الجزء التاسع والعشرون من رواية الزوجة التائهة بين الأحلام والواقع

نتمني لكم قراءة ممتعة للجزء التاسع والعشرون من رواية الزوجة التائهة بين الأحلام والواقع من إبداع الكاتبة كيندا، هل برأيك سنري تقلب كبير يحدث بين ابطال الرواية ام ستسير الأمور بكل سلاسة وسهولة ؟

الجزء التاسع والعشرون من رواية الزوجة التائهة بين الأحلام والواقع

اسمع عصام ترا كلملى خوك احمد نبيه ظرورى …

عصام ….. اوك …… تن تن تن تن الو ….. من معاى مش هدا رقم احمد عبد السلام …… شن تقووووووول … امتى صار؟؟؟ وين هوا توا ؟؟؟ ماشى ماشى شوى وجاى ….
ام احمد ….. خيررررررك شن فى طيحتلى قلبى خوووك شن فيه ؟؟
عصام …. << رد عصام والخوف فى وجهه >> احمد دار حادت وراقد فى شارع زاويه وقالو سياره مشت وهوا نجى منها بأعجوبه وقالو صحته الحمد لله … مهم انى بنبدل حوايجى وماشى ..
ام احمد …… ووووووووه ياوليدى استنتى بنمشى معااااااااااك استنى
عصام ….. باهى بسرعه ونستنى فيك بسررررعه
ام احمد …… ياصفاااااااااااااء ياصفااااااااااااااااااااااااء تعالى هنى كلمى ليلى قوليلها احمد فى مستشفى شارع الزاويه دار حادت ..
صفااء …… امى استنوووونى …. حد يفهمنى خيره اااااااحمد …… عصااااااااااااااام شوى بس نلبس ونجى معاكم باللهى عليكم استنونى …
لبست صفاء عبايتها وامها لبسة جلابيتها وطلعو مع عصام للمستشفى …. واول ما ركبت ام احمد لسياره قالت لى صفاء …
ام احمد …… كلمى ليلى قوليلها على الا صار وقوليلها راقد فى شارع الزاويه .. وطمنيها قوليلها ناض منها الحمد لله وماترعشيهاش توا تصير فيها حاجه …
صفاء …. علااااش نقوللها وانتى عارفتيها حامل وماتتحملش البنت ؟؟
ام احمد …… قوليلهااااااا يافررررخه وماتشيطيش ريقى انا مش فى باب نقاش معاك راه
صفاء …… باهى غير بطلى بكى توا يرقالك ضغط وبعون الله احمد مافيه شى
ام احمد …… ااااااااه ياررررربى نطلعو من مصيبه نخشو فى مصيبه تانيه …… ياررررب رحمتك ولطفك بى وليدى يارررب …
صفاء …… تن تن تن تن ….الو ليلى … شن اخبارك توا ؟؟
ليلى …. الحمد لله احسن … خيره صوتك صفاء فى شى ؟؟
صفاء …. بنقولك شى ومانبيكش ترعشى ياليلى …. راهو احمد دار حادت وتوا راقد فى شارع الزاويه …. غير استنى ياليلى م ماتبكيش استنى قالو صحته الحمد لله وناض منها …. باهى باهى خلاص … باهى وكيف بتجى انتى …. تعرفى تسوقى سيارة بوك …. باهى باه خلاص نستنو فيك ولما توصلى كلمينا توا نقولك احمد فى اى غرفه ودور … سلام
ام احمد …… خيرها شن قالتلك ؟؟ …..
صفاء …… فى الاول نهارة بالبكى تحسابه احمد صارله شى وهدت شوى لما طمنتها بس قعدت تبكى وقالتلى شوى ونكون عندكم ….
اام احمد …… ومن بيجيبها ؟؟؟
صفاء ….. بتاخد سيارة بوها وتجى بيها لانا هيا تعرف تسوق من لما كانت بنت ..
ام احمد ….. اااااااه ياربى ااااااه نموت ونعرف من كان سبب فى حادت ولدى بس …. انى نعرفه مش متع حوادت الا ماكان دمه محروق ومايشوف فى شى …….. وانى عرفته متعفلق من لما طلع مبكرى وماباش يرد عليا ااااااااااه كان نعرفه بس منى ووووو الله الما نغزه غزززززززز بسنونى
صفاء …….. زمطت ريقها وبعدين قالت … ان شالله يسامح الا كان فيها سبب وخلاص ….
ام احمد ……. انتى تعرفى موضوع ولا لا ؟؟؟ ….. عندى احساس انك تعرفى وساكته قسما بالله لو ماتقوليش الامانقددلك لحمك تقديد قوووووووولى ….
صفاء …….. اه اه مافى شى مانعرف شى انى …..
ام احمد ….. قووووووولى ووالله نبرك عليك قدام ناس قوووووولى ..
صفاء…… احمد وليلى شكلهم متعاركين ومانعرف شى تانى الا هكى وخلاااااص سكريه هالموضوع وخليك فى احمد الا راقد فى مستشفى .
ام احمد …… ماشى ماشى << وقعدت فى داخلها تتبرطم وتعاود ومتغلله على ليلى >>
وهما فى طريق شرين تلفون عصام ولما قام تلفون بيشوف منى المتصل لقاه رهف فاسكر عليها وعادوتله اكتر من 5 مرات بس هوا ماباش يرد وقفل تلفونه بعدها …. وبعد 5 دقايق من صمت فى سياره وصلو ودرسو سيارتهم وتسقدو طول للريسبشن وهنا سالو على غرفة احمد عبد السلام فا اعطتهم فى اى غرفه وفى اى دور وركبو بسرعه واول ماوصلو ماخلوهمش يخشوله فاقعدو يستنو برا الغرفه لحد ماطلع دكتور منها …..
عصام ….. اه شنى حاله يادكتور طمنا ؟؟
دكتور…. الحمد لله … ايده نكسرة ورجله نفتحت 5 بنتوات وعنده شوى كدمات بس الحمد لله مافيشى اى نزيف او كسور مضاعفه فى جمجمه وهدا اهم شى …
عصام ….. الحمد لله ياربى ….. اكيد دكتور نطمنو خلاص …
دكتور …… واللهى هوا فى موضوع تانى بس يفضل انى نكون انى ويك بدون بروحنا …. تعالالى بعدين فى غرفتى …
عصام …. دكتور شن فى طمنى ؟؟؟….
دكتور …. تعال وراى وانى توا نفهمك.

عصام …… صفاء خليك مع امى هنا شوى نمشى مع دكتور ونجى ..
صفاء …. اوك
مشى عصام هوا ودكتور واول ماوصلو للغرفه قاله دكتور …
دكتور …. تفضل قعمز تفضل …
عصام …. شن فى يادكتور ؟؟
دكتور ….. واللهى شن بنقولك ….. احتمال خوك انا ربى مايرزقاش بالاطفال مره اخرى واحتمال يكون شى هوا مؤقت او دائم هدا شى بأيد ربى
عصام …… كيف يعنى ؟؟
دكتور ….. انى قتلك احتمال يكون مؤقت واحتمال يكون لا يعنى فى امل وبالعلاج ان شالله يرجع

عصام …… باهى ونسبه يادكتور فى علاجه كم ؟؟؟؟
دكتور …. للاسف بعد ربى نسبة شفائه 40 %
عصام …… لاحول ولا قوة الا بالله على عظيم
|<< بعدين نزل راسه شوى وغمض عيونه وبعدين شبح للدكتور وقاله >> ومرته دكتور هل مفروض تعرف او لا ؟؟
دكتور ….. اول ماتوصل مرته توا نكلم ممرضه تجيبهالى ونتفاهم معاها انى ماشى …
عصام ….. ماشى دكتور وبارك الله فيك
طلع عصام وكاتم الهم فى قلبه وقعمز جنب امه واخته بستنو امتى يسمحولهم يخشو لااحمد ….. بس ام احمد لما قامت عينها فوق لقت ليلى جايه بسرعه وهنا ام احمد ناضت من الكرسى واستنتها لين تقرب وقالتلها ….
ام احمد …… ارتحتى ارتحتى اك خربتيها وقعمزتى على تلها باهى الولد بسببك رقد فى مستشفى وانتى بنكدك ومشاكلك ديما …. ووواللهى واللهى لو ولدى صارت فيه شى مانى مسامحتك لا دنيا الا ااخره …. حرقتلى قلبى على ولدى ارتحتى … توا انتى هكى بردى قلبك واتهنى ماااااااااشى
ليلى ….. علاش تقولى هكى ياماما انى شن درت ؟؟؟

ام احمد …… انتى شن مادرتيش ….. ولدى اليوم قالب وجهه ونار راكبه فيه على خاطر منى مالا قولى حتى انى الا هوا انى ماتحشمش منى من كتر النار الا ركبتيهاله مشى وسينى وخلانى ندوى بروحى بس نقولك شى حسبى الله ونعم الوكيل فيك قسما بالله لو صارت لولدى حاجه مانى مسامحتك لادنيا لااخره على تعبى فيه 9 شهور وجيبته وتربيته لين عطيتهولك راجل مصنع منع وانتى فى شربة ميه رقدتيه فى مستشفى بسبب مشاكلك حسبى الله ونعم الوكيل ..<< وقعدت تبكى >>
وهنا ليلى من لما سمعت كلام وعزوزتها ودموع يصبو زى الشيشمه وشدت فيها صفاء وقالتلها ….
صفاء ….. معليشى ليلى معليشى امى توا اعصابها تعبانه بس وانتى عارفه هيا قداش تحب احمد ومتعلقه بيه وهيا فى الاخير ام زى اى ام فى دنيا فا ماتزعليش منها باللهى عليك وتعالى استريحى شوى فى غرفه الا جنبنا …
خشت ليلى وصفاء لدار وليلى حكت لصفاء على كل شى وقالتلها ….
ليلى …. انى صح ممكن تسرعت هلبه لما قتله طلقنى ياصفاء بدون مانسمعه بس والله نار ركبتنى والله انى مانقدر نعيش من غيره … وهوا الهواء الا انى نتنفسه والله انى نحبه ومانتخيل حد ياخده منى ….. لو تصير فيه شى نموووت انى ياصفاء نموت …..
صفاء ….. خلاص ادعى لربى انا ينوض حاله كويس …… وربى يشوف فينا ….. وماتاخدىش على خاطرك من امى والله هيا طيبه وقلبها طيب بس الله غالب هيا مرأه كبيره فى سن ولازم نراعوها كلنا وهادى زى امك ياليلى ..
ليلى ….. هيا كلامها صح وعندها الحق انى ماشده فى قلبى منها بالعكس من حقها تخاف على ولدها بس نتمنى هيا تسامحنى وماتاخدش على خاطرها منى بس
صفاء ….. لا لا امى قلبها ابيض وماتخافيش منها و….
ممرضه …. << قطعت عليهم وقالت >> من فيكم زوجة احمد عبد السلام ؟؟
ليلى …… انى وخيتى تفضلى ..
ممرضه …. دكتور يييك فى غرفته تفضلى معاى ..
ليلى …. اوك …. صفاء خلى شنطنى معاك شوى ونجى
صفاء …. اوك حبيبتى نستنى فيك
مشت ليلى مع ممرضه وقبل ماتخش قامت ايديها ودعت لربى انا دكتور مايقولهاش شى خطر على احمد لانا مش رح تسامح نفسها بكل لو صارت فيه شى …
خشت ليلى لغرفة دكتور وخشت ممرضه معاهم وسكرو الغرفه وقعدو تقربيا حوالى ربع ساعه فى الغرفه ودكتور شرح لى ليلى شن الا صار لى احمد بزبط وبعدها ليلى طلعت تبكى وشاده فى حيط وماوصلت لى ممر الا فيه صفاء وام احمد وعصام الا و ……..

يتبع…….

لقراءة الجزء التالي : الجزء الثلاثون من رواية الزوجة التائهة بين الأحلام والواقع

لقراءة الجزء السابق : الجزء الثامن والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .