الجزء الثاني من رواية حوش جدي

وفي الجزء الثاني ماذا تتوقع انه سيحدث مع ابطال حكايتنا ؟ هل ستكون الأمور علي ما يرام ام أن الأحداث مازالت في البداية ؟ كل هذا وأكثر سوف نعرفه في السطور القادمة بإذن الله .

الجزء الثاني من رواية حوش جدي

على الكل الانتباه ليها << سميحه مرت خال نهال … ونهال رغبة من مرة خالها واحتراما ليها تقولها خالتى .. ولكن فى الحقيقه هيا مرة خالها >>

نزلت خالتى سميحه لوطا هيا وخالى فرج وقعدت نهال فوق تحط فى الماكله لولاد خالها على طاوله … واول مابدت تحط على طاوله فى الماكله خش وسام للمطبخ وقعمز على طاوله ونزل عيونه وبدى يفطر ….. وبينما نهال اول ماشافاته و من ربكه ووهيا تحط فى عشى بسرعه باش تطلع من مطبخ ناشت طاسة الحليب الا جنبه وكفتها على سرواله فا …….ناض بسرعه وقاللها ….
وسام …. عميه انتى ؟؟؟ عميييييييه ماتشبحيييييش ؟؟
وهنا خش امجد وقالله …
امجد …. غير خف علينا ياعصبى انت …. خيرك عالبنت ؟؟؟ ماتاخديش فى بالك غير سروال جابهوله شخص عززززيز بس << وغمزلها >> هههههه
وسام … انت تعرف تسكر فمك بس << وطلع وسيب مطبخ باش يغير سرواله >>
وهنا نهال طبست بسرعه باش تلم مرش طاسه الا نكسرت … فاطبس امجد معاها وقعد يلم فى المرش وبعدين قاللها ..
امجد .. خلاص برى انتى حلى فطرك … توا نمسحه الحليب انى من الارض …
نهال … اكيد امجد …
امجد …. هههههههه ولايهمك واخد على مسح انى رهو ماتعرفنيش انتى ياعسل ههههه
نهال … هههههههه عسل ؟؟ منين لقيتها كلمه هيا فى قاموسك ..
امجد …. ههههههههههه مالا شنى . تى انتى عسوولتى .. مالا شنى هههههه
نهال … << وجهها ولا احمر وقالتله … خلاص انى بنززل
ناضت نهال وقعدت تفكر وفى بالها تقول خيرا هدا شن نضرب فى راسه يقولى هكى واول ماطلعت من باب المطبخ وخش قصى قعد يضحك ….. فاحب الفضول خلالها تولى للمطبخ وكبهت باش تشوف شن فى …. فالقت امجد مطبس ويمسح فى حليب بالنشافه ويغنى ويقول …..
امجد …. ياااعينى ياعينى ياعينى على الولد … ياعييييينى ياعييينى ياعينى على الولد …
قصى …. هههههههههههههه انت يااتار الحكيم انت ههههههه صار هادى اخرها نحن لانزرع الشوك هههههه على عموم ماشى معاك دور الشغاله …
وهنا امجد لوحه بطرف الا مسح بيه الحليب على وجهه وصار فيها تريش شعروتيروات … ونهال من وراء الباب صايخه بضحكككك لين معاش قادره تاخد نفس … و بينما نهال صايخه بضحك ومافكرتش للحظه انا ممكن يكون فى حد وراها حست بحد ينخص فيها ولما تلفتت لقت ..
وسام …. كملتى ضحك ؟؟؟
نهال …. < تضربيها بموس ماتطلع منها قطرة دم وقالتله >> اه نعم ؟؟
وسام … كلامى واضح … كملتى ضحكك ؟؟ خودى طريق هي …
نزلت عينها بسرعه ونزلت بااحترمها لحوش جدها قبل ماتتهزء اكتر …
فات الوقت والكل فطر ومشى فى حاله .. وسام نزل وقعمز مع جده يهدرز .. قصى طلع مع بوه باش بيشرو طروف لسياره من محل ويكلم بوه يعطيه دجيره بالمره بالسياره زى ماعوده بوه .. اما امجد فاطلع لشارع وقعمز مع صحابه …
اما نهال فاخدت لمة معاين العشاء وركبت بيهم فوق ونزلت باش تغسل عالة شاى لمرة خالها باش تدير شاهى واول ماحطت العاله .. قالت لمرة خالها …
نهال …. خالتى … اهى العاله واتيه … وبنركب نغسل معايين العشى ..
مرة خالها << سميحه>> …. خلاص وانى شوى ونلحقك ندير اول طاسه لجدك وحناك بس .. والحوش فاضى كلهم طلعو ومعاش يروحو حتى لساعه 12 خودى راحتك ..
نهال … اوك .. تبى شى نادينى ..
ركبت نهال للمطبخ وبدت تغسل فى معايين العشاء وفجأه وهيا تغسل التمحت المسجل على دولاب … فافتحت الراديو على قناة لبييا اف ام … وبدت تدندن مع الراديو وتغسل فى معايين على خشت وسام .. بس هيا ماحستش بيه وقعدت تغنى مع فيروز اغنية << انا لحبيبى >> وعلى تلفيتتها باش تاخد الوركينه من دولاب تنظيف لقاته متكى على باب المطبخ وسرحان فيها …. للحظه كانت ملامحه كأنه كان مبتسم بس اول ماتلفتت نهال رجع طبيعى وقاللها …
وسام …. ممكن تنقصى شوى راديو بنتكى شوى ؟؟
نهال … اوك انى اسفه خالتى قالتلى مافى حد فى حوش .. وسكراته مره وحده وتلفتت وغمضت عيونها وشدة شاربها من تزريطه ورجعت تغسل فى معايين وهوا خدى بعضه وسكر داره …كملت نهال غسل معيين وكيف بتمسح ايديها خش امجد قاللها ….
امجد …. اهلاااا نهوووله  عندى ليك اليوم مشروع مش لضى …
نهال …ان شالله خير شن فى ؟؟؟
امجد …. انزلى لوطه ونجيب الكارته ونلحقك …
نهال … ههههههههههه مانعرفش نلعبها انى ..
امجد …. وقداش عندى نهال انى رح نعلمهالك وبعدها تبدا فيها ريقولياااات على اوصولها وتباصى ..
وعلى خشت قصى وخالها .. واول ماسمع قصى قاللهم …
قصى …. كاررررطه وانى معاااكم من توا …
امجد …. اااااااااى على نفخ لا لا مايمشيش الحال ..
قصى …. تى بنلعب بنلعب …. بوى العب معانا باش امجد يقول باهى ؟؟
بوهم …. تى كبرت انى على دوا هيا ..
نهال …. هياااااا خالى العب معانا …. انى عارفاتك حشيشتك الكارطه من زمان .. ماما ديما تقولى خالك كان سهريات لصبح مع صحابه على كارطه فى مربوعه ..
خالها … ههههههههه زمان هدكا وقت البال كان فاضى والمشاكل مافيش … بس يالله هاتو هيا ..
امجد ….. قصى برا جيبلنا 4 طواسى شاهى لوطه من امى والحقنا هياااااا وخف روحك بنبدوا ومناش مستنينك راهو ..
قصى …. اوووووووووووف ديما انى الا نتشحور مافيش حد غيرى …استنوووووو انى اول واحد بيختار الورق
بدو يلعبو وضحك الولاد ينسمع من هنا وغادى على اول شوط يربحوه … وفاتت ساعه وراء ساعه وقصى نعسه نوم وتكى على مندار وخالها وخر وفتح الجزيره وقوى تلفزيون وقعد يتفرج بينما نهال وامجد قعدو يلعبو مع بعض ويهدرزو وباين انا نهال ارتاحت لى امجد هلبببه وامجد نفس الشى …
امجد ….. نهووله علاش مش مفكره تتزوجى وترحمينا منك شووى ههههههه
نهال …. حسستنى كل يوم عندكم …
امجد …. ههههههههه مش عارف علاش قبل كنت نحس ماعندك عليا … بصدق علاش ؟؟
نهال …. هههههه وماتحرجش ؟؟ نحسك بارد هههههههههه وتقيل دم ..
امجد …. حقا … بجد … هههههههههه حى عليها هادى بطيح سوقى بكل … هوا انتى تلقى زى يافالحه …
نهال …. ههههههههه بعيد سوا عليا منك ..
امجد …. ههههههههههههههههه
وهما يضحكو ويلعبو خش عليهم وسام وقالله ..
وسام … صليت العشى ؟؟؟ ولا كارطه وشارع والصلاه يجيبها ربى ؟؟
امجد … اااااااااااااااااااااااااااااى تى شنى انت معمرينك عليييااااااا ..
نهال …. ههههههههه خلاص انى نازاله … تصبحو على خير …
وسام …. سكرى الباب وراك وانتى نازاله …
انصدمت نهال من وقاحة وسام وشبحت لخالها وقالتله …
نهال … خالى تبى شى ؟؟
خالها … لا لا بنتى وكان فى شى توا نادى عليك ….
نزلت نهال من الحوش ولاقتها مره خالها وقالتلها …
مرة خالها << سميحه>> .. سامحينى نهوله تعبتك معاى بس جارتنا الا جنبنا تهدرز وحناك تعرفيها شدت مصحف على اساس تقرى فى مصحف وبعدين نعسها نوم ورقدت وانى تحشمت نسيبها بروحها …
نهال .. ولا يهمك .. بس هيا حناى تعرف تقرى ؟؟
خالتها …. علمى علمك … على معرفتى بيها انها ماتعرفش.. بس لما تشوفيها كيف تبحلق فيه تقولى خاتماته يخى هههههههه
نهال …. ههههههه ..يالله … خلاص تبى شى ؟؟
خالتها … لا لا سلامتك حبيبتى … تصبحى على خير … نهال ماتنسيش تحطى جنب حناك تمر وحليب قبل ماترقدى باش تتسحر منهم ..
نهال … حاضر من غير كلامك .. تصبحى على خير ..
نزلت نهال وقعمزة فى جنان وقعدت تفكر كيف بيمشى شهر هوا وكيف بيفوت .. وقعدت افكار تجيب فيها وتودى لحد ماحست بالنوم ينعس فيها … فا ناضت وحطت جنب حناها باكو تمر وباكو اللبن .. وخدت تمرات وطاسه حليب كلتهم وحكت سنونها وخشت للفراش …
ناضت صبح … فطرة جدها كبير فى سن وضربتله ابرة سكر وظمت الحوش وكنسة جنان وخشت للحمام توضت وصلت الظهر وركبت فوق لحوش خالها واول ماخشت طقطقت فا فتحتلها مرة خالها وقالتلها ..
مرة خالها .. صبح الخير نهوله .. شنى حناك ماخلاتكش ترقدى من تقربيع ساعه 8 ..
نهال … هههههههه عادى عادى .. توقعت انا يهرب عليها نوم لانها ترقد هلبه فى نهار .. بس توا لقيتها صلت الظهر وولت اتكت هيا وجدى … نحس يضرهم نوم هكى هلبه ..
مرة خالها …. والله قولت وعاودت بس الله غالب مايسمعوش منى …
نهال …. شنى مرة خالى شن بديرى ؟؟ اليوم
مرة خالها … ههههههه مش قتلك معاش تنادينى مرة خالى … نادينى خالتى احسن ..شن مرة خالى هادى .. حتى رزينه نطقها ..
نهال … ههههههه اوك خالتى .. شن تبى تديرى اليوم ؟؟
خالتها …. بندير شربه ورز ودجاج وفركسى وبوريك بدحى وخلاص ..
نهال … خلاص معناها انتى ديرى شربة ورز وانى خلى عليا فركسى وبوريك بدحى ودجاج ماشى ..
بدت نهال تعجن فى عجينه وساهيه وماقطعش تفكيرها الا خالتها لما قالتلها …
خالتها … تعرفى فى بنيه عاجبتنى هلبببببببه ومفكره نخطبها لوسام … بس خايفه من ردة فعله ..
نهال سكتت شوى وبعدين قالتلها ….
نهال …. انى ننصحك تقوليله قبل لانا وسام نحس ماينفعش ينحط فى امر الواقع ..
خالتها … لا لا طز فيه بنخطبها وبنكلم حناك تكلمه … وتقنعه وهوا يحترم فيها هلببببه ..
نهال …. ان شالله حناى تقدر تقنعه ..
وهنا على خشت وسام للمطبخ وقاللها ….

يتبع……….

لقراءة الجزء التالي : الجزء الثالث من رواية حوش جدي

لقراءة الجزء السابق : الجزء الأول من رواية حوش جدي

للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا

جميع الحقوق محفوظة للكاتبة كيندا من ليبيا .