وفي الجزء السادس من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء السادس من رواية عاصفة الصمت
*ركبت غادة لحوشهم … واتفكر ف نزار … زعما نتصل زعما ﻻ ..وخلت بوها يطلع وانتهزت الفرصة واتصلت *
غادة : الو …
نزار : اهليييين
غادة : كيف الحال
نزار : تمام الحمدلله كيف حالك انتي
غادة : صح الرقم واﻻ انا غالطة
نزار : وصلتي وصلتي … نزار معاك
غادة : عاشت اﻻسامي
نزار : تعيشي … تعرفي عندي فضول تام نعرف مواليد كم
غادة : هههه 1991
نزار : واحد تسعين …
{تنينا وتسعين تﻻتة وتسعين اربعة وتسعين }
غادة : الووو
نزار : يعني 16 العام
غادة : اي
نزار : كتكوتة والله زغنطوطة
غادة : ايه
نزار : بطولت عمرك…اممم بس انا شيباني عليك عاى هالحال
غادة : كم عمرك
نزار : 32 عام
غادة : ههه بطولت عمرك
*عموما مانبيش نخش ف تفاصيل التعارف اكيد الكل عارف شن اﻻسئلة بين اي طرفين كيف بيتعارفوا … نختصر الموضوع
بعد مرور شهرين … نزار انعجب ب غادة … وبدي يخاف عليها زي نفسه وتغيب عليه باليومين تﻻتة بحكم ماعندهاش نقال … ونزار يضايق في اليوم اللي ماتكلماش فيه … وفي خﻻل هالفترة تصير لنزار ضغوطات من صحاب عمله القديم ومن العداوات اللي دارها *
عادل : اووو او او او دددديناري اهنا …. وسعوا الممر خلوا الديناري ايمر …
نزار : مش فاضيلك بكل با ياسينسا حتى تشوفني دير روحك ماريتننيش
عادل : شنو حق اللي سمعناه … استقالة الديناري والله خبر يستحق ينكتب ف الجرايد
نزار : خليك فحالك خيررر
عادل : تحساب بيخلوك فحالك هه مسكين راك غالط كل اللي درتله عملة قبل بيردهالك دبل ياحلوو راك طلعت من تحت جناح القيافة
نزار : فوتني ياراجل برا قيل واﻻ دبر على عمرك
عادل : اهو قتلك وخﻻص طال الزمان او قصر حيدوروك
*ركب نزار سيارته وتكى راسه على الستيرسو *
{اففف الواحد شن يدير يتنكر بش معش يزبطوني هالشكاﻻت واﻻ شنو }
بف بف بف >>> خبطات ع باب السيارة
شاب : خييير ديناري عاش من شافك ياوحش
*قام ديناري مرش الروشن وولع سيارته وعطاها الشياط لشركة اجنبية دار مقابلة عمل وروح *
مروة : نيزارووو اطلعنا اليوم
نزار : وين ؟
مروة : محﻻت الترسانة
نزار : شن فيه غادي
مروة : نزار ركز معاي محﻻت بناخدوا قفاطين مناسبة
نزار : تو نشريلكم انا
مروة : نزار !
نزار : نعم
مروة : معادش ولينا صغار تاخدنا انت
نزار : تو ناخدلك انا قولي اللون اللي تبيه ومقاسك واطلعي منها يامروة … ببش اما نقعد انلود بيك و 1000 من يشوفك ﻻ
مروة : وكان شافوني يعني … بلبسي مستورة ومتحجبة
نزار : الصبر
{تو شن بنقوللها هادي هي .. خوك عنده عدوات مع تجار حشيش…}
مروة : به نقولك
نزار : نعم
مروة : بﻻش مانبيش انت غير تقعد حابسنا
نزار : مش حابسكم بش نطلع فيكم زرادي وفي الصيف للبحر
*نزلت صفاء من السطح وسمعت الجملات اﻻخير *
صفاء : بترفعنا زردة نزار ايه والله ياريت امتى ؟؟
نزار : غير افهمي الموضوع
مروة : مايبيش يرفعنا نشرو قفاطين لعرس بنت حليمة
نزار : تو نشريلكم يامروة خﻻص اكتبيلي ف ورقة اللون و المقاس وتو نجيبلكم زوز زوز كان ماعجبكمش هدا البسوا هدا
مروة : به به
نزار : مارنش اﻻرضي
صفاء : ﻻﻻ مارنش
نزار : باه … اي حد يجيني انا مهناش واﻻ نقولكم اللي ينادي عليا مادوروشي خلوه ينادي ويمشي
صفاء : باه
*مشي نزار من المربوعة وطلعت لبنى من الدوش سرحت شعرها وربطاته بتوكة ودارت فيوكة خضراء هافتة… وطلعت لوسط الحوش *
لبنى : جي نزار
مروة : جي ايه
لبنى : اممم به خلي نمشي نقوله حاجة
مروة : ماتعبتيش من محاوﻻتك الفاشلة …
لبنى : ماتعبتش واصﻻ بنهدرزله موضوع تاني
مروة : باه باه ياام مواضيع ورينا عرض كتوفك وديريلك همة خلي نجوزوكم بالك يخف علينا شوي
لبنى : ربي يسمع منك ياوخيتي
*نزار مقعمز ويتفرج على التلفزيون *
لبنى : روحت نيزووو
نزار : روحت اهو مكسد على مسرحية العيال كبرت ههههه قعمزي قعمزي
لبنى : هههه
{خيرك هكي يانزار مش معبرني والله نتمنى انك تفهم اني نبيك }
نزار : بديريلنا تورتة
لبنى : خاطرك فيها
نزار : اي والله من هداك النهار اللي درتيها كليت طرف واحد وطلعت روحت لقيتها مهناش
لبنى : هههه كلتها صفاء … خﻻص تو نديرهالك اليوم ان شاء الله
نزار : ياوخيتي سلمها
*مع شد خدها بروس صوابعه*
لبنى : ههههه حقا امتى ترفعنا زردة والله خلوقي ضايقات
نزار : حااااضررر من عيوني قداش عندنا ضرس لبني شاوري عاليوم اللي يعجبك ونرفعكم
لبنى : يوم الخميس كويس
نزار : كويس هلبا ههههههه شوفي مصح وجهه بكل هالسعيد صالح
لبنى : هههههههه
*تررررن تلفون يشرين *
نزار : ~_¤
* جت لبنى بترد *
نزار : تمام اهو تو انرد بالك حد من الشباب
لبنى : به اماﻻ خلي نديرلك التورتة
* طلعت لبنى ورد نزار : الوو
غادة : الوات كيف الحال
نزار : مش كويس
غادة : خيرك نزورة
نزار : قداش يوم ماتصلتيش تره قولي
غادة : عارفة والله غير ظرف بس
نزار : شن ظرفك
غادة : بابا كان مريض والحوش معبي ناس ماشية وناس جاية ماحصلتش فرصة
نزار : ان شاء الله ﻻ باس عليه .. به قمتي حتى تلفون قلتي كلمتين وسكرتي
غادة : تاكد لو كان فيه فرصة راني كلمتك طووول
نزار : باه ناخدلك نقال وشفرة
غادة : ﻻﻻ
نزار : عﻻش ﻻ
غادة : لو سمع بيا بابا يدبحني وكان عرف حاتم يدير فيا حالة
نزار : باه كيف الراي نقعد هكي مانكلمكش
غادة : والله ماعارفة
نزار : والله اليوم ايفوت عليا زي الجبل من غير مانسمع صوتك
غادة : اممم معليش نزورة هدي اعصابك …
نزار : تبي تهدي اعصابي ؟؟
غادة : اكيد
نزار : غنيلي ..
غادة : شن تبيني انغنيلك
نزار : اللي يجي منك حلوو
لبنى : اول مرة اتحب يائلبي اول يوم اتهنى … ياما على نار الحب قالولي ولقيتهم من الجنة
صفاء : الله الله يابختك ياعم نزااار
لبنى : هههههه طلب نديرله تورتة
صفاء : حق او
لبنى : اي قالي طعمتها قاعدة في فمي لتوا
صفاء : ياحليلي
لبنى : خلي نمشي نسئله يبيها باللوز واﻻ واﻻ كاكاوية
صفاء : اه ياسبلة هههههه
لبنى : هههههه
نزار : والله صوتك اتقولي سحر
*وصلت لبنى جنب المربوعة *
نزار : بجد والله صوتك حلو مقايلهالك قبل …معش تغيبي عليا هكي باهي
*حطت ايدها لبنى ع فمها وخنقتها العبرة ونزلت دمعتها وتلفتت ومشت خشت للحمام بكت لين كبدها طابت *
غادة : انا توا طالعة لسوق امي تبي شوي حاجات
نزار : به اوكي تو تلقيني غادي هي
غادة : اوكي … باي
حنين (بنت خالت غادة ) : كملتي
غادة : ايه
حنين : به اوقفيلي خلي نكلم حسن
غادة : طالعة السوق توا … بنشري حاجات
حنين : ها به
غادة : اتجي معاي
حنين : اكيدة ﻻ بالك بنخليك تمشي بروحك
غادة : هههه به هيا بدلي فيسع
حنين : هي
صفاء : لبنى خيرك جوك مش عاجبني
لبنى : ﻻ شي خلوقي ضايقات بس
صفاء : من شنو
لبنى : هكي وخﻻص
صفاء : به كملي التورتة
لبنى : كمليها انتي والله جوي منكد عﻻخير
خ رقية : من امحوس المطبخ هكي سمله اتقول متفجرة فيه قنبلة
لبنى : انا ياخالتي
خ سميرة : لبنى نوضي فيسع ديريه
*صفاء شافت لبنى خنقتها العبرة فقتلها : خليك تو انضمه ونكمل التورتة ووقت نطلع بتحكيلي شن فيه باهي
لبنى : باهي ياصفاء غير خليني توا
{امممم زعما شن ناخدلها خلي ناخدلها حلوة الصوف … والله مانقاوم انا قدام حلوة الصوف }
نزار : تره اعطيني زوز بالله عليك
الشاب : ان شاء الله هي
نزار : واﻻ نقولك خليهم تمانية شكاير ﻻﻻ تسعة
الشاب : هههه تمام … وهادو تسعة
نزار : تمام تفضل هي … ربي يحفظك
{محﻻها الشاربة تخيلتها على غادة خلي ناخدهالها }
*شري الشاربة وطلع من السوق قعمز جنب السوق يستنى ف غادة … *
غادة : حول من الطريق ياحاتم
حاتم :ووووين ماشية
غادة : وين ينمشي يعني السوق وانت ع المشية والجية تحسبلي
حاتم : نحسبلك اماﻻ شنو … هاتي الفلوس تو نشريلكم من السوق
غادة : حول خير مانركب لبوي راه
حاتم : بوك بيجي معاي شن تحسابي كان نقوله عرضت عليها نمشي انا لسوق وهيا قالت ﻻ بيحط 100 احتمال ف راسه
غادة : فتان … حول مانيش معطلة
حاتم : اممم به عشرة دقايق عندك بس
غادة : باااهي
{هيا ياغدوووش هيا التانية انحس فيها ساعة }
*فجاة جاته مسج >> جاك قضاك ياديناري … خليك تتمتع بحياتك الجديدة والنظيفة … بعد ما ترتاح مزبوط وادير حاجات يبدى قلبك يرفرف عليها ساعتها ناخدو تارنا يا د ي ن ا ر ي << …
اتكنطى نزار وسكر تلفونه وحطه فجيبه ….
{محقرهم النهار المبارك … فددوني }
*وبينما نزار سارح وصلت غادة وقتله : غير وين سارح ياودي
وقف نزار ومد ايده يسلم وقالها : هههه سارح فيك اكيد
غادة : عطلت عليك
نزار : اممم ايه …شن حالك وشن مدايرة
غادة : اهو الحمدلله بخير
نزار : كويس ،شنو جاية معاك البنت اللي واقفة غادي
غادة : ايه بنت خالتي
نزار : اه قبل ماننسى جبتلك معاي هدية بسييطة و حلوة صوف
غادة : هههه به شكرا … يﻻ نتﻻقوا وقت تاني غير طلعت ومش معطلة
نزار : تمام ردي بالك ع روحك ..
غادة : ان شاء الله حتى انت رد بالك على روحك…باي
نزار : بايات … غدوووش
غادة : نعممم
نزار : بتكلميني اليوم
غادة : ان شاء الله بعد صﻻة المغرب باهي
نزار : تمام تشاو هي
*مشت غادة وحنين لسوق ونزار حاس روحه مغموم من التهديدات اللي توصله فقرر يرجع للحوش ومايطلعش لعدة ايام*
*سرت …الساعة 12 ظهرا *
طارق : انا نعتمد عليك في كل شي يا الشبح واكيد انت لكل مهامي
الشبح : ماتكون اﻻ راضي يااستاد طارق
طارق : بنبعتك لطرابلس …
الشبح : باه ..
طارق : خود معاك قداش ماتبي
من رجالة
طارق : نبيك تقتل شخص …….
الشبح : منو
طارق :شخص اسمه الديناري …
يتبع…..
لقراءة الجزء التالي : الجزء السابع من رواية عاصفة الصمت
لقراءة الجزء السابق : الجزء الخامس من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
