لنكمل سلسلة الجمال والروعة في رواية حالة حب في هذا الجزء منها، حيث سنري الكثير من الأحداث الجميلة التي نسجتها الكاتبة بكل روعة ولا مثيل لها، هل أنت متشوق للقراءة ؟ أنا كذلك ، هيا بنا لنبدأ الإطلاع علي تفاصيل الجزء سوياً في السطور التالية .
الجزء الرابع من رواية حالة حب للكاتبة لوزة ليبية
[خلي نتصل بحاتم ونقوله على مبلغ الفلوس … ] جمانة – السﻻم عليكمحاتم – وعليكم السﻻم … مش فاصي انا توا
جمانة – باهي بنقولك حاجة عسريع
حاتم – نعم قولي
جمانة – اممم لكن مانبيكش تفهمني غلط
حاتم – باه
جمانة – اونه زي ماتعرف ان محمد خوي الله يرحمه خﻻنا ورثة
حاتم – ايه قتيلي عليها 200 دينار واﻻه
[حي نسيت اني كادبة عليه ] جمانة – ﻻﻻ طلعوا مش 200
حاتم – اماﻻ كم
جمانة – خمسة
حاتم – مية ؟
جمانة – ﻻف
حاتم – خم خمسة ﻻااااف
جمانة – اي
حاتم – الله يبارك
جمانة – يبارك فيك ياروحي
حاتم – وشن مفكرة بديري بيهم ماتقوليش بتات و ارواب بيلبسهم الدوﻻب واماعين واطقم شي ذهبي شي فضي و في النهاية دحي مقلي واﻻ وقجدر زايدات بينحطوا في دار الخزين
جمانة – هههه غير استنى حبيبي خليني نتكلم
حاتم – ماهو نبيك اديري بيهم حاجة مقومة نستفيدوا منها القدام
جمانة – انا مفكرة بنعطيهملك اتم بيهم حوشك شن رايك
حاتم – اممممم ﻻﻻ مانقدرش ناخدهم منك
جمانة – غير هيا حبيبي
حاتم – ﻻ هدا ورثك
جمانة – انا وانت واحد وهدا حوشنا نبنوه طوبة طوبة
حاتم – اسمعي انا توا مش فاضي تو نهدرزوا فيه موضوع
جمانة – باهي ياعمري رد بال…
[سكر عليا … بكل هالولد ديما وهوا معاه صحابه]
~~~
خ بدرية – بتباتو معاي واﻻه
قمر – اي انا قالي حمودة باتي وخليك مع وخيك
نسمة – كﻻ انا مانقدرش يمة الصغار مخليتهم في الحوش بروحهم
خ بدرية – وجبتيهم عاد
نسمة – وين يمى سﻻمتهم غير دوشة وخﻻص
وردة – انا عندي امتحانات يمة صعب نقد قالي رجب تو انجيك مع ساعة 12 هكي
خ بدرية – وانتي يا زهرة
زهرة – تو نقعد به
خ بدرية – باهي زويز بيقعدو نهاري وكان تنوض عليه الحالة نقعد نتجارى انا وياه
زهرة – مسيكين والله وجعني ووجعتني ريفاء
قمر – استغفر الله ياربي مش مستريحتلها من امتى… وزيدي اخر حلمة حلمة بيها قلبي انقبض منها
خ بدرية – الله يرحمها هيا في دار الحق توا
قمر – الله يرحمها
نسمة – جاني فضول نعرف شن حلمتي
( وردة و زهرة وقمر ونسمة هما خوات شمسي قمر اكبر منه بعام ونسمة اصغر من شمسي بعامين ووردة وزهرة في سبعينات )
قمر – حلمت قتله شمسي انا نبيك لكن انا نبيك تبنيلي قصر هدا شرطي بش نتجوزك
وردة – ريتي واﻻه
خ بدرية – قصر مرة واحدة …
زهرة – والله غير شمسي بس يبيها كان هدا وﻻ انفكر اني مشيت وخطبتها انا وامي
خ بدرية – انسي يازهرة انسي
زهرة اتربعت وقالت – وين ننسى بالله …اختها هالمنيرة سحنتلي كبدي
وردة – وامها اماﻻ
خ بدرية – غيرو الموضوع انتي وياها خير ماينوض ويسمعكم يدير فينا حالة
قمر – غير ان شاء الله يرجعله صوته بس
خ بدرية – ان شاء الله يارب … كبيدتي مسحونة عليه يميمتي شبيب احححح ياحسرتي
وردة – الصبر يمة وتو يولي صوته غير هرب من الصدمة بس
خ بدرية – اخ اخ… اشفيه ياربي اشفيه ورجعه زي ماكان
~~~
عفاف – حي ياناري بيسيبها
خ نعيمة – مسكينة وجعتني
ع علي – انتو ديما اتجوا مع المرا شوفوا شن دارتله
نورة – يابوي شن فيها كان تعلمت السواقة
ع علي – تي اتقوله تم مش حنتتعلم ومش حناخد سيارة الراجل يطمن يسافر ووفت يولي يلقاها اتفن
عفاف – هوا متخلف
ع علي – بغض النظر طالما وعداته توفي بوعدها وكانا عارفة روحها مش قد وعدها ماتوعدش
عفاف – ف هادي عندك الحق
ع علي – ريتي كيف
عفاف – ريت ياكبدي ريت …
خ نعيمة انحنت راسها لعمك علي وقتله – نجيبلك شوية مكسرات
ع علي – اي عادي جيبي
خ نعيمة – نوضي اجمنو جيبي طشة مكسرات
جمانة – ههههههه اما انتي قوسطو عليك يمى
خ نعيمة – عﻻش شن شابحتيني نقرقزلك واﻻ شنو
جمانة – زعميتك اتقولي لبوي انجيبلك ومش عارف شن هوا بعدين تنخصي واحد منا
ع علي – ههههههه
خ نعيمة – اشبح كيف يضحك ! معناها فخاطرك اتقولها الكلمة وجت ع لسان بنتك
ع علي – الحق قلتها ههههه
جمانة – هههههه
خ نعيمة – باهي به نوضي ياحلوفة ديري اللي قتلك عليه فيسع
جمانة – هههه باهي هي
نورة – هاه
جمانة – وين المكسرااات
نورة – في دوﻻب اﻻخير في برطمانة الحمرا …لقيتيها
جمانة – لقيتها اي
[هبا نحطلهم مكسرات و نمشي نتصل بيه بالك يرد ويكون فاضي ]
خ نعيمة – هاتي الصفرة جاي
جمانة – اه خودي هي …
خ نعيمة – تعالي اهنا وين ماشية مسلسل التاني قريب يبدى
جمانة – راسي يوجع فيا بناخد بنادول ونرتاح شوي
خ نعيمة – باهي به
~~~
خشت لدارها واتصلت بعمك حاتم وحاتم وﻻ هنا وﻻ فكر انه يرد عليها … يلعب في الكارطة مع جماعته
…
فاق شمسي وكان حالته متكدرة حاولت تواسيه قمر وتهون عليه همه ونسمة تساعد فيها لكن شمسي مايسمعش فيهم شن يقولوا من اﻻساس كل تفكيره مشتت ويشوف في ريفاء مرمية في حجره وسايحة في دمها …
*انقضى اسبوع على وفاة ريفاء … وكان في كل يوم ﻻزم شمسي يمشي للنقبرة رافع معاه وردة ويقعمز شي نص ساعة ويروح … ام جمانة فحاتم مايحكيش معاها يتحجج بالظروف … وفي ثامن يوم من وفاة ريفاء
منيرة – والله استفقدتها ياحاتم انحس في حاجة ناقصتني …
حاتم – الله غالب ربي يصبرك ان شاء الله
منيرة – ان شاء الله … حق كيف حال خطيبتك مقصوفة الرقبة
حاتم – ماشي حالها شادتها ف جرتي اتصاﻻت
منيرة – كان تجي قدامي بس نطربقلها رقبتها ع سطاش
حاتم – هههههه
منيرة – والله بجد
حاتم – هاه دكرتيها اتصلت
منيرة – هات نرد عليها
حاتم – ﻻﻻ فوتيها
منيرة – غير هات هات ع اساس خالتك
حاتم – باهي لكن مش تقوليلها حبيبته نهارك بعدين
منيرة – اطمن غير هات
حاتم – هاك اه
منيرة – الو
جمانة عﻻمات استغراب ع صوتها قالت – ايوه مني معاي
منيرة – انتي منو
جمانة استغربت لدرجة شكت في نفسها – تلفون حاتم هدا واﻻ
منيرة – ان شاء الله ايه من انتي
جمانة – انا خطيبته انتي اللي منو
منيرة – حي عليا طلع خاطب من ورااااااي
جمانة – شن اتقولي ومن انتي اصﻻ
*حاتم حاط ايده ع فمه وخشمه يبي يضحك وشاد ضحكته *
منيرة – تي انا عيونه وقلبه وجنونه
* قرص حاتم منيرة *
جمانة – والله ؟؟؟ حاتم خطيبي ويحبني
طلعت لسانها منيرة متع ياغبية وقتلها – اطمني اطمني انا خالته برنية ياحنة ههههه
جمانة ارتاحت شوي وقالت – هههه اهلين بيك
منيرة – خلعتك واﻻه
جمانة – اي الحق انخلعت قلت اللطف من هيا هادي
منيرة – اممم باهي …اسمعي هوا طالع وناسي تلفونه تو وقت ايروح نقوله كلماتك جمانة
جمانة – باهي سلمي عالعويلة
منيرة – بسﻻمة …
حاتم – هههه بليدة البنت قريب قلبها طاح
منيرة – تستاهل هههه
حاتم – تعرفي كله كله تكلم فيا هكي تبي تعطيني ورثها
منيرة – عندها ورث قصدك o_O
حاتم – اي من خوها في جو خمسة ﻻف
منيرة ضرباته على كتفه وقتله – تي خود منها ياغبو
حاتم – تي تبيني نكمل بيه الحوش بش تقولي سبلتك ونحيتها هيا دير العرس
منيرة – تي خودهم وخﻻص مش شرط تتجوزها
حاتم – تي كيف مش شرط شن لنقول ل اماليها خديت فلوسها ومانبيش نتجوزها
منيرة – اممممم ماه انت شوف بتعطيك الفلوس بعلم اماليها واﻻ ﻻ
حاتم – اه قصدك كان بعلم اماليها انفوت … وكان من وراء اماليها ناخد
منيرة – بالزبططططط يافاهمني حبيبي انت
حاتم – استني تو نتصل نسئلها
منيرة – اتصل هي …..
عفاف – باهي طلعت خالته كانه مقعمز موعد راني عفست ع رقبته
نورة – وكان هدا عطيته طريحة
جمانة – بجديات لين قلبي طاح ههههه تعرفوا فاش خاطري
نورة – فاش
عفاف – شنو
جمانة خاطري نسافر لجزر المالديف بنموت عليها
نورة – ههههههه من سمعك ارقدي ارقدي
عفاف – هههه كل مرة يخطر عليك خاطر انتي
[اياودي انحس ان حاتم بدي يتجاهل فيا ع خاطر عرضت عليه مبلغ فلوس خﻻص كان اتصل معش بنجيب سيرة بكل ]
نورة – حقااااا ريتي محقرها امنة بنت خليل
عفاف – خيرهاااا
جمانة – اس اس يابنات … حاتم يتصل
عفاف – به بري اطلعي لبلكونة مانيش نايضة انا
نورة – وﻻ انا
جمانة – به به اهو طالعة ……………. السﻻم عليكم
حاتم – وعليكم السﻻم …كيف الحال
نورة – الحمدلله تسلم بخير كيفك انت
حاتم – الحمدلله ماشية اموري..
جمانة – تعرف
حاتم – شنو
جمانة – قلبي اقريب طاااااااح لما ردت عليا خالتك
حاتم – عﻻش خيرها خالتي مش عاجباتك واﻻ غولة بتاكلك
جمانة – ههههه تي ﻻﻻ قتلي انا حبيبته ونور عيونه خلعتني
حاتم ابتسم وشبح ل منيرة وقال – فعﻻ هيا حبيبتي ونور عيوني …
*عطاته منيرة بوسة في الهواء *
جمانة – هههه اياااح
حاتم – اي خالتي هادي اتعز عليا من دون خﻻاتي كلهم ليها محبة خاصة سبحان الله
جمانة – ربي يدوم بينكم المحبة والود
*قامت يديها منيرة وقالت بهمس – يارب
حاتم – ان شاء الله اي …. تعرفي متنكد للعشرة ﻻف
جمانة – عﻻش
حاتم – متزرط في فلوس ومعاشات شي وانا كبرت ونبي نتجوز خﻻص نستنى امتى نكون معاك
جمانة ابتسمت وقتله – ان شاء البه ربي يسهل الحال
حاتم – ان شاء الله … غير كان يوافقولي عالسلفة متع المصرف بس تي طبق نتجوزك
*ضحكت منيره وغمت ضحكتها بالوشاح *
حاتم بيغطي الموقف من قبل ماجمانة تسئل هدا شنو فقال – تي كس كس … كس … بكل هالقاطاطيس هادو مايخلوش من ينسجم في الهدرزة
جمانة – ريت حتى قطاطيس حاسدينا هههه
حاتم – هههه ….. افففف …. هووووف استغفر الله ياربي
جمانة – خيرك اتنفخ ياروحي
حاتم – ماه قتلك هالمعاشات الغبر هادو
[زعنا انقوله ع الفلوس بالك يزعل…. خلي انقوله وخﻻص ]
جمانة – باهي اهو قتلك نعطيك الفلوس اتكمل بيهم اللي ناقصك
* صفقت منيرة بشوية وهيا فرحانة
حاتم – ﻻﻻ هادو فلوسك
جمانة – غير خود بس ومايهمكش انا وانت واحد
حاتم – تي ماهو بنقعد ف موقف قدام اماليك خدي منها فلوس اخيه اللقطة
جمانة – تعرف حتى خواتي نورة وعفاف ماقتلهمش هالموضوع مايعرفش بيه اﻻ الله وانا وانت وبس
حاتم – زعما جمنونة ؟
جمانة – اي ياروحي … الله قداش ليك ماقتليش جمنونة ..
حاتم – هههه غير مضايق فترة اللي فاتت
جمانة – استحشت بداية خطوبتنا لما نسمن اتقولي سفنزتي … و دبدوتي … استحشت لما تبعتلي مسجات مهبولتي شن ادير توا ؟؟
* هزت راسها منيرة وقرصاته من يده *
حاتم – هههه ايه …به قوليلي توا كيف بنديرو يعني انتي تجيبيهنلي الفلوس
جمانة – ﻻﻻ نكتبلك شيكين بالتوقيع كل شيك 2500 ومعاهم نعطيك بطاقتي شخصية وانت بعدين اسحب
حاتم – لكن مش هاين عليا ناخد منك
جمانة – ماتفكرش هلبا انا وانت واحد وفلوسنا واحدة
حاتم – تم ياروحي …
ابتسم حاتم وابتسمت منيرة ابتسامات مكر
جمانة – خﻻص حبيبي غدوة نتﻻقوا وقت بنمشي انا ونورة لسوق ونمدلك الشيكات في مدكر صغيرونة
حاتم – تم حبيبي … اسمعي جوني الشباب يﻻ نتﻻقوا غدوة
جمانة – اوكي بيبي سﻻم …
[يس واخيرا واااافق الحمدلله ياربي]
* طبعا الموقف واقعي ان الشاب ضحك ع البنت هكي… وخدالها فلوسه … وهلبا صايرة في ليببا ماتستغبروش كثروا هلبا هكي
طبعا شموسة خش في حالة نفسية حادة حتى كﻻم بينه وبين نفسه معش يفكر …وصايرة فيه البهادل ﻻ طلعة وﻻ خشة يرقد بكوابيس ويفيق بيهم …فيقعد مرات معتز يبات معاه بش يهديه وشمسي الدمعة مافارقتش خده
نهائي …
عفاف – ها ياحظي شن قالك
لين جاية مبتسمة هكي
جمانة – قالي كلمات حلوة …. وحسيته رجع زي قبل وقالي انه فترة اللي فاتت كان مضايق
عفاف – باهي المضايق يقول مش يقعد هكي
جمانة – يﻻ المهم رجع كيف ماكان ..وفوق منها غدوة بنتﻻقوا
نورة – طيب فيه استاحشك وقرر يدير موعد
عفاف – اي ووين بتتﻻقوا
جمانة – في السوق كان سخر ربي نورة – باهي كويس
~~~
في الليل متاخر بعد ماتاكدت جمانة ان الكل رقد … كتبت زوز الشيكات ووقعتهم … وحطتهم في مدكر ورقدت …. على ثاني يوم الصبح اول من فاق وهيا فرحانة انها بتتلقى مع حبيبها حاتم … بعتتلها مسجات انها عالساعة 12 بتطلع للمحﻻت …. وقعدت تستنى غير امتى اتجي ساعة 11:30 بش تطلع هيا ونورة … لبست وتأنقت وطلعوا …لاقاها حاتم سلم وهدرز شوي وبمجرد مامدتله المدكرة استئذن منها ع اساس ان بيرفع امه لحالة وفاة … مشي دعس سحب المبلغ بشيك اﻻول بعدين دار دورة ورجع سحب بشيك الثاني وقاللها انه سحب المبلغ ….
بعد هالموقف بيوم سافر بو جمانة لدبي بش بيشتغل وبيقعد سبعة شهور ماان سمع حاتم ان بوها سافر سكر نقالاته وفاتها اسبوع اسبوعين لين طق شهر . وجمانة دابحة نفسها بكي المشكلة انها تتصل بامه وامه ترد عادي وكل مرة اتحط عذر لولدها اللي مايبيش يكلم جمانة …. الى ان ..
حاتم – يمى انا سكرت راسي راهو
امه – غير زيد فكر
حاتم – فكرت انتي اللي اتعشمي في البنت انا معش نبيها وتم اتصلي بيها وقوليلها حتى حاجات البيان اللي رفعتهملها تاخدهم مانبيهمش
امه – باهي متاكد
حاتم – متاكد مية في المية
امه – به اهو بنتصل ب امها ……. ….ايوووه مرحبا نعيمة
خ نعيمة – مرحبتين بيك كيف الحال
ام حاتم – الحمدلله بخير كيف حالك انتي
خ نعيمة – الحمدوله بخير كيف حال حاتم
ام حاتم – ااا … شن بنقولك
خ نعيمة – انعم
ام حاتم – راهو حاتم يبي يفسخ من بنتكم … الله غالب مافيش نصيب
خ نعيمة – اللطف
ام حاتم – قد مادرت فيه وشي يبي يفسخ
خ نعيمة – عﻻش شن شاف مننا
ام حاتم – كل خير انتة عيلة مشاء الله لكن الله غالب مافيش نصيب … سﻻمات
خ نعيمة – سليمتكم … سﻻمات
عفاف – شن فيه يمة
خ نعيمة بكل اسف قالت – حاتم فسخ من اختك
عفاف – انهاره اكحل
خ نعيمة – كيف بنقولها توا
عفاف اضايقت ووجعتها اختها وقال – خليك تو نقوللها انا
خ نعيمة – به بري
خشت عفاف ع جمانة المتكية ومهمومة وقعمزت جنبها وقتلها – وخيتي
جمانة – شنو
عفاف – كل شي قسمة ونصيب وانتي راضية بكتبة ربي
جمانة – ونعم بالله لكن ع شنو
عفاف – اتصلت ام حاتم و…
جمانة انخلعت قعمزت وقالت – شنو خيره حاتم اتكلمي
عفاف – امه اتصلت و قالت حاتم فسخ من بنتكم
جمانة -ش شنو …
* شدت راسها جمانة بطروف صوابعها وساخت *
بعد هالموقف جمانة خشت في حالة ننفسية زيها زي شمسي ….وزي مايقولوا ضربتين عالراس توجع ضربة فسخت خطيبها اللي اتحبه وضربة فلوسها اللي مشو هباء منثورا ….
فاتت عدة ايام. … كانت سودة على جمانة نوم مافيش ماكلة ماتاكلش قليل النادر تتكلم وديما مسبوها وتبكي وتكلم في روحها …
بعد شهر قطع عمله بوها ورجع ل الحوش ايشوف في بنته زي الوردة الرامضة والدابلة لين ولت زي الخيط … جابلها شيخ يقرا عليها بالك حالها يتحسن … طلعها سفرها وهيا ترحي في روحها ع ان حاتم ضحك عليها …مااقدرتش تقول لخواته وﻻ لبوها …
معتز – اسمع انا خديتلك اجازة من غير مرتب ياشمسي خمسة شهور..ﻻن . فاتوا شهر ونص وانت نادوامتش …مشي دارولك انقطاع فوضحتلهم السبب
هز راسه شمسي بالموافقة وسرح زي العادة ….
~
عمك علي مستاجع على بنته لين بدي يبكي وقال – يابنتي ياسرك من اللي ديري فيه في روحك والله قطعتيلي قلبي … وين اجمنو بنتي اللي ديما تضحك ونفرح وين نشوف غمازتها
شبحتله جمانة وهيا تبكي وخدودها ملينات دموع …. نطت في حجره وقعدت تبكي وتقول مقهووورة … مقهورة انا بنموت من قهري… بنمووت يابوي بنموت
ع علي – معش تقولي هكي انتي قاعدة صغيرة وهلبا يتمنوك
[ياريته هكي وبس ضحك عليا كﻻني في فلوسي يابوي …. سامحني]
فاتوا اربعة شهور ونص وحوش شمسي منكد وحوش جمانة منكد
خ نعيمة – علي … خلي البنت تخدم بالك يولي حالها باهي
ع علي – زعما
خ نعيمة – اي حتى تخدم شهير
ع علي – اهو سفرتها وحالها ماتغيرش
خ نعيمة – غير خليها انت شهر بس تخدم خليها تفرح ونفرحوا معاها
ع علي – ان شاء الله به … تو نكلم صاحبي في المطار يوظفها ويخليها تحت عينه
خ نعيمة – به تمام
* بعد اسبوع
( ههههه اكيد ﻻحظوتني نجري في اﻻحداث انتو تستنوا وانا نبي نوصل للموقف اللي نبيه وفي نفس الوقت مانبيش نعطل عليكم ساعة توا 3:44 )
معتز عبر الفايبر >> غدوة عمل بنمر عليك مع ساعة 9 ياشمسي
شمسي >> ان شاء الله
ع علي شاد في يده بدلة خش ع دار بناته وقال – اجمنو … هادي بدلة شنوووو
نورة – حي بدلة مضيفة
عفاف – محﻻها يابوي
جمانة قامت راسها وقالت – لشنو بوي
ع علي – ليك انتي غدوة اول رحلة ليك يابنتي
عفاف – كيف ؟
ع علي – من اسبوع فات … قدمتلها ع عمل في المطار … و عندي معرفة فيه وافقولي وغدوة اول يوم عمل ليك رحلتك عال 9:30 لمدينة بنغازي هههه طبعا قتلهم خلولها كل الرحﻻت محلية في ليبيا بس
نزلت راسها جمانة ماحستش بفرحة قوية
ع علي – شنو مش فرحانة
عفاف – خليها عليا يابوي تم وغدوة تلقاها واتية بش ترفعها
ع علي – ان شاء الله …
* حط عمك علي البدلة وطلع من الدار ….
وتﻻقوا عليها خواتها ….كلمة من نورة وكلمة من عفاف لين ابتسمت جمانة … وتتلها نورة شنطة صعيرونة فيها حاجات بسيطة بحكم السفرة في ليبيا …
فرحت جمانة نوعا ما …
وعلى ثاني يوم فاق شمسي حلق وخدي دوش ولبس لبسة الكابتن ووتى روحه ويستنى في معتز
فيقت عفاف جمانة ووتتها ولبست جمانة بدلة المضيفةالحمراء الحلوة وسلمت ع عيلتها كلها وطلع بيها عمك علي
في نفس الوقت خطم معتز على شمسي وماشي بيه للمطار ….
وصل شمسي قبل جمانة … وعلى اول كرسي قعمز وحط ايده على خده
معتز – اسمع انا كلمتهم انك حتطلع رحﻻت كمساعد طبعا ف اﻻول ماوافقوش لكن بعدين وافقوا
هز راسه شمسي اوكي …
فجاة خشت جمانة هيا وبوها متجهين لجيهة اﻻدارة …
لمحها شمسي ونزل راسه بعدين قام راسه بسرعة وقف وقال بصوت خافت – ريفاء ….
يتبع…….
لقراءة الجزء التالي : الجزء الخامس من رواية حالة حب للكاتبة لوزة ليبية
لقراءة الجزء السابق : الجزء الثالث من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
