الجزء

الجزء الرابع من رواية طبيبة قلبي

الجزء الرابع من رواية طبيبة قلبي

وفي الجزء الرابع من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .

الجزء الرابع من رواية طبيبة قلبي

شلتا تقارير الفحوصات حقت أمي والحمدلله كلهااا طلعت سليمة والضربة الفي رأسها ما شديدة الحمدلله وكم يوم كدا نطلعها من المستشفى كنتا بداوم عادي في المستشفى وكل مرة بمشي أطمن عليها معاها عمتي وحبوبتي وأبوي بمشي وبجي ليهم تالت يوم قريب للمغرب مشيت عشان بعد دا حأودي ناس أمي البيت وفي أثناء ماشي ليهم لاقني عم أحمد طوالي بجي المستشفى دي لو في زول عيان من ناس بيتهم قال لي أووو دكتور أنور يااخ أخبارك وصحتك قلتا ليهو بخير الحمدلله والله يا عم وإنتا صحتك كيف قال لي جري شديد في الدنيا دي بس نقول الحمدلله هسا جيت مع ولدي عندو ملاريا ادوهو علاج الملاريا لكن ما إتحسن والله وجبناهو راجع تاني كان شايل ليهو كيس صغير كدا فيهو أدوية وحبوب قال لي دي العلاجات الأدوها ليهو قلتا ليهو طيب وين أوراق الفحص الهسا أدوك ليها؟ قال لي قاعدة دقيقة أجيبها ليك مع أمو هنا قلتا ليهو كويس إتحرك يجيبها وأنا مسكتا الأدوية الفي يدي ومشيت طرف كدا وبقيت أشوف فيها ، جات بت مارة جمبي لمن فاتت مني شوية قالت ، ، ،هي كيفك يا بت كلامك طلع صاح أمي عندها مشكلة في الشرايين ولااا شنو ما بعرف كدا الدكتور قال لينا كلام كتير غايتو لكن عرفتي كيف إنتي!؟؟ سمعتا التانية ضحكت وقالت ليها، ، ، ،
__شفتي القوس الفي الأظافر دا لو كان لونو أبيض وواضح دا معناهو إن صحتك كويسة ، ولو كان باهت وضعيف العكس
__أما لو كان لونو بميل للأزرق دا بعني دليل علي وجود مرض السكري
__أما لو أحمر بدل علي أمراض القلب والشرايين
__يلا لو كان أصفر دا معناهو في وجود فطريات في الأظافر
__ولو بقى أسود بدل علي تسمم المعادن او تسمم ناتج من المخدرات
__والحجم حقو لو ضئيل أو ما بظهر دا نقص فيتامين ب
وأمك أظافرها كانت زي محمرة كدا
البت قالت ليها عشان كدا الدكتور قال ليها كدي أشوف أظافرك ، طلعتي خطيرة يا بت ماشاء الله ، امي هسا كويسة الحمدلله أدوها علاجات وحاجات المهم هسا الحمدلله

طبعا أنا كنتا مركز في كلامهم كويس لكن ما شايفهم لأنو مقبل عكسهم وهم كانوا وراي بمسافة ، قطع تفكيري صوت عم أحمد الجاء وإتلفتا عليهو شفتا البت البتتكلم دي وكانت نفس اللاقيتها في المعمل اليوم داك لكن هسا هي ما شافتني ، عم أحمد جاب لي الأوراق وجاب معاهو مرتو ولدو مشيت شفتا الحاصل معاهو وفعلا كان عندو ملاريا والمفترض دي العلاجات اليأخدها لكن لييه هو ما إتحسن!! قمتا قلتا ليهو تعال يا..!؟؟ إسمك منو إنتا؟؟ قال لي عمر قلتا ليهو يلا يا عمر إنتا ما عاوز تبقى كويس؟ وترجع تلعب مع أصحابك بكل نشاط قال لي ااي عايز ، قلتا ليهو طيب وريني بصراحة وبدون كذب إنتا إنتا قعد تأخد للدواء وبتبلع الحبوب دي!!؟؟ عاين لأمو وأبوهو وهو ساكت قلتا ليهو ما تخاف ماف زول حيسألك وامك وأبوك ديل دايرنك تبقى كويس صااح بعد مسافة قال لي ما قعد أبلعهم لمن يدوني ليها بمشي بدسها أو بجدعها ، قلتا ليهو طيب الكلام دا عيب منك لكن كداحتمرض زيادة وحيدوك حقن ، مش أحسن تواصل في علاجك من الحقن قال لي أنا ما بحب الحقن قلتا ليهو طيب وعد خلاص تواصل فيهو قال لي اااي وعد ، ، ، طلبتا من امو وأبوهو ما يسألوهو بس يتأكدو إنو أخد علاجو حتى يزحو منو بعديها ودعوني وفاتو وأنا مشيت لناس أمي سقتها ورجعتهم البيت وعندها كبسولات كل 8ساعات وزمنها جاء مشيت جبتا ليها موية وقعدتا جمبها وأديتها الكبسولة قلتا ليها هسا يا امي بقيتي كيف؟ الصداع راح كلو؟ أو في جزء من رأسك بوجعك؟ ضحكت وقالت لي يا ولدي إنتا كل مرة بتسألني!؟؟ أنا شديييدة الحمدلله كلو راح ويومين تلاتة الشاش دا زاتو بزحوهو قوم أمشي إرتاح يومك كلو جاري في المستشفى ما تخاف علي حبوبة قالت ليها هي كيفن ما يخاف عليك!!؟ وهو كان ما عالجك إنتي بعالج منو تاني ،،، قالت لي يا حليلك ربنا يقويك ياارب إن شاء الله ، ماشاء الله تبارك الله عليك وربنا يساعدك زي ما بتساعد الناس ، ، قلتا ليها أمين يا حبوبة ياارب بس سيرة المستشفى دي خلوها في البيت يااخ أبوي ضحك وقال لي كدا كدا ملاحقاك ، بعديها عمتي وولدها الصغيروني جو جابو الأكل وصلينا العشاء و بعد خلصنا عمتي سامية قالت لأمي يا منال بعد دا كفاكي ونسة قومي إرتاحي نومي بعد أمي رقدت قلتا ليها يما تصبحي علي خير ولو حسيتي بأي حاجة قولي لي قالت لي والله إنتا يا ولدي قلتا ليك أنا نصيحة لكن سمح لو حسيت بحاجة بكلمك وإنتا من أهل الخير ياارب
خليت حبوبة وأبوي وعمتي بتونسو ومشيت دخلتا غرفتي اخدتا لي دوش وقلتا يااا الله أنا نسيت لازم أتصل علي دكتور وليام عشان أعتذر منو ردا علي بعد سلمتا عليهو قلتا ليهو
____، ، ، ، ، ، ______، ، ، ، ، _______، ، ، ، ، ، __________

__Iam sorry Dr/william for…….

What’s the problem, l knew what happened and you did your duty perfectly and now how did you become your mother !??

__Thank you . are in good health

Good . lwish her aspeedy recovery
__(دكتور وليام أنا آسف علي……

ما مشكلة أنا عرفتا الحصل وإنتا عملتا واجبك بإتقان . والآن كيف أصبحت والدتك!؟؟

__شكرا ليك . أصبحت بصحة جيدة

جيد أتمنى لها الشفاء العاجل
____، ، ، ، ، ، ______، ، ، ، ، ، ، ______، ، ، ، ، ، ، _______

بعديها مسكتا اللابتوب لأنو من جيت ما هبشتو ورجعتا لروتيني الإعتيادي بحوث ، مراجعة ، دراسات ،…….عاينتا للساعة لقبت الزمن إتأخر قلتا أنوم بعد دا رقدتا في السرير قبل أغمض عيوني ما عارف بس إتذكرتا البت الشفتها قبيل و اللاقيتها في المعمل اليوم داك ، دا شنو يا أنور !؟ زولة بس شفتها ومن أول أمس كل يوم تتذكر فيها يمكن إعجاب أو إنجذاب لأنو نظرتها نظرة إنسانة واثقة بنفسها شديد ، يمكن عشان هي جديدة في المستشفى !!؟؟ ، ، ، أنا الأيام الفاتت دي ما كنتا فاضي عشان أعرف عينو منو أصلا ، المفترض ما أتذكرها زاتو، ، لكن مرات بتشوف زول بتحس إنك شايفو قبل كدا أو كأنك بتعرفو أو ……ما عارف بس دا إحساسي تقريبا لحدي نمتا
الصباح صبحتا علي ناس أمي وشربتا معاهم الشاي وأبوي طلع وأنا برضو مشيت علي شغلي في الطريق إتصل علي دكتور ماهر وقبليها برضو إتصل علي كم مرة وسألني من أمي وكدا ودكتور أيمن صاحبي برضو كل يوم كان بتصل ، قال لي بما إنك ما عايز تنضم لي ما مشكلة أنا بنضم ليك المستشفى الهنا في دكاترة بديروها لينا لكن الأجهزة قريبا حتصل ليك هناك بعد نشوف إجراءاتها كيف قلتا ليهو تمام كويس جدا قال لي وحيجو معاك دكتور أشرف ودكتور جون عشان هم دكاترة أكفاء وممتازين متخصصين في أمراض الكلى قلتا ليهو خلاص بإذن الله أصلا إتناقشنا في الموضوع دا ونسبة لإنو كان عندنا في المستشفى دكتور متخصص في الكلى وجاتو منحة وسافر فبقى في نقص في الدكاترة المتخصصين قال لي انا زاتي بجي معاهم بس نشوف اللازم والترتيبات هنا أول……

المجهول، ، ،
كلمة تبعث الخوف في النفوس🍁

يتبع ………

لقراءة الجزء التالي : الجزء الخامس من رواية طبيبة قلبي

لقراءة الجزء السابق : الجزء الثالث من رواية طبيبة قلبي

للإطلاع علي فهرس اجزاء الرواية : رواية طبيبة قلبي ( جميع الاجزاء كاملة ) للكاتبة اسماء محمد

جميع الحقوق محفوظة للكاتبة اسماء محمد .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى