الجزء الثامن والعشرون من رواية الزوجة التائهة بين الأحلام والواقع

هل برأيك سوف نري ظهور أبطال جدد في هذا الوقت من الرواية ؟ ام سيكون هناك مفاجآت من نوع آخر ؟ كل هذا وأكثر سوف نعرفه سوياً في السطور القادمة .

الجزء الثامن والعشرون من رواية الزوجة التائهة بين الأحلام والواقع

امها ….. عادى عادى يابنيتى كل الحوامل هكى لازم تجيهم على نوم وفى الا من الاول وفى االا فى شهور الاخيره … مهم شن بنقولك احمد مبكرى اتصل بيك وقالى لما تروحى قوليلها تتصل بيا ….. هاكا تلفون خلى نلحق نصلى ظهر قبل مايأدن العصر ..
خدت ليلى تلفون واستنت امها لين تخش الحمام خشت لدارها و اتصلت بى احمد وقالتله
ليلى …… اهلين
احمد… اهلييييييييين شن الاخبار حبوبتى …. وينك من امس لاحس ولا خبر؟؟؟
ليلى …. احمد …. نبى نقولك شى …
احمد …. شن فى ان شالله خير ؟؟
ليلى … طلقنى ….
احمد ….. ههههههه شن هبلتى انتى …. ليلى بجد تدوى انتى ؟؟
ليلى …. ايه انى خلاص معاش قادره نتحمل ؟
احمد ….. ههههههه انتى شن تدوى بزبط .. اكيد تتسهوكى صح ؟؟ قصدى ادوى قبل مانهبل ونبدا معاش نفرق بين الدوا والفعل …. نقولك شى انى جايك توا …
وصكر تلفون وركبة فيه النار مشى بدل حوايجه بسرعه وطلع بينما ليلى طلعت من دارها لقت امها مهناكش ولقتها كاتبلها ورقه وهيا ….
امها << انى لقيتك تتكلمى فى تلفون ومابيتش نقطع عليك مهم انى فى حوش جارتنا الا لصقه فينا نساعد فيها…. بنيتها جابت وليد ونديرولها فى الحلويات … ساعتين ونكون فى حوش >>
خشت ليلى لدراها وقعدت مقعمزه على سرير وقلبها يرفع ويجيب ودموع مافرقوش عينها وقلبها قابضها وفاتت دقيقه وراء دقيقه لحد ماسمعت الحوش يشرين وقعدت واقفه شوى بعدين مشت فتحت الباب وخشت طول وهوا خش وراها وصكر الباب وخش للحوش وهيا خشت لصاله وهوا لحقها وقعد واقف فم باب صاله ومولع دخانه وقاللها ….
احمد …. شن فى ؟؟؟ شن الكلام الا قولتيهولى ….
ليلى ….. احمد خلاص انى معاش عارفه نكمل تعبت تعبت من كل شى … انى من لما تعرفت عليك وانى ماشفتش يوم حلو وحتى لو شفت يوم حلو نشوف بعده ايام نكد …. خديتنى وانت ماتحبنيش ومش طايقنى ولا طايق تشوفنى ودرت مستحيل باش تحبنى … تحملت ماليك ومعاملتهم سيئه ليا وتحملت بنت خالتك ال@#$ الا حاولت تدمرلى حياتى وطلعت من حياتنا …… وخشت وحده واتنين وتلاته واولهم سكرتيره الاكانت تكلم فبك فى نص ليل والبنت الا بعتتلك رسالة فى الوقت الا كنا راكبين فيه وقتلى بننزل نكلم عصام وانت تكدب عليا واتصلت كلمتها وبعدها عاودتلها 3 مرات ومابتشر ترد عليك وبعتلها رساله وقتلها عاوديلى …. تبى شى اكتر من هكى يخلينى نقولك طلقنى … انى تعبت من الكدب وتعبت من البنات الا نلقى فيهم فى حياتك وتعبت من انى نلعب دور المضحيه خلااااااااااااص ومش مستعده نربى ولدى وانى كل يوم نشك فى بوه

احمد …… هدااااااااااا كله كنتى شادتيه فى قلبك وساكته …. وطول سألتى وحكمتى عليا بدون حتى ماتسألينى وانى هناااااااا طرطور ومش من حقى حتى ندافع على روحى بس لانك انتى فجأه ظربت فى دماغك وتبى تتطلقى صحححححح تكلممممى
ليلى ….. اما فرصه نعطيهالك …..وانى شفت كل شى بعيونى ؟؟؟
احمد ….. شدها من ايدها وقاللها >> شن شوووووفتى والله كله كدب وانى نحبك … من الا لعب براسك وقالك هكى والله الا قالك يكدب عليك ويبى يفرق بيناااااا واللهى انى نحبك ومستحيل نفكر حتى تفكير انى نخونك قسماااااااا بالله نحبببببببك
ليلى …. اوك … انت ماخنتيش باهى جاوبنى ترا وبصدق … انت اليوم الا كلمتك فيه من كان معاك فى سياره
احمد …سكت شوى وبعدين قاللها سكرتيره …. بس قسما بالله انتى فاهمه غلط ..
ليلى ……. ولما كانا تلفون مشغوا وقتلى نسيته فى مكتب باهى كيف انتى كلمتنى وقتلى لما نروح توا نكلمك كانك انت اصلا نسيته فى مكتب ….. قصدى انت كدب ماتعرفش تكدب فى حد يقو كدبه هكى … بس تعرف انى مغفله الا صدقتك انى حماررررره تحملت كل شى على خاطرك … كنت نحلم انك ترضى عليا بس مش اكتر بس خلاص تعبت قداش بنبرر وقداش بتكدب وقداش بتقولللللل ….<< وبعدين انهارت بالبكى وقالتله >> انى تعبببببت خلاص تعبت فديت ..
احمد ….. شوفى قسمااااا بالله الا مانحلف الا بيه انك فاهمه غلط وواللهى انى لما كانت معاى الا كنت مروح بيها لانا انى طلبت منها هلبه خدمه وتاخرت فى شغل بسببى وانى وصلتها بس …..
ليلى ….. << ماقالتش ولاكلمه قعدت ساكته وتبكى بس >>
احمد …. ردى عليااااااااا قولى اى شى … انتى مش مصدقتينى صح ومش مصدقه انى ماخنتكش صح رددددددى …. نقولك شى انى خلاص معاش عندى مانقول بس تعرفى شى انى مش رح نطلقك لو كان تنقلب سما على لوطا وانى نطلقك هدا شى مستحييييييل وانك تكوووونى لغيرى مش رح يصيررررر الا لو ربى خدى امانته بس ويوم ماتحسى انك بجد بى تسمعينى رقمى تعرفيه ولو سمعت منك كلمة طلقنى مره تانيه قسما بالله مرح يصير خير ماشى …. سلاااام
وطلع وقربع الباب وراه وهنا ليلى استمرت فى البكى بس قلبها كان فرحان ومش عارفه شن سبب ممكن لانا حست صدق فى كلام احمد ولى لحظه تمنت انها تنسى كل شى وتمسح كل الا سمعاته بس كل ماتدكر المسج الا نبعتلها تركبها نار….. وبعد مرور ساعه من موضوع ليلى اتصلت بى صفاء من تلفون امها وقالتلها …
ليلى …. اهلين صفاء شن اخبارك ؟؟
صفاء …. الحمد لله من ليلى …. عرفتك من صوتك شنى مال تكلمى فيا من تلفون امك ..
ليلى …. ايه حبيبتى …. بس نبى نسالك قبل احمد روح ؟؟؟
صفاء ….. ايه روح من بكرى وزى مهبول حتى امى كلماته ماباش يرد عليها … بس انتى وينك
ليلى ….. توا نحكيلك كل شى بس توا نبى نطلب منك طلب ..
صفاء …. نعم شن فى شى ان شالله خير …
ليلى ….. اركبى فوق لحوشى وخشى لدارى تلقينى حاطه تلفون فى كميدنو تقربيا متعى خوديه وانزلى بسرعه
صفاء …. باهى شن نقول لااحمد ؟؟؟
ليلى ….. قوليله ليلى بعتتنى بنجيب اى شى من دار ….. مهم تسبلى بااى سبله ونبى بسرعه وعاوديلى اوك
صفاء ……اوك خلاص برغم انا نتوقع يفجرنى بس اوك شوى ونكلمك
حطت صفاء تلفونها فى جيبها وركبت بسرعه طقطقت على احمد ولما فتحلها قالتله احمد ممكن نخش غير ليلى بعتتنى بنجيب حاجه من دار …
احمد …<< سكت شوى وضربه الخنس وبعين قاللها خشى >> خشت صفاء فيسع فتحت كميدنيو وخدت نقال وهيا كيف يتقيمه فى جيبها خش عليها احمد وقاللها ..
احمد ….. شن الا قالتلك << بعدين سكت شوى وشبح لنقال الا كيف يتخخشه لجيب سروالها وقاللها >> شن يدير تلفون ليلى عندك … هاتيه هاتيه << وخداه منها >>
صفاء ….. بس ليلى قالتلى …
احمد …. |<<قطع عليها وقاللها >> قوتلك هااااااااااتيه نبيه انى ولا لا خلاص هويناااااااا انزلى خلااااااص وكانا كلماتك قوليلها عند احمد …
نزلت صفاء بينما احمد قعمز على سرير وقعد حاط ايده على راسه ويفكر …. علاش ليلى قالت لصفاء هاتى تلفون .. <<اكيد فى شى وماتبيش توريهولى>> …… وبعدين خدى النقال وفتحه وقعد يفتش فى المكالمات مالقى شى وبعدين فتح الرسائل الوارده وهنا صدمه لما قعد يقلب فى رسائل شاف رقم غريب باعت رساله لى ليلى ولقى انا نفس الرقم الا باعت رساله نفس الرقم متع السكرتيره الاصلى ليها وبعدين خدى تلفونه هو وفتح رقم سكرتيره وقارنه برقم الا موجود فى تلفون ليلى باش يتاكد ولقه هوا نفسه فا فتح رساله وصدمه كانت فى تعبير وجهه كلها وقرى الحكى المكتوب فى رساله وفجأه لوح نقال على طول ايده وقعد يعيط زى مجنون وبعدين لبس حوايجه بسرعه ونزل ولما نزل لقى صفاء فى جنان فاقالتله ….
صفاء …… احمد راهو………… << خيره هدا طلع زى مجنون وسيبنى حى على ليلى حى >> تن تن تن …. الو ليلى … احمد راهو خدى منى تلفون ومافعدش 5 دقايق فوق وطلع زى مجنون ووجهه احمر قريب يطربق وشارع ماتشوفيش فيه الا الغبره من سيارته وصوت العجل…… نهارك الابيض شن فى قوليلى اول مره نشوف احمد هكى ….. بطلى بكى وقوليلى شن فى …. خلاص معاش تبكى … سكرى توا واول ماتحسى نفسك هديتى كلمينى اوك …. سلام حبيبتى …
..بعدين صكرت تلفون من هنا ولقت انا صهيب خاش عليها انتظار من هنا فافتحت عليه الخط وقالتله ….
صفاء ….. اه حبيبى شن اخبار …
صهيب …. تمام وانتى شن اخبارك …
صفاء … الحمد لله حال القرايه ….. مهم قولى شن صاير فيك انت
صهيب …… واللهى اهو قرايه انى والقروب وخلاص … وقولت نحكى معاك قبل مانطلعو نتعشو
صفاء ….. باهى وشنى جاى تاخد منى فى الادن متلا ؟؟ برا سلامتك وقلت سوك حتى من توا
صهيب ….. خيرك تتكلمى هكى شن فى شى مش عاجبك ؟؟
صفاء …. انت عارف ومن غير ماندوى ونتكلم اصلا توجدك مع البنت هيا كله مع بعضه مش خاشلى دماغ وهيا اصلا لو لاقيه من حاكم فيها راهو مش هكى اربعه وعشرين ساعه مطلوقه مع الولاد لاراجل يطلق ولا عمود يفلق
صهيب ….. انتى خيرك تدوى على بنت هكى هيا ماطقت فيك فى شى وبعدين لو عندك اى كلام قوليهولى انى …. وبعدين واللهى ماهو معقوله هكى كل مابنتصل بيك بتشديها وراى مشاكل ونكد بسبب هالموضوع هوا …
صفاء …… يعنى انى طلعتلك توا منكده عليك صح وانى المرأه ليبيه المنكديه و الحشريه و القرامه فى ست الحسن والجمال بس هيا لطفيه وزريقه وياااااااااى عليها
صهيب ……. اسمعى هيا مالا تشاو توا وكملى دعاكك بروحك لانى مزاجى رايق ومانبيش ننكد على موضيع تافهه جدا
صفاء …… وصدقنى حتى انى مزاجى يهبببببل قبل ماانت تكلمنى اوك وهيا سلام
سكرت تلفون فى وجهه وهيا تتمتم وراكبلها ضغط وهيا كيف خاشه للمطبخ تدور فى شى ترد فيه غيظها خشت عليها اختها وقالتلها …
مروه ….. اسمعى صفاء كلمى احمد يخلينى نرجع لقرايتى … انى ليلى كلمتها وفاتتنتى
صفاء …… تعرفى اطلعى من دماغى رانى مش فايقه بيك انتى تصيعى تصيعى وانى نتحمل صايعتك حوالى وراس امك من جنبى لانى خلاص راهو طاقتلى سقف
مروه ……. شنى مالا نسيتى ماكان يابلوعة مجارى وتوا بديتى تعرفى تعزرى …
صفاء ….. تعرفى انى من بكرى وانى ندور فى شى فى تلاجه نرد فيه غيظى وانتى جيتنى على طبق من دهب فاتعالى هنا تو نوريك كيف بلوعة مجاررررى تعالى هنااااااااااااا

مروه …… شعرى بتقطعيه ياحيواااااااااااااانه ارخى
صفاء ….. ارخى نرخى ….. ارخى ياحيوااااانه شعرى والله الا مانقطعك الله
عصام …….. حى حى يامااااااااااا تعالى شوفى بناويتك تعالى تقولى تريس فى بعضهم قريب يقتلو بعض تعالى هههههههه

صفاء ….. الحيونه هيا ارخونى عليها بس

ام احمد ………. نهاررررررررررركم بيض يا صبية اليهود انتى وياها…. وانتى يلى بيعطوك لراجل باركه فوق اختك وقريب تقتليها
تى والله الامانوريكم الله …. عصام مدلى شبشب الحمام مدلى تى والله الامانوريهم يتعاركو تقول زوز تريس
مروه …… هيا بلوعة مجارى هيا ضربتنى الاوله …. على خاطر قوتلها كلميلى احمد ….
صفاء …… نقولهم نقولهم علاش قوتيلى كلميه ؟؟؟
ام احمد …… خلاااااااااااص سكرى فمك انتى وياها وخشو لدار يوالله نهار اسود ياخسارة ماربيت وتعبت ……
اسمع عصام ترا كلملى خوك احمد نبيه ظرورى …

عصام ….. اوك …… تن تن تن تن الو ….. من معاى مش هدا رقم احمد عبد السلام …… شن تقووووووول … امتى صار؟؟؟

يتبع…….

لقراءة الجزء التالي : الجزء التاسع والعشرون من رواية الزوجة التائهة بين الأحلام والواقع

لقراءة الجزء السابق : الجزء السابع والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .