وفي الجزء الثاني من رواية زوجة المغترب دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بيروحاء.
الجزء الثاني من رواية زوجة المغترب
حوالي الساعه 12 رجعت البيت.. م كنت بقدر اقعد اكتر من كده بره والا كنت قعدت!
اول شي عملتو اني مشيت اشوف رغد .. وقطع قلبي اني لقيتها في نفس الوضع ال خليتها فيو قبل ما امرق
قلت ليها رغد انتي لسه قاعده كده؟؟
بسرعه وقفت على حيلها وقالت لي ماشه انوم والله..
مسكتها من يدها واخدت نفسسس طويل.. وبدون ما احس لقيت نفسي ضاميها علي
……………………
كنت بتذكر في آخر يوم لي في بيت ابوي.. لمن ساهر معاي وهو بونس فيني وبقول لي ح نفقدك وكده
وقتها قال لي .. انتي عارفهه يا رغد؟ وائل انسان محترم وما سمعت عنو الا كل خيرر.. وبعدين وضعوو ممتاز.. ح يعوضك عن العيشهه الفقر الاحنا عايشنها دي ويجيب ليك ال نفسك فيو
بأختصار ح يسعدك يابتي
ووين السعاده دي؟ وانا من يوم م عرستو ما شفت شي غير البكا
كنت بشكي من الفقر.. بس ع الاقل كنت سعيده وما عندي هموم
قطع تفكيري صوت وائل وهو بقول لي رغد انتي لسه قاعده كده؟؟
خفت انو يمد يدو علي او ينهرني زي قبيل.. ف بسرعه وقفت وقلت اني ح انوم..
بس رده فعلو كانت غريبه..
ضماني عليوو.. وحسيت بكميه امان وحنان كده غريبه تلقائيا لقيت يدي بتحاوطو وبضمه اكتر..
قال لي ما تزعلي مني يا رغد انا يمكن عصبي ورده فعلي حاده.. بس انا كده وما بقدر اغير طبعي
وبعدين يا رغد انتي ما صغيره.. كيف تشردي؟؟ انتي مش فاهمه اننا في بلد غريب؟؟ ما بتقدري تمشي ل امك كده؟؟
بصوت واطي قلت ليو ما شردت..ضعت
قال لي حصل خير طيب
وفضلنا واقفين مسافهه.. بعدين قال لي طيب تصحبي ع خير وبطلي بكا حاضر؟؟
هزيت رأسي.. وغيرت ملابسي ونمت
تاني يوم صحيت وكالعاده لقيتوو طلع الشغل.. نظمت البيت.. اصلا دا الشي الوحيد البعرفوو وشربت الشاي وبقيت قاعده..
لمن الباب دقاا.. لقيتها بنوته صفراء طووويله.. تتشاف عمر العشرينات كده .. قالت لي بأبتسامه صباح الخيرر..
صباح النور..
ادخل ولا ح افضل بره؟
قلت ليها لالا خشي معقوله ياخ
اتونست معاي وورتني انها جيرانا ال بابهم فاتح فينا
انبسطت انو جارتنا سودانيه.. وبعد دا طلعت ظريفه شديد
ونستنا كانت عاديه لحدي ما قالت لي:
راجلك عمل ليك حاجه؟؟
استغربت وقلت ليها لا ليه في شنو؟؟
قالت لي لالا بسس امبارح بالصدفه كنت في البلكونة وشفت انو كان هايج وكده
قلت اجي اصبح عليك واسألك..
اكتفيت ب اني اقول ليها لالا ما حصل شي..
امي زمان قالت لي انو المره لازم تكتم او بمعنى اصح تحفظ راجلها وسمعتوو حتى لو كنت م طايقاوو او بكرهوو.. بس لازم م ابين كده ابدا
طلعت مني بعد وعدتها اني ابقا ازورها
………………….
طول فتره الشغل كان شاغل بالي موضوع البت الأمس دي م عارف ليهه..
كنت مستني ب فارق الصبرر ارجع واعرف من فطومه الحاصل معاها
وفعلا خلصت وطرت طيران بالعربيهه لحدي بيتنا..
ومشيت ل فطومه في غرفتها حتى انها استغربت فيني
قلت ليها حصل شنو يا فاطمه؟؟ قالت شنو؟؟
=مزمممل! ممكن تهدأ..
اي انا هادي اها احكي..
=ما حصل شي .. ساي شلت همها.. ما عمل ليها شي..
قلت الحمد لله.. واتلفت ل فاطمه ال كانت بتعاين لي بخبث وبتضحك.. بعدين قالت لي هي متزوجه ما تعشم..
قلت ليها هبله دي! بطمن من باب الانسانيه بسس..
قالت لي اي اي صاااح وغمزت..
ضربتها بالمخده الجمبي وطلعت..
…………………
دقيت على رغد وقلت ليها اصحابي جايين يتغدوو معانا.. ابوس ايدك يا رغد اعملي شي سمح ابوس ايدك.. الليلهه بالزات م ينفع م يظبط.. حاضرر؟؟
ردت بعد مده طييب..
شلت الهم.. يعني من يوم ما اتزوجتها ونحن بناكل جاهز عشان موضوع طبخها دا
افتكرتها في الاول بتستهبل.. بس لمن الموضوع اتكرر.. عرفت انها فعلا ما بتعرف..
دعيت انو المره دي تعدي اليوم على خير.. وكملت شغلي..
في طريق الرجعهه وقبل ما اصل.. دقت علي امها.. وبعد سلمت علي قالت لي ليه رغد ما بترد حاصل معاكم شي؟؟
لالا ياا خالتي كويسين الحمد لله بكون الجوال بعيد منها بسس..
قالت لي طيب سلم عليها
دخلت اشوف الوضع كيف .. لقيت رغد واقفه و في يدها عجين ووشها مجلبط وحالتها بالبلاء.. ضحكت فيها وقلت ليها دا شنوو يا بت؟؟
قالت لي اي اضحك في اوجاعيي.. لكن ع فكره المره دي ظبطت
قلت ليها كوويس
قربو يصلو .. خشي استحمى..
قالت لي طييب ومشت..
………………….
يا امي انتي مش قلتي قال ليك كويسهه تاني مالك؟؟
ما عارفه يا مازن قلبي قابضني حاسه انها م كويسه نفسي اسمع صوتها اسمع منها هي انها كويسه..
يا امي والله انتي مكبره الموضوع .. كويسه بتكون ما تخافي.. وبعدين يا ستي بكره بدق ليها وبديك ليها تاني
طييب تمام..
عايزه حاجه يا حجه.. طالع مع اصحابي..
لالا م تتاخر بسس.. اخوانك بخافوو
ان شاء الله.
يتبع ………
لقراءة الجزء التالي : الجزء الثالث من رواية زوجة المغترب
لقراءة الجزء السابق : الجزء الأول من رواية زوجة المغترب
للإطلاع علي فهرس أجزاء الرواية : جميع روابط اجزاء رواية زوجة المغترب للكاتبة بيروحاء
جميع الحقوق محفوظة للكاتبة بيروحاء .
