الجزء

الجزء السابع من رواية حنين الماضي للكاتبة لوزة ليبية

ونقترب من نهاية حكايتنا حيث الجزء القبل الاخير منها ورغم ذلك ستجد هناك الكثير من الاحداث الجميلة الحلوة في نص الجزء التي ستجعل قلبك وعقلك يقرأ الجزء مراراً وتكراراً للإستمتاع بروعة السطور داخلها، لذلك دعنا نبدأ سوياً قراءة الجزء سوياً للتعرف عليها .

الجزء السابع من رواية حنين الماضي للكاتبة لوزة ليبية

خشو سلمى وسوسن للمصيف ومعاهم عقيل تقدمت سلمى خطوات للأمام
عقيل شاف عبدو من بعيد هوا ومهند فشد ايد سوسن وقالها :خليها بروحها تستكشف المكان
سوسن:اوكي به
مهند شاف سلمى من بعيد فقال ل عبدو :سبحان الله البنت هادي تشبه صاحبتك سالمة الله يرحمها
عبدو: ﻻش ادكر فيا توا
مهند:غير شوف
تلفت عبدو وسرح فيها وابتسم وناداها ﻻ اراديا بصوت عالي :ساااااااااااااالمةةةةةةةة ساااااااااااااااااااالممممممةةةةة
سمعت صوت سلمى وتلفتت ادور مكان الصوت ومشت تجري لنص المصيف وقعدت ادور
تلفتت وراها لقت الدار متع المصيف قرنت حواجبها وقعدت اتفكر
جاها يجري عبدو وقالها سلمى سلمى
تلفتت سلمى ع اليمين
عبدو: انتي سالمة صح ؟جاوبيني
سلمى:ايه من انت
عبدو:انا عبدالرحيم الحمد لله انك عايشة الحمد لله ياربي
نزل عبدو ع ركبية سجد سجدة شكر ووقف تاني
سلمى:اهاااا عبدووووووووووو ادكرتك
عبدو:ياعيون وقلب وروح عبدو
الله ياربي انا اسعد انسان ف هالدنيا الحمد لله انك مامتيش….وقعد ايصيح انا فرحاااااااان ياناااااس
سلمى:اسسسسكت نقص صوتك بﻻ هبال
عبدز: قولي جيتي انتي ومنو
سلمى:انا وحوش عمي
عبدو:فيسع عطيني رقمك قبل ماحد يشوفنا من اقاربك
سلمى:ماعنديش رقم وماعنديش تلفون
عبدو:بجد تتكلمي
سلمى:والله بجد
عبدو حط ايده ف جيبه وقالها : هه خودي هدا نقال امس كيف خديته وشفرة حتى هيا جديدة خوديه …
خداته سلمى ودساته ف جيبها
عبدو:حبيبي والله استحشتك ماحسبتكش عايشة الحمد لله
سلمى:كنت فاقدة الداكرة بس عﻻش تحسابني ميتة وعﻻش انقطعت عليا طول فترة هادي مفروض دورتني بش نقدر ندكر مش خليتني لين خداني حد غيرك 🙁
عبدو مانتبهش لكلمتها اﻻخيرة وقالها: قصدك فقدتي الداكرة بعد الحادث ؟؟
سلمى:حادث شنو
عبدو اتعجب وقالها:شن حادث شنو؟؟؟ قصدك ماصارش حادث واللي سمعته من جيرانكم كدبة ؟؟
سلمى غمضت عيونها وفتحتهم
وقالت: طانطا وبابا يحاول يتفادها ﻻ ﻻ ﻻ ﻻااااا ماما و بابا حسن وحسين ونادية ﻻاااااا
قعدت ترعش سلمى وصاخت
عبدو طبس عليها بيفيقها سلمى سلمى خيرك سلمى
جاها عقيل وسوسن جرووو
سوسن:سلمى فيقي
عقيل:بالله جبنا اميا ياعبدو
عبدو :هي
مشي طبق جاب ميا ورجع
بختلها سوسن امية على وجها بعد شوي فاقت
سلمى:عﻻش كدبتو عليا عيلتي كلها توفت ف الحادث عﻻش انا مامتش معاهم وارتحت من هالهم عﻻش ياربي عﻻش
عقيل:استغفري ربك ياسلمى معش تقولي هكي هدا امر الله
سوسن:هدي بالك
سلمى:ياناري عليا ياسعد من قال يمى وجاوباته تاريته اﻻم جنة ياتعس من فارقاته
عقيل دموعه زي المطر وسوسن وجها احمر تبكي وعبدو يبكي وحس بذنب
اضبطتها سوسن وقتلها معليشي سلمى الصبر ادعيلهم بالرحمة
عبدو:لله مااعطى ولله مااخد ربي ايكون ف عونك سلمى
عقيل:هيا بنروح بيك
سلمى مش قادرة توقف ع رجليها
شدتها سوسن وخدتها لسيارة
عبدو:عقيل
تلفت عقيل
عبدو:سامحني ماكنتش نعرف ان ماتندريش ان صارلها حادث
عقيل:وﻻ يهمك عبدو هيا هك واﻻ هك حتعرف …. المهم تو نهدرزو بعدين انت شايف الوضع توا
عبدو:تمام ربي يحفظك

مشو هما التﻻتة لسيارة
ايهاب:وين نحطك ياعقيل
عقيل:ارفعني منطقة كدة كدة
ايهاب:تمام
وطول الطريق سلمى تبكي وتنوح
لين وصلو حوش خالتها
طقطقت سوسن فتحتلهم ندى
ندى من اول مافتحت الباب جت عينها على عقيل برغم انه كان واقف وراء سوسن وسلمى وقتلهم:اهلين …. سلمى خيرك تبكي
سلمى:ندى ندى عيلتي توفت ياندى كلهم ماتو
ندى انصدمت:وقتلها البقاء والدوام لله هدا حال الدنيا
خششتهم داخل ونادت امها
خ زهرة تبكي:معليشي يا سلمي يابنتي والله قطعتيلي قلبي….
وفات الوقت و
طول اليوم سلمى تبكي ماوقفتش بكي ع عيلتها
سوسن مقعمزة تتفرج ع مسلسل تركي اتصل بيعل عقيل نقالها يشرين وهيا فاتحة فمها ف المسلسل بعدين ردت :ها عقيل
عقيل:اسمعي نسيت نقول لسلمى نحي الدبلة وماتقوليش لندى اني خطبتها
سوسن: تو بتسالني سلمى عﻻش شن بنقولها ساد اللي هيا فيه
عقيل:بش ولتلها داكرة؟؟؟اكيد حتعرف ان انا وندى كنا عﻻقة ونبو بعض
سوسن:ﻻﻻ ماولتلهاش كليا مش كل شي تتدكر فيه
عقيل:به قوليلها ع خاطر ندى تبيني وانا مانبيش نجرحها
سوسن:حيه عليه حيه
عقيل:خيرك
سوسن:عدي ياعقيل عدي لقطة حاسمة نتفرج ع حريم سلطان
عقيل:تي نوضي توا …فوتيه التركي
سوسن :غير شوية بس
عقيل:تي نوضي
سوسن:باهي به باي
سكرت سوسن وقعدت تتفرج فاتت عقيل ونست موضوعه بمجرد ماسكرت منه

سلمى مقعمزة في وسط الحوش ومهمومة
جتها ندى تشوف ف الدبلة ف صبع سلمى فكرت انها تسألها بالك تغيرلها جوها وقتلها:شنو يامفعوصة انخطبتي من ورانا ومن قدك ياعم انبسطي هههههه
سلمى:ماعندي عﻻش بنبسط
ندى:عﻻش من خطبك
سلمى:خطبني عمي ل عقيل والصبح بس كيف ادكرت ان عندي حبيب اهنا في طرابلس
ندى:عقييييييل؟؟؟ شن تقولي انتي ؟؟؟كيف كيف توافقي وانتي عارفتيني نبيه ؟؟
سلمى ادكرت وقتلها:ايه حق صح صح سامحيني والله كنت فاقدة الداكرة وعمي هوا اللي يبي يجوزني ليه
ندى:وكيف عقيل مايقوليش حاجة زي هادي كيف

سوسن جت تجري سلمى سلمى تره تعالي شوية نبيك
سلمى:باهي ستني شوية
سوسن:توااا تعالي
سلمى :هي هي
ناضت سلمى لحقت سوسن في المطبخ
سوسن:اسمعي توا اتصل عقيل وقالي ردي بالك تقولي ل ندى انك مخطوبة ليه ﻻن هيا كانت تبيه قبل وهوا مايبيش يجرحها
سلمى:حيه عليا كيف كنا نتكلمو ف موضوع هدا ….. باهي كيف بندير توا ؟؟
سوسن:خشت بعضها
سلمى:تي توا قتلي انه اتكلم فيه شن تقوليلي هيا تبيه ومايبيش يجرحها واصﻻ ادكرت انهم عﻻقة
سوسن:ماهو نحسابك مش حتدكري انهم كانو عﻻقة
سلمى:انا مالياش ذنب عقيل هوا اللي يعتبر سيبها ووافق على خطوبة
سوسن:هوا وافق ع خاطر باتي ياسلمى سامحيني صح هوا خاطبك لكن هوا ايحب ندى هلباااا … ومايبيش يسيبها
سلمى:وصح انا مخطوبة ليه لكن بعد مارجعتلي الداكرة عرفت ان عندي شخص كنت مرتبطة بيه ونبيه

وفي نفس الوقت
نقال عقيل يرن ترن ترن
عقيل:هﻻ ياحبي كله
ندى:والله ماتتحشم خاطب وتكلم فيا عﻻش شن درتلك انا بش ادير فيا هكي والله وجعتني منك
عقيل:غير اس..
ندى:حسبي الله ونعم
عقيل:غير اسمعيني
ندى:معش نبي نسمع منك شي يا نسونجي …باي
وسكرت عليه

سوسن ل سلمى :تعالي نمشو ل ندى خلي نقولولها ان عقيل يبيها
سلمى بصوت حزين :خلوقي ضايقات انا عيلتي متوفيه وانتو شوفو شن تفكرو
سوسن:هدا امر الله اصبري واحتسبي
وطلعت سوسن من مطبخ ومشت لوسط الحوش قعمزت جنب ندى وقتلها : خيره وجهك احمر؟؟كنتي تكلمي ف عقيل ؟؟
ندى:ايه وخﻻص معش فيه شي بينا
سوسن:اسمعي بنقولك حاجة …عقيل ايحبك ياندى ياريت انحصل شاب ايحبني زي حب عقيل ليك
ندى:لكن هوا خطب شن فايدة الحب
سوسن:انتي تعرفي باتي انه واعر صح
ندى:ايه
سوسن:خﻻص باتي هوا اللي جبر عقيل يخطب سلمى وعقيل قنع باتي ان مايديرش العرس على طول قاله عطيني شهرين وطول الفترة هادي عقيل يدير ف المستحيل بش سلمى ترجعلها داكرتها … وانتي عارفة ان سلمى اتحب شخص اسمه عبدالرحيم ندى:لكن اهو وافقت
سوسن:بش كانت فاقدة الداكرة
ندى:مانعرفش المهم انا زعﻻنة منه مفروض مادسش عليا وتوا كنت نكلم فيه وقتله خﻻص انساني
سوسن:حيه عليك كنك هبلة انتي ؟
ندى:هبلة ايه
سوسن: الولد دس عليك مايبيش يجرحك ياندى ويبي يخطبك ومش حاس بحاجة اتجاه سالمة كنك هكي انتي
ندى:مانعرفش ماندريش ع روحي
سوسن:عقيل وقت يحرج تبيله بش يرضى … الله يسامحك ياندى بجديات
ندى تبكي:هوا الغالط
سوسن:والله مانعرف شن بنقولك الحق
جتهم سلمى قعمزت
وقالت ل ندى:معليشي ياندى انا ماكنتش نعرف وفي نفس الوقت ماتلوميش عقيل
ندى:باهي به بنخش نرقد نحس ف روحي مضاايقة
ناضت ندى وخشت دارها
رجعت تاني وقتلها هاك نقالك يشرين
ناضت سوسن للحمام وسلمى ردت
سلمى:الو
عبدو:ياعيوووني انتي وحق ربي استحشتك
سلمى :حتى انا هلبا
عبدو:صوتك حزين ….
سلمى:مضايقة
عبدو:الله غالب الصبر ياسلمى
سلمى:مضايقة ياعبدو من هلبا حاجات
عبدو:من شنو شن مضايقك حبيبي
سلمى:انا نبيك ياعبدو ومانبيش نبعد عليك
عبدو:خﻻص بيبي معش فيه بعد تاني ان شاء الله منه وجاي حنكونو مع بعض كلمت امي وقتلها انك عايشة فرحت ومن فرحتها اضبطتني هههه
سلمى تبكي
عبدو:معش تبكي ياعمري عندي ليك خبر حيفرحك برغم ان عارف مش وقته
سلمى:خبر شنو
عبدو:امي قتلي غير ايفوت هكي شوية وسلمى تفوت محنة الحزن تو نمشي نخطبهالك
سلمى زاد بكاها وقتله: عبدو انا مخطوبة
عبدو:صلي عالنبي تبصري واﻻه تبصري
سلمى:والله العظيم نحكي بجد
عبدو:ومن خطبك وكيف توافقي هكي
سلمى:خطبني عمي لولده وقت كنت فاقدة الداكرة
عبدو:وين يسكن عمك
سلمى:عﻻش
عبدو: بنمشيله بنقوله انا نبيها
سلمى:عمي واعر واصﻻ مايسكنش اهنا ياعبدو
عبدو:اماﻻ وين
سلمى:في الشرق
عبدو سرح وشك ان واحد من خوت عقيل بعدين قال ﻻﻻ بالك عم تاني وقالها :كم عندك عم انتي
سلمى:هوا هدا عم واحد
عبدو زادت شكوكه :شن اسمه
سلمى:منو
عبدو:ولد عمك
سلمى:عقيل
عبدو:تتسهوكي عليا
سلمى زادت ادكرت تفاصيل المﻻهي وقتله:حيه عليا تقريبا صاحبك واﻻه وووه عليا ماقعدت غير ندير ف مشاكل
عبدو:اعطيني رقمه والله اﻻ مانوريه خزيه عالتريس خزيه هوا يعرف اني نبيك ونبي نخطبك عﻻش يخطبك عﻻش وكيف توافقي انتي
سلمى: معش تقول عليه هكي واصﻻ مش مني عمي خطبني وبالنسبة ل عقيل مايبينيش عنده حبيبة
عبدو:عﻻش ياربي مش مكتوبلي نفرح …. اسمعي انا حنخطفك
سلمى:شن تخطفني هادي حيرك عبدو
عبدو:اماﻻ عطيني رقم عقيل
سلمى قعدت تفكر كان بنعطيه رقم عقيل بتصير مشكلة قعدت غير نديرله ف مشاكل الولد وهوا واقف معاي مشكلة ندى وتوا عبدو بيتعارك معاه
عبدو:الوووووو
سلمى:ماعنديش رقمه
عبدو:معناها عاجبك الوضع وتبيه بعتيني ياسلمى صحة ليك والله ليا 4 شهور ماشفتش حتى ف وجه بنت قاعد غير نبكي زي المراة وانتي بعتيني قدام اول فرصة زواج صحة ليك رسمي
وسكر عليها الخط عاودتلها لقاته مقفل
لوحت النقال وحطت وجها على المخدة تبكي

نقال سوسن يشرين عقيل يتصل بك
سوسن:الو
عقيل:بش قتلك انا بري قوليلها سلمى كله من التلفزيون متاعك ياكلبة سمعتيني كﻻم بايخ
سوسن:والله ياعقيل لما وصلت ف سلمى ..سلمى كانت مخبرة ندى كل شي
عقيل:تي انا بعد ماقلتلك بدقيقتين اتصلت بيا ندى ومسحت بيا بالكﻻم كان نضتي طول راه ماصارش هدا كله معفنة كلبة قردة
سوسن:خﻻص
عقيل:ﻻ مش ساد والله كان قدامي راني كليتك ماكلة …. اتوتي روحك انتي وهديكا المشفشفة غدوة طيارة لبنغازي طول وجوهكم مش وجوه واحد يسايركم انتي وياها تو نوريكم الوجه التاني شن شكله .
وسكر الخط
عقيل مهموم … عبدو مضايق … ندى مجروحة… سلمى اياماتها حرف …سوسن خايفة من خوها

يتبع………..

لقراءة الجزء التالي : الجزء الثامن من رواية حنين الماضي للكاتبة لوزة ليبية

لقراءة الجزء السابق : الجزء السادس من رواية حنين الماضي للكاتبة لوزة ليبية

للإطلاع علي فهرس الاجزاء كاملة : جميع اجزاء رواية حنين الماضي للكاتبة لوزة ليبية

جميع الحقوق محفوظة للكاتبة لوزة ليبية .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى