وفي الجزء الثاني من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثاني من رواية محظوظ ولكن
في الجزء السابق …
سماح تبكي:كنت شاكة انا..انه يكلم في واحدة كنت شاكة… وﻻ ومكتوب ورا الصورة حاتم و رنا بخط حاتم وووك عليا وووه
خ سعاد اتكشخ:غير هدي بالك …. رنا شن الكﻻم اللي نسمع فيه هدا !
رنا مصموطة حتى كلمة موقف غريب والكل ايوشوش عليها و لمياء اتبيت من دارها مافهمت شي
خ سعاد:تي نكلم فيك يابلوة حق الدوة
خ وداد: والله كان الدوة صح سامحوني بن…
قاطعتها رنا و عيونها يدمعو :صح ايه..
خ وداد :معقولة يابنتي تكلمي راجل متجوز بصغاره ! اما ترباية هادي
خ سعاد اتحشمت ووجعتها كلمة وداد فردت عليها : بناتي مربيتهم كويس واللي صار غلطة وبنتي صغيرة العيب على زايد العقل ولدك بوعقلين اللي ضاحك على بنتي ..
خ وداد:ئه ئه ماهناك صغر في بنتك اندادها بصغارهم
سماح بنبرة غيض :جاية بتاخد راجلي مني بري دوريلك واحد تاني خطافة الرجاجييل خزيه
منال:احترمي نفسك ولمي لسانك كانك مهنية راجلك راه ماشافش لغيرك بغض النظر عن انها اختي
سماح:ياناري يارويحة ادافعي على وخيتك ! واﻻ تشجعي فيها تستمر انها تكلم حاتم … بدل ماتقوليلها عيب عليك
منال:ﻻ مانشجع فيها لكن شوفي روحك شن اتقولي احترمينا راك ف حوشنا
سماح:والله عاد شن تبيني نقول ايه كلميه ! شدو بناتكم علينا راجل بصغاره واﻻ تبيه يصرف عليك
رنا تبكي وقالت:احترمي نفسك
منال تعفلقت وطارتلها وشادة روحها بسيف كان تلقى تنقز على سماح
والكل ينظر لبعضهم ف نظرات غل سماح:نحترم نفسي ! غير احترمي روحك قبل
رنا:ان
قاطعتها منال بتكشيخة:اسكتي يارنا
خالة عمر :خﻻص ردوها في جواها توا ومشو اﻻمور اللطف عين وصابتكم
خ وداد:ﻻﻻ معليشي اما عيلة هادي اللي بنتهم تكلم واحد متجوز وتخطفه من مرته وصغاره ﻻ حسبت اختها وﻻ دارت قدر ل امها وﻻ خالتها اللطف امليح البو متوفي كنهدا راه جاته جلطة
خ سعاد بدت ترعش:بﻻ دوة فارغة عاد هي عيلة متسمية تحبي واﻻ تكرهي من بكري تدوي انتي وكنتك.. سكتلك هلبا …اتجرحي فينا وانتي ف نص حوشنا
لمياء سمعت طراطيش كﻻم وعرفتها عركة طلعت قدام باب دارها
الموقف ابيخ منه مافيش لمياء دموعها شبوب شبوب جت جيهة خ وداد وقتلها :خليك خالتي خليك مازال مازال مالبستش الدبلة
خ وداد شبحتلها شبحة تقتل وقتلها: كنت نحسابكم ونحسابكم ياودي هئه عمر ماعرفش يختار
خ سعاد:اصﻻ بعد اللي صار احنا ماعتقدش مزال بنتموه الموضوع
خ وداد اكتفت بنظرة متع على اساس احنا اللي نبو انتموه…لمت عيلتها خ وداد وقامو سوابيتهم وطلعوا…وهما طلعوا من اهنا صاخت خ سعاد من اهنا
عمر شاف عيلته طالعين سئلهم شنو فيه
خ وداد:اركب سيارتك اركب
عمر:عﻻش شن فيه مازال مالبستش لمياء !
فرج:عﻻش جايبين سوابيت شن فيه شن صار
والكل ساكت ومكزم …
حاتم سئل سماح:شن فيه خيركم سماح:تحب وتتمعشق واﻻه باه باه الكﻻم مش اهنا حسابنا في الحوش حاتم صارله ذهول ورد عليها:شن تفتفتي !
تلفت عمر لاخته وقالها :شنو فيه نازك ؟؟
نازك توشوش لعمر: اخت لمياء اتكلم في خوك حاتم مش عارفة كيف المهم وعندها حتى صورته ومرت خوك دارت مشكلة
عمر قاعد واقف برا سيارة وقال:به انا شن دخلني في اختها وشن دخلني ف حاتم
خ وداد:ماناقصني غير عيلة وخالها ميﻻد… اركب اركب خلي نروحو
عمر:تي استهدي بالله يمى وارجعي وخلي نتمو الموضوع
خ وداد:وحق الله واسمه ماني موليتلهم وﻻ مكلمتهم بعد هاللي صار حتى امها لسانها فاوي ادافع على بنتها بدل ماتسكت وتتحشم
نازك:كيف تبيها تسكت يمى وانتي عطيتيها على راسها ماكتب من الله خ وداد:تسكتي انتي ياقردة ..
عمر:غير هيا يمى
خ وداد:والله ماتحلم اني انولي انا وداد بنت الباعيش انولي لناس زي هادو
عمر:تي شن تقولي يمى اما باغيش واﻻ فراريج راني ولدك مش عدوك انزلي هيا
خ وداد:قلت ﻻ انا …اركب هي …اركب
غصاته عبرة عمر وحس روحه مخنوق واياماته سود غبر ع دماغه
فرج ل عمر:غير روح بيهم يا عمر باين عليها صايرة عركة قوية
عمر:شن اتقول انت يافرج
فرج:الموقف قاعد سخون وكلهم مشحونين… روح بيهم توا وخليهميهدو وفاتحهم ف موضوع
ضرب رجله عمر ف سيارة مرة واتنين وتﻻتة وركب سيارته وولع ودارها طيارة وروح بعيلته حطهم في الحوش ومشي لمكان عمله وقعمز قدام البحر … حالي يبكي الحجر … هدا وين زدت تأكدت ان ماعنديش حظ ..عﻻش بس وكيف صار اختها تكلم في حاتم وحتى ولو تكلم فيه انا شن خصني ف عمهم … حاتم مش صغير بش يقولوله تكلم واﻻ حتى تبي تتجوز … كله من السوسة سماح عارفها انا هالقردة هادي …
وقف عمر ونحى جاكيت متعه وخش في البحر لين راسه اختفى تحت الميا
منال:يمى يمى فيقي…. ياشذى جيبي الزهر ياشذى
شذى :يامنال راهو لمياء سايخة
منال:نهار حرف حسبي الله ونعم الوكيل فيك ياوداد الشياطين انتي وكنتك السحنة …حاولي تتفيقيها ياشذى وجيبيلي تلفوني خلي نتصل بعادل يرفعنا مستشفى فيسع
شذى:باهي هي
جابتلها تلفونها واتصلت بعادل وقتله تعال…
وبعد دقايق من محاوﻻت من منال وشذى انهم يفيقوا لمياء وامها فاقت لمياء وقعدت تبكي … اليوم اللي كان يعنيلها هلبا تفركش بطريقة او بأخرى ..و مازال مش فاهمة السبب بالزبط …
لمياء:ماما … فيقي ياماما فيقي
بالله عليك …
و خ سعاد ﻻ اجابة
لمياء:منال … منال عﻻش حظي هكي
منال:معليشي وخيتي غير اتفيق امك توا ﻻ سو وﻻ سوية وبعدين ساهل
هزت راسها لمياء اوكي وهيا تبكي مسحونة على التفركيشة اللي صارت اليوم اللي تمنت اتكون فيه اميرة في قمة السعادة وتعانق النجوم اتحول لتعاسة …
وبعد شوي شرين الحوش ..
فتحت شذى الباب …
شذى:عادل …باه اللي جيت شوية بس نادي منال
لبست عبايتها منال ولبست امها العباية ووشاح وام شذى لبست عبايتها وطلعوها هما التﻻتة منال وراجلها وخالتهم وصلوها سيارة ركبوها من الخلف ومشو بيها للمستشفى
..
انور: علي…ياعلي
علي:هاه
انور:شن هداكا اللي ف البحر
علي:وين !
انور:تي اونه غادي
علي:بالك شوال سكر
انور:شاك فيه شخص
علي:غارق قصدك
انور:ايه ….. ياسعد …سعد
سعد:ايواااه
انور:ولع الكشاف تره
سعد:باه
انور:حرك يمين تره … زيد زيد
علي:ياودي مافي شي
سعد:فيه حد غارق ياانور
نزل انور للبحر بالقارب متعه لين وصل في الشخص ولقاه… عمر زميله ف العمل غارق
طلعه من البحر وحطه ف القارب
سعد:شنو ياانور انجيك
انور:تعال تعال
جاه سعد وشاف فلقاه عمر …
سعد:خيره عمر غارق معقولة الحوت يغرق !
انور:حتى انا انصدمت وﻻبس بدلة
وين كان
ضغط على بطنه انور ودارله تنفس اصطناعي
سعد:بش اليوم بيانه !
انور:ايه صح خيره اماﻻ جي للعمل ؟
…وضغط تاني ع صدره
سعد:خلي نتصل ب خاله وخﻻص … خدي تلفونه سعد واتصل بفرج …الو…فرج…تعال عمر غرق روحه وتوا طلعناه
فرج:استغفر الله اهو جاي مش بعيد انا ..
ضغط انور على بطن عمر تاني مشي فاق عمر وشهق شهقة قوية وكح كحات وقال:لمياااااااء …
تلفت يمين يسار استاقض لروحه فكمل كﻻمه …خليتوني متت بش اريح ﻻش طلعتوني ﻻش … حتى شخص بيموت ماتخلوشي تعبت منها الحياة هادي تعبت …كل مانقول بنبتسم نرجع نتنكد مكتوبلي الشقا …. نرقعها من اهني تنشرك من اهنا فديت
انور:عﻻش خيرك بش اليوم بيانك ! مفروض تكون فرحان
غافلهم عمر ونقز تاني في البحر
لحقه انور وقعدو يتعاركو انور يبي يطلعه وعمر يضرب فيه يبي يغرق
لين جي فرج
سعد:يافرج لحق ولد اختك بيغرق روحه… وانور من بكري يبي يطلعه
نقز فرج ف البحر ومن تفرفيش عمر معش قدروه زي الهايشة
عمر:تي خلوني… خلوني انموت دخلكم ف عمي انت وياه تي خليني ياانور ….
فرج غصاته العبرة على الموقف … ولد اخته وصاحبه في نفس الوقت موجوع ومضايق…
ومن هون لهون ايشدوه ويفلت منهم معش قدروه فا فرج ضرب عمر على راسه …و عمر فقد الوعي
**
فرج :عمر عمررر شنو رقدت !
فتح عيونه عمر وقاله:ﻻﻻ كنت سارح بس
فرج:فاش سارح
عمر هز كتافه ودار نظرة هكي على جنب
فرج:به نوض نوض الطيار قال قريب نوصلوا
عمر:اااخ ياخالي ااااخ
فرج:معناها طول طريق الرحلة انا نحسابك راقد وانت قاعد تتدكر في اللي صارلك واﻻه !
عمر:كل مانغمض عيني ندكر فيه الموضوع تعبت يافرج تعبت
فرج:معليشي ياعمر معليشي
عمر:شن شادلي معليشي معليشي فرج :باهي شن تبيني نديرلك تره قولي هي ….بتمشي تخطبها تاني بعد اللي صار امك مش حتوافق واماليها واخدين موقف منكم
عمر:اتصلت بيها بعد الموقف هدا كدا مرة تتهرب مني وقتلي امها ساخت من كﻻم امي وجاها السكر وصارت فيها حالة ومازال تبي عيلتها توافق… تي حتى وقت نازك عاودتلي كﻻم مرت خوي اللي قالته ل اخت لمياء اتحشمت والله اتحشمت يافرج
فرج:مابعدك برغم ان فات شهر على الموقف اهواه اﻻ اني نتفكر فيها هديكا الليلة … وقت طلعناك من البحر لين عيني دمعت ربي ايعينك بجديات…هوا انا و وجعتني اللقطة يبالك انت…
عمر:ااه ياربي من دون الناس انا بس اللي يصير فيا هكي كل البينات يمشوا زي الساعة يلبسوا ويفرحوا ويطلعوا ايصوروا وانا …استغفرلله وخﻻث
فرج:الصبر يا عمر الصبر …
اهو وصلنا تركيا هيا خلي ننزلوا من طيارة توا
عمر:جيتي اهنا غلط ف غلط مفروض ماجيتش معاك
فرج:تي هما يومين بس عالسريع منه ناخد حاجتي ومنه اتغير جو .. …ليك شهر حابس روحك
نزل عمر من الطيارة هوا وفرج ومشو لاقرب اوتيل حجزوا غرفة وركبوا… خش عمر للغرفة حط شنطته وطول للحمام خدي دوش ولبس سروال توتة وتوب واتكى ع السرير ….
محظوظ ولكن … اللي نعرفه اني من غير حظ مافيش نهائي… مستاجع انا هلبا مش شوية . فيه حد حاس بيا واﻻ نسكت 
؟؟
مكسووور خاطري
كسرت الخاطر والحياة المرمادة.. تشيب صغير السن قبل اندادة
فرج:دادة
عمر:برا هوينا ياراجل مانكلمش فيك فرج:هههه باهي انا طالع بناخد شفرة وشوي حاجات تجي معاي
عمر:ﻻﻻ برا بروحك
طلع فرج وعمر حط راسه على المخدة ومشي فيها نومة
وحتى رجع فرج مافاقش بيه …
فرج:عمر ياعمر
عمر:هممم
فرج:عمررررر
عمر:هااااااه
فرج:جبت شفرة كان بتكلم العويلة
عمر:ﻻﻻ….ادكر لمياء فقاله: به هاتها هي
مدله فرج الشفرة…خداها عمر ركبها في نقاله واتصل ب لمياء …
لمياء:الو … الوووو
عمر:لمياء …لمياء كيف حالك
لمياء:مني عمر ؟؟؟
عمر:ايه
لمياء:عﻻش متصل عمر شن اللي خﻻك تتصل في الوقت هدا بذات
عمر:عﻻش اتقولي هكي يا لمياء انتي عارفة اللي صار بخارج ارادتي وبخارج ارادتك
لمياء:عمر انا صح انحبك وانت اتحبني لكن… لكن عﻻقتنا شبه مستحيلة
عمر:معش اتقولي هكي مافبش حاجة مستحيلة … انا حنفوت فترة هكي ونفتح الموضوع مع امالية
لمياء:اذ كان اماليك بيوافقوا فا اماليا ﻻ
عمر:عﻻش انحس فيك مش شادة في الموضوع برغم ان الغلط مش مني وﻻ منك
لمياء:عارفة ان اختي غلطت ب ارتباطها مع خوك لكن الكﻻم اللي سمعاته ماما من اماليك وجعها وجاها السكر وقعدت فترة خانقتها العبرة حكيتلك تقريبا
عمر:عارف والله عارف لكن..
قاطعاته لمياء وقتله:عمر بنقولك حاجة ونتمنى ماتفهمنيش غلط
عمر:قولي
لمياء:انا …انا…انا عرسي السبوع هذا
عمر :ش ش شنو
وفصل الرصيد …
يتبع……
لقراءة الجزء التالي : الجزء الثالث من رواية محظوظ ولكن
لقراءة الجزء السابق : الجزء الأول من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
