صدمات تلو الصدمات وأحداث كثيرة تجري مع ابطال الحكاية، ونري كيف يتعاملون معها وكما نعرف إن الأمور إذا تعقدت أكثر فقد حان وقت حلها، لنري ماذا تخبيء لنا الموهوبة لوزة في خبايا هذا الجزء وكيف ستظهر قوة الشخصيات تجاه الأحداث التي لا تحمل سوي الصعوبات لكن ابطالنا لها ، لذلك هيا بنا لنبدأ قراءة الجزء العاشر سوياً .
الجزء العاشر من رواية حالة حب للكاتبة لوزة ليبية
انفتح الباب وصلوا لدور التالث طلع شمسي ووراه جمانة كملت كلامها – به قصدي شن دخل ماضيك في معاملتك الجافة هادي 
…. اتكلم ياشمسي اتكلم اتكلم ياشمسي 
….
تلفتلها شمسي وبكل انفعال مع حركة يديه قالها – انحبك ياهم شمسي انحبك
سكتت جمانة وتشوفله وبس 
شمسي – ها ردي ….
* قرب منها وكانت المسافة متقاربة جدا
رعشت جمانة للموقف الرهيب اللي صاير …
خدالها يدها في ايده وحطلها مفتاح غرفتها في ايدها وقالها – بما ان ماعندكش اجابة للكلام اللي قلته معش اتقولي خيرك اتغيرت ياشمسي … وخلي شمسي يعاني مشقته وهوا ساكت …
رخالها يدها نظرلها نظرة لعدة ثواني
تمالكت فيها جمانة نفسها وقتله – ان … انت عارفني ياشمسي اني مخطوبة
(مش عارف امتى بتفهمي ان خطيبك شخص فاشل … )
[اتحبني ياشمسي ؟؟؟ ماه انا كنت قدامك قبل مايرجعلي حاتم خطرلك توا انك اتقول هالكلام ](لو بيدي نطربقله رقبته خطيبك ونخطبك انا ….لكن انتي شادة فيه مش عارف شن شايفة فيه …..فاش احسن مني هوا)
شمسي – اوك …اسف
جمانة – بالله ماتزعلش مني ياشمسي
شمسي – هذا قرارك وهادي حياتك وانا مانجبركش عليا … لكن تأكدي ياجمانة
في اللحظة هادي زاد اتقدم شمسي لجمانة … اصبح قريب عليها جدا لدرجة ان خدودها ولو حمر …. وحست بلهيب انفاسه … وشافت في عيونه دمعة بسيطة واضح ان شمسي شادها ….
كمل كلامه شمسي – تأكدي ياجمانة ان انا انحبك اكثر منه … وهوا ماحبكش …حاس واحساسي مايكذبنيش انه يلعب عليك ورجعلك مش لانه يبي يرجعلك لا … رجعلك لسبب ثاني الله اعلم شن هوا … و ربي يسعدك في حياتك ….
وخر شمسي وتلفت وتحرك بخطوات سريعة … استدركت روحها جمانة ولحقاته … فتح غرفته شافلها لثواني وخش وسكر الباب …
~~~
خشت جمانة وسكرت الباب و ولوحت شنطتها وقعمزت عالكرسي
[ماتوقعتش شمسي يقول هكي … بس والله انحس ان حق نوعا ما حاتم مارجعليش لانه يبي يرجعلي فيه سبب … لانه وعدني بيعوضني عاللي فات انما شايفة منه معاملة حقيرة احقر من الاول ….. الصبر ياربي نبي زي باقي البنات كيف خطيبهم يدلعهم ويفاجئهم وكان قالوله خبر حلو يفرح معاهم مش اينكدني زي مايدير هوا …. طول فترة خطوبتي ماشفتش هدية بسيطة ولا حتى موسم بسيط في العيد ساعة او خاتم حتى فالصو …. اخ اخ اخ اشمعنى بس اشمعنى انا ….
حي عليااااا ماتصلتش ب امي قتلها الطايرة فيها عطل وبنطر اتباتو انهار احرف …. منين بنتصل … حتى كلمة للسر متع نت الفندق مانعرفهاش بش انكلمهم عالفايبر …. زعما نمشي لشمسي … لا لا اكيدة متكنطي مني …. باه كيف اندير ياربي كيف
~~~
(حتى صارحتها مازال اتحب حاتم 
… مش عارف علاش تبيه مش عارف شي يخنق بجديات …. خلي انوض ناخد دوش والله طيرتهالي الجمانة هادي …. اياح مش جايب حوايج النهار المبارك )
* طق طق طق *
اكيدة معتز هذا … باهي جي فوقته خلي نطلعوا ناخد ملابس م السوق ….
فتح شمسي وكان لابس كنتيرا وعضلاته بارزات …
جمانة انكسفت من شمسي ….
شمسي – نعم
جمانة – ك … كككنت بنقولك ا هئ احم
شمسي – ايه وبعدين
جمانة – نبي انكلم اماليا …. مايندروش عليا بايتة
شمسي – ماعنديش شفرة طليانية
جمانة – كلم متع الفندق نبي كلمة السر متع النت
شمسي – باه شوية نلبس سوريتي وننزلهم
جمانة – باه تلقاني في غرفتي
شمسي – باه 
جمانة – مافيش ظاعي لشبحة اهياه
شمسي –
جمانة – به به خلاص نستنى فيك …
مشت جمانة وسكر الباب شمسي بدون مايضيف كلمة …بعد شوي نزل وخدي كلمة السر وركب وطقطق عليها فتحت جمانة الباب …
شمسي – هاك اه …هادي كلمة السر
جمانة – اوكي شكرا …
شمسي – العفو …
* كلمت عيلتها وفهمتهم كل شي هدرزت معاهم شوي وسكرت … *
(خيره حاتم مش مدورني برغم انه موجود عالفايبرر خلي نبعثله مسج)
>>>شن ايدير حتومي
<<<خيره رقمك خارج التغطية
>>>مازال ماروحتش
<<<وين انتي توا
>>>في ايطاليا
>>>ياسلام هيجي عاد واخدة راحتك
>>>شن انهيج متاعك قاعدة في الفندق
<<<بوب بوب بوب فندق شن اديري فيه
>>>ماهو الطايرة فيها عطل مشي اطرينا نقعدوا اهنا اليوم بنباتوا <<<بتباتي برا ياساقطة مع الطليان
>>> احترم نفسك وحسن ملافظك مانسمحلكش اتقول عليا هكي
<<<باهي اسف اسف لكن شن البيات هذا قصدي ماتفاهمناش ع هكي
>>>هذا ظرف طارئ شن بندير يعني والا تبيني نبات فشارع
>>>ومن خلص عليك حق الغرفة بما انه ظرف طارئ والشركة الطيران ماغطتش تكاليف اقامتكم
>>> الكابتن خلص
<<<ايه توا خلص في الليل تلقيه قدام باب دارك
>>> احترم نفسك ياحاتم كلام كبير اللي اتقول فيه راه
<<<ردي ردي اهو بنتصل اتصال فايبر ….
جمانة – نعم
حاتم – كيف قتيلي بيات ياهانم
جمانة – اللي هناك قلتهولك خيرك هكي بدل مااتقولي ع سلامتك ردي بالك ع روحك طايح فيا بكلام مش تمام
حاتم – ماه من غيضي ياحبي ان انا مش معاك عرفتي كيف
جمانة – به وينك اليومين اللي فاتوا
مش مدور
حاتم – ظرووف ياروحي …. اسمعي تو انكلمك بعدين جوني الشباب
جمانة – ديما وانت والشباب سلام
حاتم – سلامات ………. وين ياحبي وين عطلتي عليا نعيما نععيما
منيرة – الله ينعم عليك ياعمري
حاتم – ماتقوليش بتروحي
منيرة – اي امالا شنو … خلاص هوا داك غير امي تبدى اتقصقص وين كنتي ووين جيتي
حاتم – غير تعالي ياحبي مازال ماشبعتش منك
قعمزت بحداه منيرة وقتله – حقا في من كنت اتكلم قبل شوية
حاتم – واحد صاحب
منيرة – هههه غريبة تدودود انت وياه هكي اتقول اتكلم في بنت
حاتم – بنت منو بالله …فيه حد بحداه القمر ويشوف لنجوم
منيرة – هههههه به قولي امتى بنديروا سفرة حتى لتونس
حاتم اتخزرط لان جمانة شغلها ف المطار مرات تشوه فقالها – ماعنديش فلوس توا … خلي لين انحصل قبل
منيرة – بش قتلي عندك
حاتم – لا ماهو ادكرت فيه ولد يبي مني فلوس مشب رديتهمله …
هاتي بوسة …هاتي …
تن تن ~~ رسالة في الفايبر … ووصلت واحدة تانية
منيرة قامت تلفون حاتم وبتفتح القفل ماباش ينفتح – شنو غيرته ؟؟
حاتم – اي غيرته
منيرة – علاش
حاتم – صغار اختي يلعبوا بيه وعرفوا الرمز
منيرة – به شن هوا
حاتم – خليك منه توا وتعالي جنبي
منيرة نظرتله نظرة شك وقتله – اه باهي به
~~~
(الصبر ياربي ماسد انه كساد زيد عليها مش قادرة اندوش لان ماعنديش حوايج تانيات غير هالبدلة ….خلي نكلم شمسي كان طالع يجيبلي حتى بيجامة ….
*واتصلت عبر الفايبر *
جمانة – اه شمسي
شمسي – انعم
جمانة – بنطلب منك طلب لو مافيهاش مانع يعني
شمسي – تفضلي
جمانة – كان بتطلع لسوق والا محل ممكن تاخدلي بيجامة
شمسي – به وتي روحك وتلقيني قدام باب الفندق نرفعك محل واختاري
فرحت جمانة وقتله – ثواني بس نواسي شعري ونلبس جاكتي وننزل
شمسي – اوك
*واست شعرها ولبست دجاكتها ونزلت
دوراته لمحاته قدام باب الفندق …
طلعت وقتله – الجو حلو صح
شمسي – نوعا ما
جمانة – هيا وين بنمشوا
شمسي – فيه شوي محلات بعاد من اهني بشوي
جمانة – انت جيت قبل
شمسي – اي جيتلهم السنة اللي فاتت كان الذاكرة ماخانتنيش كنت بناخد لري….
جمانة – شن بتاخد
شمسي – اه ماتاخديش فبالك … هي خلي نمشوا
طلع معتز من الباب شاف شمسي وجمانة – بست شمسي
تلفت شمسي – انعم
معتز – وين ياراجل من بكري انطقطق ع دارك وانت اهنا و طالع
شمسي – برا انت خود حاجتك من محلات بعدين نتلاقوا
معتز – طول هكي قضيتنا
شمسي – تو نهدرزوا برا ياراجل
معتز – باهي باه نتلاقوا
جمانة ل شمسي – ماكنتش نحساب انك طالع انت و معتز فسدتلك الطلعة مع صاحبك
شمسي – معليش فداك
[سبحان الله ضيع طلعة ادهوير وتفسيح مع صاحبه ع خاطري مش زي حاتم لما نتصل بنهدرز ايقولي جوني الشباب … وطالع مع الشباب هيا مكالمة ومستخسرها فيا ]
شمسي – جمانة !
جمانة – نعم نعم
شمسي – من بكري انادي ونقولك هيا
جمانة – معليشي سرحت … هي …
الله محلاه الجو اهنا … لو بإيدي معش انروح بكل
شمسي – تحبيها ايطاليا
جمانة – اي بس اول مرة نزورها …
شمسي – تبي تتمشي والا ناخدوا تاكسي
جمانة – خلينا نتمشوا احلى
شمسي – اوك ….
جمانة – تعرف
شمسي – نعم
جمانة – صاحبتي صاحبها قالها ياساقطة
وقف شمسي وقالها – جمانة كان حاتم قالهالك قوليلي بس والله نجبدله لسانه ونكسرله سنونه
جمانة – اه ههه لا لا مايسترجاش يقولهالي نحكي ع صاحبتي قصدي هيا المفروض معش اتكلمه والاه
رجع يمشي شمسي وقالها – مدام ماحترمهاش توا فاكيد مش حيحترمها بعدين ونصيحتي تبعد عليه
جمانة – ماه هيا اتحبه
شمسي – الحب اللي بيجيب الذل بطريقة هادي بلاش منه … الحب احترام و ود ومحبة وصدق واحساس الحب اهتمام الحب مشاعر منبعها القلب …
جمانة – الله كلامك حلو يافيلسوف المشاعر
شمسي – ههههه
جمانة – قصدك معناها احتمال انه يهينها اكثر كان خطبها والاه
شمسي – اللي يتفوه بكلمات زي هادي اكيد يقول اكثر من هكي …. شوفي ياجمانة الانثى رقيقة بطبعها حساسة كلمة واحدة مش تمام اضايقها وكفيلة انها تخليها يوم تام منكدة … علاش الرسول الكريم عليه الصلاة والسلام قال رفقا بالقوارير
جمانة – عليه الصلاة والسلام
شمسي – والقوارير الزجاج الرقيق سهل الكسر ….
جمانة – باهي حتى لو بتبعد عليه كيف بدير في حبها ليه
شمسي – يرزقها ربي ابرك منه ان شاء الله لما بتفكر تفسخ منه ماتحطش فبالها دوة اهو انا فسخت من موال بيتقدملي لا اللي عطاها مرة قادره يعطيها تانية وتالت العاطي حي
جمانة – محلا كلامك ياشمسي ….
شمسي – انتي احلى ….
وفي هاللحظة يد جمانة تحادت بيد شمسي اي لمسوا بعض وهما يتمشوا …
ابتسمت جمانة ومش عارفة السبب ولاحظ شمسي ابتسامتها ….
شمسي – هذا اول محل … تعالي هي
جمانة – هي ….
خشت جمانة ولفت في المحل عجبتها بيجامة بس لاحظت السعر غالي …
[لا لا فكني مش حنكثر عليع ناخد حتى هادي وخلاص متع مشي حالك هيا بنرقد بيها ليلة وخلاص ]
شمسي – عجباتك هادي ؟؟؟
جمانة – اه لا لا عجبتني اهياه
شمسي – امممم به خلاص خوديهم الزوز
جمانة – علاش هوا يوم واحد … ليلة وفراقها صبح 
شمسي – عادي تلقيهم البسيهم ختى وقت اتروحي …. 
جمانة – لا لا مانبيش نكثر عليك
ابتسم شمسي وخدي منها البيجامة وقام بيجامة الثانية وماشي بيخلص
جمانة – نعم ….اه ايه هيا
شمسي – مزال دوري تعالي فيه محل رجالي ف الشارع المقابل
جمانة – به …
* بعد ماوصلوا للمحل ولفوا وشافوا الملابس المعروضة *
جمانة – خود هادي شمسي انحس فيها تطلع عليك
شمسي – حمراء
جمانة – عادي شن فيها … انحب اللون الاحمر انا
شمسي – بس انا انحس فيه مش رجولي الاحمر
جمانة – عادي هيا بيجامة
[هاه مش حياخد بخاطري وياخدها هي …. الرجالة كلهم يكسروا بالخاطر ] شمسي – اوك حناخدها
[حي عالجو بياخده اللون الاحمر ع خاطري … ] جمانة – بتاخدها
شمسي – اي
[كان حاتم راه دارلي عرس ومزقها فوق راسي ] شمسي – خلي نركبوا لطابق الثاني ناخد كاجوال بعدين ناخدك لمحل كاجوال نسائي روعة …
جمانة – لا لا مانبيش نكلف عليك بجد … طيارتنا غدوة العشية فمانحتاجهمش
شمسي – اعتبريها هدية
جمانة – بمناسبة
شمسي – بدون مناسبة او اعتبريها هدية من ايطاليا مش مني هههه هكي تمام
جمانة – هههههههههه باهي به
* ركبوا هما الاتنين لطابق الثاني اختارت جمانة لشمسي ملابس كاجوال وكان شمسي سعيد بتواجد جمانة …. وجمانة كانت مبسوطة اول مرة تطلع مع شاب وتختارله ملابس …. بعدين مشوا للمحل النسائي اختارلها شمسي لبسة ع ذوقه
شمسي – زودي عازمك ف مطعم
جمانة – لاااا هلباااا هكي فلست بيك انا اليوم
شمسي – بالله عليك معش تدويلي عالفلوس مانحبش ندير حاجة ويقعد حد يقولي فلوس فلوس وسخ دنيا هما ماشيات ماشيات
[حي ع عمك ياشمسي حي …مش عادي انت مش عادي وحق ربي فيك حاجات حلوة صدق من قال تعرف صاحبك في السفر ] شمسي – هيا نمشوا
* مشوا للمطعم الايطالي الفاخر …
جبدلها الكرسي وقعمزت… حست روحها جمانة اميرة اول مرة شخص ياخدها للمطعم وفي اجواء شاعرية … ونظارات الموجودين عليهم….. كابتن والمضيفة تبعه ♡
قعمز شمسي قبالتها …
شبك يديه وحطهم عالطاولة … شافلها لثواني ونزل عيونه …. في نفس اللحظة نزلت عيونها حتى هيا …بعدين شافوا لبعضهم في نفس الوقت..
(لو نقدر بس انحول هالمطعم قاعة فرح … والموجودين عيلتي وعيلتك ) [سعدود مرتك بيك ياشمسي سعدودها بصدق ]
(متخيل انك مرتي جمانة سامحيني في هالخيال بس معليشي خلي نتخيل اقلها نفرح بهاللحظات اللي انتي فيها معاي )
شمسي – شن اتحبي تطلبي
جمانة – اممم اللي بتطلبه
شمسي – نبي ع ذوقك هي
جمانة – بس المينيو طليانية شموسة
سكت شمسي اتقول هرب عليه الضي مع كلمة شموسة حس بتوتر رهيب واذكر ريفاء كيف اتقوله شموسة …
قبل ثمانية شهور بتمام كان هوا وياها في المطعم ….و لا شعوريا حط يده ع يدها وحرك صبعه عليها بحركة دائرية رومنسية….انكسفت جمانة وجبدت يدها ….
شمسي – اسف بالله عليك سامحيني والله مانقصد
جمانة منزلة راسه ….. وماردتش عليه
شمسي – نعتذر مرة ثانية … سرحت بس ومن سرحتي ايدي تحركت لا اراديا
جمانة – باهي غير معش تسرح بس ….
شمسي – تمام حاضر
جمانة – ايه قتلك القايمة ايطالية اختارلي انت
شمسي – اه تو نترجملك نعرف شوية طلياني ههههه
جمانة – هههه ترجم هي
~~~
منيرة اتفكر …. حاسة ان معتز داس حاجة … مش عليا يامعتز مش عليا انا خابزاتك وعاجناتك ….
منيرة دارت روحها تبكي وخشت ع حاتم في الدار وقتله – حاتم حاتم…
حاتم – شن فيه خيرك
منيرة – اعطيني تلفونك فيسع
حاتم – علاش خيرك
منيرة – امي امي يامعتز اشبح شن صارلها فصل عليا تلفوني مافيش شحن والضي هارب
حاتم – باه هاك هاك ….
خداته منيرة وبتفتحه وقتله – هاك افتح الرمز فيسع
خداه حاتم فتح الرمز ووقفت ع راسه شافت كيف قتحه ووقت قام راسه دارت روحها تبكي … خدت منه النقال واتصلت برقم امها وقتله ماتردش
حاتم – عاودي ثاني
عاودت منيرة وفصلت المكالمة وخشت ع الفايبر وشافت محادثة حاتم مع جمانة وانصدمت وزادت خشت عرسايل وقرت الكلام كله كيف لن حاتم يتجدى في جمانة بش ترجعله …..
حفظت الرقم وسكرت كل شي وردتله نقاله وثتله – نوض روح بيا نوض خلي نشوف نشوفها
حاتم – ماردتش عليك … هيا نلبس تيشرت بس …. ان شاء الله اتكون بخير بس ….
~~~
تموا عشي جمانة وشمسي وطلعوا من المطعم يهدرزوا ويضحكوا وكانت جمانة في قمة سعادتها حست نفسها فعلا مع راجل حست بالامان التام برغم انها ف بلاد غربة ….
روحوا هما الاتنيين يتمشوا
جمانة – ماتعرفش قداش وجودك ييعدني شمسي …. بجد خاطري نحكيلك ونفضفضلك بس ماحبيتش انضيع هاليوم الحلو بمشاكلي
ابتسم شمسي وقالها – ولا ايهمك فضفضي
جمانة – اكيد حنفضفضلك لان زي قبل نرتاح لما نحكيلك ونفضفضلك … بس توا مرتاحة حتى قبل مانفضفض بجد ربي يحفظك شمسي امثالك قلال في هالوقت
شمسي – ويحفظك ياغالية
*وبمجرد ماوصلوا للفندق نقالاتهم اقترنوا بالواي فاي …. وجت رسالة عبر الفايبر لجمانة بس مادورتهاش ….
شمسي – تصبحي ع خير جمانة
جمانة – وانت من اهل الخير سعيدة ….شمسي
شمسي – نعم
جمانة ابتسمت وقتله – شكرا ع كل شي … انبسطت معاك اليوم
شمسي يتمتم بصوات منخفض – عقبال العمر كله معاي
جمانة – ماسمعتكش
شمسي – قتلك ان شاء الله ديما مبسوطة ….
جمانة – هههه ان شاء الله اجمعين …. سعيدة
خش شمسي لغرفته وهوا مبتسم … فتح اغنية عايشة حالة حب تبع اليسا …. عايشة حالة حب معاك وخذاني وصعب انها تتكرر ثاني وبعيشها معاك لو كنت بعيد او قدامي …..
قعمز شمسي عالكرسي وسرح للحظات وهوا يدندن مع الاغنية
خدت جمانة مستلزمات وخشت بش تاخد دوش ….وبعد شوي طلعت ولبست بيجامة الحلوة وصلت الصلاة اللي فاتتها ….شمسي خلى الاغنية ودارلها تكرار وخش للحمام بياخد دوش ولا يزال يسمع في الاغنية …… قعمزت جمانو ع سريرها … وخدت نقالها فتحت الفايبر ….لقت رسالة من رقم غريب
فتحتها ودققت فيها وشهقت شهقة قوية وانصدمت وبكت وناضت جري طلعت من دارها واطقطق ع دار شمسي بكل قوتها
(عايش حالة حب …. برغم انه يوم الا انه احلى يوم ونتمناه مايتمش و تمنيتها مرتي جمانة ….الله وطالعين شهر عسل اهنا والجو روعة ومرة مرة ناخدها ف حضني هكي اخ ولا اروع …. شن هالطقطيق هذا …. اكيد معتز مايخليش من ايدوش ع راحته …. فوتني ياراجل مش حنفتح خليني سارح في هاليوم الحلو …. اياح خيره معش بطل اطقطيق …. خلي انشوفه بالك صاير معاه حاجة )
طلع من الدوش ولف نصه بفوطة وجسمه كله مبلول ومشي فتح الباب …. اذ بها جمانة خشت فحضنه طول بدون اي مقدمات ….
شمسي معش فهم شي من شي شعور رهيب سيطر عليه اتملك عواطفه واستوطن بداخله لدرجة حس بقشعريرة تسري في جسمه لين غمض عيونه….
يتبع…….
لقراءة الجزء التالي : الجزء الحادي عشر من رواية حالة حب للكاتبة لوزة ليبية
لقراءة الجزء السابق : الجزء التاسع من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
