الجزء

الجزء السابع والعشرون من رواية الزوجة التائهة بين الأحلام والواقع

الجزء السابع والعشرون من رواية الزوجة التائهة بين الأحلام والواقع

هيا بنا لنبدأ قراءة أجمل الإبداعات من كتابة المؤلفة كيندا في رواية الزوجة التائهة بين الأحلام والواقع ونتمني ان تعجبكم بإذن الله .

الجزء السابع والعشرون من رواية الزوجة التائهة بين الأحلام والواقع

صفاء …….. بعد الا قولتهولك كللللللله تقوليلى من شن خايفه نهاااااار ابيض تى شن تبيهم
يتجوزو باش نخاف انى نهار ابيض عليك وخلاص

ليلى ……. هههههههههه لا يعطيهالك قصدى …… دقيقه بس وصلتنى رساله

صفاء …. من منى يامنجوهه ؟؟
ليلى …. باين من رقم غريب دقيقه بس نفتحها ……

رقم غريب <<نتمنى انك تصدقى كل كلمه نقولهالك انى فاعلة خير ونتمنالك كل خير وحابه نقولك فيقى لراجلك راهو يلعب من وراك وانتى ماتندريش وفى الشركه صمعته كلها معروفه واول وحده ضاحك عليها سكرتيره الغلبانه متعه ومهددها انا لو تتكلم يلزها من خدمه لانا عارف انا امها ميته وهيا ماعندها حد بعد ربى وانى سكتت هلبه على تصرفاته بس قولت لازم مانقولك وراهو هوا على علاقه بهلبه بنات وتتفكرى سكرتيره الا ردت عليك وقالتلك هوا مش فاضى …. لانا هوا الا قاللها تقول هكى ودئما يقول عليك وحده نفاخه وفاد منك وانتى مش مريحتيه وديما مشاكل……. وفى ليله كانو مع بعضهم فى سياره وتلخبطت تلفوناتهم مع بعض ولو تراجعى تصرفات راجلك فى الايام الا فاتو رح تعرفى امتى تلفونه ماكانش عنده وكدب عليك اكيد …….وعلى عموم انى سكرتيره هادى صاحبتى هلبببببه زى اختى وديما تشكيلى منه و تبكى ونتمنى انك ماتقوليله شى لانك لو قولتيله رح يلزها واحتمال يديرلها مشاكل وهيا بنت يتيمه ماعندها حد ودنبها الوحيد انها صدقاته وعلى عموم لو حابه تتأكدى بنفسك برى لنقال راجلك وافتحى سجلات تلقى رقم غريب مكلمه فى الليل امس 3 مرات وهيا مابتش ترد عليه وقبلها باعتتله رساله تتسهوك فيها عليه دروحا << وقالتله لو نقولك تحبنى نلقى مكان فى قلبك >> وهوا بعدها اتصل بيها وقاللها اكيد حبيبتى حياتى كلها ليك ………… وافتحى رسائل مرسله رح تلقى باعتلها رساله فى ليل موخر مكتوب فيها ردى عليا وتانى يوم مكلمين بعض فى ظهر ……. وباللهى رجاء خاص ماتخلينيش نندم انى نصحتك لانى نعتبر فيك وخيتى وكان نرضى فيك شى نرضى فى روحى شى فيقى لراجلك ولو انى زيك حتى القعاد مانقعدله …. امسحى رساله بعد ماتقريها … سلام >>…..
صفاء ….. يابلوه خيرك نسبهتى فى نقال منى الا بعتلك رساله ؟؟؟
ليلى ….. مافى شى صفاء انى لازم نركب توا احمد بعتلى رساله وقالى اركبى
صفاء …… اوك برى خلاص توا ينوضو عليه عطابينه مالا برى برى …..
ركبت ليلى فوق ولقت احمد كيف خش للحمام وتسمع فى صوت دوش فاهيا خشت لدار نوم وقعدت تبكى بس برغم هدا فى شى فى داخلها يقولها انا الموضوع فى شى غلط وانا احمد مضلوم فامسحت دموعها فيسع وبدت تلبس فى حوايجها وهوا طلع من حمام طق طق على دار فافتحتله وحاولت تبينله انا هيا عاديه بس فشلت انها تبينله انها عاديه فا شافلها وقاللها …..
احمد …… ليلى خيرك شن فى شى ؟؟؟
ليلى ….. سكتت شوى ……. وخلاص كان الكلام على راس لسانها بس قالتله ممكن نمشى لحوش بابا ونقعد فتره عندهم ؟؟؟
احمد…. علاش ان شالله خير شى فى وشن الا خلاك طق فى راسك فجأه؟؟؟
ليلى ….. ماما كلمتنى ونفسيتها تعبانه هلبه ومريضه وحاسه نفسى انى نفسيتى تعبانه شوى فا نبى نقعد عندها 10 ..15 يوم ونروح
احمد…… باهى شن امك نرفعوها للمستشفى ؟؟؟
ليلى …. لا لا توا نمشىلها انى ونوقف على صحتها توا تنوض كويس مهم توا نبيك تحطنى عندها ماشى بس نبى نخلى تلفونى هنا لانا راسى يوجع فيا ومانبيش يلحقونى دوشت مكالمات لغادى ….
احمد …… ليلى برغم انا كلامك كله غريب وحاس انا فى شى داستيه عليا بس اوك مش رح نغصبك على الحكى …. اهم شى راحتك ولو انتى تبى تقعدى فتره ترتاحى غادى وتهتمى باامك انى ماعنديش مشكله ….. خلاص وتى شنطتك ولبين ماصليت ولبست حوايجى تكونى كملتى ماشى ياعمرى ….

ليلى ….. اوك …

وتت ليلى شنطتها وطلعت وركبت لسياره تستنى فيه وبعدين هوا لحقها وركبو لسياره وقعد هوا يحكى معاها بس هيا دوب ماترد عليه بعدين قالتله……
ليلى …. ممكن تلفونك نبعت لماما رساله …

احمد …… اوك ….

ومدلها جهاز وخداته وفتحت على رسائل وهنا صدمه لما فتحت رسائل الورادة لقت بالفعل نفس رساله الا قالتلها عليها وبعدها فتحت المستلمه ولقت نفس شى ولما فتحت سجلات لقت اول مكالمه بينهم هوا متصل بيها بعد مابعتتله رساله وقعدو قريب 5 دقايق وبعدها بعتلها رسالة بالفعل فى الليل موخر وبعدها كلمها 3 مرات وماردتش وتانى يوم كلمو بعض فى ظهر لمدة 10 دقايق

والا شافته فى هديكا اللحظه كان كف بالنسبه ليها وقعدت مصدومه وسارحه فى تفكيرها تفكيرها لحد ماافاقت على صوت احمد يقولهاا…
احمد …. ليييييييلى وين مشيتى ؟؟؟
ليلى ….. معاك معاك بس نفكر فى ماما
احمد ….. ناخدلك شى دخليه معاك ؟؟
ليلى …. لا لا برا طول …
احمد …… باهى كانا نبى نكلمك كيف نوصلك …
ليلى …… انت ماتكلمنيش انى امتى مانحس روحى فاضيه نكلمك لانا عندنا أقاربنا كلهم غادى يطمنو على ماما ومرات مانفضاش اليوم باش نكلمك فامتى مانفضى توا نكلمك من تلفون ماما ماشى
احمد …… اوك …. خلاص وصلنا….. شنى ننزل معاك ؟؟؟…
ليلى …. لا لا …مش لازم توا نقولها احمد يسلم عليك

وهنا فتح باب سياره وطلع خدى شنطتها وحطها فم باب….. وهيا قالتله …
.
ليلى ….خلاص انى توا ندخلها برا انت ماتعطلش روحك …

احمد …. اوك خلاص كانا احتجتى شى كلمنى وخلى عندك 200 جنى هما احتياط لاى ظرف اوك خلاص خشى هيا … سلام حبوبتى ….

بس ليلى للاسف قعدت واقفه وتشبحله وحست انها الشبحه الاخيره ليها ليه واخر مره رح تشوفه فيها…. ودموعها نزلو منها لاارديا …… ومن جهه قلبها يقوللها انتى تحبى احمد خليك معاه باهى ياسيدى كدبى كل شى وعقلها يقوله هدا كداب وخاين والرسائل والارقام ومكالمات اكبر دليل الا لو كنتى تبى تعيشى فى كدبه بس ….

وهنا هيا صكرت الباب الحديد وخشت طقطقت على الباب وفتحتلها امها وقالتلها ….
امها …. بنيتى خيرك شن الا جابك غربيه وين احمد …
ليلى ….. تعبانه شوى من الحمل ياماما وضايقه خلوقى وقولت نقعد عندك فتره << وبعدين حضنت امها وانهارت بالبكى >>
امها …… معليشى بنيتى كنا هكى لما حملنا تعبنا وبكينا ونفسيتنا ضاقت بس واللهى كله يهون قدام اول حضن منك ليه وقولى ماقالتهاش امك الا تبدا منكديه فى عيلها يطلع تبارك الرحمن عليه هدوء وجمال هههههه غير غيرى جوك عاد انتى جايتنى باش تغيرى جوك ولاباش تبكى …..
ليلى …… لا لا خلاص ياماما غير حسيت روحى مستاحشتك بس وزدت عرفت قيمتك بعد ماحملت ياماما …
امها …….. بنيتى هادى سنة الحياه …. وخلاص هيا خشى للمربوعه وانى حاطه شاهى على نار شوووى ونجيك خلى قبل ماتخش خدوجه وحليمه نوتيه ….
ليلى …. علاش جايين ماما ؟؟؟؟
امها …. واللهى مبكرى اتصلو بيا وقالولى بنشربو طويسة شاى عندك وبنهدرزو تعرفى انتى الخلوق ضايقات وواحنا جارت ولبعض
ليلى ….. خلاص ماما مالا انى تعبانه شوى وراسى نبى نخش لدار نوم متعى نرتاح على سرير لانا نحس ظهرى يوجع فيا ماشى ….
امها ….. خلاص حبيبتى برى ارتاحى وانى توا ندير الشاى ونجيبلك طويستك لحد عندك وانتى هونى افتحى تلفزيون فى دارك وكان تبى شى ضبحى عليا ….
خشت ليلى لدارها ولبست بيجامتها وقامت شعرها فوق وقعمزت على سرير وقعدت تفكر وترجع داكرتها لليوم الا اتصلت بيه وقاللها انى مش شاغل تلفون وبعدين لما فتشاته لقاته فى نفس الواقت متصل بى رقم غريب وهوا قاللها انى نسيته فى مكتب باهى كيف نساه وتلقى فيه مشغول ؟؟؟؟ وكيف نساه ولما فتحت سجل لقت متصل قريب 10 مرات برقم غريب وفى نفس الوقت الا مفروض انا ناسيه فى مكتب ….. وبعدين فجأه تفكرت شى وهوا الا خلاها تقطع شك باليقين وهوا انا لما كلماته وقالتله << نبيك ضرورى اول ماتوصل كلمنى >> وقتها كان فى سياره هوا …… معناها كيف قالى انى نسيت تلفونى فى مكتب ؟؟؟؟ هدا دليل انا هوا كان معها فى سياره زى ماقالت بنت وانا تلفوناتهم تلخبطو مع بعض وهوا كدب عليا وقالى نسيته فى مكتب لانا مايبيش يفضح روحه ويقول انى كانت معاى مرأه ساعه 11 فى الليل فى سياره ….
وهنا ليلى نهارت بالبكى ومعاش عرفت شن تدير وللحظه فكرت تاخد حبوب وتقتل روحها او تقطع حبل الوريد وتفتك من عيشتها المره الا كانت عيشتها فى كدبه كبيره بس وهيا فى عز هالافكار سمعت صوت ادان المغرب فا مسحت دموعها واستعودت من شيطان وناضت توضت وصلاة وقعمزت تقرى فى قرأن لحد صلاة عشى بدون توقف وحست انا القرأن الوحيد هوا الا خلى الهم الا فى قلبها ينزاح بعد الافكار الشيطنيه الا دارت فى راسها وحست بسكينه فى قلبها بعد النار الا ركبت فيه وهنا اول ماسمعت ادان العشا صلت العشى ودعت لربى من وسط قلبها انا يساعدها ويقويها فى محنتها وينزعلها حب احمد من قلبها ويخليها تعرف تعيش من جديد …..
وبعد ماكملت صلى ووهيا كيف بتقيم صلايه خشت امها عليها وقالتلها …..
امها …… تعرفى هما خشو من هنا وواللهى مابو يعتقونى من هنا تقول زامطين راديو وهما فى قولت فلانه نخطب فلانه تزوج عليها راجها فلانه طلقت ….. وليلى اكتر كلمه فى الا قالته امها زنت فى ودنها كلمة << طلقت >>
وبعدها امها كملت حديتها وقالتلها ….. تعرفى حتى جيت بنخش عليك وبنعطيك شاى لقيت دار هاديه وضى مطفى فاقولت اكيد رقدت ونخليها براحتها وقعدت لاهيه معاهم وهادى طلعتهم

…… مهم بنيتى انى درت حاجات خفيفه على عشى وحسبتك هيا تعالى الحقنى للمطبخ هيا …
ليلى ….. لا لا ماما حاسه نفسى تعبانه بنمشى لدارى شوى ونفتح تلفزيون لحد ماينعسنى نوم ماشى ماما
امها …… براحتك حبيبتى اصلا بينى وبينك حتى انى والله ماعاد عندى طاقه باش نهدرز بعد هدرزت بكرى فا يادبك بنصلى عشى وبنرقد لانا بكرا وراى نوضه بكرى للمدرسه وراى حصص من ساعه 8
ليلى …. اوك خلاص ماما برى برى لدارك ارتاحى << تصبحى على خير >>
وخشت ليلى لدارها من هنا وقعدت تقلب فى قنوات من هنا وهنا وبصدفه فتحت على قناة ولقت اغنية شيرين << ده مش حبيبى >> واول ماسمعتها دموعها نفجرو تانى وركبت نار فى قلبها تانى وبدت تتخايل فى احمد بالوصف الا وصفاته بيه بنت الا بعتتلها رساله وقعدت فى الحال هوا لحد مارقدت من كتر البكى …..
وفاتت ساعه ورا ساعه من اول ليله من الليالى سود على حسب الا حست بيه هيا من نار والم لانا احمد بنسبه ليها ماكانش راجل لا …… كان حبيب “” اب “” اخ “” صديق “” وراجلها وظهرها بعد بوها واب نبيل الا قعد ماطلعش وشاف دنيا …..
ناضت صبح خشت للحمام توضت وصلت وبدت تضم فى حوش وبعدين حطت الغدا على نار وقعمزة فى صاله قدام تلفزيون وقعدت تفكر وتفكر وفى عالم تانى لحد ماشمت ريحة شياط الغدى على نار وهنا مشت تجرى وطفت على طنجره وحطت راسها على رخامه وقعدت تبكى وبعدين حولت الاكل من طنجره لطنجره وكملت تطيب الغدا ووتاته وخشت لدارها وطفت ضى وقعدت تفكر وتبكى لحد مارقدت ومافاقتش الا على صوت امها تنوض فيها وتقوللها …..
امها …. ليلى بنتى خيرك راقده من ساعه 2 ظهر تغديتى قبل ورقدتى
ليلى …. والله ياماما سقيته وقولت تروحى ونتغدو مع بعض وحطيت راسى مع ساعه 1 ونص ظهر وباين مشت فى نوم مش عارفه خيره الا جانى جانى عليه …
امها ….. عادى عادى يابنتى كل الحوامل لازم تجيهم على نوم وفى الا من الاول وفى الا فى شهور الاخيره مهم شن بنقولك احمد مبكرى تصل بيك وقالى لما تروحى قولها تتصل بيا …. هاكا تلفون يابنيتى خلى نلحق نتوضى ونصل ظهر قبل مايأدن عصر
خدت ليلى تلفون واستنت امها لين تتطلع وبعدها اتصلت بى احمد وقالتله ……
ليلى …. اهلين احمد …
احمد ….. شن اخبار حبوبتى وينك من امس لاحس ولاخبر
ليلى ….. احمد …. نبى نقولك شى ….
احمد ….. ان شالله خير شن فى ؟؟
ليلى …….. طلقنى ……..

يتبع……

لقراءة الجزء التالي : الجزء الثامن والعشرون من رواية الزوجة التائهة بين الأحلام والواقع

لقراءة الجزء السابق : الجزء السادس والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى