الجزء الخامس من رواية قلبي ملكي ولكن أنت من

وخاصة انها معاش لقت شي تقوله .. لجده وحناه وعمامه الا يسألو وينه … واول ماطقت ساعه 7 بزبط … سمعو صوت الباب يطقطق … فاكبهت بسرعه ريحانا تشوف خوها لي مني طلع يفتح في الباب … واول ماشافت الا داخل من الباب غمرتها سعاده ماكانتش متوقعه في يوم انها ممكن تحس بيها اساسا .. وخشت بسرعه لدار للمطبخ … وهنا لقت امها توتي في صفر الشاهي لرجاله … واول ماخشت لقت امها تشبحلها وقالتلها …

حميده … من جي ؟؟

ريحانا … ليت ياماما جي

حميده .. ليت ياماما ههههه دكرتيني بي الدي مضي … الباين مكتوبلنا ناخدو من هالسلاله ههههه زي سنسله وانتي لحقتيني

ريحانا … ماما .. بنسالك ممكن …

امها .. احكي .. نسمع فيك .. مش شرط نشوفلك …

ريحانا … بابا علاش رفض اني نقعمز معاه ونتكلم معاها اقل شي ساعه قبل الفضانيه .. افرض الولد مايبنيش ؟؟

امها .. شن تقولي انتي ؟؟ بطلي عبط هوا في مقابله شرعيه بين البنت وولد عمها ؟؟ هادي تندار لناس برانيه الا مايعرفوش بعض … وبعدين لو مايبيكش .. علاش امه اختارتك انتي دون ناس … تي هوا في في هالزمن راجل يغصبو عليه اهاله ؟؟ وبعدين الولد واضح يحبك وشاريك .. لو تشوفي امه شن كانت تحكيلي عليك مبكري فانحي هالافكار السوده هادي من دماغك بس واستعودي من شيطان …

ريحانا … باهي هوا ماطلبش نقعمزو مع بعض متلا ؟؟ قصدي انتي تعرفي اني في شروط وحاجات نبي نفهمها منه قبل مانتزوجو … واولها ..

وهنا قطعت امها عليها وقالتلها …

امها .. شروط شني ؟؟ الولد متقي ويخاف ربي ومن جامع للحوش .. وامها قالتلي الولد حشومي ورافض حتي يقعمز معاك لين يصير بينكم شي رسمي .. والولد من اول ماعرف ان اهله فاتحوني تحشم حتي يقعد في العماره وبدي يروح يرقد ويطلع طول من الحشم … شن تبي اكتر من هكي ؟؟

ريحانا … بس ياماما افرض في حد …

امها … ريحانا ماتهبلنيش معاك … توا بعد الحب والنظرات والبصات وتقعميز في جنان والسرحان .. واسمه المكتوب في كل كتاباتك طلعتي بتتشرطي ؟؟ انتي مفروض تكوني طايره من الفرحه .. طحتي في راجل من سما هديه طول في عرض في جمال في اخلاق واهل زينة ناس ومنك وفيك وفوق هدا كله فوق ريح ودكتور قد دنيا … الا زيك مفروض تشم وتغم فيه وتكرش فيه بسنونها .. مش بطلع فيه لولا ..

وهنا ريحانا تحمر وجهها وقالت ..

ريحانا .. وانتي شن عرفك بالكلام هوا ؟؟

امها … اي كلام ؟؟

ريحانا .. ماما انتي فاهمه عليا ..

امها .. هههههه مافيش ام ماتعرفش بنتها شن تبي وفاش تفكر … مش يقولولك حاسة الام … خلاص وتوا دورا ربك يرزقك بصغار وتعرفي

ريحانا … ههههه غير مسرع بس رزقتيني بصغار ياررب ..

امها .. اي اتفقت اني ومرة عمك بعد مايروحو تريس بتلبسك دبله .. يعني علي ضيق بما ان العرس الخميس الجاي .. وبكرا باش نطلع اني وياك وناكدو علي حجز الفيلو

ريحانا … خايفه ياماما كل مايقرب موضوع اكتر … حتي صليت استخاره ماارتحتش …

امها .. اكيد بتخافي … بتاخدي صنديد زي هوا وماتخافيش … والله يابنيتي نسمع بي سعد زي الرعد .. لين شفته عندك .. من قال بين يوم وليله بنعطيك وبتمشي وتسيبني .. والله كانا واحد غير ليت .. مااني موافقه وراهو قولت هادم يكروتو في ولدهم اشبح شن فيه وبيغمونا غم … بس لان ليت زي وليدي وربيته علي ايدي ونعرفه ونعرف اهله .. فامش رح نقولك الا انه سعد جاك زي الرعد وبس .. وخلاص بري خليني نكمل الا في ايدي قبل مايجي بوك وياخد مني شاهي …

ريحانا .. ماشي تمام … ماما ملاك وين ؟؟

امها … اعتقد امها نسمع فيها تنادي فيها مبكري .. اسالي مرة عمك تلقيها في دار العربيه ..

ريحانا .. تمام

واول ماطلعت ريحانا لقت ملاك تدور في امها .. واول ماشافت ريحانا قالتلها ..

ملاك … ريحانا ماريتيش ماما ؟؟ ليت يدور فيها .

ريحانا .. اعتقد في دار العربيه ..

ملاك .. تماما ومشت لدار العربيه وطبست كلمت امها في ودنها .. ودورطلعت مريم في دار وركبت فوق … واول ماركبت سكرت الباب وراها وهنا لقت ليت مقعمز يستني فيها علي صالون .. فاقعمزة علي صالون بجنبه بلهفه وقالتله …

امها … ربي هداك ياوليدي ؟؟ ان شالله ربي يكملك بعقلك يارب .. باهي لاش مالا العار من الاول وتبات برا الحوش ..

ليت … << تنهت >> شن مطلوب مني حاليا ؟؟ نمتل دور العريس باهي ؟؟ وشن تاني ؟؟

امه .. مانبيكش تمتل … نبيك تاخدها وانت مقتنع وتحبها .. لانها بتكمل معاك عمرها كله ..

ليت … ههههههه هوا انتم تكدبو الكدبه وتصدقوها ؟؟ لا والله هلبا … نتزوجها غصبن عني باش نرضيكم … وفوق من هدا كله .. نحبها كازوجه .. بالله سؤال .. انتم شن قولتم ليها ؟؟ وكيف خليتوها توافق وتتزوجني قطوس في شكاره ؟؟ ولا ياتري البنت اساسا مشتركه معاكم في الفيلم هوا ..

مريم .. ليت استهدي بالله البنت ماتندري علي شي .. ولولا اكدتلها انك تبيها وتحبها وشاريها ماكانتش وافقت … ورجاله لوطه وخلاص الموضوع تم فا ماتصعبهاش عليا .. واعطي لنفسك فرصه راهو والله البنت تتحب برضي عليك ياولدي خلاص … بعد مايطلعو تريس برا دير دوش وبدب حوايجك وانزل سلم وهدرز وبارك لخطيبتك ولبسها دبله

ليت << بتنهيته يأس >> ان شالله خير ..

مريم … افرد وجهك ولدي وماتخليش ناس نساوين عمامك وحناك يحسو انك ماتبيهاش .. وانزل لوطه وانت مبتسم .. اهو نستني فيك

ليت .. خلاص يما ارحميني بالله عليك وانزلي … ساعه تانيه ونازال ..

امه .. ماشي خلاص ..

ونزلت امها بعد ماحست ان في بدرة امل من ليت وحست في صوته انه لأان وارتخي شوي .. ونزلت لوطه وهيا الابتسامه من هنا لهنا … وبدت تزغرط

واول ماخشت لدار شبحت لي حميده وقالتله ..

مريم … تعرفي ركبتله وقالي شي قولي لمرة عمي اني بنلبس لريحانا دبله … علي قد ماقولتله قالي شي بنلبسهالها اني .. واهو ساعه ونازال …

حميده … ههههههه خليه يلبس .. شن مازال علي العرس اسبوع .. مالا شني بيعشو عمرهم الله ارحم ايام اللاي وريده غمتني بدله واني زي الهبله فرحانه وطايره بس جيل هالوقت يبي كل شي يعيشه بحدافيره وبدماغه هههههه

واول ماسمعت ريحانا الكلام .. طلعت من دار تجري … وخشت لملاك في مطبخ

ريحانا … ملاااااااااك خايفه خايفه … تعاليلي بنموووووت ليت بيلبسلي دبله … خايفه ومرتبكه وبيمسلي ايدي وحرام ومانبيش نغضب ربي ونبيه يلبسني ومش عارفه شي ..

ملاك .. سكري فمك هههه ربي غفور رحيم … وبعدين عرسك الخميس الجاي .. خلاص يعني انتي في حسابنية مرته

ريحانا .. ماكنتش مخططه انه بيلبسني … شن بنلبس ؟؟

ملاك .. تعرفي لما كنا برا … كنا نحضرو في مناسبات في سفاره اعياد رسميه وغير رسميه … فا شاريه قفطاين محجبات يهبلووووو ومعاهم طرحه زي لبس المصريين في حفلاتهم يهبلوووو

ريحانا .. مصحك قصدك ترتر وهكي ؟؟

ملاك .. تي لا لا انتي غيري اركبي نوريهملك واختاري بسرعه ..

ريحانا .. مرات ليت فوق نتحشم تعرفيني ..

ملاك … نخشو لدار علي طول احنا … غير هيا قبل مايشوفنا حد او امك

ريحانا … لا لا مانقدرش نركب .. شن بيقول خفيفه … نزليهم انتي ..

ملاك .. توا اني معقوله بنزلهم كلهم ؟؟ تي هيا تعالي .. نقولك شي … خلي نركب كانا لقيته في داره نقولك تعالي وخشي لداري طول تمام ..

ريحانا .. مش مرتاحه لكن نسايرك وخلاص ..

ملاك .. اوك تمام .. وركبت ملاك … واول ماخشت لشقتهم لقت ليت في حماما يدوش … فا اتصلت بي ريحانا وقالتلها …

ملاك .. اركبي بسرعه في الحمام ..

ريحانا .. اااااااه ماشي

وركبت ريحانا وهيا مش راضيه بس غصبن عنها تتصرف هكي … واول ماركبت مشت تجري ركبت وخشت لدار ملاك … وبدو يطلعو القفطاين واحد ورا واحد … وريحانا تقيس واحد تنحي واحد لحد مااستقرت علي قفطان … وبعدها بدت تقيس في قفطايين العاديات يعني للحفلات نسائيه بس بناء علي اصرار من ملاك … ووهيا تقيس ومنسجمين .. شبحت ملاك لتلفونها فالقاته شحنه بيتم … فاقالتلها …

ملاك … خليك هنا شوي بس .. نجيب شحني من لوطه ونجيك … نلقاك قايسه القفطان هوا …

ريحانا .. مصحك بتخليني بروحي وبتنزلي ..

ملاك .. شن بتاكلك سلعوه .. ننزل للمطبخ ناخد شحن ونجي دقيقه بس وماتخافيش مش رح يخش حد لداري ..

ريحانا … تمام ماتعطليش بس نقتلك ..

ملاك … تمام …

وهنا نزلت ملاك من شقه .. واول ماوصلت للمطبخ .. لقت وائل في مطبخ فا لاارديا لقت عيونها قلوب قلوب وخاصة بعد ماقاللها ..

وائل … انتي ملاك جيتي في وقتك .. جعان ومالحقتش علي عشي .. في شي نتعشاه ؟؟

ملاك … << نست كل الموضيع ومالقتش نفسها الا تقوله >>

ملاك … شن تبي ؟؟ نديرلك شكشوكه

وائل … ااااه عزفتي علي الوتر اني بنوقف علي راسك لين تكمليها .. جعان موت

ملاك … ههههه تمام

وبدت تطيب ونست ريحانا الا تستني فيها امتي تركب بتانيه

اما ريحانه … فا بدي قلبها يقبض فيها لحد ما سمعت حركه بااتجاه غرفة ملاك وهنا ارتاحت لان عرفت ملاك رجعت … واول مانفتح الباب وفي نفس اللحظه الا بينفتح فيها الباب قالت ..

ريحانا .. واخيرااا جيتي يامصيبه وين كنتي ؟؟

وفي اللحظه هيا نفسها … فتح الباب بندفاع وقال ا ..

ليت … قداش مره نقولك معاش تمسي حاجتي بدون … وهنا صدمه …

ريحانا لابسه القفطان وواقفه متجمده من صدمه … وليت لابس روب الحمام وخاش يدور في مشطه متعه … واول ماشافها ارتبك وهرب عليه ضي وقاللها ..

ليت … اسف اسف بجد … وطلع من دار بسرعه …

بينما ريحانا بدو دموع ينزلو منها غصبن عنها .. ومن الخوف انشلت ومعاش عرفت تقول اي حرف … وليت قعد واقف فم الباب بعد ماسكراته في وجهه .. ولا عرف يقدم طالما جاته الفرصه وهيا بروحها ويقوللها كل شي .. ولا عرف يوخر ويرجع لداره …

وفي اللحظه الا كان بيطق علي دار وبيقوللها انه يبي يتكلم معاها في موضوع ظروري قبل مايركب حد … خشت ملاك لشقه وواضح كانت تجري وخايفه … واول ماوصلت وشافت ليت بيطق علي الغرفه … قالتله …

ملاك .. لاااااا استني … ريحانا داخل …

فا تلفت ليت ومشي وسيبها ورجع لداره … بينما ملاك خشت لدار .. وهنا لقت ريحانا تبكي .. وتلبس في وشاحها … واول ماشافتها قالتلها …

ملاك … خيرك تبكي شن في ؟؟

ريحان << ودموع يصبو بعبرتها >> ولا حرف .. اني الغبيه الا وتقت فيك .. بسببك خوك شافني بقفطان ولا روب نوم … بسببك انتي اني نحطيت في موقف عمري مانتخايل اني ننحط فيه …

ملاك … اسفه بجد والله والله نسيت قصدي .. مش عارفه شن نقولك .. غير استني وين ماشيه … والقفطان ؟؟

ريحانا … مانبي منك شي .. شوفي ليت وين وبيننزل …

ملاك .. مافي حد .. انزلي ومش رح نسيبك لين تسامحيني … والله ماقصدت … خلاص سامحيني .. اصلا خلاص بعد بكرا فاتحتكم …

وهنا مسحت دموعها وشبحتلها بصدمه وقالتلها …

ريحانا … من قالك ؟؟

ملاك … وائل كنت اني وياه في مطبخ مبكري هدا علاش عطلت …

ريحانا .. ندله … شفي من في برا بنطلع ..

ملاك … انزلي وسط الحوش فاضي .. والقفطان ..

ريحانا .. قولتلك مانبيشي .. ونزلت …

ملاك … براحتك تاكليها في روحك … شوي ونلحقك نرد القفطاين في مكانهم بس …

واول ماطلعت ريحانا طلعت ملاك من غرفتها وخشت لدار ليت وقالتله …

ملاك … مصحك .. كيف تخش علي البنت هكي ؟؟

ليت …<< بهزوه >> مش بتولي مرتي ؟؟ وانتم تبو هكي ؟؟

ملاك .. شن تقصد ؟؟؟ مافهمت شي .

ليت … مانقصد شي … اطلعي وسكري الباب ملاك وخليني

ملاك … معاش تنهلب علي دار من غير طق اااااها قولتلك ..

ووكيف بتطلع من دار … نادها ليت وقاللها …

ليت … ملااااك .. تعالي .. بنسالك … انتي قريبه من ريحانا هلبا ؟؟

ملاك … اي علاش ؟؟

ليت … مافيش حد في حياتها .. قصدي قبل ماينفتح موضوع خطوبه هيا ؟؟

ملاك … والله شن بنقولك .. هيا كانت ولازالت تحب واحدوالشخص هوا .

وفي اللحظه الا بتكمل فيها جملتها … جاه اتصال ..

ليت .. لحظه بس ..

وشاف لتلفونه .. وهنا شاف حبيبته لارا تتصل .. فاقاللها ..

ليت .. اطلعي شوي ملاك عندي مكالمه مهمه .. وبعدين نكملو حكينا ..

ملاك .. اني بننزل لوطه .. اكيد يستنو فيا … سلام ..

وطلعت بسرعه … وهنا ليت ناض سكر الدار .. وفتح الخط وهوا يولع في دخانه وبعدين فتح روشن وقاللها …

ليت .. اهلين حبيبي .. حتي اني والله استاحشتك هلباااااا

لارا … خيرا صوتك حبيبي ؟؟ متضايق شي ؟؟

ليت … لا لا مافي شي .. شوية مشاكل في حوشنا ..

لارا .. امتي بترجع .. اني معاش قدرة علي بعدك …

ليت .. هانت حبيبي .. شهر بس وناخد من بوي الفلوس الا بنبدو بيهم حياتنا غادي … واول مانوصل غادي رح نتزوجو طول

لارا … امتى حبيبي .. اني نستني في اليوم هوا قداش ليا …

ليت … لحظه بس حبيبي … الباب يطق … ايوااااا ؟؟

ملاك … ليت … ماما قالتلك هيا .. احنا نستنو فيك باش تلبسو دبل

ليت .. ماشي … قولها شوي ونازال ..

وبعدين رجع لتلفونه وقاللها ..

ليت .. اه حبيبي ..

لارا … خيرك في شى ؟؟

ليت .. لا لا مافي شي .. بس عيلتنا ساهره لوطه ويستنو فيا … خلاص نكمل منهم لوطه ونركب نكلمك .. ماترقديش

لارا .. تمام نستني فيك

ليت … سلام حبيبي

لارا .. سلام

وحط ليت تلفون علي سرير وحط ايديه علي راسه .. وهوا يحاول يستوعب تلخبيطه اهيا كلها وكلام معتصم ليه .. والباين ان اهله ماخلولاش خيار تاني … وهنا تنهت بالقوه … وطفي دخانه في طبله وناض وطلع من داره ونزل …

واول مانزل .. لقي الرجاله كلهم في مربوعه … ونساوين كلهم في دار العربيه … فا احمح باش يسمعوه وهوا خاش …

وهنا طلعتله امه وقالتله …

مريم … خش خطيبتك تستني فيك ..

ليت .. بنلبسها وبنطلع طول … ماتطلبيش مني اكتر من هكي …

مريم … ياودي خش وافرد هالوجه واسكت …

وخش وسلم علي حناه ونساوين عمامه وامه مدتله باكو الخواتم .. ولبسو لبعضهم دبل … وهوا يحاول يشبحلها .. لعلها تفهم الكلام الا يحاول يعبر بيع في عيونه .. بس ريحانا حشمتها غلبتها وماقدرتش حتي تقيم عينها فيه … واول مالبسها .. طلع طول من الدار ومشي للمربوعه مع تريس … واول ماوصل للباب وكان بيخش .. تلقي صدمه من حديتهم مع بعض .. لما سمع ان الفاتحه بتنقرب بعد بكري …. وان خلاص … انتهي موضع وانحسم … وامحط في الامر الواقع … وفي اللحظه الا كان بيولي وبيرجع فوق … تلقاه وائل من ورا ظهره ودفه للمربوعه وقاله …

وائل … شني ياعريس .. بتهرب .. ولا متحشم .. خش خش خلي ندرهولك كبدك شوي ونباركولك هههههههه

خش ليت وهوا يحاول يطصنع الابتسامه المرسومه بخنجر مرشوق في صدره رشق …

وفاتت الليله والكل فرحان .. ماعاد ليت .. الا اسودت الدنيا في عينه … وريحانا الا كان قلبها مقبوض … وفي نفس الوقت فرحانا بالدبله والفاتحه الا بتنقرا من اكتر شخص تمناته في حياتها …

وبعد هادي الليله تحديدا .. بدت تتجنب تكون في مكان تحس ان ليت فيه … وليت كان يتعمد يكون في مكان الا هيا فيه لعله يلقي فرصه ويقوللها علي حقيقة مشاعره اتجاهها قبل مايطيح الفاس في راس … ولكن … كانت ساعات تفوت بسرعه لحد ماجت الساعه الا نكتبت فيها فاتحتهم … واصبحت زوجته علي الاوراق رسميه … بدون اي فرصة اخري لنجات … وماكانش يسمع بعدها الا في اصوات الزغاريط والتجهيزات .. فا من لحظة مااصبحت نقرت فاتحتهم … ششبه اختفي من الحوش وبدي معاش يروح الا باش يرقد بس .. وفات اليوم ورا اليوم وتعلقت الاضواء وانتصبت الخيمه .. وجي اليوم الا كانت ريحان تستني فيه بتانيه باللحظات من سعاده والخوف وكل المشاعر المختلطه …

ريحانا … خلاص اني قلبي بيوقف … وحاسه روحي بنبكي …

ملاك … هههههه شن بتبكي … مكياجك يسيح يامهبوله .. وبعدين الناس في صاله يستنو .. وليت نفس الشي … يعني جمهور كله ينتظر في خضرة جناب الاميره امتي تطلع من الموزين ويشوفو البرنسس كيف بتطلع جميله .. مش المكياج سايح علي خاطر شوية دراما ..

ريحانا … سكري فمك .. وشوفي وائل وصل ولا لا ؟؟

ملاك … تلفونك يرن شكله وصل البسي كابك بسرعه ..

ولبستها كابها ونزلو من الميزن وركبو لسياره والكل يستني فيهم والزغاريط تتعالي علي احر من الجمر …

وبعد اقل من ساعه وصلو لصاله وخشت العروس<3

رووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووي …

الف صلاة وسلام عليك ياحبيب الله محمد ….

روووووووووووووووووووووووووووووووووووووووووووووووووووووووووووووووووووووووووووووووووووي …

يتبع……….

لقراءة الجزء التالي : الجزء السادس من رواية قلبي ملكي ولكن أنت من

لقراءة الجزء السابق : الجزء الرابع من رواية قلبي ملكي ولكن أنت من

للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا

جميع الحقوق محفوظة للكاتبة كيندا .