وفي الجزء الخامس من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .
الجزء الخامس من رواية طبيبة قلبي
عمي خرجوهو من المستشفى وكان معانا في البيت ، وبعد اسبوع كدا بالليل قريب للساعة 12 كدا عمتي مواهب جاتنا وكانت زعلانة زعل هي كبيرة ومتزوجة بس ما عندها اولاد لمن إتخلعنا لمن روقت حبة أبوي وعمي مصطفى سألوها مالك!؟ قالت راجلها طلقها وجاب معاهو البيت مرأة وولدين صغار أولادها وقال لعمتي دي مرتو وإتزوجها قبل تلاتة سنوات وعمتي ما عارفة أي حاجة لأنو ماف زول كلمها وولدت ليهو وهسا طلق عمتي ولمن إتكلمت معاهو طوالي هاج فيها وقال ليها إنتي واحدة عاقر وشؤم عمري كلو ضيعتو معاكي و و و….. سمعها كلام كتير وحار شديد ( في حين إنو عمتي دي وقفت معاهو من الصفر وباعت دهبها وشغلو الماسكو هسا دا بسببها هي وبدايتو بقروشها دعمتو لحدي بقى مرتاح وقبل يتزوجها بشهر بس كان حصل ليهو حادث وإتشلا وبرضو عمتي ما رفضتو وتمو زواجهم وإتنازلت وباعت الوراها والقدامها لحدي إتعالج ورجع تاني يمشي وتعاملها حلو مع كل ناس بيتو) وأمو وأخواتو برضو جو تمو الناقصة عمتي زعلت وجات وقالت لينا أنا ما عندي مشكلة يعرس بس كان يكلمني أشيلها في عيوني والله وماف داعي يسمعني كلام ، أمي قالت ليها ما تزعلي نفسك خليهو بعد الفترة دي كلها هانت عليهو العشرة ، أبوي وعمي مصطفى إتكلموا كدا وقالوا ليها تاني ما بجينا لكن عندنا كلام معاهو ، ، المهم نمنا وعمتي هي صاح زعلت لكن ما بكت ، بالليل زي الساعة 1ونص كدا جاتني صحية كنا نايمين في الغرفة ومعانا امي وسريري قريب ليها زي السمعتا صوتها كدا ولعتا النور وجيت قلتا ليها عمتو مالك!؟ علي صوتي أمي صحت ، كانت زي الما قادرة تتحرك كدا قلتا ليها عمتو!!؟ برضو ، قلبي دقا تالت مرة
__ قلتا ليها عمتو كدي إبتسمي إبتسمت لي نص إبتسامة بس ما إبتسامة كاملة
__قلتا ليها طيب أرفعي يدينك الإتنين برضو ما رفعتهم لي علي إستقامة ، ، ، قلبي بقى بدق شديد
__قلتا ليها عمتو سامعاني!؟ كدي قولي الحمدلله رب العالمين ، قالت لي ا ا الحم حمد ل ل وبقت تتلعثم فيها ، ، ، أنا هنا قابي طار عديل بالخوف
أمي قالت لي كدي هسا زحي لي وبطلي أسئلتك البلا جيها دي و…….. ما إستنيتا كملت جريت بهناك لناس أبوي صحيتو وقلتا ليها أب أبوي عمتو دي لازم نوديها المستشفى ، قال لي بسم الله يا بتي مالك!؟ وعمتك مالها!؟؟ قلتا ليهو ما عارفاها بس ما كويسة أرح نوديها سريع عمي برضو قام جو لينا وتاني أبوي فات لحارنا عندو أمجاد صحاهو وجانا وأخوي هيثم كان مافيش بايت مع ناس حبوبتي( هو أصغر مني في أولى جامعة) ، قبل أركب جريت جوا جبتا معاي ولاعة ودبوس وجيت ركبتا معاهم سريع أنا وأمي قاعدين ورا وعمتي في نصنا بعد عقمتا الدبوس بالولاعة قويت قلبي وبقيت بطعن في أصابع عمتي بالصف وناس أبوي وأمي وعمي يشاكلو فيني دا شنو يابت!!؟؟ و ..و.. قلتا ليهم ما قعد أعمل حاجة غلط قلتا لأمي
__أضغطي براحة علي أصابعها عشان نسرع الدم يطلع ، ، ، المهم لحدي حصلنا المستشفى نفس الكان مرقد فيها عمي ولقينا معظم الدكاترة ماف بس بالعدد البكونو بالليل لقينا دكتور كدا وشكلو زاتو كان طالع بس لمن شافنا وخالتي تعبانة نادى ممرضين وسريع جابو معاهم نقالة والدكتور زاتو رجع مع ناس امي وأبوي وعمي وكان بسأل فيهم من الحصل امي حكت ليهو كل حاجة من صحت لحدي هسا ، وأنا ماشة وراهم ويديني لمن باردات وخايفة وقلبي بضرب بعد مساافة بعد الدكتور شاف الحاصل جاء قال لينا الحمدلله مرت سليمة كان جاياها جلطة والإسعاف العملتو بتكم دا هو الأنقذها قال ليهم ممكن الجلطة تتعرف قبل تلاتة ساعات عن طريق الإسعاف العملتو بتكم دا قال لي يا ريت لو كل الناس عارفين الحاجة دي ماشاء الله عليك ممتازة جدا ( أنا فعلا قريت عنها كان عشان كدا خفتا شدييد لانو عمتي كانت بادية عليها كل الأعراض حقتها ) وباقي ليلنا داك كلو قضيناهو في المستشفى ، ، ، ، ،
__طلعتا لأمي الشاش الفي رأسها بعد كنتا بغيرو ليها كم مرة لأنو بعد دا خلاص بقت تمام الصحة والعافية الحمدلله وبعديها طلعتا مشيت المستشفى ولمن حصلتا اول شيء مشيت لدكتور علي صحبي برضو ومعاي في المستشفى زاتها بس هو دايما ببدأ دوامو متأخر ولكم ساعة بس وخلاص نسبة لإنو بمشي الصباح عندو عيادة في الحلة ، ، مشيت ليهو لأنو أمبارح إتصل علي بعد العشاء بمسافة وقال لي جاي أبيت معاك حرستو كداا ما جاء وتلفونو مغلق ، لمن حصلتو قلتو ليهو يا شراد أمس حارسك لمن شالتني نومة دي مواعيدك ياخ ، ، قعد يضحك قال لي أول شيء صباح النور يا أكرم ههه ( عندو ولد أختو صغير بقول لي أكرم عشان كدا هو بناديني زيو) قال لي والله كنتا طالع عليك لكن جاتني حالة مستعجلة عشان كدا إضطريت ارجع ، ، قلتا ليهو دي حالة شنو البتخليك تقفل تلفونك كمان دي!!! ، ، قال لي لالا تلفوني قفل شحن بس لكن ما دام جبنا سيرة الحالة إنتا عارف الحالة الجاتني حالة جلطة بس الحمدلله والحاجة دي بسطتني جداا عارف ليه!؟ في بت كدا معاهم عملت إسعاف للمريضة قبل الجلطة تتم للنهاية يا ريت لو كل الناس عارفين يسعفو كيف ، كان بننقذ كم روح يااخ والبت كمان شابة ما زولة كبيرة يعني ما أظن بتكون مرت عليها ، ، قلتا ليهو ماشاء الله تبارك الله في ناس فعلا واعية جدا ومتعلمة تمام، ، جاء مريض داخل داير يقابل دكتور علي قمتا وقلتا ليهو خلاص شوف شغلك لمن بعدين وطلعتا مشيت انا كمان لمرضاي بعد فترة جات حالة مستعجلة حادث وحاصل إرتجاج في المخ قلتا للممرضة سوسن سريع معاك الباقين جهزوا لي غرفة العمليات قالت لي كلهم إتوزعو مع الدكاترة ماف غيري قلتا ليها شوفي معاك الممرضة الجديدة الكانت واقفة معاك في المعمل ديك ولااا أي زول ، ، قالت لي بإستغراب ممرضة!!! قلتا ليها طيب الدكتورة الجديدة ال…قاطعتني وقالت لي آااه دي لا ممرضة لا دكتورة دي مرافقة مريض مش قصدك سومة!!؟؟ مافي زول إتعين قريب واصلت كلامها دي بت إتعرفتا عليها بس اليوم داك وإتونسنا سوا…..قاطعنا صوت الممرضة هدى الجات قالت لي دكتور انور طلبتني؟ قلتا ليها ايوا جهزوا لي غرفة العمليات معاك سوسن قالت لي تمام وفاتو ، إتفاجأتا في كلامها قلتا غريبة كل مرة بلقاها بسمعها بتقول إرشادات طبية ، مرقتا ساعتي والخاتم الكنتا لابسو ومشيت علي غرفة العمليات لبستا لبس العمليات ودخلتا بديت العملية ساعة ساعتين لحدي العملية تمت وأسعفنا المريض ومتابعين معاهو اول بأول ، ، ،
بقينا قاعدين مع عمتي في المستشفى إتحسنت شويتين قالت دايرة تمشي البيت وأصرت امي قالت ليها بتطلعي أصبري نشوف كلام الدكتور قالت لي سومة امشي ناديهو لأنو عمتك دي مصرة مشيت ليهو في مكتبو دا ما لقيتو قالوا لي طلع قبل شوية ووصفو لي مكانو مشيت لحدي حصلتا غرفة كدا دخلتها لقيت جواها سوسن الممرضة الكان لاقيتها ديك كانت بتتفحص في الغرفة وأجهزتها من شافتني جات سلمت علي ببشاشة كدا وقالت لي تعالي أدخلي مريضكم بقى كيف؟ قلتا ليها كويس وخرجوهو لكن هسا عمتي مرضت ورقدوها هنا هسا كويسة قالت لي يااا الله سلامتها قلتا ليها الله يسلمك بسأل من دكتور علي عشان متابع معاها قالت لي طلع هسا فات الجناح البهناك أنا زاتي ماشة بهناك ثواني بس أنظم ديل وأمشي معاي ، قلتا ليها تمام وبقيت أعاين في الغرفة والأجهزة الفيها شكلها جديدة ولااا كان فيها مريض ما عارفة لفتني الجهاز البقرو من المؤشرات الحيوية علي شاشة المريض البكون في العناية المركزة بكون جمبو بتعرض الشاشة دي المؤشرات الحيوية لجسمو قلتا ليها سوسن وأنا بعاين للجهاز ، قالت لي أيوا وجات وقفت جمبي ، قلتا ليها مش
__ رسم القلب الكهربائي /ECG/ هو معدل نبضات القلب في الدقيقة ورمزو بكون Pulse أو HR….. ومعدل النبض الطبيعي للكبار من 60 ___100 نبضة و الطبيعي للأطفال حديثي الولادة من 120___170 نبضة
__وقياس ضغط الدم رمزو NIBP أو BP ومعدل الضغط الطبيعي هو 80__120
__وقياس معدل التنفس Respiration Rate
رمزو RR أو Resp والقياس الطبيعي لمعدل التنفس من 12__20 دورة في الدقيقة
__طيب مش دي درجة الحرارة Temperature
رمزهاTemp ودرجة الحرارة الطبيعية للجسم 37
طبعا أنا بتكلم بحماس وإنبساطة قلتا ليها صاح كلامي !!؟؟؟
جانا صوت زول بقول أيوا صاح مية بالمية وجاء وقف جمبي لمن عاينتا ليهو لقيتو دا نفس الزول الكان لاقيتو في المعمل اليوم داك………
هل هي صدفة !!؟
أم القدر الذي يجمعنا كل مرة
يتبع ……..
لقراءة الجزء التالي : الجزء السادس من رواية طبيبة قلبي
لقراءة الجزء السابق : الجزء الرابع من رواية طبيبة قلبي
للإطلاع علي فهرس اجزاء الرواية : رواية طبيبة قلبي ( جميع الاجزاء كاملة ) للكاتبة اسماء محمد
جميع الحقوق محفوظة للكاتبة اسماء محمد .
