وفي الجزء الرابع من رواية هدوء قبل العاصفة هل يا تري سنري الجميل من المواقف بين ابطال الحكاية أم سيحدث شيء مفاجأ يقلب الدنيا رأساً علي عقب ويغير من مجري الأحداث كثيراً ؟ كل هذا وأكثر سوف نعرفه في السطور القادمة .
الجزء الرابع من رواية هدوء ما قبل العاصفة
احلام ….. تمام الحمد لله …. اهو غير قولت نتصل بىك ونطمن عليك بس …. بالك بكرا نمر عليكم ان شالله باهى …. وتوا بنسكر لانا مجدى يضبح …. فى امان الله ….. سلام …
سكرت احلام التلفون واتكت على شنطة حوايجها وقعدت تبكى وتبكى لحد ما فجأه خش عليها مجدى وقاللها …..
مجدى ….. شنى نحطلك شنطتك فى السياره ولا اتصلتى بااهلك وغيرتى رايك هههههههه والله انتم بالفعل نساوين << ناقصات عقل ودين >> على عموم انى توا جانى اتصال مهم وبنطلع ….. فابنخش الحمام بندوش وكااااااااانا غيرتى رايك ههههههه حدديلى سوريتى البيج وسروال القماش الاسود ولمعلى كندرتى البيج …..
…… شبحتله احلام شبحة كانت مختلطه بين الالم والمدله وكانا لقت مدتله كف طيرتله وجهه لولا عارفه انا موضوع بيكبر فامشت وسيباته وطلعت من دار وخشت للمطبخ حطت سوزة القهوه على وقعدت واقفه جنبها لحد ماسمعت صوت تلفونه يشرين وبعدين سمعت صوت باب دار نوم ترد بصوت واطى جدا فاهنا ضربها الخنس ومشت لجيهة دار ووقفت ورا الباب تسمع وهنا سمعت مجدى يقول ….
مجدى …… اه ياعمرى ….. مش قتلك ماتطلعيش الا ما نوصل انى للمحل …. انتى عارفه انى نغير عليك ولا لا ههههههه….. تى اى اى نغار عليك من اول يوم شفتك فيه …. شن بديرى هيا مهبول وطاح فى واحد … ماشى ساعه بس ونكون غادى 
خلاص تبى شى فى طريق نجيبهولك ؟؟؟ اه اى عرفته ؟؟ من عيونى … اوك خلاص سلام حبى
وهنا احلام نهارت بالبكى ومشت تجرى وخشت للمطبخ …… وهوا خش للحمام بينما هيا استمرت فى البكى لحد ما فاجت القهوه وهنا طفت عليها ومسحت دموعها ومشت لدار طلعت طاولة الحديد وسوريه وبدت تحدد فيها وتبكى وحست للحظه انها مشلولله ومش عارفه تدير شى ولاعارفه حتى لمن تشكى واول ما كملت الا قالله عليه خشت لحمام ضيوف وتوضت وطرحت صلايه وبدت تصلى وبعد ماكملت قعدة تدعى وتبكى وتقول ……
ياربى فرجها عليا يارب …. ياربى انى تعبت وبين نارين …. ياربى ارشدنى لطريق صح …. ااااااااه ياربى انى الا لما نحكيلك ونشكيلك نحس براحه وانك جنبى ياربى فامتتخلاش عليا فى مصيبتى ….. اهديه يارب وبعده على حرام واسترها معاى وبعد عليه بنات الحرام …. انى ماعندى ظهر نستند عليه الا انت ياربى انت بوى وخوى وكل شى ليا فا متتخلاش عليا ….. ياربى انى لو طلقت مش رح يرحمنى حد حتى اقرب ناس ليا رح يتشمتو فيا واهلى رح يشوفلى انى وحده منحله وتبى تطلق وتمشى على حل شعرها ولو قعدت فاكرامتى كل يوم تنحرق ونفسى تموت وحاسه انى ننخنق كل يوم نقعد فيه معاه …. بس انى خايفه انى عمرى ماكنت شجاعه ولاقويه باش حتى نواجه نفسى فامدنى القوه انى ننسى الاسمعته او انى نواجهه وننهى كل شى ونتحمل الطوفان ياررررررررررربى دعيتلك فامتخدلنيش وخليك معاى للاخر يارب ……
استمرت احلام فى دعاء ودموع مابوش يوقفو نهائيا وبعدين خدت مصحف وفتحت سورة مريم وقعدت تقرا فيها وتبكى لحد ماسمعت الباب الرئيسى تصكر وهنا استمرت تقرى وتقرى لحد ماحست بالسكينه فى قلبها وكأن ربى مسح كل الا فى قلبها من نار والم وبعد ماكملت مشت للمطبخ وصبت قهوه فى مق وقعمزت فى صاله تفكر فى كل الا هيا فيه وتراجع فى نفسها وتعرف هيا فى شن الا غلطت فيه وبى شن مقصره معاه وعلاش هوا هكى يتصرف معها …… وهيا غاطسه فى كومة هالافكار سمعت صوت الباب يطق قالما فتحت لقت …..
احلام ….. اهلين يا اللاى …
عزوزتها …… اهلين بنيتى شن حالك وشن اخبارك والله ليك وحشه يابنتى … شدى شدى بنيتى فراشيتى وطبق دحى هدا …. والله كرشت فى خليفه عمك وقتله حطنى نطمن عليها …..
احلام ….. سامحينى والله ياللاى دنيا تاخد فى الوحد من كل حد حتى اقرب ناس ليه …
عزوزتها ….. مهم بنيتى انتى شن حالك ؟؟؟؟
احلام ….. خشى عمتى شن بتقعدى واقفه تفضل تفضلى …
والله الحمد لله تعرفى انتى حمل وتعب كيف يدير …
عزوزتها …… اى والله يابنتى عندك الحق بس خيره وجهك تعبان وعيونك منفخات شن كنتى تبكى ؟؟؟؟
احلام ….. والله اللاى شن بتقولك خليها على ربى وخلاص الشكوه لغير الله مدله …
عزوزتها ……. اول شى قوليلى ياامى لانا نشهد بالله انتى زى بناويتى واكتر وتانى شى احكيلى شن فى خيرك من مزعلك ؟؟؟
احلام …… وين بنات خيره ماجبتيهم معاك ….
عزوزتها ….. تعرفيهم انتى وحده خطيبها مدايرلها جو ومايبهاش تطلع الا بشوره وهوا مسافر توا وتانيه قالت غدوا عندها امتحان …. بس ماتغيرى موضوع وقوليلى شن فى ؟؟؟؟؟
<< وهنا شبحت احلام لعزوزتها ودموع بدى يصبو زى شيشمه >> فاخدتها عزوزتها فى حضنها وقعدت طبطب عليها وبعدين قعمزت احلام واحكتلها كل شى صار لحد موقف الا صار فى دار وهنا ام مجدى كانت ردت فعلها هيا ….
عزوزتها …… الله رزينى فيه هالكلب نسونجى هدا والله الا مايجى الله الامانكرش فيه بسنونى هالمزتتت هوا يلقى ويطول والله انتى زى بلسم تنحطى على جرح يبرى … هكى يدير معاك هالشايب الخايب هدا …. طالع لعمه ضارب العرق فيه لسابع ارض …. بالله يابنتى وكانا عندى خاطر عندك لاتطلعى ولاتسيبى حوشك ولا تديرى شى …. خليه عليا انى بس ووالله الا مانبدا مكرشه فيه تكريش وناخدلك بحقك منه والله زى مانتى بنتى هوا وولدى وفى الحق مانعرف واحد وحقك رح تشوفيه توا غير يجى بس ….. اما انتى يابنتى والله بنت اصول وبنت ناس فاخليه عليا وتوا تشوفى كيف نعجنه من اول وجديد ….
احلام …… نتمنى ياماما والله انى مانبى نشرد عيلى من قبل حتى مايطلع على خاطر مراهقته هوا واسلوبه الا زى زفت ….. فاانتى اخر حل ليا لانك لو مادرتلى حل ياماما انى معاش نقدر نستمر معاه …..
عزوزتها ….. خلاص يابنيتى تم الموضوع واعتبريه عندى ووالله لو نضطر انى ندخل تريس فيه موضوع بس حققك رح يوصلك …
احلام ….. ربى يخليك ليا ياماما يارررررب وتوا مادمك وصلتى للحوش والله ماك مروحه لين تشربى شاى وتتعشى كان هدا نحرج منك ايواااااااااااا …
عزوزتها ….. ههههههههه خلاص اليوم متعشيه عندك والله مانكسر بخاطر بنيتى لو كان اشبح على خاطر شنى ….
حطو عالة شاى ودارو شاى وهدرزوا وفاتت ساعه ورا ساعه وطيبت العشى احلام وحطوه وتعشو وقامت المعايين وحطت فااكهه وهيا كيف بتمد لعزوزتها صونية فاكهه فتح مجدى الباب وخش …..
مجدى …… اهلللللللللللن انورت انورت من فى حوشى نور عيونى ميمتى اهلن اهلن اهلن اشرقت الانوار …
عزوزتها …… << دارت باص عيون ونتشت شارب وعضت سنون وتكرميشة عيون >> وشقلبه للخلف وقالتله ……..
يتبع……
لقراءة الجزء التالي : الجزء الخامس من رواية هدوء ما قبل العاصفة
لقراءة الجزء السابق : الجزء الثالث من رواية هدوء ما قبل العاصفة
للإطلاع علي فهرس اجزاء الرواية : جميع اجزاء رواية هدوء ما قبل العاصفة كاملة للكاتبة كيندا
جميع الحقوق محفوظة للكاتبة كيندا من ليبيا .
