الجزء الخامس عشر من رواية حوش جدي

وفي الجزء الخامس عشر لنري ماذا سيكون هناك من مواقف رائعة فيه ، دعونا نبدأ بالقراءة سريعاً دون المزيد من المقدمات ولنري جميل الكلمات والخيال الرائع في السطور التالية .

الجزء الخامس عشر من رواية حوش جدي

عصاة مكنسه وين ؟؟؟ تعااااااااااال هنااااااا
هرب وسام فوق يجرى وقعد يضحك وقال لنهال …
وسام … ماتخافيش غدوا صبح تنوضى تلقيها ناسيه كل شى ههههههههه تصبحى على خير
وهنا نهال شبحت لحناها وهارب عليها ضى … وحناها قالتلها ….
حناها …. خشى داخل … مايطلع منك انتى ترريتك … مش منك عرق جدك ضارب فيييك خشى … وانت يااااااسام والله الامانحرش بوك غير يصبح صبح بس …
كبه وسام فجأه من فوق وقاللها …
وسام … هههههههههه وسام وسام ياحنااااااى واو وين طار …
حناه … توااااا سا م .. وسام … ابتساااااام … ان شالله بوعجيله … والله الا ماتنزل بس كان مانزلتش زقية جدك على سقانك مانبداش وريده وماشم نهااااار … ومازال نلقاك هنى بس …
خشت حناهم للحوش وقربعت باب بى 3 ساقطات وخشت رقدت ونهال خشت للمربوعه داخليه وفرشت ورقدت …. ومافاقتش صبح الا على صوت خالها صبح ينوض فيها ..
خالها … نهااااال … نهااااااااال ….
نهال … صباح الخير خالى … واخيررررا جيتو … اه شن حال بابا توا ؟؟
خالها … الحمد لله تمام واليوم بيطلعوه … … وامك قالتلى روح بيها .. لانا باقى خوالك وعمامك سمعو … واكيد بيجوكم .. هيا البسى حوايجك .. لبين مادرت دوش وغيرت حوايجى ..
وفجاه نزل وسام يجرى بسرعه وقاله …
وسام … اه بومى وين رافعها نهال ؟؟
بوه … غير قول صباح الخير … قول شن اخبارك يابوى … شن حال عمك .. وانت خاش طول فى خط ..
وسام .. صباح الخير … سألت غير نحسابه راجل عمتى تعب بس ..
بوه … لا لا الحمد لله بعد العصر بيكتبوله ورقة الخروج وبيطلع … ونهال خلاص بنروح بيها … ااااااااااه حاس روحى متهتك وتعبان …
وسام … امى وين هيا ؟؟
بوه … امك مع خالتك فى مستشفى .. قولتلها نروح بى نهال … ونرتاح ساعتين وبعدين روح بيكم ..
وسام … اه قصدك امى قاعده غادى ؟؟ باهى كان هدا خش انت دير دوش .. اكيد تعبان وانى توا نحطها نهال فى حوشها …
بوه …. ياريت والله … انى تعبان ومش قادر نفتح عيونى ..
وفجاه حناهم انتخصت وقالت ..
حناهم … لا لا مايروحش باها الخروف مززى هوا … امس حلمت بيهم حلمه مش باهيه فى جنان …
وسام … شن تقولى انتى ياحناى .. هههههههههه << ضحكة تزريطه وهربت ضى >> خلاص بوى خش انت دوش وارتاح وانى توا نوصلها …
بوه … ماشى ماشى خلاص ..
نهال …. طبست فى ودن وسام وقالتله … << هدا غير تنسى حناااااك قريب فضحتنى قدام خالى ..
وسام … ههههههههه الباين انا مشهد امس نحفظ فى الداكره غير مؤرشفه ههههههههههه عند حناى وخشت بعضها عندها .. مش تسمعى فيها قالتلك حلمت بيكم ….
نهال …. ههههههههههه خلاص نمشى نلبس حوايجى انى اوك ..
وسام .. خلاص تلقينى فى سياره نستنى فيك …
خشت نهال تلبس فى حوايجها … ووقف وسام فى دروج وقال …
وسام … ااااااااااااااااامجد .. ااااااااااامجد ..
امجد …. اووووووووووووف نفخ .. شن فى …
وسام … نوض وكلم خوك .. ظمو فراشتكم وحك الحمام ..امك مروحه ومش لازم تشوف فراشتكم …
امجد …. قوووووولى بالله هوا انت تشوف فيا << مجيده >> لابسه توكه وقفطان … تى برا يارجل … امشى وانت شورك خديت عليا هلبه واعطيتك وجه ….
وسام …. نوصل نهال ونرجع مااااااشى …. وبعدها تشوفنى كيف نولى ….. مااااااااشى …
امجد …. نحك الحمام بى الديتول ولا الوركينه ؟؟؟
وسام …. قصىىىىىىىىىىىىىىىىىىىىىى ..
قصى … نعم ….
وسام … انزل لوطه اضرب لجدك يبرة سكر … واعطيه شن يفطر …
قصى … مش صايم هواااااا ؟؟؟ ولادينته ماجوسى وانى مانعرفش ..
وسام … وحق ربى كان نركب مانى مخلى فيكم واحد … انزززززل لوطا انت شن دخلك فى امه …<< استغفر الله ياربى >> انززززززززززززززل ..
قصى …. خلاص ماتضربنيش وراس امك تبنى حتى انى نفطر ونضرب لروحى يبرة سكر ماعنديش مشكله …
امجد …. << قال لقصى بشوى >> هههههههههههههه عيل زفت تخاف منه
وسام … ااااااااااااااااااااااااااااااااامجد …
امجد …. << شبحة تخزريطه >> نعم .. ماقولتليش نحكه بالوركينه ولا ديتول ..
وسام … الوح مفتاح سياررره بسرررعه ..
لوحله امجد مفتاح سياره وركب فى سياره … وولعها وفتح مكيف وقعد يستنى فى نهال … ومافاتتش 5 دقايق الا وخشت نهال للسياره وركبت من تالى وقالتله …
نهال …. وسام … ماكلماتكش خالتى ؟؟؟
وسام …. لا لا … بس ها اليوم بنفطرو عندكم اهو قتلك ..
نهال … بجد تدوى ؟؟
وسام …. والله بجد … وتى فطور …بنجيب حناى وجدى وبنفطرو عندكم … وتوا نكلم امى تروح عندكم ..
نهال … فى حاجه وسام ؟؟
وسام …. توا تعرفى ….
حط وسام نهال فى حوش وروح …. وهنا لقى الحوش يبرق برق .. وبوه راقد فى دار نوم ووامجد وقصى يلعبو بى البلاى ستيشن … وامجد كل مايخسر يقعد يهبك فى قصى وقصى يبكى ويقوله …
قصى … والله الا مانحرش فيك وسام يامسخ ااااااااااااااااااااه
امجد … مسخ … تى والله الا مانقددك تعال هنا
وهنا خش وسام وقاللهم ….
وسام … امتى بتكبر انت وبتولى راجل … تشوف فى بوك راقد فى دار ياعيل ولا لا … خلى خوك يلعب وبرا صلى ظهر … ومعاش نبى وجهك على بلاى ستيشن … اكبر اكبر ندادك بصغارهم ..
امجد … كانا انى نداندى بصغارهم …. انت شنى ندادك فى القبر ؟؟
وسام … تخفف فى دمك باه اه اه اه .. برا صلى توا لنحدفك بالنقال الا فى ايدى ..
امجد …. بنمشى بس شن صار فى الا طلبته منك ..
وسام … شنى هما ؟؟
امجد … 200 جنى …
وسام … بعد ماتصلى خش لداى .. وافتح كميدنو تلقاهم فى درج الاول … وخف عليا ولحلح روحك واخدم … مش كانا بوك مايبيش يعطيك باش تسترجل شوى وتخدم … طلعهم من جلدتى انى ….
امجد …. وين قتلى فى كميدنو … هيا مالا تشاو توا … انى طالع ..
وسام ….. وين ؟؟
امجد …. ماتحسبوش بحسابى فى فطور … ماشى للبحر ومش مروح الا فى الليل موخر ..
وسام … قول لبوك قبل … انى مادخلنيش فيك …
امجد … وينه هوا توا ؟؟ قاعد راقد ؟؟
وسام … اى لما ينوض كلمه …
امجد … توا نكلمه بنقال بعدين .. هيا تشاو ..
خش وسام لداره وقعد متكى على سرير ويفكر لحد مانعسه نوم ورقد …
بينما نهال روحت .. ظمت الحوش وحطت العشى على نار وحسبت بحساب حوش خالها …. وماطقتش ساعه 7 الا وكان الحار والحلو واتى …. وعلى طلعتها من مطبخ بعد ماكملت كل شى … شرين باب … فامشت بتفتح .. ولقت وسام قدام وجهها وجايب حناه وجداه …
قعمزتهم فى دار عربيه … وغسلت عالة شاهى وحطتها على جنب … وولت للمطبخ وبدت توتى فى صفر … وفجأه لحقها وسام وخش للمطبخ وقعد يعرى فى الطناجر ويقوللها …
وسااام .. اووووووو محشى وبوريك ومبطن … رز بالبصله … لا لا هلبه الحق انتى عليا .. تسلم ايدك يامرتى ياعيونى انتى 
نهال … هههههههههههه … وسام مش خالى قال بيروحو بعد العصر وينهم ؟؟
وسام … كلمت امى … قالتلى .. دكتور مازال ماجى مبكرى .. وقالتلى الحقنى انت وجدك وحناك واحنا بعون الله قبل المغرب نكونو غادى …
نهال …. اه … اوووك … حبيبى 
وسام …. شن حسك قووولتى .. ماسمعتهاش عاوديهااااااا  .. انى فطرت خلاص … ااااااااااه ياقلبى بس امتى تكونى حلالى و ملكى وتعيشى معاى … تى والله ماعاد مخليك طالعه حتى سنه من الحوش  ..
نهال …  صيام نهار ابيض ياوسام ماكنتش هكى كنت عاقل خيرك 
وسام …. هههههههههه وعقل شن درت بيه عنست فى حوش بوى بس 
نهال … ربى يخليك ليا يارررب .. مدلى صفت صوانى هدكم ..
وسام … ويخليك ليا حبيبتى …. تعرفى حاجه … امس فاتح راديو سياره جت اغنيه … تدكرت الا صار بينا وكيف كنت مش قادر نعبرلك على اى شى وكل كلمه قالها حسيتها بالدت لما نخطبتى … لما قعدت نسمع فيها رجع شريط كله التالى وقعدت نضحك زى مهبول ..
نهال … شن هيا وراس وساام ..
وسام .. هونى تلقيها فى نقال … نزلتها … اعتقد لمحمد حماقى << وادى حالى معاك >>
نهال … اوك هات نسمعها … << وفتحت عليها >>
وادي حالي معاك هموت عشان انساك
حاولت ياما اقول لقلبي كفايه يستناك
وادي حالي معاك شايفك هنا وهناك
في كل حته سايبلي ذكرى عيشتها وياك
مش ذنبي ان قلبي راح معاك ومجاش
انا شكلي كلمة انسى كلمه ما اعرفهاش
مش ذنبي ان قلبي راح معاك ومجاش
انا شكلي كلمة انسى كلمه ما اعرفهاش

ايام بتفوت بعدك ببطء بموت
على طول واحشني وليه سايبني ومش سامعلك صوت
في جراح وعذاب حتى الامل كذاب
كل ما اقفل باب حبيبي الذكرى تفتح باب

وسام …. هههههههه خيرك تبكى نهارت سود بلاش بطلنا ماتسمعيش .. وانتى قلبتيها نكد ..
نهال << مسحت دموعها >> هههههههههه
نهال … نحبك 
وسام …. وانى والله نموت فيك وبعون رح تكونى ليا بس ورح ندير مستحيل 
وفجأه …. شرين الحوش … فاطلع وسام وفتح الباب … بينما نهال مسحت ايديها ولحقاته …ومشت استقبلت امها وخالتها وخالها وبوها وقصى …. واول ماشافت بوها قالتله …
نهال …<< غمرته >> بااااااابا شن حالك يابابا استاااااحشتك 
عمى محمد … الحمد لله يابنتى .. صحتى زى جمل …  انى زى قطوس بسبعه رواح ..
عمى فرج …. شن ماتبوش تعشونا … ولا مافيش عشى ؟
نهال … لا لا خلاص الفطور واتى يدن مغرب بس ..
سميحه …. نهوله تعالى انى وياك فى مطبخ نحطو صفر هيا …
ام نهال … اى خلاص وانى نساعد محمد بس ونلحقكم ى مطبخ …
عمى فرج … وسام .. وين جدك وحناك ؟؟
وسام … فى دار .. ومبكرى جدى يسال عليك … تعال نخشولهم .. مقعمزين بروحهم ..
خش عمى فرج ووسام لجدى وحناى .. ومافاتتش 10 دقايق حتى ادن مغرب ولتمو كلللهم على صفرت الفطور فى دار العربيه الكبيره … وبدت تنفتح موضيع وتتسكر موضيع .. وضحك ينسمع من هنا وغادى .. ومافاتتش ساعه الا ونقامت الصفر … وام نهال قعمزت على عالة شاى … والكل مقعمز فى دار ويهدرز .. بينما نهال وخالتها … خشو للمطبخ يغسلو فى معايين … وهنا خالت نهال قالت لنهال ..
خالتها … نهووولتى … نبى نسالك سوال وتجاوبنى بصدق ….
نهال … نعم خالتى .. انتى تعرفى .. انك زى صاحبتى وعمرى مادسيت عليك شى ؟
خالتها …. انتى فى شى بينك وبين وسام ؟؟
نهال … سكتت ..
خالتها … شوفى نهال من غير ماتسكتى … انى بنقولك هلبه حاجات ومفروض جى وقت انك تعرفيها ….. انى امجد قالى انكم تحبو بعض … ووسام فى الاول كان يحاسبه انك انتى وامجد تبو بعض … لحد ماجى وحكى معاى ووضحتله فكره انا امجد يبى وحده ومكلمنى عليها قداش ليه باش يخطبها وقتله ابدا كون نفسك وانى نخطبهالك … ومن بعدها وسام حسيته فرحان ولما سالته قالى انى كنت نحسابه امجد يبى نهال لانا مره قالى هكى وانى حاولت نحى موضوع من راسى … بس انى نبى نهال .. ونبى نخطبها … وامك لما ززبطكم وانى قتلها وسام كلمنى على بنت يبنى نخطبهاله كنتى انتى وانى كنت عارفه كل شى .. وحكالى وسام على الا صار لما جى هنا لحوشكم .. فالخلاصه …. وسام شاريك ويبيك … وانى نعرف ولدى راجل وقدها .. بس انى نبى نسألك سؤال وتجاوبنى بصدق … انتى تبى تقعدى مع خطيبك ؟؟ ولا تبى وسام ؟؟ .. انى قالى وسام … لكن انى قولت مش رح نتجرء ونفتح موضوع مع اهلك لحد مانسمع انك ماتبيشى خطيبك … فاانتى شنى تبى بزبط ؟؟
وهنا نهال كيف جت بتجاوبها .. ضبحت عليها امها فامشت واول ماخشت .. بوها شبحلها وقاللها …
عمى محمد …. نهال … بو خطيبك وخطيبك جونى فى مستشفى والله بارك الله فيهم وقالولى الايام جايه بنجو ونحددو موعد العرس ويبو فاتحه تنقرا توا .. وانى الحق قولتلهم باهى ومادبيا تنقرا فاتحه توا باش تقدرى تطلعى انتى معاهم براحتك كان بياخدولك دهب …
وهنا وسام سمع الكلمه وشبح لنهال كيف منزله راسها وقالتله ..
نهال … ان ش الله ان شالله بابا .. مازال وقت .. وطلعت من دار ووكيف وصلت فم الباب سمعت وسام طلع صوته وقال ..
وسام … عمى نبى نفتح معاك موضوع ..
وهنا نهال نصمتت مكانها ويبست .. وبعدين مشت ووقفت فم الباب وقعدت تسمع وايدها على قلبها …
وسام … عمى … انى نبى نطلب القرب منكم ونطلب ايد نهال …
عمى محمد … ههههههههه وسام خيرك انت تنكت ؟؟
قعد الكل يشبحله بصمت ومصدوم … وخالت نهال جت بسرعه ووقفت جنب نهال وقالتلها …
سميحه … نهال شن فى خيره الحوش نطفى ونسمع فى صوت وسام ؟؟
نهال … حى عليا ياخالتى … بيقول لبووى … << شبحت سميحه لنهال شوى وبعدين خشت لدار وقالت …
سميحه … شن فى خيركم طفيتو ؟؟ << وقعمزة >>
وسام …. شن قولت ياعمى محمد ؟؟؟
عمى محمد …. والله كلامك غير منطقى ياولدى .. شن بنرد عليك … انت عارف انا البنت عاطين فيها كلمه … وكيف كنت نتكلم فى اخر مستجدات … فاان شالله تلقى نصيبك فى حوش تانى .. غير هكى .. والله مانقدر نقولك شى ….
وسام … عمى محمد ….. نهال … ماتبيشى خطيبها … وانى ولد خالتها واولا بيها من حد برانى … وانى نبيها بنت …
ام نهال … نسمرت وتضربيها بموس ماتطلع منها قطرة دم .. قعدت تبحلق و تشوف لبنتها وسميحه بس … لانا عرفت كان بتقول الا صار قبل هيا اول ناس بتنضر …
عمى محمد … لا ياولدى … انت غالط ونهال بأردتها .. وهيا الا وافقت عليه وماغصبها حد … وتوا تتحمل مسؤلية قرارها …
وسام … انت نادى نهال وأسالها …. وشوف رأيها توا …
عمى محمد …. لانسال ولانزيد ياولدى …. هدا كلام تريس ماهو كلان نساوين … وانى عطيت كلمه لرجاله بموافقه منها …. واهو قدام بوك وامك نقولك … ان شالله تلقى نصيبك فى حوش تانى …
ناض وسام زى مهبول … وطلع من دار ولقى نهال واقفه وراء الباب وتبكى …. فاشبحلها شبحهت كره عمرها مارح تنساها … لانها كانت سلبيه واكتفت بصمت وراء الباب والدموع … وماحاولتش حتى تدافع على الا بينهم … قربع وسام الباب رئيسى وطلع …. وركب سيارته زى مجنون وقعد يبكى ويخبط على ستريسو …
وفى لحظه من الغضب وماقدرش يتمالك نفسه ويديرها رابعه فى طريق ….. طلعت عليه سياره فجأه من جنب و …..
ترن ترن ترن ترن ترن ترن …

نهال …خالى … تلفونك الا حاطه فى شحن يرن …
خالها … هاتيه هاتيه .. بنتى …
نهال … هاك خالى بسرغه بيصكر .. رقم غريب راهو ….
عمى فرج … الوووو منى معاى ؟؟؟
الرقم … ايوااااا …. لقينا واحد توا كيف دار حادت ومغمى عليه ومازبطناش شكله لانا وجهه كله دم … بس لقينا رقم تلفونك عنده فى سجلات اخر رقم … ولقينا بطاقته شخصيه
عمى محمد … منى هوا ؟؟ شن اسمه ؟؟
الرقم … والله هوا شاب صغير … وسيارته كيا اوبتما .. واسمه فى بطاقه وسام فرج …
عمى فرج …. << عيطه قويه وناض وقال >> وسااااااااااااااااااااام … وين توا هوا ووووووين .. شن صار فيه …
الرقم …. تبرعو زوز ورفعوه لمستشفى الحوادت بوسليم .. وانى كلفونى نكلم اهله بس ..
سكر تلفون عمى فرج وناض بسرعه يجرى وهنا محمد قاله …
عمى محمد … شن فيه يا فرج شن فى خيره وساااام …
فرج … وسام دار حادت ورفعوه فى لبوسليم ..
محمد … استنا نى طلع معاك ..
سميحه .. ولييييييييييييييييييييييييييييييييييدى وووووه عليا ووووووه … وليدىىىىى مات حد يقوووولى .. حرام عليكم ..
ام نهال …. نهاااااال نوووضى نهاااال … نهااااال … ياسميحه هاتى كلونيه بنت صاخت بسرررررعه …. نهااااال … بنت بتمشى مننا يانهاااااال فيقى …. ووووووووووووووووه عليا وعلى هاليوم الاسود …
جابت سميحه الكولونيه وقعمزة طلطم وتعيط … ومافاتتش 5 دقايق الا وفاقت نهال ودموع على عيونها وقالت خالتهاا ..
نهال …. خالتى وسسسام مات ردى عليييييا … ررررردو عليا خيركم تشبحوووولى …
امها …. مافيشى شى مافيشى شى يابنتى بعون الله ينوض منها ..
سميحه … ماتكدبيشششش على بنت … خديتووووو ولدى منى بكلمه منكم … بس الله لو تصير فى ولدى حاجه مانى ماسامتحتكم ليوووووم دين …
نهال … اااااااااااااااه ياررررب اااااه سيبته فى الوقت الا كان محتاجنى فيه … انى سبب فى موته … ياررررررربى ياربى ماتبعدااااش عليه ياررربى … ياربى انى ماصدقت لقيته يارررررربى …
حناهم …. ناضت من نوم وقالت >> اللطف عيله وخالها ميلاد … خيررررركم شن فى .. خيررررركم تتعياطو زى فراريج ؟؟
نهال … خشت لدارها وسكرت عليها … ومعاش طلعت منها …
وان نهال ردة على عزوز وقالتلها …
ام نهال …. وسام دار حادت … ورفعوه لبوسليم …
حناهم …. سااااااااااااااااام مااااااااااااات ..
ام نهال … اللطف ياربى خيرك يما تتفاولى عليه مازال ماقالونا شى …
حناهم … ووووووووووووه ياربى قتلوك عريس قبوووور ياررررب … ووووووووه مازلت صغير ياااااربى …
ام نهال …. هدى روحك ياسميحه هدى روحك وقولى خير …. خيرناااااا ياااما قولنالك ولد مازال مامت خيرك تموووتى فيه … وشن قتلوك هااااادى …
سميحه …. اى وووووالله لو قتلتوه الا دمه فى رقبتكم … الولد يبى بنت وبنت تبيه … ياسررررركم … بنت صاخت وعندها القلب وقريب مشت فيها … والولد بين حيه وموت … وانتى مازال تقولى منى ؟؟ … حسبى الله وتعم الوكيل بس .. ياررررربى قلبى محروق على ولدى ياررررربى …
فاتت ساعه وراء ساعه …. والكل يستنو على نار والدموع ولا قالت نجف …. والكل يستنى وقلبه على ناااااار ومش عارف وسام مات او مازال عايش ….
بينما الكل واخد تركينه ومقعمز بروحه فى صمت … وحناى تقيد فى الحوال جيهة جدى لا يتفرج على كافرات … ودروحها مره مره تنزل فى دموعها … شرين تلفون سميحه … ناضت سميحه ومسحت دموعها وقالتله …
سميحه … ايوووووووا فررررج طمنى على ولدى ماااااااااااااااااات ؟؟
فرج … لا لا .. الحمد لله رضوض بس فى وجهه وخشمه … ستر ربى تلقاته المخده متع الامان سياره …وحاليا قاعدين يديروله فى الاشاعه باش يطمنو عليه …..
سميحه ….. ووووووووه عليااااا ياوليدى فى شربة ميه قريب رحت فيهااااا …
فرج …. شن بتقعدى تعيطى على تلفون … خلاص وولدك بعون الله صبح نروحو بيه …
سكرت سميحه تلفون وجتها نهال تجرى … وقالتلها …
نهال … << مسحت دموعها >> خالتى شن صار فى وسام ؟؟
خالتها … الحمد لله يابنتى … مافيشى شى فى شوية ضربات على وجهه وجسمه بس .. وهما حاليا يديروله فى باقى كشوفات وكان مافيشى شى صبح يروحو بيه …
غمرت نهال خالتها وقعدو يبكو … وهنا خالتها قعدت تطمن فيها … وتقولها انا رح ينوض ورح يكون نصيبك .. وربى معاكم … وماتستلموش لاول مطب … وكلام خلى نهال تزيد تبكى وتحس بدنب اكتر … بينما امها كانت واقفه وراء الباب وسمعت كل الا نقال …
فاتت ساعه وراء وساعه والحوش فى فى حزن كبير ومافيش حد حط راسه ورقد الا
<< الجد والحنا >> لحد ماشرين الحوش الصبح … وهنا ناضت نهال تجررررى وفتحت الباب ولقت وسام يعكز برجله ومحصل ضربات على خشمه ووجهه وايديه فاقعدت تبكى وتشبحله وولحظه نست انا بوها قدامها …
واول ماققعمزو فى صالون خش عمى محمد باش يغير حوايجه … بينما عمى فرج شبح لسميحه وقاللها ..
فرج … هيا شنى سميحه مازل ؟؟
سميحه … دقيقه بس نلبس عبايتى ونجى ..
ام نهال …. خليكم بالله عندنا اليوم …
فرج … لا لا مره تانيه خلى الولد اليوم يروح ويرتاح … نهال هيا نوضى حناك …
نهال … حاضر خالى ..
خشت نهال نوضت حناها ولبستها فريشتها وطلعت لوسط الحوش .. اما جدها فالبس فرملته وطلع … وقاللهم ..
جدى اسماعيل … ماريتيش نظرتى ياحاجه ؟؟
حناى وريده … تى اطلع يااعمى اطلع … توا وقت نظرتك …
طلعو الكل وكيف وصلو فم الباب … قال عمى محمد لوسام ….
عمى محمد … وسااااام ..
سكت وسام وتلفت وشبحله وقاله …
وسام .. نعم ..
عمى محمد … انى مستعد نرجع فى كلمتى .. بس بشرطين … لو بنت توا قدامى تقول انى نبيه .. اول شى ؟؟
وهنا وسام شبح لنهال والكل قعد يشبحلها .. اما نهال شبحت لوسام بس وقالت ….
نهال …. اى نبيه ..
عمى محمد ….متأكده يابنتى ؟؟
نهال … اى متاكده ..
عمى محمد …. معناها انى موافق وعلى بركة الله بس بشرط ..
عمى فرج ووسام … شنى هوا ؟؟
عمى محمد … عرس بعد شهرين ….
نهال ووسام … بعد شهررررررررررررررررررررين ..
حناهم … رووووووووووووووووووووووووووووووووووووووووووووووووووووووووووووووووووووووووووووى
<< صلو على نبى ياناس صلو عام خطوبه وعام عرااااس صلوووو روووووووووووووووووووووووووووووووووووووووووووووووووووووووووووووووووى …..
<< حناهم … اعطيها اعطيها بنتك راهو خلاص عليها هيا والصوفه المززيه هدا … اخرررر مره شدتيهم تحت دروووووج … ولا تحسابونى نسيت ..
نهال ووسام شبحو لبعضهم …. هههههههههههههههههههههههههههههههههههههههههههههههههههههههههههههههههههههههههههه

هكى انتهت حلقتنا لليوم فى حوش جدى مع نهال ووسام … العرس تحدد …و تجهيز بدى … ومن هنا للجزء تانى … اكيد رح تشوفو نهال ووسام بمواقفهم … ومشاكلهم .. ومطباتهم هلبببببه … نلتقى بيكم قريباااا فى << الجزء التانى من حوش جدى 2 >>> وان شالله ديما على الحب والود ملمومين يارررب 

يتبع ………..

لقراءة الجزء التالي : الجزء السادس عشر من رواية حوش جدي

لقراءة الجزء السابق : الجزء الرابع عشر من رواية حوش جدي

للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا

جميع الحقوق محفوظة للكاتبة كيندا من ليبيا .