني
يوسف:ان انخطبت ! ! !
كيف ولمنو وكيف قدرت تنساني هكي بسرعة هادي خيره انا مانسيتهاش وماقدرتش ننساها
عفاف:استاذ يوسف انت ف مكان عمل ياريت ماديرش شوشرة
يوسف خش للحجرة متع مختبر ولقي مسرة
قالها:انا صح كدبت لكن ﻻن مانبيش نخسرك لكن انتي تكدبي على روحك وافقتي باللي تقدملك مدايرتيه طوق نجاة بش تنسيني
مسرة بتبكي:اطلع من اهنا يوسف امشي
يوسف:انتي تحبيني مسرة تحبيني معش تخدعي نفسك كيف تسمحي لنفسك تعيشي مع راجل ماتبيشي
مسرة:خﻻص ساد يوسف اسكت مرتاحة معاه خطيبي
يوسف: مش مرتاحة معش تكدبي
مسرة تبكي:شن تبي مني يوسف خليني ف حالي
يوسف:عﻻش لما جيت خطبتك ماوقفتيش معاي خليتيني نروح زي المهزوب
مسرة:انت متجوز افهم
يوسف:وكان متجوز شنو كفرت انا؟؟هدا حﻻلي النهار مبارك انتي حبيتك لكن مرتي ﻻ مخليها على ذمتي بس ﻻنها قريبتي
مسرة مسحت دموعها وقتله:النقاش انتهى يوسف تقدر تتفضل
يوسف:صحيتي مسرة ماتوقعتكش تقدري تنسي بسهولة هادي
مسرة:مانسيتكش مانسيتكشش بس مافيش حاجة في ايدي انت الغالط متجوز و تعرفت عليا جرحتيني يوسف تحساب ساهل عليا اللي صار ….تفضل يوسف امشي بالله عليك
يوسف:حاضر حنطلع.. بس صدقيني مش حتقدري تنسيني حتى وان تجوزتي كان تحسابي الزواج اينسي فهو ماينسيش انقولهالك من واقع تجربة..
طلع يوسف من مختبر وهوا ﻻيدة عليه الصفرا
يتبع ……

لقراءة الجزء التالي : الجزء العاشر من رواية سر سعادتي

لقراءة الجزء السابق : الجزء الثامن من رواية سر سعادتي

للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة

جميع الحقوق محفوظة للكاتبة لوزة .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى