وفي الجزء الثاني هل ستبدأ معالم الرواية في الإتضاح أكثر أم سيكون هناك دخول للأحداث بشكل مباشر ؟ كل هذا وأكثر سوف نعرفه في السطور التالية من رواية قلبي ملكي ولكن أنت من للكاتبة الموهوبة كيندا .
الجزء الثاني من رواية قلبي ملكي ولكن أنت من
وهنا ملاك مدت تلفون لامها ومافاتتش عشره دقايق لين امها مدتلها تلفون ووجهها مايتفسرش وقالتلها …
امها<< مريم >> … ملاك كملي سهريتك مع البنات واركبي ..
ملاك .. ماما خليني نبات معاهم ريحانا كيف وصلت وبايته وريم حتي هيا بتقعد لوطه في حوش جدي وماهيش راكبه لشقتها وبصراحه عرسها الاسبوع هوا يعني نبي نبات الاسبوع هوا كله في حوش جدي ونهيجو وماتكلمنيش ولاتعرفيني هههههه..
امها … براحتك … اني راكبه فوق بوك يبي يتعشي ..
ملاك … تمام تصبحي علي الف خير ياعسلي انتي 
وركبت امها فوق وخلت البنات مع بعضهم فوق يركبو في باقي باكوات البكلاوه والعمبر والحلاوات ويطبقو في كلينكس … واول ماركبت وخشت لشقتها في دور تالت سألها راجلها محمد …
محمد … شن في خيرا وجهك مقلوب .. كنتي كويسه مبكري ..
مريم … ولدك كلمني توا ..
محمد … باه شن في ؟؟
مريم … غير تعالي في مطبخ نكملو حكينا … شن تبي تتعشي ..
محمد …. خاطري في طاوة شكشوكه من ايدينك الحلوات وشاهي …
مريم … وكيف بترقد بعد شاهي ..
محمد … انتي خيرك بترقديني بسيف يامرأه … من قالك نبي نرقد اني
مريم … فايق ورايق انت .. انت وين وولدك وين …
محمد … شن في ؟؟
مريم … من مده سمعت دوه وكدبتها من بنت خالتي .. ولدها يقرا في هولندا حتي هوا وقاعد في نفس المدينه متع ولدك وقالتلي ولدك مداير علاقه مع هولنديه غادي وراهو الوضع بينهم متطور جداااا وشكله الولد يبيه وامورهم واضحه ..
محمد .. ايه باه .. قولتيلي وتناقشنا في موضوع .. شن صار جديد ؟؟
مريم … توا كلمني سالني وين كنت قتله كنا ناكدو علي الحجز متع بنت عمك وعقبالك ياررب ياوليدي ..تصور قالي دعوتك استاجبت ياامي ورح تفرحي بيا قريب ان شالله … ولما سالته شن تقصد فا تصور بكل وقاحه حطلي شكاره كلها. وقالي نحبها ونبي نتزوجها ويبي يروح يفتح معاك موضوع ويبني نوافق لو نبي سعادته تصور شفت وقاحه اكتر من. هكي جايبلي وحده يهوديه مش معروف ملتها منين وبيتم فيها … اني من صدمه معاش عرفت شن نقول شفت حظ اقل مني ؟ … لا وعلي اساس بيفرحني قالي موعد طيارته بعد بكرا ان شالله في صبح ..
محمد …. ماتخافيش ولاطحتي موضوع في بالك … ومش رح يصير الا لاانتي تبيه …
مريم … اني نبي نفرح بيه بي بنيه ليبيه من توبنا ودينا مش جايبلي يهوديه وجاي يهز بطوله بيها …
محمد …. انتي في بالك بنت معينه ؟؟؟
مريم … كيف يعني ؟؟؟
محمد … ولدك لازم ماينحط في الامر الواقع .. واني نعرف كيف نلويله ايده … بس انتي في بنت في بالك ؟؟
مريم … شن بنقولك … والله اني بصراحه عاجبتني بنت خوك عبد السلام بنيه محترمه وهوديه ولامن فمها لامن كمها والحق البنت ماشالله زي فلقة القمر وفوق من هدا كله رزينه ولامتع مكياج لامتع علاقات لادوه فارغه … ومانتمناش لوليدي خير منها وخاصة اني مربيتها علي ايدي ..
محمد … تم خلاص … بكرا … تفتحي موضوع مع امها وتجسي نبضها … وكانا مش متكلم عليها حد … فا خلي الباقي عليا اني مع خوي …
مريم …. وليت … كيف بتم من غير رضاه ؟؟
محمد … ولدك علي حسب كلامك الباين انه جاي وبيزفنا الخبر انه يبيها واني نعرف ولدي لما يحط حاجه في باله … لدلك لازم مانضغطو عليه غصبن عنه وصدقيني اني نعرف كيف نخليه يوافق غصبن عنه …
مريم …. بس هوا قاعد تلاته اسابيع هما الا قبل رمضان وشهر رمضان وبعدها متسقد …
محمد …. العرس رح يكون قبل رمضان 4 ايام بس …
مريم ,… هبلت انت محمد … اسبوعين شن بندير فيهم اني ولا امها حميده ؟؟
محمد … الفلوس يخلوك تديري كل شي في اسبوع بس … ماهو ياترضي بالحل هوا يااما تخلي ولدك يسافر وياخد من يبي ومعاش تفتحي موضوع هوا … لان ولدك مش مروح علي سواد عيونك … ولدك مروح باش ياخد الفلوس الا وعدته بيهم ومعاش تشوفيه تاني …
مريم … وانت شن عرفك ؟؟
محمد … هوا حاكيلي من قبل ومهدرزلي انه مفكر يهاجر ويكون مستقبله برا … واني قولتله مش رح نوقف قدام مستقبله … ووعدته انه لو خدي الماستر بتقدير … فارح نعطيه مبلغ يشري بيه شقه غادي وسياره ونبعتله مصروفه لين يوقع عقد في مستشفي ويستلم خدمته غادي…
مريم …. اه قولي يعني انت الا مشجعه ؟؟
محمد … اني صح شجعته علي مستقبله لكن
ماقولتلاش خود اجنبيه وتزوجها واقطع احر حبل ليك هنا … وتوا هالدوه مافيش داعي ليها لاني اني زيك … شرطي علي الهجره انه يتزوج ليبيه اما غير هكي مش رح ياخد قرش مني …
مريم …. خلاص بكرا نفتح الموضوع مع امه ونقولك شن صار …
محمد …. باهي اني جعان مازال ؟؟
مريم … لا لا خلاص كملت ….وهادي صفره … تقعمز علي طاوله مطبخ ولا برا ..
محمد … لا لا خلينا هنا …
مريم … اها … اكيد بتغمس … خلي نقرلهالك طاوه ..
محمد … وانتي … خيرك ماتبيش تتعشي ؟؟
مريم … ولدك سدلي نيتي …. وبعدين من لما روحت لليبيا واني سارحه في كيلوات وزياده … هدا لاني نساير فيك …
محمد … والله يامريم … انتي في عيني احلي زوجه سمنتي ضعفتي مرتبه منكوشه .. انتي حلوه …
مريم … باهي باهي خودني في دوكه … مهم تعشي انت براحتك واني خليني نوض نرقد لان بكرا سهريه وواكيد زحمه وتطيب وتوتي فاخلي نرتاح باش بكرا نوض نقرض البصل معاهم …
محمد …. ماتنسيش الا قتلك عليه بكرا ..
مريم … بعون الله اني اصلا علي نار من هالموضوع … تصبح علي خير ..
وخشت مريم لدارها وقعمزت علي سريرها وفتحت كمدينو باش تاخد شحن وتحط تلفونها في شحن … واول مادورت عليه مالقتاش … اتصلت بي بنتها ملاك …
مريم .. الو … وين خيط شحن مش قتلك مبكري ركبيه ..
ملاك … حي نسيته ماما … تبيني نركبهولك توا ؟؟
امها … لا لا خلاص مافيش داعي .. مهم غدوا ركبيه
ملاك …حاضر ماما … سلام …
وهنا ملاك سكرت الخط وقالتلهم …
ملاك … باهي كملي ريما هانم …
ريما .. اني كملت .. بس انتي الا نستنو في حضرة جنابك تتكلمي ..
ملاك …. شن بنقول ؟؟
ريحانا … تبي تعرف الفضوليه من الا في قلبك وتخممي فيه ؟؟
ملاك … هوا في … بس صعب نقوللكم عليه ..
ريما … وراس امك مني ؟؟
ملاك … بصراحه نتحشم … لان مافي بيني وبينه شي بس هكي نحس ان في نظرات بينا …
ريحانا … احكس وقولي هالسر ؟؟
ملاك …. بصرررراحه … خوك وائل ..
ريما … ياوقحاتك ههههههه وتقوليلها فيها في وجهها ..
ريحانا … هههههههههههههههه
ملاك … اني فاضيه الا معتبرتكم صاحباتي ونحكيلكم … اني راكبه فوق لحوشنا
ريحانا … ههههههههه غير تعالي ياودي نبصرو عليك … بجد مالقيتيش غير وائل الكزمه ؟؟ تي هوا هوا دفش شن فيه حبيتي ؟؟
ملاك … خلاص انهوه الموضوع نتحشم ههههه
ريما … انتي تتحشمي وهكي مالا كانا ماتتحشميش شن درتي ؟؟؟ راك مشيتي لعمي عبد السلام وعطيتي فيه كلمه هههههه.
ريحانا وريما … هههههههههههههههههههههههههههه
ملاك … اني تافهه الا نحكي معاكم ..
وتلفتت وحطت سماعات في ودانها ورقدة ..
ريحانا … حرام عليك كليتيها ..
ريما … شفتي مفعوصه مايطلع منها ؟؟ لكن يالله اهو زيتكم في دقيقكم مع بعض
ريحانا … شن تقصدي ؟؟
ريما <3<3 <<بعين ضحكت شماته >> . مانقصد شي ههههه
ريحانا … انتي ماتتحشميش واني غبيه الا نحكي معاك اصلا …
وعطتها بالقفي ورقدة هيا تانيه ..
اما ريما فااول ماشافت تلفونها يرن من خطيبها … انسحبت ومشت لصالون باش تحكي معاه براحتها ..
وفاتت الليله وكل وحدا في العيله يخمم في شي … بس ياتري من الا امنيته رح تتحقق ومن الا العاصفه رح تكسره … اكيد مع كل يوم رح نكشفو الاسرار سر ورا سر …
حناهم … بينياتي صباح النور والبنور … راهو شميسه بدت تزرق وصلاة الفجر بتفوتكم نوضو صلو الفجرراهو والله ماتلقو الا صلاتكم …
ملاك … هيا حنينه هي … صباح الورد … وين ريحانه ..
حناهم وريده … ريحانا بنيتي ربك يكملها بعقلها يارررب ويطيحها في خيرة شباب .. ناضت من بكري صلت وخليتها تقرا في قرأن …
ملاك … ههههه ةاني خيرني ياحنينه ؟؟
حناها … انتي كانا تنوضي تصلي انتي وريما تاخدو مني كل دعاوي السمحه وان شالله يارررررب مانشوفك الا انتي وريحانه في ليله وحده في كوشه وقبل حتي مايخش علينا شهر الكريم
ملاك … اهو نوضت هي يااحلي حنينه ..
وناضو خشو للحمام توضو وصلو وبعدها خشو للمطبخ لقو حناهم كيف حاطه البيض مسلوق علي نار والشاهي …
ملاك … خلي منك ياحنينه ؟؟
حناهم ..ز لا لا بنيتي انتي متعوده شبانيا نفطر فيه كل يوم … بس هوني ريحانه بدت تضم وتهوي في حوش الحقوها قبل مايخش حد ..
ريما … حناي جدي جي وجاب معاه الحليب وسفنز والخبزه سخونه …
حناهم … قوليله يدخلها وبري نوضي امك وبوك وعمك ومرة عمك ووخيك صغيرون وقوليلهم ينزلو نفطرو جميع جري ..
ريما .. اي حاضر
وركبت ريما ونوضتهم ونزلو والتمو مع بعض … علي خشت حميده ام ريحانا …
حميده … شن فطروتو من غيري ولا شني ؟؟
وريده … والله ياكنتي الغاليه ماينزل فطور من غيرك … هي وتعالي في جنبي هنا .. دني ياريحانا شوي لامك … قوليلي وين عبدالسلام خيره ماجاش فطر معانا ؟؟
حميده … قولتله والله بس تعرفيه الدوام دوام عنده .. فافطرته غادي وحطني ومشي ..
وريده … باهي باهي مهم مافيشي شي .. خلي يمشي يخدم علي رويحته …ريما … وينك … هاتي فازو العسل وزيدي الخبزه والسفنز .
ريما … هي هي جيت …
والتمت العيله مع بعض يفطرو وضحك وتهدريز ينسمع من هنا وغادي … واول ما كملو فطورهم … خشت حميده للمطبخ باش تغسل معايين الفطور وخشت معاها مريم باش تساعدها وتبدا في تقريض البصل … اما البنات فا كل وحده مشت تدير في حاجه …
واوما خشت سهيله للمطبخ باش تساعدهم … نطت مريم وقالتلها …
مريم …. والله ماك مدايره حاجه هنا … مش عندك موعد توا مع الخياطه ؟؟ بريلها واحنا مش رح نعقبو شي كأنك موجوده ..
سهيله … باهي وين البنات ؟؟
مريم<< ام ليت وملاك >> … خليت ملاك وريحانا ركبو فوق يضمو في حوش .. وريما ركبت تضم شقتكم فوق واهوا اني وحميده في مطبخ والغدي والحوش هوا ناضو البنيات من صبح وكله ضموه ..
سهيله .. اه مالا مادما توا مافي شس … خلي نمشي للخياطه نشوفها شن دارت … غير ماتنسوش تحسبو الوليدات الا بيركبو القواطين بعدين في غدي بس …
حميده … من غير تقولي تهني ..ز بري بسرعه بس قبل ماينهلب حد من الجيران …
سهيله … مالا هيا خلي نركب نبدل ونطلع سلام ..
حميده … في امان الله … اااه والله ياناري مابعدها متقطعه هنا وغادي …
مريم … اي والله هدا مازال بعد هالحوسه بتخمم في رمضان
حميده … اي والله نخممله من توا … بالله شن وتيتي …
مريم … والله مانكدب عليك درت الحاجات العاديه .. خبزه ونعناع وخديت تموين وباقي قولت كل يوم بيومه هدا كانا ربك حيانا ومن اهل دنيا …
حميده … اااي والله تقولي غير نطلعو من هالمعمعه وبعدها نديرو كل شي …
مريم .. تخافي تطلعي من هالمعمعه تلقي روحك وخيتها هههههه .
حميده … شن تقصدي ؟؟ علاش تضحكي هههه بالله عليك شن في ؟؟
مريم … بصراحه ومن غير هلبا دوه … في ناس كلموني علي بنتك ريحانا ويبو يعرفو هل في حد عاطي فيها كلمه او لا ؟؟
حميده .. والله شن بنقولك … هوا كلام رسمي مافيش لحد توا .. بس صاحب عبدالسلام في الخدمه اكتر من مره شافها جايه لبوها في مكتب … ولمح لعبد السلام انه يبي يجي يتقدملها …
مريم … مافي شي رسمي ولا لا ؟؟
حميده … لا والله مانكدب عليك لحد توا مافيش شي رسمي …
مريم … مالا خلاص … راهي ريحانا من توا كلمتك عليها ونبيها لوليدي ليت … ووليدي من غير مانحكيلك عليه زي الوريده المفتحه …
حميده … <<ضحكه من هنا وهنا >> انتي تقولي .. ياسعدها وهناها الا بتطيح في دكتور ليت .. والله امها داعيتلها بالخير طول عمرها …
مريم … معناها انتي موافقه ؟؟
حميده … بالنسبه ليا والله ماعندي مشكله … توافق البنيه وبوها وباقي اني علي احلي من قلبي من العسل …
مريم … باهي مالا اليوم محمد بيكلم عبدالسلام ويفاتحه في موضوع …
حميده … خلاص وريحانا خليها عليا …
وفي اللحظه الا كانو فيها يحكو علي نفس الموضوع كانت ريما تسمع فيهم من ورا الباب ووهيا كانت جايه بصدفه بتاخد صابون تايد من حناها … بس اول ماسمعت الخبر ركبت فوق زي طلقه … وهات من يشدها توا …
واول ماوصلت لشقه … قعدة تدربك علي الباب وتغني …
ريما …. ايدك ياغلي يالله معانا … هدا الغالي تمنيته طلبت العالي ولقيته روووووووي … ان شالله يابنيه تشوفيه عريسك وبوك يدرج فيك ….
ملاك … الباب قلبتيه خيرك يامهبوله … والله تقول تزوجتي بعد شوق صح ههههه
ريما … امبحي هدا مش ليا … هدا لعروستنا … ترا قولووووو مني ؟؟
ريحانا … اختصري مني ؟؟؟؟
ريما … قداش تعطوني ؟؟
ريحانا … ستين كف … تكللللللللمي ؟؟
ملاك … ماتقوليلش وائل خطبني …
ريحانا … زعمك هههههههه
ريما … هههههههههه لا لا ليت خطب ريحانا …
ملاك … تتكلمي بجد ولاتبصري ياكدابه ؟؟؟
ريما … قسما بالله نتكلم بجد … امك كيف كانت تكلم في مرة عمي حميده …
وهنا ريحانا حست دنيا لفت بيها فجأه ومالقتش روحها الا مغمي عليها …
ومافاقتش الا وهما يبخو عليها في كولونيا …
ملاك … فيقي يابنت شن صارلك ؟؟
ريما … هههههههه ومن الحب ماقتل مش منها شورا ماقدرتش تستوعب موقف …
مش منها شورا ماقدرتش تستوعب موقف …وهنا فاقت ريحانا وهيا حاطه ايها علي قفي راسها مكان ضربه وتتالم وتقولها …
ريحانا … خلاص اسكتي يابلوه مبردك ..
ريما … الولد وجي خطبك خلاص قولي الا فيها يابنتي الحب مش عيب
ريحانا … خلاص اسكتي
ملاك … صار تحبي خوي حتي انتي يامهبوله وتعجبي فيا وتضحكي امس ..
ريحانا … مش حب هادي بس تالف من عندها .. اعطيني ميه ملاك…
ناضت ملاك بتجيب الميه لريحانا … بينما ريحانا ردست ريما وقالتلها …
ريحانا نتفاهمو لوطه مش هنا … بس قوليلي توا بتفصيل كيف عرفتي …
وهنا بدت تحكيلها ريما كل الا سمعاته …. وعلي خشت ملاك سكتو … فاقالتلهم ملاك …
ملاك … سامحيني جاني تلفون … هاك الميه … وجهك اصفر تقول طلعلك البعبع …
ريما … خلاص اني بننزل قبل مانبع الحنان تجي وتلقي شقه مازال مقلوبه وانتم كملو بدون سهوكه …
ملاك … باه بري وتوا نتلاقو لوطه …
وهنا نزلت ريما .. بينما ملاك قالتلها … تعالي لدار ليت … مازال هادي بس خلي نرتبوها قبل مايروح ونغيرو غولافاتها … وبصراحه بندوي معاك في موضوع مهم لازم تعرفيه ..
ريحانه … يخص مني ؟؟
ملاك … يخص ليت … تعالي نكملو حكينا في داره …
وخشت ريحانه وقلبها يدق بسرعه وخايفه … علاش ماتعرفش .. ممكن لانها من قبل تحبه وماحلمتش ان يكون غيره زوجها وحبيبها … ولما القدر انصفها وكان من نصيبها … مش حابه تسمع شي يخليها ترفض … وخاصة انها لطالما قرارتها كانت مبنيه علي عقلها مش عواطفها … بس ياتري شن هوا الكلام الا بتقولهولها ملاك …وشن بتكون ردة فعلها .. هدا بس
الا رح نعرفوه في الحلقه القادمه ..
يتبع……….
لقراءة الجزء التالي : الجزء الثالث من رواية قلبي ملكي ولكن أنت من
لقراءة الجزء السابق : الجزء الأول من رواية قلبي ملكي ولكن أنت من
للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا
جميع الحقوق محفوظة للكاتبة كيندا .
