الجزء الرابع من رواية حكاية دعاء

ايمان طول الوقت تبتسم وبعد تغدو مع بعضهم بحتت في محمود يلي يشرب في شاهي : في خبر حايفرحك

محمود : خير ان شاء الله شنو هالخبر يلي حايفرحني

ايمان : منتصر كبر وعاجبته بنت يوسف الكبيره يبيهاا

محمود ابتسم : ما شاء الله ومن امتى هالكلام صار

ايمان : هو بصراحه حكالي اليوم انه مضايق عشان لما كبرت دعاء ماعش قعد يشوف فيها ولا قدر يحكي معاها قتله في حدود توا بينك وبينها ومستحيل يقدر يحكي معاها الا اذا نواه الحلال فقتله نخطبوها لك وبعد تتخرج انت نطلعو العرس وهي تكمل قرايتها معاك طار من فرحته لما حكيتله هكي لو تشوفه مش مصدق ويبيني نحكي معاهم اليوم بس انا قتله نقولها لباتك قبل

محمود : اكيد موافق ومش حانرفض ويوسف ما شاء الله عليه هو وبناته ومستحيل نلاقو احسن من بنته دعاء

ايمان : ما شاء الله عليها ابنيه سموحه وشطوره

محمود ابتسم : اليوم امشيلهم واحكي معاهم الموضوع عشان نحكي مع يوسف المهم يوافقو قبل مانحكي معاه

ايمان : بأذن الله بعد العصر حانمشيلهم ونحكي معاهم

بعد العصر

عدت يا حنه ايمان لحوش يوسف ونوال يلي فتحتلها الباب ورحبت بيها بدون ماتعرف سبب الزياره : مرحبتين بيكي تفضلي وكيف حالك وحال محمود ومنتصر

ايمان بأبتسامه : الحمدلله كويسين انتي شنو اخبارك واخبار البنات ويوسف ومعتصم ان شاء الله طيبين

نوال : الحمدلله خشي تفضلي الحوش حوشك

ايمان : تسلمي ياربي وخشت واعيونها ادور عالبنات

نوال : في من ادوري اذا عالبنات هما رقدات توا

ايمان قمعزت وبحتت فيها : نوم العوافي ياربي وبصراحه انا جيتك اليوم لسبب مش عشان نهدرزو لا في سبب مهم جدا يخص ولدي منتصر ونتمنه تسمعيني للأخير

نوال بأستغراب : خير كنه منتصر في حاجه صايره معاه

ايمان : يلي صاير معاه كبير واجد ومتعبه يا نوال وبنتك دعاء هي أساس حالته ومعناته وكل شي صاير معاه

نوال : ليش كنها بنتي لو مزعلته حانوريها بس هي ماتحكيش معاه من زمان ممكن توضحيلي شنو في ؟

ايمان : منتصر عاجبته دعاء ومضايق عشان مافيش فرصه يحكي معاها ولا معطيته مجال اصلا وهو ناوي الحلال لو موافقين علي منتصر يحكي محمود مع يوسف ويتفقو وتوا خطبه بس لكن بعد تخرجه نطلعو العرس

نوال : والله بجديات ماتوقعت الموضوع هكي في البدايه خفت يكون صايره حاجه كبيره زي ما حكيتي بس دابينه الموضوع في حلال وزواج هههه فرحني واجد لكن دعاء مزالت صغيره ونتمنه الخطبه تكون طويله علي الأقل

ايمان : ههه اطمني وانتي عارفه تخصص ولدي يبي يقعد قاضي وان شاء الله ربي يوفقه ويوفق دعاء وانتي احكي مع يوسف لو وافق قوليها ليا عشان محمود يتفاهم معاه

نوال : حاضر ماعندكش اي مشكله واليوم يجيك الرد

ايمان : نراجي فيكي وهيا توا لازم نمشي مع السلامه

نوال : هضا وين جيتي خليكي اشويه نهدرزو

ايمان : لا لازم نمشي ولدي يراجي فيا ههههه

نوال ضحكت : باهي بلغيه يراجي ردها ورد باتهااا

ايمان : حاضر وان شاء الله يكون في نصيب بينهم

نوال : يارب وكانت فرحانه واجد بنصيب بنتهااا

ايمان روحت للحوش وقفها منتصر ولدها : طمنيني

ايمان بأبتسامه : توا يردولنا خبر بعدين بأذن الله

منتصر : ان شاء الله يوافقو والله خاطري نحكي معاها

امه ضحكت عليه : توا تحكي معاها واتشوفها اكويس

منتصر بأبتسامه : ان شاء الله يارب وعدا لغرفته وتفكيره فيها طول الوقت حاسس بأحساس حلو اول مره يحسه

دعاء بعد ناضت من نومها نادتها امها عدت لعندها : نعم

نوال بأبتسامه : كبرتي يا بنتي وجاك عريس يبيك

دعاء انصدمت وبخوف : كيف مافهمتش ومن هضا ؟

نوال : جارنا منتصر طلع يبيك وطلباتك عمتك ايمان

دعاء وجها انقلب باكو الوان وفي نفس الوقت ماتوقعتش ابدا ان منتصر يبيها وحايخطبها قلبها قعد يدق بسرعه

امها بأبتسامه : شنو يابنت وين صوتك احكي موافقه

دعاء تلكلگ وبأرتباك : اااا والله مش عاارفه شنو نحكي

امها ضحكت : كنك شنو صايرلك أول مره نحقك هكي

دعاء صبت ووجها احمر : ماما بجديات مش عارفه شنو نقول بس لو انتو شايفين ان منتصر مناسب ليا وموافقين عليه فأنا حنوافق عليه وعدت تجري لغرفتها والفرحه واضحه في وجها بحتت فيها سجى يلي تقرا سيبت كتابتها وبحتت فيها : خير شنو يلي مفرحك هكي

دعاء : عارفه منتصر طلع يبيني وطلبني والله

سجى انصدمت : كيف يعني انتي وياه حاتتزوجو

دعاء بحتت فيها : مانعرفش بس أنا صغيره مزلت

يوسف بعد علمها ابتسم : والنعم فيه هو وباته ما شاء الله عليهم والله فرحت ومنتصر كويس بكل وعاقل اخراا

نوال : حتى انا شايفته هكي وفرحانه واجد

يوسف : خلاص ردي عليهم وقوليلهم موافقين

نوال : تمام توا نقولها وعدت اتصلت بأيمان بلغتهااا

ودغري قعدت تزغرت ايمان وفرحت بولدها يلي طلع يجري من غرفته وفرح لما شاف فرحتها وزغروتتهااا

نوال : ان شاء الله ألف مبروك وتشرفونا في أي وقت

ايمان : يومين بس وتلاقونا عندكم وسلميني علي كنتي

نوال ضحكت : حاضر من أعيوني وليلتكم طيبه يارب

ايمان : وليلتكم وبحتت في منتصر : مبروك موافقين

منتصر : الحمدلله بس ليش قلتي بعد يومين ؟

ايمان : لان نبو نجهزو للخطبه ونبي انجيب هديه لدعاء

منتصر : باهي جيبولها تليفون عشان نحكي معاها

ايمان زقاته : انت مش شورك والهديه علي ذوقي والتليفون بروحك جيبه وسلمه لها بنفسك وعدت وهي تضحك عليه وهو همس : تمام حانجيبه هو والشفره

يوم خطبة دعاء ومنتصر /

ايمان جابتلها هديه فرحت بيها واجد وهي عباره عن اكسسورات وساعات ماركه مشكله لان عارفتها اتحبهم واجد وطول الوقت تمدح فيها وبعد جاه وقت اللقاء بينها وبين منتصر خافت اشويه ولبست حجابها وطلعت مع خوها معتصم وبحتت في منتصر يلي صبا وأعيونه عليها ارتبكت واجد وبصوت خجول قالت : السلام عليكم

منتصر : وعليكم السلام ورحمة الله وبركاته كيف حالك

دعاء : الحمدلله أكويسه وبحتت في الكيس يلي ماسكه في يده وأشرلها اتجي تاخده : تعالي وما تخافيش

قربت بهدوء وخداته منه : شكرا عليش متعب روحك

منتصر : مافيش تعب وجبتلك تليفون وشفره مبروك

دعاء انصدمت ماتوقعتش هذي الهديه وحاسه روحها في حلم بحتت فيه لقاته يبحت فيها ويبتسم وجها احمر خشت جوا وهربت منه ومن نضارته لها وابتسامته مش قادره تصدق ان هضا نفسه منتصر يلي قبل 5 سنين مجننته وتكسد عليه توا خطيبها بشكل رسمي حاسه بمشاعر حلوه خاصة بعد شفاته قدامهااااا

وسجى فرحت لأختها واجد وأما منتصر ماحبش يرقد قبل ما يبعتلها مسج ويقول : تصبحي علي خير يارب

دعاء ابتسمت وردت : وأنت بألف خير وشكرا عالهديه

منتصر : ماعش تشكريني ويلا عالنوم توا واي شي ينقصك قوليلي ماتتحشميش مني انا خطيبك توا

دعاء : لا مافيش حاجه ناقصتني وبابا مش منقص عليا شي ولو عالتليفون هو قالي بعد تطلعي من الثانويه نجيبلك واحد بس أنت جبتلي وحلو عجبني

منتصر ضحك علي ردها الطفولي : المهم عجبك

دعاء : عجبني واجد وتوا لازم نرقد مع السلامه

منتصر : مع السلامه ونوم العوافي يارب

ومن يومها وهو كل يوم يبعتلها في الصبح وقبل ماترقد تعلقت بيه واجد وحباته من كل قلبها قعد يزور فيها ويشوفها ويحكي معاها وجه لوجه وبوجود خوها معتصم كان فرحان واجد منتصر بالخطوه هذي انه قرر يخطب وهو عمره 22 سنه خطب بنت في صغيره عمرها 16 سنه ولكن مش شايف العمر لان قلبه متعلق بيها ويحبها فعلا ومش حاسس بالأحساس هضا ولا فكر في الحب الا بعد جابت سيرته أمه وتوا ألتهاه بالكليه أمتعه ودعاء في مدرستهااا الثانويه هي وسجى يلي بعد مرور 6 سنين قعد عمرها 20 سنه عدت تجري لأمها وايدها علي فمها وبألم : يا ماما توجع فيااا سني واجد ماعش هدت

نوال بحتت فيها : كنها بسم الله وليش توجع فيكي ؟

سجى : مش عارفه لكن واجد توجع فيا وماتخليش فيا نرقد من أمس حتى بعد ناكل توجعني سني واجد

نوال : باهي وتي روحك توا انقول لمعتصم يشيلك

سجى : تمام وعدت جهزت روحها لقت دعاء يلي عمرها حاليا 22 سنه تحكي مع منتصر عالتليفون وتضحك معاه

دعاء بحتت فيها وسكرت الخط : كنك تلبسي في حاجه

سجى لبست حجابها وبحتت فيها : ماشيه للعياده سني متعبتني وكملي مكالمتك مع حبيب القلب وغمزتلها وعدت ضحكت دعاء علي ردها وأتصلت بيه مره تانيه وهي تبتسم : شنو قلت قبل اشويه عاود يلي قلته

منتصر بخبث : تسألي شنو قلت وتسكري في وجهي

دعاء : سكرت لسبب واسفه عشان سكرت المهم عاودلي

منتصر : لأنك تأسفتي سامحتك ويلي قلته قبل أشويه ان حبي لك يزيد كل يوم وأسبوع وشهر وسنه انا خلاص اكتر من هكي مش حانصبر وحانطلع العرس خلال شهر

دعاء انصدمت بعد كمل كلامه : لالا انا ورايا امتحانات توا

منتصر تأفف : توقعتك تفرحي وتقولي حاضر اه يا حظ

دعاء : انا اسفه بس والله ورايا امتحانات نهائيه

منتصر : باهي امتى يكملو عشان نطلعو عرسنااا

دعاء بهدوء : اليوم 22 / 3 خليه يوم 5 / 5 كويس

منتصر : الله يصبرني علي 6 أسابيع وان شاء الله يجرو

دعاء ضحكت ووجها احمر : عليش مستعجل فهمني

منتصر : انا تخرجت ونحنا اتفقنا نتزوجو بعد التخرج

دعاء : باهي بس حتى انا ورايا امتحانات افهمني

منتصر : تمام تأمري وأنا فهمتك في اوامر تانيه

دعاء ضحكت : لا سلامتك المهم تفهمت يلي حكيته

ضحك منتصر وفي نفس الوقت يرجا في الأيام يجرو عشان عرسه مرايف عليها واجد ويبيها معاه علي طول

سجى ترجا في دورها وسنها متعبتها واجد !!!

يتبع ………

لقراءة الجزء التالي : الجزء الخامس من رواية حكاية دعاء

لقراءة الجزء السابق : الجزء الثالث من رواية حكاية دعاء

للإطلاع علي فهرس أجزاء الرواية : جميع روابط اجزاء رواية حكاية دعاء للكاتبة سلطانة كوكي

جميع الحقوق محفوظة للكاتبة سلطانة كوكي