وفي الجزء السابع من رواية حوش جدي للمبدعة كيندا يا تري ماذا سنري فيها من جميل من الأحداث ؟ ما رأيك أن نبدأ بقراءة السطور التالية للتعرف علي ذلك ؟ هيا بنا .
الجزء السابع من رواية حوش جدي
اما وسام … فا فتح سهاره وخدى روايه بولسيه يقرا فيها … واول مافتحها تدكر الموقف البوليسى الا صار مبكرى ونهال كيف مكرشه فى ايده زى عيل … بس للحظه تمنى انا هاللحظه تكووون سنه لانا بصراحه كانت ايدين نهال ناعمه هلبه هههههه … وفجاه فاق لروحه وقعد يخبط على راسه بالكتاب وضحك .. وطفى ضى سهاره ورقد ….
فاتت الليله زى اى ليله فى حوش جدى 
وكان تانى يوم جمعه … وكالعاده عمى فرج وصل صبح وقعد يقول …
الاب << فرج >>….. سميحححححه ….. شن راقدين ؟؟؟
سميحه …. صباح الخير انت روحت ؟؟
فرج …. قولى تصبحو على خير … ساااااعه 12 .. شنى راقدين لحد توا …
نهال …. صباح الخير خالى ..
خالها << فرج >> … صباااح الورد بنتى .. حتى انت معاهم فى هالسبات عميق … جدك وحناك توا ماريت عليهم نايضين من صبح بكرى
نهال … امس رقدت موخر وفامحسيتش بالوقت … اهو توا ننزل نضرب لجدى يبرة سكر توا ونفطره ..
خالها … لا لا بنتى خلاص خليك .. ضربتهاله انى وحطيتله طاسه حليب وتمرات ..
سميحه …. وساااااااااااااام .. امجججججد … قصصصصصى … نوضو صلاة جمعه قريب نوضوووو …
نهال … خالتى انى نازاله .. تبى شى ؟؟ نضم الحوش ونركب باش نبدا معاك فى العشى ماشى
خالتها … خلاص .. خلى انى نبدا فى ظمان حوش هوا .. ونسقدهم لصلاة جمعه …
وسام … ناض وايده على راسه ويتكسل وشعر مشفشف وابتسم لنهال على جنب وقاللهم …
وسام …. صباح الخير
بوه … شنى غريبه مش عوايدك ترقد لى هالوقت …
وسام … ماهو امس سهرة … سى مرتك شحورتنا .. الله غالب .. ماك مش موجود فى حوش .. غاب اللقط العب يافار
امه … تحشم على وجهك … عينى عينك بتفتن فى وجهى … امااااااااااااااا الضنى ضناى وفعل مش فعلى ..
امجد ….. وووووووووووووه صبااااااااااح الخير وصبح يافتااااااح شن هالعيله هادى تفطر على دوا صبح
بوهم …. انى بنخش ندوش … طلعيلى البدله عربيه وحديدهالى .. وطلعيلى فوطه ماشى ..
سميحه … باهى باه … انت غير خش وانى نلحقك بيهم …
امجد …. هىىىىىىىىىىى هىىىىىىىىى شن نلحقك بيهم هادى ديرى قدر قدام صغارك زفت … شن تشوفى فينا نرضع وفى شيشه ..
وسام … كانا انت تفكيرك سوس فا بعدنى على تفكيرك انى شخصيا مامشاش تفكيرى بعيد …
امجد … هههههههه على ماما الكلام ده .. مالا كروت عشره الا يتنطرو ساعه 2 فى الليل وين يمشو كانا مايعلموش فيك ..
وسام …. ضم فمك … واعرف كيف تتكلم .. خير مانجى نهدلك سنونك …
امجد …. هدا الحق .. شن كدبت انى …
سخنت دعكه بينهم ونهال تتفرج … ووسام لولا تدخل امه كان مد لى أمجد بونيه نساته شن اسمه .. فصلت امه بيناتهم وقالت لى امجد ….
امهم…. خلاااااااااااص فكونو من تعشيش وشر … امجد … انزل انت لوطى دوش فى حوش جدك …
نهال …. خالتى انى نازاله ماشى …
امجد … شبح لوسام وابتسم وقاللها ….
امجد …. هيا نسايرك مالا حتى انى … انزلى يابرنسيسه ..
ووسام يتفرج ويغز فى سنونه وكان يلقى يجبده من ماليته ويبرك فوقه طول وعرض …
خشت امه لدار نومها … وقصى كمل نومه على كنبه .. بينما وسام قدم خطوتين للدروج وكبه عليهم …
واول ماكبه شاف امجد يقول لنهال …
امجد …. اسمعى عسولتى غير تعالى نقولك حاجه تعالى هههههههههه
نهال … هههههههههههههههه عسولتك .. شن قصتك انت ؟؟
امجد …. ههههههههه تى مالا شنى عسووولتى انتى ..
نهال … خش خش باين عقلك طار انت ..
وهنا وسام ناضو عليه جنونه وطلع العرق من رقبته … وقعمز على كنبه ….
وفجاه شبح امجد …. رجع وخش لداره يتبسم .
قعد وسام يهز برجله وبعدين ناض سرعه وخش لدار امجد … وهنا لقى امجد متلفت ويطلع فى حوايجه …
فاشده ولصقه للحيط باايده وشده من تيشرته وقاله …
وسام …. وحق من خلق السمى على لوطى .. تكلمنى مره تانيه بطريقه هيا … تاكم سنونك انساه مااااااااااااااشى … ونهال بعد عليهاااااا خيرلللللك ماشى …. وبصاااااااااارة المسخين هيااااااا برا بصارها على بناااات شوارع مش بنت خالك … تسممممممع فيااااا …
امجد …. وانت شن دخلك … شكتلك هياااااااااااااااا … واهو نقولك شى مااااااشى نهال نبيها ونحبهااااااااااا وهيا تندرى وبنكلم امى عليهااااااا ماشى وانت اطلع منها وريح روحك يارمبو … وايدك نحيه لانى خلاص انى مش عيل فااااهم …
وهنا نحى ايده وسام … ووخر شوى .. وقعد يشبحله وبعدين مشى وسيبله دار …. خش لداره وقعد ماشى جاى وجاى ماشى ويقعمز ويهز برجله وينوض ويمسح على لحيته ووجه … ويحك فى خشمه بعصبيه … وبعدين ضرب كميدنيو برجله وطلع …. ولما طلع لقى بوه طلع من حمام …. خش للحمام وفتح دوش على مسقع وقعد واقف تحت ميه قريب ساعه … ويفكر …. واول ماكمل دوشه … لبس حوايجه وطلع من الحوش …
نزل من دروج وعقارب دنيا كلها فوق راسه … واول ماخطم من جنان لقى نهال تكنس فى جنان … فانزل عيونه ومشى وهنا اول ماشافتله نهال ابتسمتله وقالتله …
نهال …. صبح الورد … رساله امس قريتها ياشرير << وضحكه من شق لشق>> ..
بس هوا للاسف ولاعبرها بربع شبحه …. وتجاهلها وكأن ماقالت شى وطلع وسكر باب الحديد وراه …
وهيا للحظات ماكانتش مستوعبه شن الا صار ….
كملت كنس جنان وبعدين وقفت شوى ولوحت المكنسه من ايدها وخشت داخل وقعدت تبكى … بكت ممكن لانها مش متعوده … او ممكن ماكانتش متوقعه انا يتصرف هكى معاها … او ممكن فى شى تحس بيه فى داخلها اتجاهه … تحبه ؟؟ ممكن
…. كل هادى الافكار قعدت تلود فى رأس نهال … وكانت حابه تعرف علاش تصرف معها هكى اصلا وقعدت تقول بينها وبين نفسها … مافيش اى سبب يخليه يتصرف هكى … ممكن لانا امجد قال هكى قدامها ؟؟ اكيد اكيد مافيش اى سبب تانى …
كملت نهال ظمانها … وركبت فوق لحوش خالها … خشت مع خالتها للمطبخ … وبدت تلف فى ورق الظولمه وتقلى فى بوريك … قعدت ساكته شوى وبعدين قالت لخالتها …
نهال … خالتى وسام خيره كلمته … ماردش عليا ؟؟
خالتها …. اااااااااه يابنتى … وسام هوا بدات صعب تفهميه … خطر عليا بوى الله يرحمه …
مزاجى جدااااا وكتوم … يعنى يتعفلق ويرضى .. ومش رح تعرفى سبب .. وفوق من هدا كله توا تلقيه طالع متعفلق ويروحلك وجوه تماااام اسألنى انى بس تعرفى يانهال شى .. هما كلهم صغارى ونحبهم .. بس هوا اقرب واحد لقلبى ..
نهال … ممكن لانه البكر .. ديما ليه مكانه فى قلب امه
خالتها … لا لا والله مش شرط بس هوا حنين وطيب وقلبه ابيض … ولو يلقى لقمه فى فم خوه وهوا جعان مستحيل ينحيها منه … ولو كان عارف روحه بيموت … تعرفى … لما كانو صغار … خالك روح من مالطا وجاب لكل واحد سياره … بس وسام جابله موطو … وسام اول ماشافها قريب جن وفرحان … بس عمك امجد دار نهار احرف وقال شى هيا نبيها …. فاماكانش الا انا وسام خداه واعطه لى امجد .. برغم انى شفت قداش كان زعلان …. فهمتى علياااااا … ومشكله لما نسأله مايقولش … مستحيل يرد عليك ولايقولك انى عاجبتنى ولانبيها …. يعنى يكابر هلببببه …
قعدت نهال متلفته تلف فى ورق ظولمه وتسمع لخالتها وتبتسم وكأن خالتها تمدح فيها … مش تحكى على وسام ….
فات اليوم كله ونهال الايدين بس يخدمو فى مطبخ بس العقل يستنى امتى وسام يخش وتتطمن بابتسامه يبتسمهالها تحس بيها بالامان ..
فاتت صلاة العصر … وكملو تطيب … … وبدو يوتو فى صفره …. وهنا نهال قالت لخالتها …
نهال … خالتى .. انى نسيت … توا جدى وحناى يأكلو فى رقيق هدا ؟؟؟
خالتها …. هههههه نهال وين عقلك ؟؟ …. خالك عبد المنعم جى مبكرى ورفع حناك باش تتعشى عندهم هيا وجدك … قصدك انى مبكرى نحكيلك ونعاود وانتى مش هنا … الا واخد عقلك يتهنى …
نهال …. هههههه سامحينى والله صيام باين مأتر عليا ……
<< وبعدين سكتت شوى وقالتلها >> …
نهال … خالتى … هوا وسام امتى بيروح ؟؟؟ غير نقالى من امس تلخبطت اعدادته وهوا قالى توا نشوفهولك …
خالتها …. والله يابنتى مادما طلع وهوا متعفلق … اشبح توا دماغه امتى يقوله روح بس توا قبل المغرب نكلمه ….
نهال …. خلاص هيا توا ساعه 8 … خلى نمشى نتوضى باش بنصلى … تبى شى تانى ؟؟
خالتها ….. لا لا … توضى وهيا تعالى على صفره باش تحلى فطورك
مشت نهال توضت ونزلت باش تجيب عباية صلى متعها … واول مانزلت سمعت صوت تلفون يشرين … فاردت على تلفون وطلعت امها …
فقعدت تتكلم معاها شوى وبعدين ركبت … واول ماركبت لقت وسام مقعمز على صفره والكل مجتمع على صفره … واول مأدن المغرب حلو فطورهم وصلو جماعه وقعمزو على طاوله يفطرو … وهدا كله ووسام متجاهل نهال تمام … بس نهال تحاول تدور فيه بعيونها … قعدو كلهم يفطرو ويهدرزو … بس نهال كانت تراقب فيهم وساكته وتحديدا مره مره تشوف لوسام … اما وسام فامقامش عينه من صونيته …. ساد صمت على سفره للحظه … وبوهم قدر يكسره لما قال …
عمى فرج … اما يانهال … بوك نعمى خلاص هههههه..
سميحه … اللطف خيرك يافرج تف من فمك وانت تتفاول على راجل … شن صار …
فرج …. امس واحنا اهل العريس مدايرين العزومه فوق الحيط متعهم … مهم بعد ماكملت العزومه وقفنا على حيط باش بوك يسبس .. وشورا جيرانهم فى مراه كبيره فى سن .. متكيه فى جنان .. وانى مركزتش … ولاهى نهدرز معاه وهوا نشوف فيه يحك فى عيونه ويبلق فى جنان … ويقولى … فرج … مش هديكا قطعة بساط ملفوفه ؟؟؟ كانى نشوف فيها تتحرك … وانى نتلفت من هنا والمراه فتحت فمها علينا من هنا … وهوا يحلف ويقولى الا شفتها قطعة بساط ملفوفه ..
وسام…. ههههههههههههههههههههه معقوله ماقدرتوش تميزو ..
بوه … هههههههالدنيا ظلام وهيا شوراها لابسه ردى وملفوفه تحت الحيط زى قطعة البساط …
على اخر الزمان … طلعنا نبصبصو … وياريت حتى حق هههههههه..
سميحه …. فرج … بالك حق … انتم رجاله مافيكم امان …
فرج …. ههههههههه تى حرام عليك يامراه بعد شيبة هالراس تقوليلى هالكلام ….
وهنا نهال قعدت تاكل وتشبح لوسام كيف يضحك ويشارك فى حديت معاهم ومتجاهلها .. وكـأنه مايعرفهاش ولاعمره شافها …
ولما يأست نهال انا يشبحلها … ناضت وقالت … خالتى .. انى بنوض شبعت الحمد لله .. ولما يكملو توا نخش نغسل معاين …
خالتها … خيرك نهال ماكليتى شى ؟؟
نهال …. لا لا شبعت ؟؟؟
مشت نهال وقعمزة فى صاله تقلب فى تلفزيون لحد ماناض كل واحد منهم وخش لداره
واول مافضى مطبخ … ردة باب مطبخ عليها … وفتحت الراديو على اغنية شرين << انا مش مبينالو >> وقعدت تسمع وتبتسم وتدكر فى كل المواقف الحلوه الا صارت بينها وبينه ….
وبعد ماكملت غسل معايين … دارت صفرة شاى ومشت لخالتها وقالتلها …
نهال … خالتى نصبلك شاهى ؟؟
خالتها … صبى صبى بنيتى …. شفتى مسلسل هدا … فضيييع … وبدات يسرا بصراحه مبدعه ..
نهال … اى اى صح .. خالتى .. وسام وين ..
خالتها …. هونى اكيد فى دار مقعمز على لاب توب …
اه اوك … خلى نمشيله يشوفلى نقالى … .
خالتها … ارفعيله طاسة شاى على طريقك …
نهال …. اوك …
رفعت نهال طاسة شاى … ووقفت شوى خدت شهيق وزفير .. وطقت على باب … ومابتش تخش لحد ماسمعاته يقول …
وسام …. خش الا يطق …
واول ماخشت لاقاته … فتح ضى سهاره وفاتح براين ادمز .. اغنية <<everything I Do >> وفاتح كتاب يقرا فيه …
فاحطت طاسة الشاهى جنبه وقالتله … ممكن لحظه …
وسام << بدون مايشبحلها >> … نعم فى شى …
نهال … خيرك تكلم فيا هكى … شفت منى شى ؟؟
وسام … هههههه وانى من امتى ناخد ونعطى مع حد ؟؟؟
نهال …. قصدى … خيرك ..
وسام …. انتى الا خيرك ؟؟ شن فى ؟؟
نهال … خيرى ؟؟؟ الا لا مافى شى .. اسفه جدا على ازعاج ..
طلعت نهال من دار ونزلت لحوش جدها طول … وناض وسام وقعمز بعد ماكان متكى ولوح الكتاب على باب وناض وطلع وراها يجرى …. ونزل للدروج بسرعه وقاللها …
وسام …. نهاااااال … استنى ..
وقفت نهال على دروج من لوطه وكان دروج مظلم … وقعدت تشوف فى ظله نازل وبرفانه الا كل ماتقرب مسافه يقوى اكتر …
وقف جنبها وكانت بينهم مسافه بسيطه جدا وقاللها ….
وسام …. ماتزعليش منى …. متأسف ….
نهال … لا لا مازعلتش …
وسام …<< لقى شعره نزله على جنب فادخلها وهنا ايده مست خدها وقاللها …
وسام … اكيد … مازعلتيش ؟؟
نهال .. اى
وسام …. هوا انت ديما هكى ..
نهال … كيف يعنى ؟؟
وسام … شينه لما تبكى ؟؟
نهال … ههههه ومسحت دموعها وقالتله …على حسب الا مزعلنى …
وهنا وسام قعدت يشبحلها … من ضى القمر وقاللها ..
وسام …. خلاص برى كملى طريقك … نخاف نبدا نخرط عقاب الليل ..
نهال …. ههههههههه لا لا بنركب .. اصلا انى شن نزلنى ..
وسام … مش عارفه الحق .. هوا انتى عندك خال اهبل ؟؟
نهال … هههههههههه لا لا عندى خاله سمينه شوووى ..
وسام … هههههههههههههه سمينه صار …
نهال …. اى اى .. بعد شوى بنركب بعععععد … ههههههه
وسام … تى شنى فيل بيخطم اطلعى …
طلعت نهال وركبت اول درجتين وهنا وقفها لما قاللها …
وسام … نهال … استنى شوى … بنقولك شى ..
نهال <<< جمدت فى مكانها وغمضت عيونها وخدت شهيق وزفير وبعدين تلفتت وقالتله …>> نعم
وسام …..
يتبع………
لقراءة الجزء التالي : الجزء الثامن من رواية حوش جدي
لقراءة الجزء السابق : الجزء السادس من رواية حوش جدي
للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا
جميع الحقوق محفوظة للكاتبة كيندا من ليبيا .
