وفي الجزء الثالث من رواية لن استسلم دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثالث من رواية لن استسلم
مشي اسامة طبق لحوش خ نادية
طق ططق طاااف طاف
سمية اف منه حسه هوا
ناضت سمية وفتحت
اسامة:عﻻش ماترديش؟
سمية:ماسمعتاش نقال
اسامة:مالقيتيش اﻻ عبدالله تتعاملي معاه خﻻص بتفتحي المحل معش فيه صبر
سمية:اسامة نقص صوتك بعدين بالك تحساب روحك بوي واﻻ خوي؟
اسامة ايه بوك وخوك باهي
سمية:ﻻ ماليكش عﻻقة فيا نكلم عبدو واﻻ حتى عليوة انا حرة ومستقلة
اسامة يكشخ: تي انا كان عارفه عبدالله كويس راني ماادخلتش لكن هوا واحد استغفر الله ياربي مانقدرش نرضالك الحاجة العوجة
سمية:اسامة ماقلتش بنتزوجه انا
اسامة:واااااك منك تي افهمي يابنت راهو مايصلحش
سمية:انا كنت بناخد منه بضاعة وهوا وقف معاي بعكسك انت
اسامة جمرة طاحت في اميا وقالها قصدك هوا هدا رايك ف نهاية يطلع عبدو ماشاء الله عليه وانا الكخا ؟؟ من غير جميلة لكن ادكري كويس من يوم حليتي عيونك ع هالدنيا من كان جنبك بعد الله وامك
وهدا مفاتيح محلك وبضاعتك تو نبعثهالك مع امي وجﻻل سﻻم
وطلع وصرفق الباب بقوة
سمية توحوح حيه عليا شن درت نهار ابيض ﻻزم ندير عفسة ﻻزم ووووك شن اندير عليك كﻻم قلته
طلع اسامة ومضايق من الكﻻم اللي سمعه ركب سيارته ومعش عرف شن يدير ووين يمشي
تلفون سمية يشرين صاحب محل يتصل بك(عبدو)
سكرت عليه وقعمزت تندب ف حظها ع مرواحة خ نادية من المدرسة
وقتلها: سمية خيرك متغششة بنيتي
سمية:خلوقي ف تل خليني نقيل عند زينب ماما
خ نادية:ﻻﻻ مافيش قولها اتجيك تقيل عندنا
سمية:بالله عليك ماما والله بنطق
خ نادية:باهي بري وماتعطليش عندهم ع عشية روحي
سمية:اممموه احﻻ ماما
خدت سمية توتة ومستلزماتها ولبست عبايتها وطلعت
وصلت لحوش زينب وقعمزو وحكتلها كل شي
زينب لسمية:حي علمهاا هادي …انتي غبية ؟؟مدايرة عملتك وجاية اهنا ؟؟ ح ياكلك كان شافك
سمية:قلت كان بنتصل بيه مش حيرد فقلت لازم نجي عندكم ونتاسفله
زينب:ههههه اشك انه حيسمعك اصﻻ
سمية:نحاول وخﻻص
زينب:باه تعالي بنطيب الغدي ساعديني
طيبو الغدي وخالتك نفيسة ماشية فيها نومة
زينب :تعالي نوريك صور اسامة ف صغره
سمية:هي
خشو لداره وطلعو اﻻلبوم وبدو يتفرجو
سمية:ههههه جو قبل شكله كان ضحوكي مش زي توا عصبي
زينب:اللي يسمع يقول مش متربية معانا عموما ولى هكي من وقت توفى بابا كانو زي الصحاب هما الزوز انا صح مالحقتش عليه هلبا بابا …هههه قولي منو طفلة هادي اللي مع اسامة
سمية :منووو
زينب:ههههههه انتي
سمية؛كيف وخيرك ماوريتهاليش من قبل صورة هادي
زينب:نسيت هدا مرة قعدتي تبكي تبي اتحلقي مع بوك وطبعا بوك اونه مش معاكم ف الحوش المهم تبي زي ماكانو يجيبو ف الدعاية كان تتدكري الاب وطفلته دعاية ع موس الحﻻقة المهم تبكي وتبكي مشي اسامة دار الجيل لي لحيته وخﻻك تحلقيها ههههه وجرحتيله خده
سمية:حي عالجو باهي من حكهالك
زينب:ماما حكتهالي …. اييييي بطني وجعتني
سمية:اشبح شن واكلة
زينب :طعمية …خلي نمشي حمام
سمية:هههههههههه
وقعدت سمية تلوم ف روحها ﻻنها كلماته بطريقة هادي . ..و تتفرج ع صور وتضحك ع اسامة وتقول سلمه ياربي وقت كان صغير خير من توا اقلها مش عصبي امممم
خش اسامة واتكى على حاشية باب داره ونحى نظارته وقالها ؛ بجديات؟ خاشة لداري وتحنكسي ف حاجاتي بالك تبي تفتحي الدواليب و تتفرجي ع حوايجي
سمية: ا ا ا ا اسامة انا
اسامة كيف بيطلع شدتله طرف ايده وقتله اسامة انا اسفة امبكري ماكانش قصدي
اسامة: اششش مانبيش نتكلم فيه موضوع بكل واﻻلبوم رديه مكانه تعلمي تستأذني
سمية : متعجرف
اسامة:عنيدة
سمية:اناني
اسامة:ام لسان طويل
وطلع من دار وخﻻها
طلعت سمية وراه وخشت للمطبخ
اسامة قعمز وسط الحوش وينادي زينبببب ديرلي حاجة ناكلها
سمية:زينب ف الحمام نديرلك انا حاجة تاكلها
اسامة:ﻻﻻ مانبيش شبعت
سمية جاته تجري:شن قصدك مانعرفش ندير واﻻ شنو
اسامة:ماقصدي شي متعود على ماكلة اختي واصﻻ انتي توا بديري ماكلة لشخص كخا ؟؟؟
سمية:اسامة انا مش ق…
قاطعها:اششش مانبيش نتكلم
فيه الموضوع
سمية:تي اسمعني
اسامة:خﻻص سمية
زينب:خيييركم تلعلعو
اسامة:بالله وخيتي ديريلي حاجة ناكلها الماكلة من ايديك تفرق هلبا من بكري نستنى فيك
سمية اغتاضت
وزينب فرحت اول مرة خوها يقولها هكي
اسامة:استني زنوبتي جبتلك شكﻻتة ورد متع زمان
زينب :اساااااامة 
_ شكﻻتة ورد اتهبل ..
خدتها زينب وطارت للمطبخ
سمية بتلحق زينب واتمتم ايه حق ماهو امي ارنب
اسامة:حاشاها خالتي المراة
تلفتت عليه سمية ومشت
جابتله زينب نص دحي مشكشك وجبنة حمراء وعصير
قتله ماتكترش ماكلة قريب نحط الغدي
اسامة:اممبه
خ نفيسة :وسيما روحت بابا
اسامة:ايه يمى من بكري
خ نفيسة:به ع سﻻمتك وليدي
اسامة:سمعتي يمى
خ نفيسة:ان شاء الله خير
اسامة :الناس طلعوني كخا يمى ..
سمية ف المطبخ سمعاته
و زينب تضححكك
خ نفيسة :اللطف من قالهالك هاللي مايتحشمش
اسامة:شخص هكي عنيد ولسانه طويل يبي القص
خ نفيسة :يعطيه دعوة ياكبدي ماعاش اللي يقول عليك كخا.. وليدي راجل
اسامة بصوت عالي:ايه قوليلهم ياميمتي قوليلهم ماه مايعرفوش اسامة كويس
خ نفيسة:الدعوة فيهم كول وليدي كول صحيحة
زينب لسمية:شرفي هي حطك ف راسه ياهانم
سمية:شن حطني ف راسه شنن بيدير يعني
زينب :ع اساس ماتعرفيشي تو هههه دا الشبلي يختي
اسامة ل خ نفيسة:خلي نقيم صفرة ونخش ناخد دوش …خدي معاه شكﻻتة ورد لسمية
سمية قاعد تهدرز لزينب :ﻻ شبلي ﻻ لبوة تره..حقا امبكري عبدو كلمني سكرت عليه نفكر نكلمه بش نتأسفله ع اللي صار
زينب تأشر بعيونها ان اسامة وراك بس سمية مافهمتش
اسامة عفج شكﻻتة ويلوحه بعيد ويجيها من وراها ويشدلها ايدها ويقولها سادك منه قاعد شاد روحي بسيف ياسمية هانم العوج مانرضاش بيه وعبدو تمسحي رقمه وتحطيه ف الرفض
سمية:ماني…
اسامة قاطعها:اهو قتلك ياسمية جربي انتي الدوة توصلني توصلني راه
وحط السفرة وطلع
زينب لسمية :قتلك انا بيحطك ف راسه وفكك من العناد خير.. اسامة معارفه هلبا حيعرف انك كلمتيه ..
سمية:ﻻ حنكلمه مانحبش نقعد ف موقف قدام حد
زينب:تلقي اماﻻ مايجيك
سمية عنيدة واسامة عصبي شن بيصير بينهم حتعرفو ف الجزء القادم
يتبع…….
لقراءة الجزء التالي : الجزء الرابع من رواية لن استسلم
لقراءة الجزء السابق : الجزء الثاني من رواية لن استسلم
للإطلاع علي فهرس اجزاء الرواية : رواية لن استسلم جميع الاجزاء كاملة
جميع الحقوق محفوظة للكاتبة لوزة .
