الجزء

الجزء السابع من رواية الزوجة التائهة بين الأحلام والواقع

الجزء السابع من رواية الزوجة التائهة بين الأحلام والواقع

هل احببت الأحداث ؟ مازال هناك العديد من المفاجآت التي في طيات الرواية لذلك جهز مشروبك المفضل وهيا لنبدأ بالإطلاع علي احداث الجزء السابع من رواية الزوجة التائهة بين الأحلام والواقع للموهوبة كيندا .

الجزء السابع من رواية الزوجة التائهة بين الأحلام والواقع

ولدلك حاولت تتباطئ فى ظمان قدا الامكان وتحاول تخلق مواضيع مع البنات لحد ماطقت ساعه 2 فى ليل وجت اللحظه الحاسمه لانهم كملو كل شى وبتركب وبعد ماخدت حوايجها وركبت فى دروج ومع كل درجه تركبها تدعى ربها انا يكون راقد ولما ركبت لقت ضى الحوش مطفى ومفتوح ضى سهره متع صاله بس وحست تحتها انا فى مرش وشافت للانترى لقت تحف ومراية الانترى مكسورات فاعرفت انا هوا لحقها ولما هيا نزلت كسر المرايه وتحف متع الانترى الاجانب الباب وطبعا خشت لدار نوم وشافته واقف على روشن ويدخن << عاطيها بالظهر>> فادارت روحها عاديه وفتحت الدولاب وقلبها على ايدها وهيا تعلق فى حوايجها ومتجاهلته ف هوا تلفت وقاللها…. …. وين كنتى لحد توا ……
طبعا هيا ساكته ماقالتش ولا كلمه ولما مابتش ترد عليه خدى السيجاره طفاها بعصبيه وجاها وشدها من ايديها الاتنين ودوراها وقالها لما نكلمك ردى عليا وماتعطينيش بالظهر تفهمى فياااااااااااااااااااااا وطبعا صوته وملامحه تقول بركان ونفجر فى وجهها …. فى لحظه هديكا طبعا هيا نفجرت بالبكى
فاهوا طبعا كانت ردة فعله كانه نار صبيتى عليها تلج وطول حضنها
ا وقاللها ……
.. انى اسف ماكنتش نقصد بس من لما ناديتك وانتى مارديتيش عليا ركبتنى نار ماتعودتش انا حد يمشى ويعطينى بالظهر وانى نكلم فيه مهما كانت الاسباب بس برغم هدا انى اسف .
وبعدها خدى مخدته وشرشافه وطلع من دار ورقد برا لانا حس انا هوا متعصب وانا نقاش مش رح ينفع الليله هيا لانا هوا متعصب وهيا تبكى وخايفه منه لانها حتى بعد ماتاسفلها ماوقفتش على البكى ولدلك خدى مخدته وشرشافه وقرر يرقد برا فى صاله لحد ماتهدى اعصابها .
وطبعا ليلى طول الليل شاده مخدتها وتبكى بس يعنى الا صار معاها شبيه بى المتل << هدوء ماقبل العاصفه >> والليله هادى كانت بمتابه عاصفة بنسبه ليها
جى صبح وناض احمد من نوم وفتح دار بشوى ولقى ليله راقده فا طلع من صاله وخش للمطبخ وخدى المدكره والبيرو الا فوق طاوله وكتب على الورقه << انى اسف على الا صار امس >> وخدى الورقه وحطها جنب مخدتها وسكر دار عليها وطلع من دار وخش للحمام غسل وجهه ودار لفه الاعتيديه ليه ونزل وطبعا لقى العيله كلها ملتمه على فطور ويستنو فيهم ..
احمد …..صباح الخير .
ام احمد .. صباح الخير وليدى مالا وين ليلى اليوم ؟؟؟.
احمد…. ليله امس شورها تعبت هلبه وماقدرتش تنوض.
ام احمد …. اى والله ياوليدى امس تقطعت فى ظمان الحوش بعد ماروحو ناس يعطيها الصحه واللهى اليوم ريحتنى..
احمد طبعا تضايق هلبه وهوا فى اساس متضايق من ردة فعله معاها وزاد تضايق لما عرف انها امس سهرة باش تسااعد امه فى ظمان
احمد .. باهى توا شنى واتى الفطور ولا مازال؟؟
ام احمد …هيا وليدى قعمز خلاص وتى الفطور نجيب سبات الخبزه بس ونجى
قعمزو كلهم على الفطور بستتناء نبيل فا صفاء كلمت امها وقالتلها نوضه نبيل ولا نخليه ؟؟
ام احمد … برى برى نوضيه هالجيفه قوليله قالتلك امى بتنوض تفطر ولا نجيك بى مالقى ميه مسقع ؟؟؟
احمد … خليه راقد علاش تنوضى فيه ..
ام احمد ….. تى كيف مانوضاشى وقرايته من بيمشى يحظرها انى ولا بوك ؟؟؟ امس روحلى الفجاير واليوم يترقد زى الوليه ..
نبيل … صبااااااااااااااااح الخير
ام احمد… منين بيجى صباح وانت مروحلى الفجاير ؟؟؟ امس مع منى كنت يامنجوه ؟؟؟
نبيل خودلك هيانفخ على صبح … مع منى يعنى بنكون مع هيفا ولا اليسا ؟؟؟ اكيد لا اصلا طول ماانى معاى الباكو عبسى والمتخريط ايوب ومسكسك فتحى مش رح نشوف وجه بشوش بكل لين ندفنهم اصلا الا يشوف وجههم مايشوفش نعيم بعدها هههههههه
ام احمد …. هيفا من هيفا هادى يافرخ ……والله انتم خلاص معاد تتحشمو تى بتنوض ولا لا راكيه ولا اتنين ينهدو على جنابك .
نبيل … باهى باهى ياحويجه ونبى هدى لعب توا ….. وخلينى نتفاهم مع عصيوو شويا
عصام … شن فى ايوووو.. خشلى فى جو خش …. تسبتيلى هيا شن فى من الااخير خاطر اسمى متع دلع فى هالحوش مانشوفش فيه الا فى مصالح بس
نبيل …. اسمع وراس عصيوو نبى سيارتك شوى وراس العزيزه اليوم بس عندى مشوار بعد المعهد
عصام …. ضحك وقاله مشوار شنى ؟؟؟ اخر مره قتلى مشوار ولقيتك فى الجامعه منصوب وبعدين انت كترة مشاويرك بسيارتى والشركه تركه
نبيل …. تعرف لو ماتعطينيش سياره نقولهم على زباين محل هدوكا << مع غمزة عين على جنب >>
ام احمد … خيركم تدو بالالغز قولونا شنى احنا اخر من يعرف ولا شنى
عصام … لا لا ماتدورى شى ياحويجه هدا يخفف فى دمه بس علينا وانت صكر فمك وخودها سياره لكن واللهى الاماتوصلنى لحد المحل زيك زى راجل طيب وفى مروح تروح بيا
نبيل .. منور منور عيصووووو وان شالله نردهولك فى الافراح والليالى ميلاح
ام احمد …. احمد خيرك منكد ومتغشش انى حسيتك من لما نوضت ؟؟؟
احمد … لالا مافى شى بس بعد مانكملو فطور نبيك شوى
نبيل …. مالا فى نونو فى طريق ياحميده << شورا من دار لنار >>
احمد … تعرف كانا ماتفلبش وجهك عليا نتفجر فيك توا والله ماخاطرى فى برادة عمك وتحشم على وجهك قدام امك… وهادى دوا فارغه ادويها فى شارع مش هنا
نبيل …. غير خيرك علينا انا ماشيين وقالبين وجهنا هي تبى شى حويجه ؟؟؟
ام احمد لا وليدى سلامتك واها رد بالك على روحك وانت تسوق وقرايتك نهارك سود تستفهملى زى كل عام موادك وبوك يقعد يحشم روحه مع ناس
نبيل … باهى باه خلاص فضحتى بيا وانتى قريب تكتبيها فى جريده
عصام ….. ههههههه ياشماتته ابله زازه فيك
نبيل ….. هههههههههه اخرس
وطبعا بعد الفطور احمد قعمز مع امه وقالتله
شن فى ياوليدى خيرك مش على بعضك
احمد … بنقولك كلمتين وقص وماتناقشينيش فيهم برى كلمى اختك تشد فرختها من عليا خير ماندير فيها شى وتقعدى طول عمرك متحشمه ايوااااااااا قاعد نقولك
ام احمد …. غير بشوى عليا اللطف وفهمنى منى ؟؟؟
احمد .. منى يعنى .. اميرة زفت بنتها قولها تبعد عليا ومعاش تتصل بيا ولا عاد تقرب مرتى
باهى شن صار ياوليدى حسك خوفتنى شنى فى حاجه امس صارت ؟؟ خاطر انى امس لما ركبت ليلى وضبحت عليها لقيتها فى الحمام وصوتها كأنها كانت تبكى بس قولت مرات يتهيالى
احمد … قعد يقول فى نفسه والله زى ماتوقعت سمعتنى وانى ندوى معاها … باهى باهى مهم انى قوتلك قولها تشد فرختها عندها وقولها الا بينى وبين بنتك بح خلاص
باهى باهى وليدى انت غير ماترعشش روحك وكانا امس اميره ضايقت ليلى فى حاجه انى توا نكلمها ليلى ونوضحلها كل شى
احمد… الا تشوفيه مناسب ديريه المهم الا قوتلك عليه ديريه وانى توا بنركب نبدل حوايجى باش بنمشى للخدمه ونقولهم يمددولى شهر تانى على خاطر سفر
باهى باهى وليدى مربوحه وكانا ناضت ليلى وماتبيش تركب خليها معليشى توا بعدين انى ندب خطوه خطوه لفوق ونركبلها الماكله ونكلمها
احمد طبعا ركب فوق لقى ليلى فى الحمام خش لدار نوم وفتح دولاب وحار شن يلبس كاجول ولا رسمى لانه مدير اداره كبير وبايخه يمشيلهم بى كاجول وخاصة انا هما واخدين عليه برسمى ديما فا لبس بدلته رسميه السوده
وطلع قروطه سودا وطلع لوسط الحوش ولقى ليلى كيف طالعه من حمام فا قاللها ..
هوا … ليلى صباح الورد
هيا … صباح الخير
هوا …. ممكن تلبسيلى قرواطى
هيا …. اوك وخدت وقفت قريبه منه و طرحت ياقة السوريه ودخلت القروطه فيها ووهيا تلبسله فيها شمت البرفان الا جابتهوله هديه فى عرسهم باخ منه ولى اول مره بعد زواجهم فالا ارديا نهضت عينها فى عينه لقاته يشبحلها ومبتسم وقاللها ……
انتى مازال زعلانه منى ليلى ؟؟؟
هيا…. مافيش حاجه تخلينى زعلانه منك ؟؟؟
هوا … ليلى انتى تعرفى وانى نعرف انك سمعتينى وانى نتكلم فحاولى تسهلى عليا موضوع
وطبعا ليلى لما قاللها هكى حست انا كرامتها مجروحه وانها معاش قادره تتحمل فا دموعها لااريا نزلو منها وقعدت ساكته فاقاللها …
ليلى ردى عليا انتى علاش تتصرفى معاى هكى ؟؟؟ وقعد يشبحلها وهيا ساكته ويستنى منها فى رد بس هيا ماقالتش ولا كلمه ووهوا كيف جى بيقولها … ليلى انى مش عارف شن سمعتى بزبط بس انى واللهى امس قول ………………. وطبعا هوا قاعد ماكملش كلمة قولتلها سمعو صوت فى دروج ينادى
ليلى ….. ليلى سلم بنيتى وينك تعالى ساعدينى راهو رجلاياتى مارفعونى الا بسيف ..
طبعا ليلى مسحت دموعها وردت عليها ..
هيا هيا ماما اهو جيتك ..
احمد قعد يدوى فى داخله طبعا ويقول شن هالحظ الاسود هوا ماحلا لهاش تركب الا توا وقالتلك رجليا مارفعونى الا بسيف وهيا ماصدقت مبكرى قولتلها باهى… بسرعة الفيه سابعه لقيتها هنا ياشينك حظ وخلاص
ام احمد…. بنيتى لما لقيتك مانزلتيش تفطرى قولت نركب انى نطمن عليك ونركبلك الفطور
ليلى …. خيرك ماما متعبه روحك انى كيف كنت ناويه ننزلك
ام احمد ……لا لا عادى تعبك راحه بنيتى
ليلى …. خشى ماما خشى معقوله بتقعدى من فم الباب ؟؟
ام احمد … باهى باهى بنيتى توا نخش نشرب عندك طويسة ميه وننزل انى وياك دبه دبه
خشت ام احمد ولقت ولدها فى صاله يواسى فى روحه مشى قتله
ام احمد…. هوا انت قاعد هنا لحد توا مش قتلى بنطلع ؟؟؟
احمد اهو بنطلع غير كنت نلبس بس ..
ام احمد …. اللطف خيره مرايه الانترى مكسره ؟؟؟
ليلى طبعا تحشمت نزلت راسها لوطه ماعرفتش شن تقول فا احمد رد بسرعه وقاللها
هادم امس واحد من صغار شورا ركبو وناشوها بى الكوره عادى عادى مش مشكله توا العشيه نجيبلها مراش
ام احمد … هادم ولاد نعيمه عطيهم مايجيهم مايديروهاش الا هما الدوشه والكلب تقول خرفان مطلوقيين فى زريبة سعى
طبعا ليلى لاارديا لما سمعة جملة عزوزتها ضحكت ونست همها فاحمد دارلها باص عيون وضحك << متع كان نندرى امى بتضحكك راهو من بكرى رشقتها وسطنا >>ا
وطبعا نزل احمد ومشى للخدمته وام احمد قعدت تهدرز مع ليلى وقالتلها …. اسمعى يابنيتى انى بنقولك كلمتين وياريت تاخدى بيهم ناس زمان يقولولك << ولدك على شن تربيه وراجلك على شن تعوديه >> وانى احمد قالى انا ليلى حرجانه منى من امس بسبب سوء تفاهم وماتبيش تقولى فانصيحتى ليك يابنتى افتحى قلبك وادوى مع احمد وقوليله الا فى خاطرك لانك لو بتعوديه انك كل ماتسمعى ولاتشوفى شى بدسيه فى قلبك وماتنا قشيشى فيه يبدا حتى هوا يبعد عليك ويتعود يدس فى قلبه وراجل الا يدس فى قلبه تخافى منه راهو وانى وليدى واللهى مافى منه والا فى قلبه على لسانه ومستحيل يغلط فيك ولا يطعنك فى ظهرك ولايرضى فيك حتى بقة شوكه وسوسه هديكا بنت اختى تبى تفرق بينكم بس لا اكتر ولا اقل فاماتعطيهاش فرصه وانى والله ماقولتلك الكلام هوا الا لانى نشوف فيك زى بنتى وخشيتى خاطرى وكان على الحب فهدا يجى بشويه بشوى بالعشره طيبه والود والمره شاطره هيا الا تعرف تكسب راجلها وتملك مفتاح قلبه وانى متاكده انك قدها وقدود يابنتى وتوا هيا امسحى دموعك وخلى ننزلو لوطه نديرو طويسة شاى مدما الحوش نظيف ونادو على جارتنا خالتك مديحه ونهدرزو شوى بالك تنفكى وتغيرى جوك شوى
ليلى …. صحيتى هلبه ياماما والله كلامك كان ليا زى بلسم على جرح وان شالله ربى يقدرنى ونسعدكم يارب وانتى توا كانا بتنزلى خلينى نزلك ونساعدك بس بنركب عندى صابون بنديره وبنوتى شناطى سفر وفى شوى معايين فى الحوض من امس احمد واكل فيهم بنغسلهم وقيس ظهر توا نصلى وننزل نحط الغدا على نار
ام احمد….. صحيتى بنيتى واللهى عارفه روحى متعباتك معاى بس الله غالب والله رجليا ماعاد قادره توقف عليهم ونفكر بعد ماتروحو من سفر نقول لاحمد يرفعنى لتونس ندير كشف
ليلى …. ان شالله ياماما توا نقول لاحمد انى ان شالله فى اقرب وقت بعد مانروحو يرفعك
.ام احمد…. صحيتى بنيتى ربى يرحم ولديك يارب هيا مالا خليك انتى…… وانى تو ننزل دبه دبه
ليلى …. ولدينا وولديك ياماما خلاص وانى نصلى ظهر ووننزل
وطبعا ليلى دارت ضمه لحوشها وصوبنت صابونها <<غسيل ملابس >> وضمت مطبخ وبعدها فتحت شنطه وبدت تحط فى اول حاا جاتها لانا مفروض بكرا طيارتها ساعه 9 صبح تتسقد لى لندن
وبعد ماوتت شنطتها وشنطت راجلها وكملتهم وحطتهم على جنب بجانب شكماجه متع دار نوم خشت للحمام باش تتوضى لانا ظهر يدن وبعدها صلاة نحطت عباية صلاه على كنبه وسكرت شقتها ونزلت خشت للمطبخ لقت عزوزتها طيب فى براد شاى لشيبانيها مش قتلها ؟؟
ليلى .. ماما شنى اليوم نطيب الغدا
ام احمد.. واللهى الشيبانى اليوم عنده نيه فى رشيده مبكبكه من تحت ايدياتك بالقرقوش وهونى ديقه متع القرقوش تلقيها فى دولاب وانتى غير حطيها على نار وانى توا تقعمز فى جنان كلها نقرضها وننشرها فى شميسه على طاولة اللوح لحد ماتطيب مرقه
ليلى …. حاظر هيا اهو بنطلعلك الحاجات هيا ودقيق ….. بس قداش نطلعلك الدقيق؟؟؟
ام احمد….. طلعى باكو متع الكيلو خاطر عندى ولاد زى الهوايش مايخلو شى ههههههه واللهى على قولت بوك زى سراق طالعيين واكليين جايين واكليين وياريت حتى طالع على قيطهم .
ليلى طبعا ضحكت وقالتلها ان شالله بصحه عليهم يارب وبعدها طلعت الحاجات فى جنان وفرشت حصيره فى تركينة ظل ومنيديرات وحطت الحاجات على حصيره وخشت حطت الغدا على نار وبخرة الحوش وبعدها لقيت معايين فطور شوى منهم قاعدات غسلتهم وهيا كيف تنشف فى مطبخ خش احمد عليها وقاللها نخش ولا صكرتى نولو غدوه ….. ابتسمتله ليلى ابتسامة سماح وقالتله خش خش شرب ميه وطلع وشبحلها وقالها باهى الا رضيتى علينا طيب فيك دهشتنى باش شفت هالابتسامه منك شنى الغدا واتى
ليلى .. لالا مازال
احمد….. مالا خلاص لما يوتى قوليلى انى راكب بنغبر حوابجى وبنرتاح شوى
ليلى …..اوك خلاص ان شالله
مشت ليلى قعمزت جنب عزوزتها وانتفخ راسها من سيره فلانه جابت وعلانه طلقت وفلاتانه ترملت مهم من هنا وغديكا حطو الغدا وتغدو وبعدها ليلى قامت معايين هيا وصفاء ومروه وخشو للمطبخ بس صفاء وزعت مروه وقالتلها برى انتى توا نغسل معايين انى فاطبعا مصدقت مروه باش تشد الارضى ساعتتين مع صاحباتها مشت وقعدت ليلى فى مطبخ وصفاء مشى استغلت فرصه صفاء وقالتلها …
صفاء ….. ليلى نبى نقولك شى بس وعد ماتجيبى سيره لحد
ليلى نعم صفاء قولى وبعون الله سرك فى بير
صفاء … انى نحب واحد معاى فى كليه وهوا يبى يجيب امه بس انى خايفه لو امى عرفت انا جاى من طرفى وعلاقه تحرش خوتى فيا وخوتى واللهى الا مايقتلونى قتل قوليلى شن حل ؟؟؟
ليلى ….. واللهى ياصفاء مش عارفه الحق توا لانك فاجئتينى بس عطينى فرصه نفكرلك فى حل ونقولهولك … باهى وانتم امتى قررتوا يجيب امه
صفاء .. واللهى مانى عارفه الحق قولت لين نطلع حل للبلوه الا انى فيها
خلاص اعطنى فرصه لحد مانروحو من سفر ونرد عليك وانتى هكى ولا هكى ماتقدرى تديرى شى الا مايجي احمد من سفر
صفاء … اكيد
ليلى …. خلاص انى توا بنمشى نصلى عصر مادم كمل مطبخ فانخليك وبعون الله نديرلك حل
صفاء صحيتى هلبه ليلى وخلاص خودى راحتك
طبعا ليلى وهيا راكبه لدروجها تلاقت مع احمد وقاللها اسمعى انى طالع توا ظرورى عندى حاجات بنديرها قبل سفر اليوم طلبوهم منى فى خدمه وبنجيب شوى حاجات وبنروح ……..ماشى
ليلى ….اوك خلاص
…. توصىى على شى … لا لا سلامتك
…. ركبت ليلى وخشت للحمام توضت وخشت صلاة عصر وقراة قرأن من مصحف ودعت لربها من كل قلبها وبعدها ناضت قامت الصلايه وعباية صلاه وقعمزت فى صاله وفتحت تلفزيون وقعدت تقلب فى قنوات من هنا لهنا لحد ساعه 9 فى الليل ولما شافت للساعه ناضت خشت دوشت وجبدت شعرها وصلاة العشى وحطت شوى ميك اب خفيف ولبست روب نوم حرير باللون الاحمر القاتم وبخت شوى برفان وطفت ضى دار وفتحت ضى سهره وفتحت اغانية فيروز << انا لحبيبى >> وقعمزت على سرير وطلعت من القجر كتاب جابته معها من لما كانت بنت لاحلام مستغامى << الاسود يليق بك>> وقدت تقرا لحد ماسمعت باب الحوش رئيسى تصكر وطبعا كملت القرايه عادى وفجأه شمت ريحة برفان احمد فى دار قامت عينها شافت احمد مبتسم وحاط ايده وره ظهره وكأنه مخبى شى وراه و …….

يتبع …….

لقراءة الجزء التالي : الجزء الثامن من رواية الزوجة التائهة بين الأحلام والواقع

لقراءة الجزء السابق : الجزء السادس من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى