وفي الجزء الثاني عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الثاني عشر من رواية قد كفاني
تاني يوم ياسر رجع من الشغل وقال لي انتي امبارح قلتي شنو لي موظفات الشركة؟ قلتا ليهو ولا حاجة قال لي عليك الله قلتا ليهو ونسه عادية انت لشنو بتسأل؟ قال لي في واحدة من الموظفات جات في المكتب وقالت لي عاوزين نقسم الشركة وما عاوزين اختلاط مع الرجال عشان الجو يكون مهيأ لي زوجتك وتجي تدينا دروس لو ممكن قلتا ليها جدا ما عندكم مشكلة بوريها. اها إنتي رايك شنو يا مهجة؟ قولتا ليهو ما عندي مانع. مهاد ومثاني جو شربو معاي شاي المغرب تاني يوم وديت الأطفال الروضة ومشيت الشركة قابلت البنات واي واحدة معاها كمية من الأسألة بديت اجاوب عليهم وانا مبسوطة من إستفساراتهم في واحدة قالت لي يا مهجة انتي ما بتزهجي نحنا من قبيل بنسأل فيك!! وإنتي بتجاوبي من غير ما تتعصبي قلتا ليها ابدا يأخ بالعكس مبسوطة شديد
وربنا يكتب الهداية لي ولكم انتهيت من الدرس ياسر اتصل علي وقال لي تعالي شيلي الأطفال وعرفيهم على الموظفات قلتا ليهو ليه خليتهم يجو؟؟ كان ممكن انا ارجع البيت قال لي كنتي مندمجة في الأسألة فعشان كدا ما حبيت ازعجك قلتا ليهو عادي ما في أي إزعاج دخلتا المكتب شلت ريتال و عاوزة اشيل رئبال قال لي يمه خليني مع ابوي بعد تحنيس حتى مشى معاي في واحدة قالت لي ديل نهائي ما فيهم شبه ياسر قلتا ليها فعلا مايلين في الشبه لي انا قالت لي نحنا نعرفك كيف اذا إنتي م رفعتي النقاب حتى بعد الرجال مافي ضحكتا 
وقولتا ليها تعويدة والله ورفعتا ليهم النقاب البنت دي إتخلعت شدييد قالت لي م كان ترفعي النقاب كان تقولي لينا انا رئبال 
ضحكتا شدييد قلتا ليها عليك الله رئبال دا بشبهني شديد موظفة تانية قالت لي والله التقول طابعة بس نسخة منك ريتال قالت ليها وانا يا خالتو ما بشبه امي رفعتا وقالت ليها بتشبيها شديد رئبال قاعد بعيد وما عاجبو الوضع نهائي البت القبيل رفعت ريتال وجات عايزة ترفع رئبال قال ليها ما ترفعيني مدت ليهو يدها عايزة تسلم عليهو قال ليها م بصافح ودخل مكتب ابوهو. إلفتت علي وقالت لي حتى الأطفال ما بتخليهم قالتا ليها ما معروف الظروف عشان لو حصل لي اي حاجة أكون مطمئنة انو اولادي ما ح يضيعو قواعد دينهم قالت لي بتعجب كدا ما شاء الله ربنا يحفظكم قولتا ليها امين جمعا يارب
ومرت الأيام والتؤام كبروا وبقى عمرهم ٨سنوات كانوا بحاولو بقدر الإمكان يأخدو معلومات مفيدة وكتيرة عن الدين ووقت كلو بسألوني وكنت مبسوطة انو ربنا جبر بخاطري وهدى لي اولادي مره كنت بصلي انا وريتال اما رئبال مشى المسجد مع عمو انس وغيث وليث بعد إنتهينا من الصلاة ريتال قالت لي امي إنتي ليه ما عندنا قنوات اطفال كل ما افتح التلفزيون بلقى شيخ بتكلم وفاطمة صحبتي نهائي ما عندهم شيوخ قلتا ليها حبيبه ترضي يطلع منك كلام ذي دا !؟ يعني هسي عجبوك قنوات الأطفال وما عجبوك الشيوخ البحكو قصص الصحابة!! خلاص انا بكرة بنزل لك قنوات الأطفال. سكتت مسافة وبعدو قالت لي يمه ما دايراهم قلتا ليها لشنو ما قلتي عاجبنك؟ قالت لي رئبال قال لي الموسيقى حرام وتاني الزول لو سمع أغاني القرآن ما بفهمو وانا ريتال حافظة القران كيف م افهمو أبتسمت وقولتا ليها ايواا دي ريتالي الأنا بعرفها وناس فاطمة لو لقيتي عندهم الأغاني بتعملي شنو ؟!قالت لي بقول ليهم الأغاني حرام قلتا ليها لو ما سمعوا كلامك بتعملي شنو؟ قالت لي بخليها وما بيكون بيني وبينها شئ غير السلام هي الصحبة لو ما بقت لي خير لوزومها شنو انا في اللحظة دي سجدتا سجدة شكر لله على انو اولادي عقلهم كبيرة وبحبو دينهم شديد وعيني دمعة من غير ما أشعر
رئبال جا وكان رجلو مضروبة والأولاد عاوزين يدخلو بيهو جوة قال ليهم اضربو باب الصالون ولو ما جا زول ما ح ندخل الأولاد اتعجبو شديد
وقالوا ليهو لكن انت صاحب البيت عادي تدخل قال ليهم الوقت دا تحديدا ما بدخل ما لم أستاذن حتى لو دا بيتي والجوة دي امي وانا سامعة الحوار كلو طلعتا قلتا ليهم ادخلوا يا أولادي دخلو رئبال سلم علي شفتا رجلو مضروبة قلتا ليهو رئبال الحصل لك شنو قال لي ولا حاجة يمة ضربة خفيفة ما تشيلي هم جبتا علبة الإسعافات ونضفتها ليهو وعملت ليهم عصير في واحد من الأولاد قال لي بعد إتأكد انو رئبال دخل الحمام قال لي رئبال ضربتو ركشة لانو ما شافوا سيد الركشة طوالي جرى قلتا ليهم ما مشكلة يا أولادي جزاكم الله خيرا وانا بقلبي زعلانة ليه ما رفعوا هسي رجلوا لو إتكسرت ليه يعمل كدا سرحانة كدا رئبال طلع من الحمام وقال لي يمه خير مالك سرحانة قولتا ليهو اسكت مني يا رئبال انت ليه ما بتحكي لي الحاصل هسي الركشة دي كان كسرت رجلك انت ح تعمل شنو؟! قال لي حقك علي والله ذاتو ما اضربتا شديد وتاني بإذن الله ح احكي لك الحاصل لانو سامع الولد القبيل كبر القصة قلتا ليهو طيب غيث ما كان معاك قال لي لالا والله غيث دخل البيت ولا عندو علم بالحصل وقولتا ليها طيب ليث وين!؟ قال لي ليث خليتو في المسجد قلتا ليهو عليكم الله امشوا مع بعض قال لي حاااضر يمه سألني عن ريتال قلتا ليهو في غرفتا لكن بتكون نامت قال لي خلاص انا ماشي ألعب مع غيث وليث قلتا ليهوإرتاح الليلة م في لعب حنسني كدا نهائي ابيت اخليهو شويه كدا غيث وليث جو وكانوا مخلوعين وجروا على رئبال وبدوا يسألوا فيهو وجعاك رئبال عاين ليها متورمة كيف
ليث إلتفت لي غيث وقال ليهو دا كلو منك ليه دخلتا البيت قبل تتأكد انو رئبال دخل معاك!؟ رئبال دافع عن غيث وقال ليهو والله يا قائد خالفنا التعليمات والحق علي وفي النهاية دا قدر وانا أسد الرمال بإذن الله ما ح تجني عوجة 
شوية جو ابوهو واعمامو وقالوا الإ يمشو بيهو الدكتور لكن هو كان مصر انو كويس وما عاوز يمشي الدكتور ابوهو لمن شافو مصر ما حب يضغط عليهو وخلاهو براحتو والضربة اخدت حكاية اسبوع وبقت كويسة الحمد لله
من جانب آخر الموضوع دا بحتاج لي كم يا شيخ!؟………
خلاص بكرة بكون معاك ( لمن نعرف الحاصل )
يا ياسر الليلة الجمعة عاوزة اخد العيال ونمشي نفطر مع ناس خالتو اميمة (ام ياسر ) لانو من الأسبوع الفات ما شفتا زول منهم قال لي خلاص تمام اكلم ناس احمد وأنس يمشو معانا قلتا ليهو انا سلفا كلمتا مهاد ومثاني وجاهزين بس منتظرين موافقتكم ياسر كلم اخوانو عمو عبدالله قال لينا انا و الله ما بقدر احمد قال طالما ابوي ما ماشي انا بقعد معاهو ومثاني تمشي مثاني رفضت تمشي في نهاية عمو عبدالله قال لينا انتو جنكم تحانيس راح نمشي وانا زاتي عاوز افرق وعلى كدا مرقنا كلنا وصلنا ناس خالتو اميمه وسلمت علينا بحرارة وقالت لي مالك طولتي مننا ومشتاقين يااخ
قولتا ليها تشتاق لك الجنة يا خالتي لكن الأسبوع الفات رئبال ضربتو ركشة فعشان كدا ما كنت قادرة اطلع قالت لي سلامتو يأخ ان شاء الله جات خفيفة قولتا ليها لالا خالتي اطمني ما حصلت ليهو حاجة الحمد الله شويه كدا قامت فيني عمت رئبال (جمان) قعدت تكورك قالت لي مهجة ليه ما كلمتيني ما كفاية سرقتي ياسر وبقى ما بسأل مننا وهسي كمان ما عاوزة تتكلمي وتقولي لينا رئبال انضرب ولا فالحة تحومي مع ياسر من شركة لي شركة انا اتخلعتا وم حبيت ادخل معاها في نقاش لكن كتر الله خير خالتي اميمة قالت ليها هسي عليك الله اقنعيني انك بتخافي عليو اكتر من امو
بعدين لو اصلا انتي مهتمة كان انتي تتصلي عليها 
وما تحوم مع ياسر مالا حامت مع غريب جمان سكتت وم عرفت تقول حاجة انا قولتا ليها لالا يا خالتي هي م قصدها كدا بس خايفه على رئبال خالتي قالت لي مهجة انتي اسكتي ساي وانا بتي بعرف قصدها شنو
اليوم مره عادي وفيه نوع من الطمأنينة بنسبة لينا رجعنا البيت دخلتا مكتبتي كان عندي كتاب بريدو شديد اسمو الأربعين النووية بديت اقرا فيهو شوية رئبال جاني واتونس معاي وقال لي امي انا زعلان شديد غفلت الكتب وقولتا ليهم بسم الله المزعلك شنو؟ قال لي كلام عمتي معاك يمه هي لي بتعاملك كدا!؟ وانتي ما قاعدة تردي ليها انا والله بزعل شديد لمن زول يرفع صوتو عليك خليها تغير اسوبها ولا انا عندي معاها كلام تاني
انا كنت ساكتة وخليتو يتم كلامو وقلتا ليها اول حاجة دي عمتك حسن اسلوبك وانت بتتكلم عنها وبعدين دا كلام ناس كبار ما صح تدخل فيهو وهي لمن اتكلمت كان ظاهر عليها انها خايفة عليك عشان كدا ما تكبر القصة قال لي حاضر يمه (مع انو ما كان مقتنع بكلامي)
رئبال دا عندو مميزات بخليك تتعجب من طريقة تفكيرو انسان عميق شديد وفي نفس الوقت غامض انا قولتا رئبال اكيد ما بمضي الموضوع على خير لكن الشئ البعرفو انو ما بزيد على كلامي كلمة (يعني بسمع الكلام )
تاني يوم ياسر قال لي اها جاهزة عشان انا طالع قولتا ليهو امشي الليلة ما ماشه معاك الشركة قال لي مالك قولتا ليهو مافي حاجة بس جارتي دي عازماني جبنة بعد إذنك!؟ قال لي عادي ما عندك مشكلة وطلع مشى الشركة انا رتبتا بيتي وقعدتا في المكتبة والعيال كانو في المدرسة وفي الحقيقة انا مافي زول عازمني بس كلام عمت اولادي أثر فيني لكن قولتا امشي على جارتي ساي اسلم عليها وبالفعل مشيت اتونست معاها انسانه طيبه وحكيمه شديد اكتر واحدة حبيتها في الحي في أثناء ونستنا كدا قالت لي مهجة عليك الله ما تنسي التحصين وازكار الصباح والمساء لانو انتو ما اسرة ساهلة وكل الأنظار عليكم اذا كان من قريب أو من بعيد اعملي حسابك؟ انا بطبعي اصلا ما حصل مر يوم من غير ما احصن نفسي وزوجي وعيالي بس في شئ غريب انا خايفه منو لكن قولتا يا مهجة الخلقنا بحفظنا هدى (جارتي) قالت لي سرحتي وين؟ قولتا ليها لالا معاك بس الأولاد بعد كدا بجو عشان كدا انا أستاذنك قالت لي اقعدي حبه كان جاء مجتبى معناها عيالك جو (دا اصغر ولد ليها بقرا في سنة تامن ) قولتا ليها مهاد ومثاني منتظرني قالت لي خلاص ما مشكلة لكن عليك الله ما تنقطعي قولتا ليها بإذن الله ورجعت البيت الأفكار كانت جايطة راسي مثاني قالت لي مالك مقلقة كدا؟ ما من عوايدك قلتا ليها ابدا مافي حاجة مشيت اتوضيت حاسه بضياع شديد ما عارفة دا شنو ! ومضايقة بصورة مبالغة فيها
قريت القرآن ولساني حاسه بيهو تقيل في نطق الأيات شوية حسيت بي لفت رأس شديدة وتاني ما سمعتا أي حاجة 
بلسان مثاني جيت بصدفة مارة بجنب مكتبت مهجة قولتا اجي اقرا معاها شوية دخلتا لقيتا عيونة مغمضة وراقدة في سجادة المكتبة انا الخوفة الوقعت فيني الله يعلم بيها
اتذكرت مشهد امي ولي لحظة قولتا مهجة زاتا عاوزة تموت مني وبقيت أصرخ مهاد جات جاريه بصوتي وطوالي اتصلت لي ياسر. ياسر بعد دقايق وصل وطوالي جرى بمهجة المستشفى وانا من مكان ما اتحركت خايفة اقوم واشوفها كفن قدامي والله بموت بعديها
شويه كدا ياسر اتصل وطمنى عليها وقال لينا هبوط عادي بيحصل في الفترة دي يعني كانت حامل والله انا ما كنت مصدقة واحساس الخوف من موتها ملازمني الإ هي طلبت اني اجيها وشفتها وكانت بتتكلم يأخ والله ما مصدقة حضنتها وبكيت على نفسي ما كنت عاوزة ازح منها انا ما عارفة حياتي ح تعدي كيف لو مهجة دي حصل ليها حاجة بعيد الشر عنها فرحتا ليها وباركت ليها لانو والحمد لله بعد تمانية سنوات ربنا رزقها بالمولود التاني …
نرجع لي مهجة بعد صحيت لقيت ياسر قاعد جنبي ومركبين لي درب اول ما صحيت قال لي حمد الله على سلامة يا غالية قولتا ليهو انا وين؟ وأولادي وين؟ قال لي ارتاحي الأولاد في خير وعافية انتي بس عليك تهتمي بي نفسك ما ممكن الإهمال دا كلو الإ تجيك مضاعفات عشان اعرف انك حامل انا سكتا مسافة بين ما مستوعبة ومبسوطة
قولتا ليهو ياسر عليك الله ما تهظر قال لي والله العظيم ومبارك علينا قولتا ليهو الله يبارك فيك ما بنكر انا الموضوع دا ذاتو المؤثر في نفستي كنت عاوزة اخوان لي اولادي ما شاء الله مهاد جابت اتنين ورى ليث ومثاني جابت محمد اما انا قعد تمانية سنوات والله ما رزقني مولود جديد كنت راضية وفي النهاية دي قسمة ربنا بس مرات الإنسان ما بقدر يتحكم في نفسياتو والحمد الله الليلة ربنا بعد دعاء طويل استجاب لي دعاي قولتا لي ياسر اتصل لي مثاني ومهاد كلمهم خلي جوني قال لي اتصلت عليهم وحاليا جاين دخلت علي مثاني وحضنتني كانت ماسكة فيني قوي زي الطفل الصغير زي الكأنها خايفة اني اضيع منها حسيت بها لانو الخوف كان ظاهر في عيونها طمنتها علي وباركت لي …..
اها يا شيخ ما قلت ما بتحمل نهائي اها الحصل شنو!؟ حاليا العائلة مبسوطة بالمولود الجديد
_اسمعي انا من الأول كلمتك احتمل انجح واحتمال لا وكل القدرت عليهو عطلتها تمانية سنوات هسي انتي مالك جايطة لو دايرة اقتلو بقتلوا لك …….
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الثالث عشر من رواية قد كفاني
لقراءة الجزء السابق : الجزء الحادي عشر من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
