الجزء

الجزء الأول من رواية حكاية دعاء

الجزء الأول من رواية حكاية دعاء

في الجزء الأول من رواية حكاية دعاء للكاتبة سلطانة كوكي دعونا نبدأ بمعرفة كيف ستبدأ الرواية وعن شخصيات الأبطال ؟ كل هذا وأكثر في السطور التالية بإذن الله .

الجزء الأول من رواية حكاية دعاء

نوال : يا دعااااااااااااء وينك يابنت شيطتي ريقي 🗣
سجى جات تجري : يا ماما راه دعاء مش قاعده هنااا
نوال : وين عدت طح سعدها ناويه تجنني الفصعونه
سجى : مانندريش وين عدت من امبدري ما شفتهااا
نوال : توا ندور عليها قبل ما اظلم الدنيا تعالي معايا
سجى : حاضر وطلعو يجارو يدورو علي دعاء يلي اختفت من حوالي ساعتين شافو المزرعه كلها بس ما شافوها وأنصدمو بعد لقوها راقده عالعشب ومعاها الكلب متعهم : دعاء نوضي ضاقت الواسعه ماترقدي الا هناااا
دعاء فتحت أعيونها ولقتها قدامها هي واختها سجى قعدت تتاوب : كنك يا ماما تعيطي بسم الله شنو درت
نوال : وتسألي اخرا يا فصعونه من امبدري ونحنا ندورو عليك راقده في اخر الدنيا مش عندك سرير ارقدي فيه
سجى تضحك عليها وخاصة بعد كشخت وقلبت وجها
دعاء : والله يا ماما انا كنت نلعب وجريت مع دوني 🐕 واجد اشويه نعست هنا والجو كان سمح وشمس تهبل
نوال : باهي صبي الدنيا بدت اظلم وخشي دوشي بسرعه وشوفي قرايتك بكرا عندك مدرسه في الصبح
دعاء : ماعنديش نيه نمشي للمدرسه ونبي انغييب
نوال : اتغيبي عينك يا طيح السعد كملتيها كلها غياب
سجى : قالتلي يا ماما ماتبيش تقرا وتبي المزرعه وبس
نوال : العتب لا عليك ولا عليها العتب علي باتكم مدلعكم ومخربكم ويخلي فيكم في المزرعه اتعيشو في معناتها
دعاء : يا ماما انتي ليش ماتحبيش المزرعه وهي سمحه واجد وانا نحبها وغاليه عليا بس مانحبش المدرسه لان معلماتها ديما يعيطو وخلاص وانا كرهتهم ومانحبهمش
نوال : من الشطانه اكيده اديرو فيها في الحصه وتحكي مع البنات هذي مدرسه مش نادي للهدرزه واللعب 😒
دعاء : والله يا ماما انتي واعره وتحكي زيهم اخرااا
نوال : امشي داااه ان شاء الله ناقص غير اتقوليلي حتى انتي مانحبكش زي معلماتي عليك جيل جيلكم يقهر
دعاء عدت تجري وتضحك ديما متعبه امها يلي تكره المزرعه بشكل لا يوصف وتبي تعيش في بنغازي ولكن زوجها مايبيش يسيب مزرعتهم يلي انولد فيها وتربى فيها ولا يسيب رزقه وعندهم في المزرعه اشجار مثمره ودجاج ومواشي وبقر وحتى حمار وحصان بس مش عاجبها شي وماتبيها ولا تبي تكمل عمرها فيهاااا
_____
تعالو نعرفكم عليهم الاب أسمه يوسف عمره 39 سنه حنون بكل مع بناته الأتنين وولده يلي ديما معاااه
الزوجه نوال 30 سنه طبعها صعب أشويه وماتحبش العيشه هذي وتبي بنغازي حداه هلها واقاربها وبسس
ولدهم الكبير معتصم 13 سنه يقرا اولى اعدادي نشيط واجد ويحب يقعد مع باته طول الوقت ويتعلم منه
اما دعاء المشاكسه عمرها 11 سنه وتقرا خامسه ابتدائي ديما متعبتهم ولسانها طويل وفوقها تهرب من المدرسه بس اكتر شي تهرب من الحصص امتعاتها وتقعد وراه المدرسه بدون ما يشوفها حد ويا تاكل يا ترقد بالنوم
سجى هي العاقله وعمرها 8 سنوات وتقرا تانيه ابتدائي
يعيشو في مزرعة باتهم يوسف يلي فرحان بعيلته الصغيره ولكن زوجته نوال مش فرحانه ابداااا
_____
طلعت من الحمام بعد دوشت وامها نوال معلمتها كيف ادوش ومعتمده علي نفسها عكس سجى مزالت تهتم بيها نوال وتعلم فيها عدت لأمها : ماما امشطيلي شعري
نوال : اه منك وخلاص ديما نعلم فيك ومافيش فايده
دعاء : مانحبش نمشطه ومانعرفش ومانبيش نتعلم
نوال كرتها وقرستها مع وذنها : لسانك طويل ويبي قص
دعاء : اااه لا مش طويل والله قصير يا ماما وطلعاته لها
سجى تضحك بعد شافت لسانها 👅 الطشه 😂
نوال زقتها : خشيه لسانك راه نقطعه لكي بالموس
دعاء : اذا قصيتيه ليا مش حانقدر نحكي وحتى بابا وربي حايزعلو منك واجد لانك درتي فيا هكي
نوال : ياربي صبرني عالبنت هذي شنو قصتك انتي
دعاء : مانعرفش انتي احكيلي قصتي ونسمعهااا
نوال : ووووو راسي حاينفجر منك كلمه بكلمه خلاص
دعاء ضحكت علي عصبية امها وخلتها تمشطلها شعرها يلي كان طويل واجد رغم صغر سنها وبعد كملت امها عدت تجري لغرفتها وتبي ترقد عشان ماتبيش تقرااا
سجى جاتها : حي عليك من ماما توا تضربك صبي
دعاء : قوليلها عندها حراره ومريضه واجد وقعدت تكح
جات نوال وشعلت الضي : راقده توا شنو قتلك انا قبل اشويه مش قتلك اقري يا طيح السعد كنك معايا انتي
سجى : يا ماما قالتلي عندها حراره ومريضه تبي ترقد
نوال : ما فيها شي كيف الحصان هيا صبي خيرلك علي جيت يوسف ومعتصم من برا لقوها تنوض في دعاء يلي مابتش تتحرك ومغمضه اعيونها اول ما سمعت باتها جاه عدت تجري صاروخ لعنده ومسكت فيه : يا بابا انا والله تعبت اليوم ونعسانه نبي نرقد بس ماما تبيني نقرا وتوا
يوسف بحت في نوال المصدومه : كنك معاها خليها ترقد وتتريح لاحقه عالقرايه توا تقرا بكرا وانقريها انا اخرا
نوال : بنتك ماتبيش تقرا اساسا ولا تحب تقرا وكذابه
دعاء : عيب يا ماما انا ما نكذبش وقتلك اني مانحبش المدرسه والمعلمات مش القرايه 😎 بس انا تعبانه توا
يوسف يضحك : خلاص امشي تريحي يا عيون البابا
دعاء فرحت : شكرا يا بابا وباست خده وعدت تجري
نوال : انت خربتها خليني انربي بنتي ونأدبها 😤
يوسف : لا والله وهي مزالت صغيره بالشويه عليها
نوال : هذي عقلها اكبر مني ومنك ولسانها 10 ميتروو
يوسف ومعتصم ضحكو لان عارفين دعاء كويس ومتعبه واجد : خلاص وسعي بالك توا تكبر وتعقل اصبري عليها
نوال : ركبلي الشيب في راسي منها سادني انت وحق الله
يوسف : لا حول ولا قوة الا بالله بدينا يا نوال تي كنها المزرعه في يلي مش لاقيهااااا بكل وبعدين انا قتلك مانقدرش نسيبها وننقل لبنغازي في مسافه كبيره وفوقها زحمه ماعنديش راس نقعد ماشي وجاي ارحميني وارضي بنصيبك الله يربحك ما تزيديها عليا مروح تعبان وعدا
نوال لحقاته : يعني انا مش طالبه شي مستحيل نبي حوش كيفي كيف خواتي والناس في بنغازي شنو فيها
يوسف : بعد يكبر معتصم توا نديرله سياره يشيلك ويجيبك امتى ماتبي لكن توا مانقدرش نجيبها له مزال صغير وهو يعرف يسوق بس خايف عليه واجد
نوال : تبيني نراجي 10 سنين يالله تحملت 13 سنه
يوسف : لا مش 10 سنين 6 سنين ونجيبله سياره
نوال : صبرني ياربي انت مش فاهمني ولا حاسس فيا
يوسف : والله ماعندي مانديرلك يا بنت الناس ماحدش قالك وافقي عليا وانتي عارفه عندي مزرعه وعايش هنا
نوال : علي اساس الكلمه كلمتي لو عليا راه رفضتك بس باتي الله يرحمه ويسامحه هو وافق عليك وزوجني لكي
يوسف : لو تبي انطلقك ماعندكش مشكله ولكن المزرعه طلعه منها مستحيل ومزال شريك باتي الله يرحمه في المزرعه ماجش وهو يملك نص المزرعه الكبيره هذي
نوال : قصة الطلاق في كفه وصدمتي التانيه بالشريك في كفه تانيه ومنين طلع الشريك هضا ويقيدني اخراا
يوسف : استغفر الله العظيم علي اساس يبي يعيش معانا في نفس الحوش وهو يملك نصها هضا حقه يدير يلي يبيها في قطعته حتى لو بناه حوش مش شورناا بييه
دعاء تسنط عند الباب عدت تجري لغرفتها : حي شكله حايجونا ناس ويقعدو معانا يا سجى ويقيدوني زي ماما
سجى ساكته ومش معدله عالموضوع ولا تحب تدخل بس دعاء فضولها يبي يقتلها وتسحبهم حايقعدو في نفس الحوش وطول الوقت تفكر في الموضوع هضا وبعدها نعست ورقدت للصبح نوضتها امها : نوضي سادك نوم امشي توضي وصلي وراك مدرسه هيا تعبتيني صبي
دعاء رقيتلها وتبي ترقد صبت وعدت للحمام ورقدت وهي مقمعزه وطولت اخرا بس نطت مفجوعه بعد خشت عليها امها يلي لقت الباب مسكر بدون مفتاح : ما شاء الله اول حاجه راقده في الحمام ومش مسكره الباب وراك كويس وتاني حاجه حتى وجهك ما غسلتيه كنك انتي تبي تجلطيني اغسلي وجهك وتوضي واطلعي تواااا
دعاء : والله نعسانه نبي نرقد اشويه بس يا ماما اشويه
نوال : مافيش وهيا اطلعي خفيهاا ودعاء تحرق 🔥 توضت بسرعه وطلعت تصلى وامها تراقب فيها طول الوقت لان متعبتها وبالأيش ادير الحاجه بعد صلت فطرت دعاء وهي ذبلانه ونعسانه بكل وسجى عادي مش نعسانه بعد لبسو جاهم باتهم : هيا يا بنات نوصلكم بسرعه
دعاء تتاوب وجات هي واختها ولحقوه للسياره وصلهم للمدرسه بس دعاء ماعدتش لفصلها ولفت خلف المدرسه ورقدت في العشب قعدت فتره طويله هنا جاه وقت الاستراحه متع الفطور وكان في طالب جديد يتمشى في المدرسه ويشوف فيها كويس بس وهو يمشي تعتر في شيء وقريب طاح وانصدم بعد شاف طالبه راقده بس ناضت مفجوعه بعد خبط فيهااا : انا اسف ما شفتكش
دعاء : عماه ما اتحقش انت كسرتني الله يكسرك ايووه
منتصر عصب : كنك تعيطي انتي وبعدين انا تأسفتلك واحترميني انا اكبر منك ونقرا في الثانوي 🙄
دعاء بهزوه : حاجه والله كبيره شنو تبيني نديرلك وانت جعزتني وانا مانحبش الناس المجعزه يلي زيك
منتصر عصب : انتي وحده قليلة ادب كنت فرحان بالمدرسه اول يوم ليا ونلقا عفريته في وجهي زيك
دع
اء : انت العفريت مش انا وما يحكي الا المقهور
منتصر : انقنك الا مطرشقه امشي لفصلك احسن
دعاء : مش شورك بيا وهضا مكاني انا امشي غادي
منتصر : مش مكتوب بأسمك ولا شفته اصلا اسمك
دعاء رقيتلها : انت بارد ودفاته نلقاك هنا انوريك بعدين
منتصر : حانجي غصبا عليك وتقدري تلزيني انقول للمدير لقيتها راقده في العشب وشكلها مسيبه الحصص متعاتها
دعاء : طيح الله سعدك يا بصاص يا معفن خزي علي شكلك وخدت شنطتها وعدت وهي تعارك وراقيتلهاا
منتصر : عليك ام لسان يا ساتر فرخه صغيره وترد اخرا والله عليك جيل معفن والعيشه في بنغازي خير من هنا بس حظي باتي جابنا هنا وشكله يلي هنا كلهم لسانهم طويل وانا مانحبش الهرجه ولا الصوت العالي عليك اجعاز وحط سماعات في وذنه وشفاته دعاء من عند الروشن عدت تجري للمدير : يا استاذ راه الطالب يلي في الثانوي داير سماعات واكيد عنده تليفون وهو ممنوع هنا 😎
المدير : من هضا والله نكسره له وهي شيرتله عالمكان ومابتش تمشي معاه عشان مايحكيش عليها وعلي رقدتها في العشب قرب منه المدير : انت يا طالب مش قلنا ممنوع التليفونات اول يوم لكي بسم الله جيبه هناا
منتصر بحت فيه : عفواا ؟ انت قلت تليفون ممنوع ماقلتش المسجل والاشرطه ممنوعه وطلع المسجل الصغير من جيبه : هضا مش ممنوع ومش تليفون
المدير : وشنو تسمع عبد الحليم حافظ ولا علم امتعنا
منتصر ضحك : لا والله نسمع في شعر نزار قباني
المدير : عليك جيل هيا امشي جوا والمسجل ماعش تجيبه تشوم عالطلبه يقعدو كلهم يجيبو زيك وكل واحد يسمعلي حاجه هذي مدرسه مش معهد موسيقه وشعر
منتصر ضحك وفي نفسه : عليك طيحه سوده نوده الله يسامحك يا باتي جبتني في مدرسه معقده كنت متريح في مدرستي وكل شي مسموح بس هنا حسسوني اني من كوكب اخر ربي يصبرني عليهم وخلاص 🤦🏻‍♂️
وفي العشيه عدا هو وباته وامه للمزرعه يلي نصها ملكهم ومنتصر قالب وجه ومايبيش يقعد هنا : توا يا باتي عليش تبينا نعيشو هنا بصراحه ماتريحتش بكل
محمود : نحنا جينا توا للمزرعه بسم الله وبعدين هضا رزقي ومن حقي نقعد فيه وحكينا فيه الموضوع اسكت
ايمان امه : كنك يا منتصر والله تهبل ما شاء الله عليها
منتصر : تعودت عالمدينه وعلي اصحابي وكل حاجه
محمود : توا تتعود عالسكنه هنا وامس كيف انتقلنا واجرنا استراحه صغيره بعد نكملو حوشنا انجوه هنا ايمان بحتت فيه : باهي حكيتله لولد المرحوم عشان جيتك وتبي تبني في قطعتنا لازم يكون عنده العلم
محمود : اكيد نبي انقوله وانا جبتكم هنا نشوفو المزرعه ونعدو لحوشهم قاعد جوا نحكو معاهم ويكون عندهم العلم بقرارنا وهيا نمشو تأفف منتصر وعدو مع بعضهم في أتجاه الحوش يلي واضح عليهم من بعيد انه كبير وسمح كانت الطبيعه خيال وبان عليهم المواشي والبقر
دعاء تتفرج عالبقر هي وسجى وتشير علي كل بقره وتضحك عليها : هذي تشبه ابله زكيه ديما معصبه
سجى تضحك : توا تضربك ماما زي نهارتها سمعاتك
دعاء : انا ما نخافش والعجل هضا يشبه الطويل يلي امبدري شفتيه مع المدير في وقت استراحة الفطور
سجى جات عينها عليه هو وعيلته شيرت عليهم : بحتي وراكي يا دعاء اهو جاه لعندنا توا يقولها لبابا وماما
دعاء لفت وهي مصدومه بعد شافت منتصر يلي حتى هو انصدم بعد شافها طاحت في جهت العجل والبقر قريب هرسها العجل يلي متعود عليهم وخر لكن دعاء خافت يقولها لباتها قعدت تبكي زي الطفله دموع شلال 😭
منتصر قالب وجه وفي نفسه : طيحه بسيطه بكتها شنو ادير لو هرسها العجل ونطحها تنتحر الفصعونه هذي
امه : اسكت عيب وحرام البنت صغيره شكلها وقربت منها حطت يدها علي كتفها : بسم الله عليك كنك تبكي هكي
دعاء بكذب : العجل عفس علي يدي توجع فياا ااااه
سمعتها امها جات تجري وشافت ناس اول مره تحقهم انفجعت : من انتو وكنها بنتي تبكي شنو درتولهاااا
وقبل ماتحكي الام والاب حكاه منتصر : اول حاجه بنتك طاحت بروحها ما ضريناها وتاني حاجه نحنا جينا لنص ارضناا وملكنا ونبو نبنو حوش في قطعتنا بأذن الله
نوال انصدمت واذكرت كلام يوسف بلعت ريقهاااا
دعاء سكتت وهي مصدومه وفي نفسها يعني الطويل هضا حايعيش في ارضنا طح سعده ريت كيف يحكي مغرور خزي عليك شكل وشعره مصبي زي شوك القعمول
منتصر جات عينه عليها وشافها تكشخ في وجه وتبحت فيه من فوق لتحت ربع ايديه : مش كنتي تبكي انتي
دعاء قعدت تبكي اخرا : اه يا ماما يدي قعدت توجع فيا اخرا ااااه خزي هالعجل هو السبب عفس عليا 😭 اااه
امها : انا اسفه وتفضلو جوا توا نكلم يوسف يجي وقربت من بنتها دعاء : وين الالم بسم الله عليك هيا صبي
دعاء مسكت فيها وتبكي ودموعها شلال وكأن فعلا عفس عليها ومنتصر مصدوم فيها وفي نفسه : هذي تبكي بالطريقه هذي مع اني متأكد ان العجل ماعفس عليها باهي لو عفس حاتعيط عياط وبكاء بصوت اشر من.هضا والله انتو يالبنات كيدكم عظيم واعيونه عليها كيف ماسكه في امها وتبكي بكذب ومنهاره بشكل لا يوصف
امه صدقتها : يا ناري مزالت تبكي البنت حرام وجعتني
محمود : ساهله توا تتحسن بسرعه وهيا نخشو جوا
منتصر حط ايديه في جيوبه وخش ومزال يسمع في صوت بكاء دعاء تأفف : هذي بالعه راديو ولا شنو
محمود : اسكت يسمعوك عيب والبنت صغيره مزالت
منتصر : وانت مصدق ان العجل عفس عليها كذابه شفته بعيوني المشهد طاحت حداه ووخر دغري تي هو يلي انفجع منها العفريته هذي قل اعوذ برب الفلق منها
محمود : سكر فمك وعليش تقول عليها عفريته البنت ما شاء الله عليها جميله واحلى منك اخرا كنك حاقد عليها
منتصر : مش قصة حاقد عليها بس هي معايا في المدرسه شفتها اليوم وما حبيتهاا لسانها طويل وجالطه
محمود : باهي اسكت توا يجي باتها ويسمعك خلاص
منتصر سكت وكان راقيتله واجد طبعه صعب اشويه
دعاء تدلع علي امها قدام ايمان ومزالت تبكي وتتأوه وكانت شاطره في التمثيل لدرجة امها صدقتها لأول مره عكس قبل تعرف كذبتها دغري بس كانت مصدومه من يلي سمعاته منهم اليوم بقصة !!!!
يتبع ……..

لقراءة الجزء التالي : الجزء الثاني من رواية حكاية دعاء

للإطلاع علي فهرس أجزاء الرواية : جميع روابط اجزاء رواية حكاية دعاء للكاتبة سلطانة كوكي

جميع الحقوق محفوظة للكاتبة سلطانة كوكي .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى