الجزء

الجزء العاشر من رواية سر سعادتي

الجزء العاشر من رواية سر سعادتي

وفي الجزء العاشر من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء العاشر من رواية سر سعادتي

روح يوسف وهوا مصدوم خش لحوشه وقعمز على الكنبة سارح ووجه احمر حتى الميدالية متع مفاتيح كسرها من غيضه
طلعت رويدة من دارها ماشية للمطبخ جاته وقتله :خيرك امبوم ؟؟؟
انت هي ! نكلم فيك شنو حتى الرد معش بترد؟؟؟ اجعنك مارديت اصﻻ عارفة انا الوجه الحلو والضحك مش ليا زابطة الشي هدا …
يوسف ساكت ويشوف للوطا فقط …
ورويدة عششت فيه ادور ف المشاكل
رويدة كملت دوتها :شنو مبلم هكي تكلم خير بﻻك ……..افففف تعرف العيشة هادي معش تمشي معاي
يوسف:مش ناقص رويدة رجاء خاص خليني بروحي اللي فيا كافيني
رويدة:اياااح ديما انت هكي اصﻻ مش عارفة شن صبرني عليك لتوا
يوسف:عن الغلط رويدة شن اللي وصلنا اهنا قوليلي هي؟؟؟شن اللي خلني نشوف لبنت تانية ماهو انتي …
مش عارفة امتى بتفهمي الشي هدا تمنيت ولو مرة نخش الحوش تستقبليني بكلمة حلوة ابتسامة اتكوني متعطرة ﻻبسة لبسة حلوة عﻻش انتي هكي ماتحسيش ؟؟ اه ماتحسيش؟؟ جنبك زوجك ف السرير تتلفتي وترقدي به ياستي مايجيكش خاطر تلعبي بشعري ؟ اطبطبي عليا ؟ اتحسسيني باني متزوج اتكلمي عﻻش ساكتة تو كم من مرة وضحتلك الشي هذا وكم مرة قتلك ان الحياة بش تمشي تبيلها شوي تفاهم افهميني حسيني حسي باللي داخلي
رويدة:ماتبررش لخيانتك يوسف انت خاين وانا معش نقدر نعيش معاك تحت سقف واحد طلقني ﻻني خﻻص مليت من هالعيشة
يوسف:بعد هدا كله طلعتي انتي اللي مليتي سنة و9 شهور وانا متحملك وتقولي مليتي
رويدة:طلقني يوسف طلقني طلقنيييييي
يوسف:طالق طالق رويدة
ماكنتش نبي الشي هدا و ادكري كويس اني صبرت عليك لأخر لحظة ﻻ تبعتيلي اماليك وﻻ حتى حاجة
رويدة تبكي: انا وانت زي الزيت على النار ماعندي ﻻش بنبعتهم اماليا
مشت رويدة لدارها لمت قشاشها كله واتصلت بخوها جي خداها
وقعد يوسف ف الحوش المنكوت بروحه
فات يوم يومين ثﻻتة وهو ماطلعش من الحوش ومامشاش للعمل
الحوش يشرين يشرين
ويوسف سارح لين فاق من سرحته
وناض فتح الباب
احمد:تي خيرك ياراجل ماتردش مشيتلك حتى ف المستشفى وقالو ماجاش تﻻتة ايام شغلتني عليك شن فيه ……يوسف خيرك ساكت
شن صار معاك تكلم
كلماتك مسرة ؟
يوسف:شنو فيه
احمد :فيق على روحك يايوسف مشكلة كان بتقعد هكي يصير فيك زي المرة اللي فاتت
قولي شنو فيه كلماتك مسرة؟؟
يوسف:انخطبت
احمد:اهاااا
يوسف:بدلتني بواحد تاني
احمد:ياودي حاول تنساها خﻻص بما انها نخطبت ربي يسعدها
يوسف وقف وطيح التلفزيون والحجات اللي فوق طاولة وقاله :ماتقوليش انساها ماتقوليش انساها مش بيدي عﻻش يصير معاي هكي فديت والله فديت
احمد:باهي باهي اهدى خﻻص شن كل ماتحب ادير نفس الدسكة ماخديتش حصانة من صدمة اﻻولى
يوسف:تي اما حصانة والله طايرتلي وزادتن المراة نفختلي راسي وطلبت الطﻻق دارتني انا اللي مهمل وماننفعش وانا قداش ليا صابر عليها
احمد:فرصة طلقها وافتك منها
يوسف:طلقتها…احمد خودلي اجازة بدوم مرتب مش حنقدر انركز في العمليات عارف روحي ..خلي نلم شتات نفسي قبل
احمد:اوكي خﻻص ارتاح انت توا..
وقعد يوسف على هالحال فترة وخداله احمد اجازة بدون مرتب وقعد شاقي بيه ويجيه كل ليلة يشوفه شن ناقصه وشبه يوميا اخته شذى اتجيه اضم الحوش والحجات اللي مكسرهم يوسف واطيبله وتروح
لين فاتو ثﻻتة اسابيع بتمام
وفي ليلة يوسف يفكر ويتكلم مع نفسه بصوت يملؤه الثقة …انا ﻻزم مانوقفش عندها ..هيا بدلتني وعايشة حياتها وانا قاعد ف الحوش زي الولية ربي يسعدك مسرة ومن غدوة ﻻزم نمشي العمل ونكمل حياتي المعثرة لين ربي ياخد امانته والنساوين بنشطبهم من قاموس حياتي …
وعلى الساعة 6 صباحا ..
فاق يوسف ناشط حلق لحيته وخدي دوش وصلى الفجر ودار قهوة ولبس بدلة كحلة وتأنق وطلع ركب سيارته فتح fm على حظه جاته اغنية اليسا لو في انا انا لو فيا انساك وعيش بحرية لو في رجع ماضي ايام اللي كانت منسية بس مافيا شيلك من قلبي وعيناية
سكر fm وساق للمستشفى
ووخش وزمﻻئه كلهم رحبو بيه
وتوجه لمكتبه ..
جاه منير
منير:اووووووو والله مخلي مكانك ياعفريت ….حمد لله ع سﻻمتك وين وين الغيبة
يوسف:هههههه الله يسلمك شنو سامن مريحاتك المرا الجديدة شوره هههه
منير:ههههه ايه نوعا ما لكن حامل توا وتتوحم
يوسف:ماشاء الله ربي يبارك
منير:كل ماناخد مراة تحمل طول تي راهم يديرو نظام اجانب مافيش سنة سنتين من غير صغار
يوسف:ههههههههه قول الحمد لله وانت اتنق

وفات الوقت وجت ساعة 1
جي منير تاني ل يوسف
منير:كساد ياراجل البنت اللي تعرفت عليها خلت مكانها
يوسف:اما هيا ﻻن عندك هلبا هههه قلبك خلية نحل
منير:ههههه هديكا اللي قتلك اطلع شوفها بدالي وانت سكرت راسك
يوسف:اها ايه خيرها
منير:ﻻهية ف عرس صاحبتها وهيا 24 ساعة مسرة مسرة قاعدة معاها اكثر مما تقعد معاي
ناض وقف يوسف وقاله :من مسرة
منير:صاحبتها اليوم الحمام متعها
يوسف:وشن اسمها صاحبتك
منير:عفعوفة
يوسف:تشتغل ف مختبر
منير:ايه كيف عرفت ان شاء الله مش قريبتك بس
طلع يوسف يجري ركب سيارته
على اتصال احمد فصل عليه
مشي احمد عاود تاني
بوسف:مش وقتك يااحمد
احمد:عﻻش شن فيه
يوسف:عرس مسرة
احمد:اها وانت شن دخلك بيها
يوسف:ماشيلهم جيهة حوشهم سﻻم
احمد:استنى شن بتمشيلهم ان…

الزح سكر عليا شن ماشي بيدير غادي غير يحشم روحه !
سكر احمد المحل وركب سيارته ومشي جري لجيهة حوش مسرة وبمجرد مااحمد شاف سيارة يوسف جاية سكر عليه الطريق
نزل يوشف من سيارته
يوسف:اخطاني يااحمد
احمد:شن ماشي بدير عيب عليك
يوسف:نار واكلتني ماكلة مش متخيل حد تاني ايشوفلها ولو نظرة يبالك يكون معاها 24 ساعة اخطاني يااحمد
احمد:اركب سيارتك يايوسف بﻻ عار خﻻص البنت بتتعرس هدا نصيبها
يوسف مشي يجري ع رجليه جيهة حوش مسرة
ويوصلو سيارات من الحمام بيب بيب بيب والنوبة بدت تضرب نزلت مسرة ووقفت ع النوبة وكيف كانت مبتسمة شافت يوسف جاي يجري وبدو عيونها ايدمعو زي المطر ودست وجها ورا المروحة
احمد لحق يوسف وشده وقاله: هيا نروحو بالله عليك الشارع كله معبي اقاربها تو يطلعونا بمقرون واﻻ كﻻشن فكنا تربح
يوسف:مش مهم
احمد:شن مش مهم هيا روح خﻻص
يوسف ضرب احمد بونيه على وجهه
احمد :احيه يادعوة فيق على عمرك ماتحشمناش قدام الناس
علي خو مسرة شاف يوسف واحمد يتعاركو
جاهم و قالهم:برو تعاركو في جيهة تانية ماديروناش مشاكل اهنا
احمد:سامحنا خونا اﻻمور هانية مانتعاركوش
يوسف:انا نبيها
قاطعه احمد وتلفت ل علي :ياريت ياخونا تجيبلي اميا والله بنموت من عطشي
علي :اوكي لحظة بس
وجبد احمد يوسف وقاله توا تروح تواااا لو قعدت اهنا ودرت مشكلة حيحسابو البنت معيوبة وممكن يقتلوها واﻻ يديرو فيها حاجة حتندم طول عمرك …الهم اﻻحرف كله مني النم ﻻ تعارف ﻻ بلي على دماغك مش ليك حاجات هادي
يوسف:نبيها يااحمد نبيها
احمد:غير هيا وراس يوسف تو يفيقو بينا عيلتها هيا نوصلك سيارتك
مشي يوسف مع احمد خطوتين القدام وتلفت ماشي جيهة العرس احمد:ﻻﻻﻻ يوسف ماكش صغير على هالعمل خﻻص عاد قداش مرة بنشدك ياراجل
يوسف حط ايده بين سنونه وقال:مقهور يااحمد مقهور
احمد:تي هاه صوابعك دم ارخي ايدك تي ارخي النم @/#@**&$##$$ كان مازال قتلك تعرف
هيا تحرك تواااااا…
توجهو لسيارة
ركب يوسف ف كرسي التﻻني زي المسبوه والحزن واكل قلبه ماكلة
اتصل احمد بخوه
الو فيصل بالله خود المفتاح اﻻحتياطي متع سيارتي وتعلا جيهة محﻻت النوفا عرفتهم ….تمام تلقى سيارتي خودها وروح بيها جيهة المحل تمام اوكي سﻻم..
وصل احمد جيهة حوش يوسف ركبه لحوشه وقالها انا بايت معاك اليوم مانضمنكش مرات تمشي من وراي لحوش البنت
يوسف ماردش بي وﻻ كلمة وخش لداره وسكر الباب
وبعد يوم دارت مسرة حفلتها ومشت لحوش راجلها
ويوسف قعد مضايق وقاعد ف داره طول الوقت موجوع يكسر الخاطر ..

النهاية ……….

لقراءة الجزء السابق : الجزء التاسع من رواية سر سعادتي

للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة

جميع الحقوق محفوظة للكاتبة لوزة .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى