الجزء

الجزء الثالث من رواية سر سعادتي

الجزء الثالث من رواية سر سعادتي

وفي الجزء الثالث من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثالث من رواية سر سعادتي

مشو يوسف واحمد للبخاري
وبعدها خطمو ع مطعم بيتعشو..
يوسف ل احمد:حقا كيف حال عيالك اخر مرة قتلي تاعبة
احمد:باهية الدكتور عطاها فترة 4 شهور ترقد ع ظهرها قالها كان تحركتي البيبي ايطيح 🙁
يوسف:ﻻ حول وﻻ قوة اﻻ بالله
احمد:فتوا حطيتها عند امها السبوع اللي فات
يوسف: سعدودك ياريتها مرتي يعطوها 9 شهور رقاد ع الظهر هههههه
احمد:هههههههههه تي غير اتفقو بش حتى تحمل مرتك
يوسف:ههههه تعرف ليا سنة وشهور متزوج ماحسيتش بطعم زواج بكل …وينه اللي يقولو دلع وجو حلو ماريت شي ماهناك غير النكد اتقول راضعاته ف الحليب
احمد:ههههه مرتك هادي حالة خاصة تو بالله عندها راجل دكتور و حليق انيق وتنكد عليه هههههه
يوسف:ههههههههههه يعنجد حليق انيق قوية
احمد:والله بجديات قصدي شن مازال تبي تاني مستغرب فيها الحق
يوسف:تفدد والله تفدد لين مرات مانحسش فيها مراة استغفر الله ياربي …. تعرف هداك النهار واحد صاحب يحكي ع مرته وكيف ادلع فيه وتوتيله ف فطوره وتوكل فيه وتلبسله ف لبس حلو وتتأنقله وتتصل بيه هيا روح عطلت عليا استحشتك.. شهادة بالله خنقتني العبرة عيشتي جفاف ياراجل
احمد:ههههههه والله واجعني حالك يايوسف
يوسف:يﻻ فكنا من سيرتها توا

كملو نقاشهم زي كل مرة هما اﻻتنين وروح يوسف للحوش ونكدت عليه رويدة كالعادة مدايرة ف شعرها خلطة ثومة وجرجير وبدو ف العراكات هوا وياها
يوسف:تي اصﻻ ﻻش مدايرتيه ليل
رويدة:هيا ﻻزم تندار ف ليل ونرقد بيها شعري تقصف
يوسف:تي كيف بترقدي ف هالريحة غميتيني راهو
رويدة:مافيشي صنة ارقد بﻻ دلع
يوسف:تي ثووومة وتقولي مافيشي صنة …نقولك اصﻻ نقاش معاك اعقم من العقيم انوض نرقد ف دار تانية ارجل…
ناض يوسف مشي لدار تانية
ومرت عليه ليلة عكس يومه الحلو اللي قضاه…
وفاق متأخر شاف اموره وطيب قهوة وعباها ف مق وفتح دوﻻب خدي بدلة رسمية بحكم مافيش وﻻ لبسة محددة لبس وخدي قهوته وطلع

خش سيارته يبرطم على عيشة الي عايشها وفتح fm جاته اغنية اليسا بستناك وبستنى اعيش العمر كلو حبيبي معاك …..يوسف ابتسم و
ساق للمستشفى وخش مكتبه
خش عليه منير صباح الخير يوسف فيه عملية طارئة
يوسف:باهي اوكي
منير:تي نوض فيسع الراجل مضروب برصاص
يوسف:استغفر الله باين عليه انهير من بدايته… هي اهو جاي
منير:مش اهو جاي نقولك الحالة مضروب برصاااااص نوض توااااا
ناض يوسف بدل حوايجه لبس لبسة مستشفى واطلع ع تقرير مسعف عالسريع وغسل ايديه وخش غرفة عمليات لبسوه قوانتيات
يوسف ل السستر:وين خبير التخدير
السستر:جي خدره ومشي لطابق ثالت نادته دكتورة

منير:باهي نادي الدكتور اسعد
سيس:الدكتور اسعد ماجاش مافيش اﻻ غيركم ف قسم الجراحة
يوسف:اوكي هي بسم الله …. هاتي مشرط
بعد 7 دقايق
منير:مش عارف رصاصة متعمقة يايوسف واﻻه
يوسف:نحاول انها ماتنزلقش للقلب
منير:سيس اضائة ركزي اهنا مش ف وجه يوسف !
يوسف:وجهي tv واﻻ شنو
منير:عندك علم انهم ثﻻتة رصاصات واﻻه؟؟
يوسف:اي عارف اطلعت على التشخيص متع المسعف وان شاء الله ربي يسترنا ونطلعوهم
منير: ان شاء الله
يوسف:كيف حال بنتك
منير:الحمد لله ..تعرف يوسف باين عليا بنتجوز
يوسف قريب نخص الحالة كان فايق راه سبه ههه
وقال ل منير: تو وقته هدا؟؟؟واصﻻ عﻻش شنو من شن تشكي مرتك
منير:تره فكني من مرتك خيرها وبيرها …بنتجوز يعني بنتجوز.
يوسف فباله انا نتمنى مرتي تكون باهية كنهدا ﻻش بنفكر نتزوج تاني .ورد ع منير: انت نسونجي
منير:ههههههههههه بش يبدو زوز ايدلعو فيا هكي زي الاغاني اﻻجنبية واحدة ع اليمين و واحدة عاليسار
يوسف:ياقعادك تحلم ماتلقاهم غير يتعاركو فوق دماغك زي نساوين عصام ف باب الحارة هههههههه
منير:ههههههه زعماااااا
يوسف:مقص ….ركزي سيستر حنان قلنا مقص
مدتله سيس مقص وقتله كنت سارحة ف كﻻمكم انتو الزوز خفت خطيبي يديرلي هكي بعد زواج
منير:انا نسيت حتى انك اهني ديري روحك ماسمعتي شي
يوسف:ملقاط …اسمعي ياسيس حنان مش ضروري كل راجل خاين ماتعدليش عليه دكتور منير هدا حالة بروحها ههههه
منير:ههههههه سيس مش نلقاها منتشرة ف المستشفى دكتور منير بيتجوز
يوسف:باهي تمام شدينا رصاصة جيهة قلب خيط انت منير خلي انبربش ع رصاصة الثانية
منير:ان شاء الله هي
يوسف:يستر الله
بعد شوي
يوسف:تمام اهيا الرصاصة الثانية
منير:والثالتة جيهة الفخد…. نهاره سود ع دماغه ع شوي مشي فيها !
يوسف:هههههههههه …. سيس جيبي كيسين دم فصيلة o+ الحالة نزف هلبا

وتمت العملية بنجاح
خش يوسف لمكتبه ويستنى ف العشية ويشوف لساعة لقاها 12 قال فباله خيره الوقت يمشي بشوية
ومن هون لهون بين مراجعات جت ساعة 4:30 بدل يوسف حوايجه متع مستشفى ولبس بدلته وطلع
عساعة 5 كان قدام المختبر

عفاف ل مسرة:اسمعي هيا شنو بتروحي
مسرة :اكيدة شن بنبات اهني طيب فيا قعدت ل 5
خش يوسف واتجه لجيهة الحجرة الداخلية
السﻻم عليكم
مسرة مكزمة:وعليكم السﻻم
يوسف:كيف الحال
مسرة:الحمد لله 😑 اكيد تبي تحليل صح؟
يوسف:ﻻ نبي بوكيه ورد
مسرة تبي تضحك وشادة ضحكتها بسيف
😑
يوسف فباله سبحان الله حتى تكشيرتها فيها ابتسامة بشوشة ماتعرفش النكد …وقال ل مسرة:شنو واتية نتيجة تحليل؟
مسرة:بأسم من
يوسف:شذى الغاوي
مسرة ف عقلها مصح وجهه جاي ياخد تحليل مرته ومزال يبتسم قتله :لحظة بس 😑
يوسف:اوكي
مسرة:مدلته نتيجة تحليل وقتله: مبروك 😑 المدام حامل
يوسف:الحمد لله ياربي بنولي خال
واخيرا بنسمع بيبي يقولي خالي
مسرة فرحت وطلعت منها ضحكة ﻻ اراديا
يوسف تلفتلها يبتسم: خيرك
مسرة عادت اﻻبتسامة لوجها:الف الف مبروك يتربى ف عزكم يارب
يوسف سرح بما انها فرحت انها مش مرتي معناها حاطة العين عليا ..ورد عليها:الله ايسلمك …. مسرة نبي نقولك حاجة
مسرة :تفضل

يوسف:صحيح انا مانعرفش نصيغ الكﻻم ف المواضيع هادي بس بنقول وخﻻص
مسرة:تفضل عادي
يوسف:ممكن نتواصل معاك يعني نتصل بيك هكي
مسرة:ليش شن السبب ؟
يوسف:نفهم منك انك رافضة
مسرة: نسأل بس
يوسف:نبي نتعرف عليك ممكن او ﻻ مسرة:اوكي ممكن
يوسف:اوكي رقمي نهايته 25
مسرة:ههههه سبحان الله نفس عمري
يوسف:ماشاء الله ربي يبارك الحق توقعتك اكبر من هكي
مسرة:ههههه ﻻﻻ ..كم تحسابتي
يوسف:والله نحسابك هكي 29..30
مسرة:اوووف كبرتني هلبا
…عموما انا توا ﻻزم انروح دوامي انتهى للحديث بقية
يوسف:اوكي ان شاء الله … بس ف اي وقت نقدر نكلمك ؟؟
مسرة:مع ساعة 9 مساء
يوسف:تمام ف امان الله

روحت مسرة وهيا قريب اطير من فرحتها اتصلت ب عفاف
الوووو عفووةة
عفاف:اها توا كنت نعاك
مسرة:يوسف ياعفاف
عفاف :خيره
مسرة:طلع مش متجوز واللي جت معاه اخته
عفاف:هااااا حلووووو..لكن كيف عرفتي
مسرة:هوا قال بنولي خال
عفاف:اشيه اشيه
مسرة:وقالي ممكن نتواصلوووو
عفاف:بخوتة ياكبدي ياناري عليا بري بري خير ماتلطني سيارة من هﻻخبار
مسرة:باي باي

يوسف وصل عند احمد
خشله محل ويصفق بيديه ويغني وشدت ياخونا شدت ..شدت معانا شدت
احمد:شن فيه؟؟؟ماتقولش طيحتها
يوسف شد قرواطته:احم احم
احمد يغنيله:طيب فيك ياللا ههههههه
يوسف:زي ماقتلك تحساب اختي مرتي هههههه بمجرد ماقتلها بنولي خال تغيرت مﻻمح وجها وضحكت ضحكة قوية ههههههه
احمد:ههههههه خﻻص على هالخبر نعطيك الكنتيرا هادي هدية متع مناسبات راه
يوسف:مصح وجهك ماناقصني غير حوايج نساوين البسها انت الحق فيا نشكيلك همي بديت تتسهوك عليا
احمد:ههههههههههههههههه والله ماقصدي هكي …غير اسمع كيف بتكلمها ساعة 9 ومرتك ف الحوش
يوسف:استغفر الله ﻻش تعكرلي ف مزاجي واصﻻ مامبيش نروح مشكلة حتى امي مسافرة لخالي كنهدا راني مشيت غادي لكن يﻻ حتى سيارة حلوة
هيا سﻻم توا بنمشي تتغدى قاعد هكي من بكري
احمد:ستنى نمشي معاك حتى انا ماتغديتش
وليل الليل وجت ساعة 9:15 اتصل بيها ماردتش

مسرة:شافت اتصاله ماقدرتش اترد حازم خوها ف الحوش … قعدت قالقة حي تو يقول تتجكتر عليا وشايفة روحها وتمتم غير امتى يطلع حازم الزقة اهواه

فاتت 9 وجت 10 ويوسف ف سيارته يستنى ف رنة يتمتم ﻻﻻ خﻻص ماعتقدش تتصل خلي نركب وخﻻص
ركب يوسف لحوشه دوش وشاف اموره وقعمز يتفرج تلفزيون جت رويدة وقعمزت تتفرج معاه
وعلى ساعة 11 اﻻ ربع يشرين تلفون يوسف رنتين وراء بعض ..
يتبع………

لقراءة الجزء التالي : الجزء الرابع من رواية سر سعادتي

لقراءة الجزء السابق : الجزء الثاني من رواية سر سعادتي

للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة

جميع الحقوق محفوظة للكاتبة لوزة .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى