وفي الجزء الأول من رواية رحلة الحب دعونا نبدأ بمعرفة كيف ستبدأ الأحداث وعن شخصيات ابطالنا ؟ كل ذلك وأكثر في السطور التالية بإذن الله مع الكاتبة الموهوبة لين نزار ، قراءة ممتعة بإذن الله .
الجزء الأول من رواية رحلة الحب
البت دي جننتني مليت من نفسياتا دي، على اخر عمري بتي تكون منفسنه 
-يا امي انتي ليه بتقولي عليها منفسنه كلامك دا بخليها تنفسن اكتر 
_انت عايز تعلمني اقول شنو وم اقول شنو يعني؟
-يا امي العفو م قصدي، بس البنات حساسات شويه وانتي عارفه انو هديل دي غير كل البنات كل شي عندها بتاخدو بنظره تانيه وسلبيه مفروض احنا نحاول نجتهد معاها، و…
-شوف هنا ي ولد م تتفلسف علي، البت دي عايزه تتعدل خليها تتعدل م عايزه انا ماعندي ليها اي شي وهدا كلمتك دكتور نفسي م بوديها عايز يقولو علي شنو؟ ودت بتها لدكتور نفسي؟
-يعني كلام الناس عندك اهم من هديل؟
-أمير شوف ليك شغله غيري وامشي جيب لي التأشيره وأكد الحجز عشان انا مسافره لندن الاسبوع الجاي لي ابوك م عايزه تعطيل
مرقت نهله من غرفه امير بعد ما نهت كل الحلول معاه،
أمير اخد ليه شهيق وزفير وقعد ف السرير 
بينما هديل سمعت كل الكلام القالته امها وبقت مدركه تماما وتأكدت شكوكا ف انو امها بتكرها او احتمال هي م بتهم لانو ماف ام بتعمل البتعملو نهله دا
اعرفكم،،
هديل عبد المولى،، بقرا صيدله المستوى التالت ربتت سنتين بسبب نفسياتي وكسرت حنك القرايه
أمير، اخوي الكبير،، ومهندس كبير في شركات ابوي في فرع السودان، تقريبا هو الوحيد البيحاول يعوضني حنان امي وابوي
نهله وعبد المولى امي وابوي، ابوي مدير اعمال مشهور ف الغرب والشرق الأوسط نسبه لعمله الكبير وشركاته الضخمه مابلقى وقت لينا انا وأمير ، يمكن شويه أمير بلاقيه لمن يكون ف مشكله ف فروع السودان اما انا عادي يمر ١٢ شهر ومايكون عارف اخباري شنو غير بالتلفون واللي هو كل ٣ شهور نهله امي زوله فارغه وبتحب الفارغه وأهم شي بالنسبه ليها برستيجا قدام اهلا وصحباتا م بتتفرغ لي كتير ولو اتفرغت غير المشاكل مافي شي بحصل..
انا وأمير حياتنا شبه تعيسه
انا طبعا بحكي القصه دي بعدما حياتي اتغيرت وبقت احسن الحمد لله 
نرجع نواصل..
معناها انا مافي زول شغال بي، طيب جايبني ع الحياه دي ليه عشان اتعب يعني معناها قراري القررتو دا صاح، لازم انتحر،،
في مكان آخر..
-اي حفله عيد ميلاد هي
-طيب اسمعني اخت معتز حتجي مش؟
-عاوز تجيب هديل؟
-اي امي حتسافر وم عايز اخليها براها بليل..
-خلاص حكلم كل الشباب يجيبو اخواتهم..
…
كنت غرقانه ف النوم،،
أمير خش علي براحه، لقى الغرفه جايطه طفى المكيف وغطاني وطلع 
أمير كان بحس انو انا بتو اصلا م اختو،، غير كده ملامحي طفوليه شديد عكسه تماما 
نسيت م وصفت ليكم نفسي،،
أنا قصيره 155 سم 
لوني اسمر فاتح عيوني واسعه،، شايله ملامح ابوي بالكربون،، على عكس أمير فهو طويل 189سم اصفراني عيونو صغيره كنت بسمع اهل ماما بقولو عليه مليح،، فعلا أمير اخوي وسيم حتى اوسم مني بكتير
نرجع:
بعد اسبوع، أمي سافرت لندن ووصت الشغالات ع البيت وم اهتمت بموضوعي شديد..
يوم الجمعه من الصباح..
أمير دق باب الغرفه،،
أمير :هدوله صاحيه؟
هديل : ايوه
أمير خش وقعد معاي شويه وهو ساكت،
أمير :كيفك
هديل :تمام
أمير :رايك شنو تمشي معاي حفله بليل
هديل :م لي مزاج
أمير :م اشتقتي تشوفي الشارع انتي؟.
هديل:لا
أمير :تتذكري لولا اخت معتز صحبي؟
هديل:اها
أمير :اصرت علي اجيبك
هديل:أمير انا بالجد اختك؟
أمير :هديل دا كلام شنو؟ اكيد اختي وحبيبتي وأي شي؟ ليه السؤال الغريب دا؟
هديل :طب لي ماما تعاملا معاي كعب كده كأني م بتها؟ ليه م بتتونس معاي وتجي تسمع كلامي وتفهمني وتخليني اخد رأيها ف حاجات كتيره زي ماباقي البنات بعملو
، عارف زمان لمن كنت بقرا ف تانيه، متذكر صحبتي بلسم كانت برضو بت واحده بس امها بتحبها شديد وبتهتم بيها وبتضرب ليها طوالي ولمن مره عزمتني امها ظريفه وحسيت انها حنينه وبتحبني اكتر من امي هي لو انا م بتها تكلمني بشيل شنطتي وبمشي والله، بس م تعاملني كده ي أمير،حتى اكتر موضوع وجعني ف حياتي قالت لي تستاهلي كل البحصل معاك دا أمير انا تعبانه شديد مستحيل تكون دي امي امير من غير م يشعر لقى نفسو بحضنيوببكيي،، حس ان تصرفات امي هي الوحيده الحتقدر تغيرني وترجعني احسن
في الحفله،،
معتز :اووو أميرنا الخبر ياخ
أمير :معتززز الشوق والريد، لينه اخبارك؟
لينه وواضحه علامات الإعجاب فيها ..
لينه :أمير
ازيك
أمير :بخير الحمد لله، جبت ليك هديل زي م طلبتي 
لينه :تسلم لي انت
. صوت الميكروفون..
الرجاء الهدوء والاستماع.. اخونا فارس حيسمعنا حاجه سمحه
فارس بقا يقول،، طبعا انتو متشوقين تعرفو الحفله دي ليه؟ كل الناس اي اي
واصل،، الليله عيد ميلاد امي السمحه وانا عزمت اصحابي كلهم واهلنا عشان اعزها واعمل ليها حاجه بتفرحها عارف انها بتحب لمه الناس ف شنو ي مزه،، كل سنه وامي حبيبتي وصحبتي واحلى حاجه في الدنيا سالمه وبالف خير
امو دي بكت لمن الله غفر ليها وكل ألفي الحفله شغالين كل سنه وانتي طيبه
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الثاني من رواية رحلة الحب
للإطلاع علي فهرس أجزاء الرواية : جميع روابط اجزاء رواية رحلة الحب للكاتبة لين نزار
جميع الحقوق محفوظة للكاتبة لين نزار
