الجزء

الجزء الثاني عشر من رواية إمرأة بلا هوية

الجزء الثاني عشر من رواية إمرأة بلا هوية

وفي الجزء الثاني عشر من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الثاني عشر من رواية إمرأة بلا هوية

اتلفت وعينو وقعت علي رهف ،،،، الضحكه اتجمدت في وشو واتسمر قبلو😨 ودا خلي ميناس تتلفت وتشوف الحاصل شنو؟ وصرخت في فرح بعد شافت رهف : هلا هلا اتاري المحل انوارو زايده اتفضلو اتفضلو 😍 😍 حبيبي ابو محمد اصر يجيب لي هديه ،،،،، فرصه توروني رايكم في الاساور حقتي 😊 علي فكره اي حاجه يجيبا لي خطاب بعتبرها غاليه جدا علي قلبي 😍
الاء مسكت الاساور وقالت في فرح : روووعه مافي كلام تتهني بيهم ان شاء الله حبيبه 😅
اما رهف كانت 😢😔 مصدومه وبتعاين لي خطاب في حزن واسي وبدون م تلمس الاساور ردت : حلوين مبروك 🙂 واتلفتت علي الاء وقالت : موش تغيري دبلتك يا الاء عشان نمشي ؟
ميناس في سعاده واضحه : رهف شكلها الاساور م عجبتها 😍
رهف وهي بتحاول تكون عاديه : بالعكس حلوين خالص…
خطاب بدا عليه الحزن وبقي ساكت وصابه فيه مطره واتأكد انو علاقتو بي رهف بقت مهدده بالانهيار وبقي عايز يلاقي رهف بأي طريقه عشان يوضح ليها سوء الفهم دا بس هي رفضت تديهو اي فرصه عشان يبرر موقفه ،،، وبعد الاء بدلت الدبله طلعو بسرعه بدون مع تقول ليه ماشه علي وين ؟؟
ميناس طارت من الفرح وقالت في سرها : لسه م شفتي حاجه بيبي 😍 والصدفه خدمتني كمان بدل اوريها الاساور في البيت جات واتفرجت عليهو وهو بختار لي كمان!! ولسه الخطوه الجايه اخطر ،،، ألعبي بعيد ي بيبي ميناس القاضي م بتخسر بسرعه ،،،،
⭐⭐⭐⭐⭐⭐⭐⭐
رهف م قالت ولا كلمه لحدي م وصلو بيت اهل زوجها ،،،، لانو بت المرحوم الصغيره اتصلت عليها واعتذرت وطلبت منها تجي تشيل قسيمه الزواج وشهاده الوفاة ،،،، بعد خلصت موضوعها لقت مكالمات كتيره من خطاب بس م رجعت ليه ،،، ولما عرفت انو جا الصيدليه رفضت تمشي هناك ومشت مع الاء عشان تقابل خطيبا وقضت معاهم اليوم كلو لحدي المغرب وم عرفت تمشي وين رغم اصرار الاء الشديد انها تمشي معاها البيت ،،،،
الاء : زوله عجيبه انتي!!!! طيب ح تمشي وين قولي لي ؟ 😏 جبتي لي كثافتي ياااخ،،، نحن بيتنا بيت محترم وبعدين م بناكل الناس م تخافي يعني ،،،،،ولو ما مصدقاني اسألي حسام خطيبي ،،،،،،
رهف عاينت لي حسام في خجل وقالت : بمشي بيت عمي ،،،
الاء : استغفر الله العظيم ،،،، تاااني ماشه ليهم ي رهف ؟؟ 😏
رهف بصوت مبحوح: م عندي حل تاني،، م طايقه اعاين لي خطاب في وشو ،،،، مضطره حتي لو ما استقبلوني كويس ح ابيت بس، ومن الصباح بطلع ،،،، وعليك الله جدي لي في موضوع الداخليه ي الويه 😔
الاء : طيب م دام مصره يلا نمشي البقاله دي ونجي ،،،، اتلفتت علي حسام وقالت : انتظرنا اسي بنجي ،،،
رهف في ضيق : اوووف بقاله شنو ؟ اسي دا وقتو ؟ ☹️
الاء : م بأخرك يلا ،،،،
كان في سوبر ماركت في اول الشارع وجنبو ملحمه ومحل خضار ،، دخلت الاء ورهف جنبها ،،،،، اشترت سكر وزيت ولحمه وخضار وعدس ومكرونه وكم غرض كدا،،، وحاسبت وختت الحاجات في كيسين كبار وطلعت،،، وفي الشارع ادت رهف الكيسين وقالت ليها : ادخلي عليهم بالحاجات دي ،،،،، بشيلوك في راسهم،،،،، وتاني لما تطولي م تجيهم بضربو ليك ويسألو منك 😅
فتحت شنطتها وطلعت قروش وعايزه تدخلهم لي رهف في شنطتها بس رهف منعتها وحضنتها وبقت تبكي وقالت ليها : شكرا ليك والله عندي قروش موش كفايه الحاجات الاشتريتيها؟ لولاك م عارفه كان ح اعمل شنو بس اول م اقبض مرتبي بسدد ليك ديونك😔😔
الاء : ي بت نحن ولايا زي بعض ووضعي م افضل من وضعك بكتير،،،، انا كمان يتيمه وعايشه مع عم وزوجه عم بتمنو بتين اعرس واطلع وافضي ليهم البيت ولو م كنت شغاله كان رموني في الشارع زماااان،،، اسكتي خلي الطابق مستور .
⭐⭐⭐⭐⭐⭐⭐⭐
وصلت رهف بيت عمها ودقت الباب وبعد شويه جات اشجان ولما شافتا صرت وشها،،،،،، بس رهف اتلفتت عشان تشيل الاكياس واشجان طوالي ابتسمت 😅 وسلمت بحراره وبقت تكورك : امييي ي امييييي رهف جات 😅😅😅😅
بسمات جات طالعه في استياء وبرضو لما شافت الاكياس فرحت وقالت وهي بتفتش فيهم : لييي تعبانه حبيبتي ؟ الحاله واحده 😅 امشي يا اشجان جهزي غدا لي بت عمك ،، واتصلي بي كريم يجي من النادي يسلم علي هوفا ،،،
اشجان : م برد من قبيل بتصل عليه،،،، كنت عايزه لبن ،،،،
رهف : في كيس لبن بدره جبتو معاي ،،،،
اشجان في فرح :حلوو
⭐⭐⭐⭐⭐⭐⭐⭐
خطاب يدخل ويمرق ويضرب لي نبيل يسأل عن رهف وتاني يرجع في تلفون الاء ويلقاه مقفول وبقي متوتر رفض العشاء وبعد ميناس نامت مشي رقد في غرفه رهف والدنيا مسوده في وشو،،،،،، واخر شي اتذكر كريم واتصل عليه ولقاه لسه في النادي وقال ليهو م شاف رهف من فتره وكان فعلا صادق لانو م رجع البيت لسه وم عارف حاجه ،،،،
⭐⭐⭐⭐⭐⭐⭐⭐
صحت رهف بدري واخدت دوش ولبست جات قعدت في الصاله بعد شويه بسمات جابت الشاي وبقت تتونس وتضحك وتحكي ليها عن امها وابوها وكيف كانو ناس طيبين وبعدها سألتا : خطاب دا اريتو خطاب السرور يتخت في الجرح يبرأ 😊😊 بعدين ي رهف انتي اتغيرتي شديد ،،،، زمان كان اذا شميتي ريحه القروش من بعيد بتجري
ليها ،،، حتي صحباتك كانو طبقه هاي ،،، بعدين راجل زي خطاب دا!!! كان رميتي شباكك عليه زماااان وفي الفتره القضيتيها معاه دي كان قعدتيهو علي الحديده،
رهف وشها اتغير واتصدمت بي كلام مره عمها ،،،، معقوله دي حقيقه رهف القديمه ،،، رهف قبل الحادث كانت بالبشاعه دي ؟؟ لا لا مستحيل المره دي عايزه تدمرني ،،، حسبي الله ونعم الوكيل 😰😰
كريم جا من جوه قعد جنبهم وقال : بالمناسبه خطاب امس اتصل سأل عنك وانا طبعا م عارفك معانا 😅 قلت ليهو م شفتك قريب ،،،،
رهف : احسن انك م عارفني جيت،، عشان م توريهو محلي 😒😒
بسمات :النصحيه ي بت ،،،، انتي وحيده وم عندك سند ،،، الولد دا شاريك وعايزك بالحلال ولو علي مرته الراجل محلل ليه اربعه ،،،،،
رهف في ضيق : م عندي ليهو حاجه يمشي لي مرتو وولدو
كريم اضايق من كلام امه وقال : امي خليها بي راحتا مافي زول يضغط عليها ،،،، المره الاولي جبروها تتزوج راجل قدر جدها وكانت النتيجه شنو ؟؟
بسمات : دي قسمه ،،، بعدين مافي زول جبرها انتو كذبتو الكذبه وصدقتوها ؟؟؟ كانت موافقه بكامل ارادتها و خطاب م زي ابراهيم الله يرحمه ،،،، خطاب شاب ومحترم ووجيه وغني والاهم من دا بحبها ،،،،
كريم : احسن امشي شغلي انا ،،،،
رهف : وانا كمان ح امشي لي الاء وصيتا لي شغل وكمان سكن
كريم : سكن شنو ،،، بيت عمك موجود….
بسمات وهي وبتعاين لي كريم في غضب وعتاب: احسن ليها تعرس خطاب وترتاح من بيت عمها ومن الداخلية ،،،، المره راحتها في بيت زوجها بعد شويه جات اشجان طالعه من الغرفه مغمضه عين ومفتحه عين ولابسه قلاده ذهبيه في رقبتها انيقه جدا ومميزه،،،،، رهف عينها وقعت علي القلاده حست بي دوار شديد وبعده جات في مخيلتها يوم جات من المدرسه وكانت طالعه مناسبه مع صحباتا ،،، لبست احلي م عندها وفتحت الخزانه حقتا وفتشت القلاده م لقتا ، بقت تبكي وجات حبوبتها كمان فتشت وما لقتا ورهف زعلت شديد واعتذرت وم مشت المناسبه عشان القلاده ذكري من امها ،،،،،،،،،
اشجان غطت القلاده بي يدها وقالت في ارتباك : خير ي رهف مالك بتعايني لي رقبتي كدا ؟ خوفتيني!
رهف م ردت ودعتهم وطلعت واول م فتحت الباب لقت ،،،،
————————————–
———————
*☆إمتناني ❤*
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*

لقراءة الجزء التالي : الجزء الثالث عشر من رواية إمرأة بلا هوية

لقراءة الجزء السابق : الجزء الحادي عشر من رواية إمرأة بلا هوية

للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين

جميع الحقوق محفوظة للكاتبة بت محمد جمال الدين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى