وفي الجزء الرابع من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الرابع من رواية قد كفاني
قال لي كيف انتي !!قولتا في سري لا حول ولا قوة الا بالله قولتا ليهو قصدي والدتي اتوفت الإمام قال ان لله وانا اليه راجعون دقيقة اجيب ليك الحاجات مشى بيتو وكان في المسجد وانا دخلتا مسجد النساء وصليت النافلة وجاتني بت الإمام اسمها مهاد والاسرة دي جزاها الله عني كل خير والدها كان أمام مع والدي في واحد من مساجد الحلة الكنا ساكنين فيها وبعد وفاة ابوي ماقدر يواصل ورحل الحلة التانية وبقى مؤذن في المسجد الثاني اما مهاد دي كانت بتجيب لينا اكل بيتهم ونهائي ما قصروا معانا دخلت علي في المسجد وبكت معاي وربطة لي نقاب وقالت لي انتي من يوم وفاة ابوك مافي راجل شاف وشك اتقوي ونقابك اوعى تتخلي عنو ابوي ذاتو اتخلع لمن شافك من غير نقاب ياداب حسيت على نفسي استغفرت والاذان الثاني اذن صلينا انا ومهاد في المسجد وطلعنا قبل الرجال عشان نجهز امي ،اللحظات دي بالذات انا ضعفي زاد وقلتا لي مثاني انتي لبسيها وعطريها مثاني اصرت انو ادخل معاها عشان نقوي بعض دخلتا معاها شوفت امي مبتسمة والله لو ما ماتت قدامي وانا الغسلتها ما كان صدقتا انها فارقت الحياة.
بعد خلاص جهزناها مهاد قالت لينا نادو رهف تودع امها انا ومثاني مشينا حاولنا نصحي رهف ابت تقوم مهاد جات حاولت تصحيها وشافت النبض للاسف لقتو واقف ليو قرابة الساعتين اتخلعت ونحنا م منتبهين نهائي قولتا ليها مهاد مالك قالت لينا م شئ ،سمعنا ضرب في الباب مثاني قالت ديل الرجال ومشت لبست نقابها ودموعنا حالفة تقيف ومهاد تقول صابة فيها مطرة خايفة تقول لينا رهف ماتت تقوم واحدة فينا تجن وهو هسي قاعدين في حالة اشبه بالجنون مثاني فتحت الباب ،الرجال دخلوا ومعاهم العنقريب رفعوا امي انا جريت وراهم بس مهاد ومثاني مسكوني والرجال ماشين على الباب كوركت شدييد ودي كان اول صرخة وقلت ليهو عمو عبدالله اقيف( ابو مهاد ) وقف ونزل العنقريب وقال لي يا بتي مالك اصبري شوية هسي اخواتك التانيات يقولوا شنو قلتا ليهو يا عمو انت عارف قبر ابوي صح قال لي ااي قلتا ليهو في ارض فاضية جنب القبر على يدك اليمين ادفنوا فيها امي وباقي الارض ح نندفن فيها نحن دي وصية امي الله يرحمها
مهاد اتخذت الفرصة ونادت احمد أخوها وكان وشو مورم من البكى لانو امهم اتوفت طول شديد وكانوا بقولوا لام مهجة امي المهم قالت ليهو احمد اصبر لانو المصيبة الأكبر لسة ما جات قال ليها هو في مصيبة اكبر من دي الحمد لله على كل حال قلت ليهو احمد والله رهف اختنا دي اتوفت قال لي تقصدي منو قلتا رهف يا احمددد رهااااف، احمد ذي التقول ضربتو كهرباء قال لي انتي بتقولي في شنو قلتا ليهو والله ماتت كمان بعد وفاة امي طواالي كان واقف قعد في الأرض وبعداك عمو عبدالله قال ليهو يلا يا احمد عشان ننفذ الوصية كان ماسك راسو نادى ابوهو والرجال واقفين حكى ليهو عمو عبدالله جسمو كلو رجف وقال هسي نحنا ح نعمل شنو؟ انا م بقدر اكلم البنات ديل ح يمشو في درب بعض والله الحمد قال ليهو انت شيل معاك كم راجل كدا واتحركوا بي امي ونحنا بعد شوية بنجيكم برهف، عمو عبدالله قال ليهو امري لله اعمل حسابك البنات ديل مستحيل يصبروا
البنات ديل مستحيل يصبروا ،عبدالله مشى كلم الرجال واتقسموا النصف جزء مشو مع نعش امي والباقي منتظر جنازة رهف وانا دا كلو م على بالي بس بتردد صوت امي لمن كانت بتقول لي مهجة ربنا يصبرك ويقويك شوية كدا اسمع ليك مثاني تكورك بطول حسها انا شايفاها بس م قادرة اقوم اقويها قلت خليها تاخد راحتها في البكى احسن ، لمن ركزت في كلامها لقيتا بتقول واااي يارهف حرقتي قلبي يا رهف 
قلتا مثاني دي جنت ولا شنو مشيت عليها وقولتا ليها اصبري يا مثاني رهف هسي بوديها الدكتور مهاد مسكتني من يدي وقالت لي رهف ماتت يا مهجة ادعي ليها واصبري انا في اللحظة دي قعدتا اضحك ااي والله قعدنا اضحك بصوت عالي وبعدها ما شعرت بي اااي شي
على لسان مثاني مهجة اختي بقت ذي المجنونة ما بتتكلم سرحانة الوقت كلو نحن جبنا دكتور عشان نتأكد من وفاة رهف وطلعت فعلا متوفية ليها زمن أثر صدمة ، احمد قال لي مهجة ادخلوا غسلوها الزمن مشى انا قولتا ليهم م داخلة ومهجة لا حس لا خبر احمد قال لي مهاد ادخلي انتي غسليها مهاد قالت ليهو والله انا ذاتي م بقدر احمد جا على مهجة وقال ليها مهجة انا متاكد انك سامعاني يرضيك اختك تمشي من غير م تودعيها يرضيك انك تغسلي امك وتقولي م عايزة تغسلي اختك مهجة حركت عيونا انا حمدت ربنا انها ما دخلت في حالة نفسية واستجابة لكلام احمد ودخلت وهي ساكتة على الأوضة القاعدة فيها رهف سلمت عليها وقالت ليها عارفاك زعلانة مني عشان انا ما جبتك ودعتي امي
اعفي لي يا اختي
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الخامس من رواية قد كفاني
لقراءة الجزء السابق : الجزء الثالث من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
