الجزء

الجزء الخامس من رواية قد كفاني

الجزء الخامس من رواية قد كفاني

وفي الجزء الخامس من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .

الجزء الخامس من رواية قد كفاني

وغسلناها ودي المرة التانية نقوي قلوبنا ودي المرة التالتة الموت زار دارنا وخلانا نفترق وحتى العايش عايش بس عشان م ينتحر ويدخل النار انتهينا من غسيل رهف والرجال رفعوها واحمد قال ما بمشي مالم اسمع بكائكم ( دليل على أنهم صدقوا) وقال لينا رهف ماتت احسن تدعوا ليها بكينا انا ومهجة ومهاد والرجال اتحركوا بالعنقريب وانا كل خطوة منهم حاسة انها بتمشي على قلبي م على الأرض ناس الحلة جو وعايزين يفرشوا لي امي الله يرحما واتفاجؤ باني قولتا ليهم انتهى العزاء بمراسم الدفن واهلنا ياداااب شرفوا بعد ما دفنا، عندي بت عمي اسمها ريان يااخ دي م جات بيتنا من وفاة ابوي ،وحاليا قاعدة تبكي وجات عزتني مديت ليها طرف يدي وانا والله بطني طامة منهم كلهم، مشت على مهجة وحضنتا بس إتفاجأت انو مهجة دفرت ريان بكل قوة وقالت ليها الانسة ريان ما كان تشرفي ؟ما بدري ؟ عاملين فيها اهل والله الحمد لله عندنا الناس الواقفين معانا وعارفين حالنا ما محتاجين ليكم اتفضلوا اتخارجوا ومن الليلة انا م في صلة بتجمعني بيكم بعد الكلام دا مباشرة اخدتا لي كف شدة ما حار م قدرتا احدد صاحبوا منو ( تتخيلوا منو ؟ ) بعد مسافة حتى عرفتا انو دي مثاني اختي قالت لي مهجة ارجعي لي عقلك انتي من متين بتقولي كلام ذي دا مسكتني من يدي وقالت لي اعتزري من ريان وعشان م اقطع صلة رحمي ولأن الرسول صلى الله عليه وسلم كان يعطي من حرمه ويصل من قطعه ويعفو عن من ظلمه
وبعد فترة بسيطة من وفاة امي احمد قال لازم يعقد علي واحدي فينا عشان يقدر يتولا امرنا قلتا ليهو الحمد لله نحن م محتاجين وم تشيل هم قال لي آخر كلامي يا انتي يا اختك وقرروا سريع

باليل قاعدة مع مثاني وحكيت ليها بي كلام احمد قالت لي والله صح كلامو لانو محتاجين راجل وسيد البيت عايز بيتو وقالت لي انتي لازم تتزوجي قلتا ليها مثاني انتي جنيتي ولا شنو !!
انا والله ولا بتزوج احمد ولا حاجة واحمد دا من زمان عايزك انتي حتى انا لمن كنت خاتا معاهو القروش كان بسالني عنك وانتي ذااااتك م غايب عني انك بتحبيهو عايزة تتضيعي الفرصة من يدك 😉استخيري والكاتبو ربنا ببقى قالت لي خلاص تمام استخارت في الليل وبعد يومين ادتني موافقتا فرحتا ليهم شديييد وعقدوا في المسجد واعلنوا الزواج واحمد جا بارك لي مرتو و وزعنا بلح وتم العرس وبقى يومي يجينا حتى يمشي الشغل ومرت الأيام واحمد جاهو عقد عمل في قطر استاذني ياخد مرتو الخرطوم عشان تودعو قلتا ليهو مرتك اكيييد تمشي معاك واذا عايزها تمشي معاك قطر م عندي مانع قال لي لا م للدرجة دي اصلا انا فضل لي شهر نسافر الخرطوم شهر العسل ومنها أودعها وانا من اليوم داك شغالة تجهيزات في اختي وعملت ليها الحبسة وعمرها بقى 15 سنه وديتها الكوفير رسمو ليها وجهزت ليها شنطتا ونسوان الحلة كلهم بتكلموا وبقولوا التقول امهم واختهم ما اتوفوا قبل 4 شهور انا والله كلام الناس آخر همي بس مثاني اتاثرت وقالت لي صح كلام النسوان وانا مفروض م ارسم قلتا ليها حبيبتي مثاني م تشتغلي بزول والحداد فوق ثلاثة ايام ذاتو م صح انتي ترضي الناس وتغضبي، ربك مثاني ياغالية لو عايزة تعيشي وتاخدي راحتك لازم م تشتغلي بي كلام الناس لازم ما تبرري لي زول عن ااي حاجة بتعمليها ارضي نفسك وقبلها ربك وصدقيني قلبك ح يكون مطمئن وصلنا البيت ودخلنا المغرب أذن صلينا وانا دعيت من كل قلبي ربنا يحفظ لي اختي انا عايشة بس عشان اشوفها مبسوطة واحمد ماشاء الله ما بقصر فيها ربنا يحفظهم لي بعض
مثاني حضرت شااي المغرب وشربنا واحمد جاء يشوف مثاني لو ناقصة شي وقال ليها عازمكم نمشي البحر لو م في مانع مثاني قالت ليهو بمشي اسال مهجة وبجيك قال لي خلاص تمام، مهجة كانت في الأوضة عشان ناخد راحتنا في الونسة قلتا ليها يا مهجة احمد قال عازمنا نمشي معاهو البحر قولتا ليها انا م ماشة امشي انتي وراجلك اخدوا راحتكم( ذووق) قالت لي مهجة عليك الله امشي معانا اصلا عازمنك انتي ومهاد ( يعني هي م ح تكون بين البصلة وقشرتا ) قولتا ليها خلاص تمام احمد قال لينا اجهزوا اصلي العشاء واجيب مهاد معاي قلتا ليو تمام انا ومثاني لبسنا عباياتنا ونقاباتنا شي م ظاهر مننا حاجة كدا راحة نفسية بنسبة لينا ،احمد بعد صلاة جانا ومعاهو مهاد ومرقنا على البحر اول حاجة اتذكرتا لمن ابوي بيوديني ليهو وبقول لي عايزك تبقي بحر ،مجاز وحقيقة وطبيعي كنت بسألو كيف ابقى بحر انا مهجة م بحر ونضحك شديد كان بقول لي تبقي بحر مجاز يعني تبقي كريمة وبحر حقيقة يعني يكون جواك آلالم كثيرة بس الناس م تشوف فيك غير الهدوء وما ترتاح الإ بجوارك اتنهدتا ومن غير م اشعر قلتا بتك يابه بحر مجاز وحقيقة، م في زول فهمني مهاد قالت لي قولتي حاجة يا مهجة قولتا ليها ابدا احمد ومثاني مشو براهم وانا ومهاد قعدنا برانا قالت لي عندي ليك خبر قلتا ليها اها وانا اصلا فقدتا الشغف تجاه ااي حاجة بدت تحكي وقالت لي في واحد اتقدم لي وكانت مبسوطة قلتا ليها ربنا يتم ليك على خير قالت لي والله انتي تبرد منك الله م خلق، اسالني اسمو منو ،وعمرو كم ، اتلاقيتو كيف، ؟ قولتا ليها مهاد دا كلو م مهم المهم انك مبسوطة ودا الانا عايزاهو
مهاد منتقبة بس م ملتزمة يعني عادي بتسمع اغاني ام عندها مشكلة انو تتواصل مع خطيبا بالتلفون المهم اخدنا قعدتنا واحمد ومثاني جو علينا اتونسنا شوية كدا واحمد طلع لينا تلفونات حديثة كدا ادا اختو وزجتو اداها قبييل ومدا لي انا قلتا ليهو انت اكيد بتستهبل انا تلفون اعمل بيو شنو؟ ما عايزة وجزاك الله خيرا ما قصرتا ربنا يقدرني ارد ليكم جمائلكم علي قال لي حسستيني انك بتخاطبي زول غريب انا اخوك وبعدين والله الذي لا اله غيره انا عشان عارف لو القروش حقت التلفون دي طلعت من جيبي متاكد تماما انو م بتشيلو عشان كدا القروش دي حقتك قولتا ليهو حقتي؟!! قال لي ااي والله دي قروش علاج امك واختك الكنتي لاماهم معاي قولتا ليهو طيب معناه انت كنت بتصرف علي مداام القروش دي لسة محفوظه عندك قال لي في واحد اتكفل بي كل حاجة بتخصك حتى انو الكفن حق امك واختك هو ختى بدلهم اتنين في المسجد وعمل سبيل على روح والدتك

انا اتعجبتا من الكلام دا قولتا في سري دا منو ياربي قولتا ليهو انت بتعرفوا قال لي لو شوفتوا بعرفوا لكن م بعرف اسمو حتى الجمعة المضت دي وقت مشيتي تدي الاطفال الدرس في المسجد هو جا ونزل مواد تموينية تكفي شهر وسأل منك ومن صحتك إسألي مثاني دي قولتا لي مثأني دا منو يا مثاني قالت لي ما بعرفوا لكن تتذكري صاحب العربية الجانا قبل 4 شهور انا قعدتا افكر صاحب عربية؟!!! متين جانا ؟ قدر ما حاولتا ما اتذكرتا ( خلونا منها انتو متزكرين ) قلتا ليها انسى الموضوع ( لكن نحن م ننسى ) استلمتا منو التلفون وقلتا في سري ابيعو وأعمل حاجة تنفع أمي أما أختي ما عليها حساب عشان كدا بدعي ليها ساي المهم إتحركنا على البيت أحمد قال لينا نبيت معاهم الليله قلتا ما مشكلة أصلا البيت مغفول مشينا مع احمد ومهاد بيتهم أو بالأصح بيت أختي انا ومهاد قعدنا في البرندة واحمد ومثاني خليناهم في الصالون وعمو عبدالله رقد في الحوش الساعة عملت 9:30 والناس كلها نامت وانا النوم غلبني بين ذكريات جميلة عالقة في ذاكرتي وعن حب جدي وحبوبه وحنيتهم علينا ولا خالي مجدي وضحكتو الكان صداها بتردد في أذني زي الكأنو هسي بسمع فيها رفعتا يدي لربنا انا كلي ضعف وإنكسار وقلتا (اللهم أرحم أجسادا دفنت؛ فدفنت روحي معها ) وتلقائيا لقيت نفسي ببكي بحرقة 😔وتاني شلت هم اختي وإنو بكره ان شاء الله بتسافر قفلتا(اللهم أحفظ أرواحا أعيش من أجل أن أراها سعيدة ) وبرضو من غير إي مقدمات إتذكرتا صاحب العربية المجهول الوقف معاي طول الفترة الفاتت دي من غير ما أعرفو فقلت(اللهم إحفظ كل من ينفق علينا ويسر أمره وأجعل السعادة هي حظه ) تاني نمتا من كترت التفكير من غير ما أشعر كالعادة قمتا الساعة واحدة ودا زمني المحدد للقيام قمتا وصليت وانا بس في بالي صوت أمي ودعائها لي بكيت قدرتي وقريت قرآن إرتحتا شوية ورجعتا نومتا …..
عمو عبدالله ضرب الباب على الخفيف كدا انا صحيت ولبستا توبي وغطيت وشي وقلتا ليهو إتفضل قال لي صباح الخير يا بتي قلتا ليهو يسعد صباحك عمي قال لي عن إذنك عاوز اصحي احمد عشان الأذان الأول أذن بعتذر على الإزعاج قلتا ليهو لالا يأخ مافي إزعاج صحى أحمد ومشو المسجد أنا إتوضيت وصحيت مهاد ومثاني صحت براها صلينا واي زول قرا جزءو المحددو بعد الشمس طلعت انا ومهاد عملنا الشاي والزلابية وشربنا واحمد طلع الشنط ….
————————————–
———————
*☆يتبــــــــــــــــــــــــــــــــــــــــــــع☆☆*

لقراءة الجزء التالي : الجزء السادس من رواية قد كفاني

لقراءة الجزء السابق : الجزء الرابع من رواية قد كفاني

للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم

جميع الحقوق محفوظة للكاتبة آيه إبراهيم .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى