وفي الجزء الخامس من رواية بايرة حلتنا دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة مريم أحمد .
الجزء الخامس من رواية بايرة حلتنا
وصلتا البيت لقيت أبوي بس الفي وبحضر في التلفزيون، قلت ليهو يا حاج أمي وين! قال لي حتكون وين يعني ما عند ناس محاسن قلت ليهو فطرتا! قال لي يعني قايلاني ح أستنى حضرتك سيادتك تشرفي من الحوامة عشان تفطريني كان عملت كدة كان الترابة في خمشي قلت ليهو غايتو بيتنا دا الله يطلعني منو
قال لي أمشي من قدامي هسي قطعتي لي الاخبار يقطع راسك يا الهمله، أستغفرت ربي وطلعت الغرفة قلت أمش أدس التوب قبل ما أمي تجي وبعدين بنكرا حطب، مشيت ختيت التوب في سبت الملابس وعملتا رايحة….
يلا هي أصلا الكرامة عاملنها غداء فما مشيت ليهم الا قريب الساعة أتنين، لبست لي عباية ولفحت معاها أقرب طرحة لقيتها ومشيت ليهم، طبعا ناس كلها قاشرة والعجب فلانة لابسة داك يا البنطلون الجينز والبلوزة كيف كيف وطرحة في الاكتاف والشعر كاوينو والمكيب ما يدك الدرب، وانا تحلف تقول المرة المطلقة وشي شدة ما مزيت كان عصرتو بطلع زيت والعجب لوني ضارباهو ليك الشمس وباقي فحمة بس لكن الثقة في الله نجاحالمهم اهم شي كان عندي في الكرامة اني أجي عشان أطق طقة نضيفة وأكل سلطة أسود وأشوفو
بعد ما طقيت تمام مسكت ليك بنات الجلة جت عليهن وونستهن طبعا هن معرسات واحدات حوامل واحدات بي شفعهم الا أنا البايرة القاعدة الفي نصهنيلا عندنا حريم الحلة ثقيلات خلاص ما بمشو من بيت المناسبة لمن تكون غذاء الا العشاء ونحنا طبعا كجزء من حريم الحلة قعدنا برضو معاهم وأتخارجنا بيتنا مع العشاء…
صحيت الصباح بصوت في نص ضهري كالعادة يعني لازم ناس بيتنا يصحوني بعنف وجنهم جن ضهريقمتا وقعدتا في نص السرير لقيتا دي أمي وماسكة المفراكة في يدها، قلت ليها ح تكتلوني يوم بضربكم دة
قالت لي غير أنك نايمة لوقت متاخر شارطة التوب مالك يشرط راسك وكمان داساهو يا قليلة الادب، نطتتا عيوني وقلت ليها انتي عرفتي كيف! قالت لي جيت أطلع الملابس عشان تغسليهم لقيت التوب في نصهن وأنا عارفاهو نضيف وشفتك الصباح لبستيهو قلت ليها وحات الله ما شرطتو قاصدة سكاني على جنووقالت لي بلا على جنووو معاك بلا خرا أنا مش قلت ليك تاني ما تلبسي تيابي الجداد خليتك ليك القدام لكن راسك القوي دة وأدتني ليك فيهو ضربة أنا لمن حسيت نفسي فقدت الذاكرةقالت لي قومي سريع أخدي جلدتك وأمشي غسلي الملابس قلت ليها لالا عليك النبي ما تضربيني والله تاني ما البسنأدتني ليك فت ضربة واحدة خلتني أقوم جري من السرير قالت لي تعالي هنا بالمطلوقة قلت ليها حرام عليك أمبارح ساكيني على جنووو والليلة أنتي ارحموني شويةقالت لي أصلو ما ح أخليك أخير تجي تاخدي جلدتك والا ح أزيدهم ليك عشان تاني ما تفكري تلبسي تيابي، في الاخير أستلمت وجيت وقفت قدامها، رفعت الصوت وضربتني كدي كان باب الشارع يفتح ويجي سليم داخل وعاين لقى أمي رافعة الصوت وبتدق فيني…….
☆☆☆☆☆☆☆☆☆☆
اشوفكم
…
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء السادس من رواية بايرة حلتنا
لقراءة الجزء السابق : الجزء الرابع من رواية بايرة حلتنا
للإطلاع علي فهرس اجزاء الرواية : جميع روابط اجزاء رواية بايرة حلتنا للكاتبة مريم أحمد
جميع الحقوق محفوظة للكاتبة مريم أحمد .
