الجزء التاسع عشر من رواية خط احمر

ايهاب ولع السيارة: انت لمستشفى المجانين طووول (ضرب الدومان) متزوجه ياحيوان وعنده زوز هادي محرم تفكر فها وهي ع ذمت غيرك ياكلب

فادي تعصب اكثر: تعرفه عقلك خامر ياراجل شن هدا ارمله ارمله

ايهاب : اسكت ونبي اسكت لنفتح الباب وانطرك من الباب اسككت

فادي: برا معاد حكيلك حاجه شن الخمر لفي عقلك

ايهاب: رددت فعلي عاديه ف الاول قتلي عندها ولد مش متزوجه وبعدين قتلي عندها زوز وبعدين متزوجه وتوا طلعت ارمله ونبببي اسكت انت كان طلعت مدرس راك وديت الطلبه ف داهيه

فادي ضحك: توترت النمم هي عمرها24 سنه صغيره ياايهاب ترملت صغيره عندها زوز صغار قعدين ف الشهور الاوله صغارها ف فترة العلاج كانت معاي دردشنا قالت انه مات راجلها قبل مايعرف انها حامل يعني لها اكثر من سنه ارمله

ايهاب: خلي بنت الناس ف حالها مش رح توافق لانه لو وافقت احتمال ياخدو منها الصغار عيلة راجلها

فادي: تي سالتهااا قتلها ياخدو فيهم ولا قتلي هو راس ولد راجلها الله يرحمه وقالت امه متوفيه وبوه متزوج وحده تانيه قالت مرتاحه انه صغارها معاها وماحد يقدر يطلبهم يعني لو نتزوجها بناخدهم صغارها

ايهاب: شن بنقولك اني ليريحك بس بتاخد صغار مش صغارك امانه هادم رح تتحاسب عليهم كانك انت قد المسؤوليه توكل وخودها

__________

.

.

تأخررر الوقت

باسم رجع وخش شاف ولده راقد ع الصالون ببرائه والالعاب جنبه وادم يتفرج ويزن يكلم ف خطيبته رسايل قرب قام ولده دخله لدار رسل

اسلام فاق: با با..وخداه النوم

باسم غطاه وطلع

يزن: مش عارف انت والموضوع يرجعلك

ادم: حتني مش عارف لكن مليحه لنمم بناخدها

يزن: جي خاطري نشوفها النمم

باسم تعصب: شن تحساب روحك انت؟!

ادم شافله: شنو!

باسم: توا انت خاطب ولا البنت لعندك مش ماليه عيونك

يزن: شن دخل البنت لعندي وشن فها كان شفتها مرات تعجبني وناخدها قرب العرس

ادم: تاخد قهرتك اني شفتها الاول

باسم قعمز وساكت ونااااار راكبه فيه وهما يتكلمو ع يقين قدامه

يزن: صورتها؟!

باسم شافلهم بدون مايحسو وقام حاجبه

ادم: ملحقتش نصورها غضوا نمشي نصورها

باسم مصدوم ف خوته والنار تاكل فييه

ادم خش ع صفحة المعرض متع السيارات

ادم: غضوا ع الفطوور مش ناجل الموضوع بنكلم بوي علها

باسم تعصب ومقدرش يتحمل: شن فها حاجه كبيرة قصدي هي عادييييه غير انت مكبرها صكر الموضوع ريتي هلموناليزا

ادم: موناليزت شني شن تخرط انت قصدك شايفها؟!

يزن: اني عرسي قريب ناخدها اني ندير بها العرس ونعطيهالك

ادم: سوداء خودها كلهم ملاح هما

يزن: لشفتها سدواء

باسم: سيارة هي؟!

ادم ضحك: مريض انت ولا خيرك شن لينا ساعه نخرطو اني شفتها وطلعو هو شايفها وبنشوفو من لبياخدها الاول

باسم : متعرفش ع النصيب هي

يزن حط الهاتف: نصيب شنوو انت وين هي سيااارة

باسم: عارف سيارة اني سرحت شوية هي تصبحوو…. وخش للمربوعه يذكر ف خبر وفاة سما مرته

سما كانت زواجه تقليديه يعني زواج بعدين صداقه بعدين حب فهمتو وكانت حلوة وكويسه مع الكل وسبب موتها هو ولاده مبكره (اسمعو مش كان ف وحده حامل تقرا تخاف وتبدا تدعي عليا ريحو رواحكم ترا كان ف وحده حامل وتقرا بري ربي يسهل عليك المهم متخافيش وتنزلي عليا دعاوي)

باسم هدي : ربي يرحمك ويجعل مثواك الجنه يارب

ومش ف نوووم

___________

.

.

فادي نزل للمستشفى شافه الساعه10:30 خش لغرفة بكري لـ كان فها جاد ولد فرح

كان بروحه

جاد يتحرك فاتح عيونه ويناغي

فادي قرب بلكروسه من الجيه التانيه شد ايد جاد باسها ولمسله جبينه: نزلت حرارتك يابطل ههههه

جاد يناغيله

فرح بدون ماينتبه علها فادي كانت واقفه جنب الباب شفاته لم خش للغرفة فالحقاته عشان تشوفه ممكن في شي بس ابتسمت لم شفاته مشغول ع ولدها ويشوف ف حرارته

فادي ضحك: هدا انت طرف ومالا اختك كيف

فرح ضحكت وخشت: طبعا البنت احلا

فادي تلفتت:انتي من امتى هني

فرح ابتسمت:من لم خشيت شفت لهفتك ع جاد وخوفك

فادي: نزلت حرارته علاش مروحتيش

فرح: هو اني عندي سيارة ونسوق بس توا نزلت حرارته المغرب خفت مقدرتش الدنيا ظلام ومعاي ولدي خفت

فادي: كويس انك ماخطرتي ع المهم اني…قاطعه

…. خش:فروحه

فادي شافله وشاف لفرح بصدمه

….قرب لـ جاد: حرارته نزلت نوصلك؟!

فرح شافت فادي وبعدين شافت…..

فادي ف داخله لالا بلله لا وداهش

فرح:اي ياريت خليت ميرال بروحها

فادي شافلها بصدمه ونزل عيونه:اسف منبيش نعطلك مايشوف شر…وبدي يجبد ف الكرسي بعنف وبقوة يجبد ف الكرسي بعنف ف الممر ويسب ف روحه :بنت قمر ز هادي مفكرها بتقبل بواحد معاق ايده مكسوره…وشاف الدروج قدامه وقريب نقلب بس ف شخص شد الكروسه من الخلف ف اخررر لحظه

فادي تلفتت وهو متعصب وقارنهم : فرحت بلحادث مع اني تكسرت ونعقت بس مع هدا فرحت بلحادث لجمعني بيك…قطعاته

فرح وخرت الكروسه ابتسمت تشوف لعيونه طبعاا ليللل الممرات فاضيات :الخوف والغيره هادم كلهم عشاني

فادي شاف لجهة الدروج: نوهم ف روحي صح؟!

توا بتقولي ماصدق شاف بنت (وشافلها)

فرح ابتسمت: تصدق انه اني نحس فيك كذبه او تكذب عليا شن رح يجبر شخص ظابط شرطه ممتاز وفوق هدا شخصيه ومحترمه هلبااا انه يحب وحده ارمله وعندها طفلين

فادي قرن حواجبه وتعصبب:والاهم ف الجمله انك فكرتي فيا نكدب صحيتي

بري روحي معاه بريله بالك ينشغل الاخ

فرح ضحكت بهدؤ: شوف اني من ايام العلاج الطبيعي مع انه مش مهنتي صح نعرف فيه بس انت وتقت فيا انه اني لـ نهتم بعلاجك مع انه اني دكتورة تخدير مليش علاقه بلعظام…قاطعها فادي

فادي طلع هاتفه: لا خلاص بجد بما اني كداب اني مش مهم شوفي لـ جاد توا…وجبد هاتفه خش ع الارقام

فرح جبداته منه وبدت تسوق بلكروسه تسوق تسوق لعند خشو لـ غرفة فاضيه ونادت ع الممرض بس مجاش الممرض، بلعكس جي نفس لخش عليهم بكري

….:بتروحي انتي ولا تلعبي مع المريض بلكروسه

فادي تلفت:ارخي لكرسي ياسر مهزله…بيطلع بس سكت لم تكلمت فرح

فرح:ادم ساعدني عشان يوقف

فادي شاف ادم: ماحد يلمسني نوقف بروحي..وشد الكرسي ووقف مشي خطوه وتنين ووقف

ادم (عرفتوه ولد خالتها نفسه اخ باسم لـ جاب دواء جاد وشاف يقين)

فرح:امشي كمل

فادي فقد توازنه

ادم:انتي كملي اني مع المريض واني نشوف جاد.. وطلع

فادي فقد توازنه بيطيح بس قربت وشدت ايده ورجع وقف

فادي واقف لف روحه جهتها وكان اطول منها بعااام

فرح شاده ايده عشان ميطيحش وابتسمت:حي طلعت دريا

فادي ابتسم ويشوفلها: قوليلي انه خوك تربحي قلبي بيوقف

فرح ابتسمت وشافت جهت قلبه تردددت بس حطت ايدها ع قلبه وشافتله:انت توا وقفت يعني مش معاق انت شخص بدون عيوب بعدين حتى ولو كان الكرسي عيبك اني حبيتك لم كنت مقعمز ع الكرسي متقارنيش بـ اسمهان

فادي حط ايده ع ايدها لشداته: اني محبيتكش لانك حلوة صدقيني في احلا منك ولاحبيتك عشان ذوقك ف لبسك ف ذوقهم احلا منكم ولا حبيتك لانك طيبه انتي طيبه بس ف اطيب منك محبيتكش لانك دكتورة ف معاك دكاترة افظل منك

فرح:علاش حبيتني

فادي شاف ايدها لـ كانت ع قلبه: لانه المصيبه لبين ضلوعي اختارك

فرح حبتت طريقته ف الكلام:رومانسي هلباا انت صار للمصيبه لبين ضلوعك هو لختارني

فادي يشوف ف ملامحها من قريب وعيونها كل مره ع جز فها مره عيونها انفها شفايفها كل مره يتحركو عيونه لمكان

فرح نزلت ايدها ووخرت خطوه: اني محبيتكش اني مكنتش نعرفك اول شي خشيت للعمليات شفتك كا اي مريض خدرتك وطلعت وبعدين طلعت اول وحده كنت متوقعه نشوف زحمه قدام العمليات بس مكان ف حدد رجعت خشيت سالت عليك وقالو انه لم درت الحادث انت طلعت من السيارة بس السيارة نحرقت ونحرق الهاتف وكل شي حسيتك مميز وغامض ووراك قصة طلعوك وقعدت معاك مش عشان شي بس وجعتني بروحك توقعت انه اليوم التاني يكونو جنبك احبابك روحت بس ونسيتك واذكرت قبل مانرقد قلت اكيد جو مرته وخواته ورقدت تاني يوم ركبتلك عطول لم خشيت اني الجهاز يأشر ع النبض وكان صبح كيف باديين يجو دلكتلك قلبك لاني خفت من الجهاز هلبااا

فادي: ياحليلي ني هدا علاش حبك قلبي هلفاسد

كملي

فرح ضحكت:تعدل نبضك وجت ممرضة حامل ليك ههههه بتعقملك جروحك بس متحملتش جروحك وعطتني اني نعقم مكانها لانه حامل ماتتحملش كشفت جروحك وعقمتك

فادي: جروح صدري ياعيني ياعيني

فرح ضحك:بطللل هادي خدمتي بعدين معاش دورتك وتالت يوم مدورتكش بكلل العشيه فتت جنب غرفتك شفتها فاضيه تاني خشيتلك ورجعت نفس الممرضة سالتها عليك قتلي مايعرفو عليك شي شفت حرارتك وطلعت نسال عليك قالو معرفو شي وحسابك كبررر وروحت ورابع يوم كان عندي عطله المهم جيت ف المغرب عليا توكه سمعتك تكلم ف خوك خشيت وكنت نبي نشوفها عيلتك لقيته يبهدل فيك ههههه تعصبت الحق واني منحبش الناس العصبيه وطلع خوك طلعت هزبته بس الصراحه هو كان كويس باين عليه ورجعلك وبسس الباقي تعرفه

فادي قام ايدها: عارف حتى لمست ايدك حرام بس اني نبيك حلالي فرح وصديقني راغبهم صغارك وبلعكس لزاد رغبتي فيك ولادك مانعرفش كيف مع انهم مش مني بس نبيهم معاي

فرح بلعت ريقها نزلت ايدها بهدؤ:اممم برايي شن رايك ننسو لصار تعتبرني صديقه بس بدون حب بدون شي فادي اني أم مانبيش نخرب فرحتك انت كويس صدقني واهو انت واقف مش معاق تقدر تتزوج الاحسن…قاطعها

فادي:ضمي فمك المصيبه ختارك خلاص مش بيدي

فرح:لااا فادي خلاااص انت عندك عادي بس اني منقدررش ا نت عندك ام وخوت رح ينصدمو ومش رح تكون فرحتك كا اي عريس مستحيل

فادي:بس شن الفايده بعروس كامله ومكمله والقلب مش راغبها اني مش مطرر نجبر حد يتقبلك ليهمني انه اني نكون نبيك بس

فرح:بس بنتي رح تكبر ورح تقولي علاش اسم بوهم مش ز اسمك ولدي رح يفكرني خنت بوه

فادي: لم رح نكون مقصر معاهم ونعامل فيهم مش كويس وقتها رح يقولو هكي بس اني صدقيني راغبهم وفرحان بيهم الزوز

يتبع ………

لقراءة الجزء التالي : الجزء العشرون من رواية خط احمر

لقراءة الجزء السابق : الجزء الثامن عشر من رواية خط احمر

للإطلاع علي فهرس اجزاء الرواية : جميع اجزاء رواية خط احمر للكاتبة ميشو محمد

جميع الحقوق محفوظة للكاتبة ميشو محمد .